Haköplö Hī in Minë Tö Nët Chitri Pītör

 1. Asuh öp la-en kahëtö Yāvē nö in Pītör urēhěkūö kinpaha ò?

SAMYEŪHEUV ṙò-òten ök Pītör nö chiplö nö löklōn Yāvē. Holren Yēsū inrē anga-aṅ nö chuh in nup panam nö ahānga. Anga-aṅ raneh vamë-eny nang yik tahëng mihërö tarik tö ngam tölöök inhānga. Unôichrit e ngaich anga-aṅ nö la-evṙen tö ngam yōm la-en. Akahakūö anga-aṅ tö ngam inlahenre nö öt ṙò-òtivören, sön pöri ang Yāvē nö kētö la-en ò. Ihôi ngam tö 62-64 C.E., ngam Tēv nö kētö la-en ò nö kūich minë tö nët chitri nö i minë-eny 1 Pītör hēk 2 Pītör töngamuh. Kētö maheūkkö më Kristīön anga-aṅ nö mihôiṅ nö yöölen nö löktö in në chitri unôichrit kinpaha ò.—2 Pīt. 1:12-15.

 2. Minë kahūich Pītör chitri kūö yòh anū-ö nö yöölen tī tö yik Kristīön mu-urěh?

² Ik sā yik Kristīön nö teunghu tö minë ‘töṙōlkangen kanihngen ngaich hēten tö e ang Pītör nö kūich në chitri.’ (1 Pīt. 1:6) Yik tötlöök tarik nö ṙūöhöl alaha më Kristīön el ngam māṅ nö kēken minë tövaich la-en hēk haköp inlahen minë tövaich inrē inköphöti. (2 Pīt. 2:1, 2, 14) Yik Kristīön mi-iyöng i Yarusalem röhta inlahen maheuk cha-a tö inlahen manāngen në taṙòkhöre. Tö ngö manah tö më kumyung aṅ Rōm min nö ahetngen minë panam tö minë töng sitih la-en më Yahūti. (1 Pīt. 4:7) Öt kintööngulōn yin më Kristīön nö in minë kahūich Pītör chitri tö cha nö löktö in e nö mihôiṅ nö la-al minë yamih kanihngenre.b

 3. Kūö yòh öi hòṅ chumkūöṙen tö ṙô nup tö kūichö imat minë chitri?

³ Rö-ö ön pön chitri yik raneh Kristīön nö kahūich Pītör, kūichhöt e inrē ang Yāvē nö in ngam ṙô re. Lökten inrē ayī-ö töngamuh öi haköplu löktö in minë tö kūichö imat e. (Rōm. 15:4) Iyöng kūö ngih panam in töngamuh, ngam ṙamūöhlö alaha minë tövaich tinlööken, lökten nö ṙōlkangen mihôiṅ minë kanihngen hī öi löklōn Yāvē. Rö-ö nöng anū-ö pön öt ṙò-òtenvö yanīhi inrē ngam tökiröng kanihngen. Ngam inlahen Yarusalem tö ngam chūök vinë-ekūötēv min nö ahëti. Pōyen nup min tötṙānangen haköp hī imat minë tö nët chitri kahūich Pītör: (1) Löktö in e inyööken min ayī-ö öi chumkūöṙen tö ngam yanīhi sakāmö Yāvē, (2) yēḵ hī öi pa-ekūö tö tarik ngaich sitih inlahen mihôiṅ öi ṙapöre, hēk (3) holtö ellōnre min öi hangenlōn tö höö. Lökten in e min më minṙöinylen nö hayöökaren nö chumkūöken më sīṅp Yāvē.

 4. Sitih löktö mikahkūö öi löktö im 2 Pītör 3:3, 4 töp lāinyngen ngam ṙinatö-ellōn hī nö kūönngöre?

⁴ Havīlöng in tö më tarik töt ṙamatö-ellōnre nö in minë tö-eūka aṅmat Paipöl. Lohten min cha-a nö miyëḵṙô tö hī, kūö hī öi samyeūheuv ṙò-òten öi vënyen ngam manāngen nö yih. Ōt inrē yip tarik tö mihôiṅ nö ngö ṙô öthō ön nö yih ngam manāngen. (Vë-evkūö 2 Pītör 3:3, 4.) Mihôiṅ nö kūönngöre ngam ṙinatö-ellōn hī yěi hang ṙô yip holre i chūökre öi kaman, aṅ patīre hēk ichūök hī inrē ahānga. Vë-eny nang hī ang Pītör tö inlahen ngam inyööken hī.

 5. Sitih inlahen öi havāitö ngam mufē re yěi hökkö yanīhi ngam manāngen ngih panam? (2 Pītör 3:8, 9)

⁵ Ōtre yip tö ngölōn tö Yāvē nö öt hē nö ahetngen në ötlanöökö ikūö ngih panam. Löktö in minë ṙô Pītör pöri ayī-ö öi teūngen tö yanöölenre öi havai ngam mufēre. Hòṅ köpölōn ayī-ö töm mufē Yāvē hēk tö mufē më tarik nö kö harīkngöre anū-ö nö i alaha ngam ṙētak. (Vë-evkūö 2 Pītör 3:8, 9.) Ngam tö hěng köiny samyeūheu töng hěng sumkam angū-ö nö imat Yāvē. Möi inrē ang Yāvē, pön öt lōnu tö hī öi ṙòkhöre kapah. Lökten yěn yih min ngam sakāmö ò, ngaich ahetngen yip tötlöök min anga-aṅ tarik. Kirööngen ṙanamlōn in töngamuh pò hī öi yūs ngam tö rahëichtit ṙētakre urēhěkūö yanīhi ngam manāngen nö yih öi vë-eny nang yip taṙòkhöre tarik tö ngam tölöök inhānga.

 6. Sitih inlahen öi mihôiṅ örheūheu “meukkö ngam sakāmö” Yāvē? (2 Pītör 3:11, 12)

⁶ Lōnu ang Pītör tö hī öi “meukkö ngam sakāmö Yāvē.” (Vë-evkūö 2 Pītör 3:11, 12.) Sitih inlahen öi yěi hòṅ meukkö ngam sakāmö Yāvē? Mihôiṅ ayī-ö öi örheūheu öi afēkö minë inkòlôre yamih min ip tövai panam. Asehkūöre man töre yēḵ meh nyā nup tökuchik nyā-aṅkūö hēk kēḵ ngam töhet kuföt inrē. Höngkūö yip holre min më-eṅ yip tö hachohlöng, haköpten cha inrē min më-eṅ tö minë tökilē-ěyö aṅmat ngam Paipöl nö sitih inlahen anū-ö nö teung. Yēḵ meh min öm afēken u ngaich möi min më-eṅ hökkö ṙētak yanīhi ngam Tēv hēk ṙatö-ellōnre tö yanīhi ngam manāngen nö yih. Yěi urěhti mikahkūö tö inlahen ngam yamih ṙētak ngaich lāköre min ayī-ö tö minë tövaich ṙô inköphöti.—2 Pīt. 3:17.

 7. Sitih inlahen öi min yěi pa-ekūö tö tarik?

⁷ Akahalōn in tö ngam sakāmö ngam Tēv ngaich nö röhta yanīhi. Asā tölngö kanò-òṅ hī pöri hòṅ ngatī inlahen ayī-ö vë-eny nang yip tahëng tö ngam tölöök inhānga. Lohten ayī-ö öi piyū-uṙô vë-eny nang yip tahëng, kūö hī öi vöö tö inlahen nup mufē cha nö in hī. Sitih inlahenken inrē min ayī-ö tö tī cha. Ngatī inlahen ök inrē Pītör ik sā Yēsū nö kahòkkaren ik hatööm ngaich vöö ang Pītör nö vë-enyre nö mahaköp nö in Yēsū, ṙōlheuh inrē anga-aṅ nö mahngenre nö öt akahakūö tö Yēsū! (Mët. 26:69-75) Unôichngöre pöri ngaich anga-aṅ nö ṙap ngam vanööröre, holtö ṙinatö-ellōnre ngaich anga-aṅ nö ngö ṙô: “Ui pa-ekūö tö cha; ui röingölōn rēhĕn.” (1 Pīt. 3:14) Reuslöre alaha in öi löktö in minë ṙô Pītör, tö hī inrē ayī-ö mihôiṅ ṙap ngam pinhë-ekūöre.

 8. Sitih inlahen öi mihôiṅ ṙap ngam pinhë-ekūöre? (1 Pītör 3:15)

⁸ Asūp mahayööken hī mihôiṅ ṙap ngam pinhë-ekūöre tö tarik? Ngö ṙô ang Pītör: “Miyich tö Kristū nö ellōn yīö.” (Vë-evkūö 1 Pītör 3:15.) Yěi hòṅ ngatī inlahen ngaich hòṅ fēkö ngam minā-aṅ hēk kumlēḵ ngam Mā hī ayī-ö ang Yēsū Kristū. Yēḵ meh pa-ekūö vënyö ngam tölöök inhānga in yip tahëng, ngaich kò-òren öm fēkö inlahen ngam rācha hī. Asehkūöre man tö ò ngaich nö ṙònghöichren nö hayöng el halīöngö nö havīlöng tö më töt kanṙeuken ma-ahānga. Köpölōn tö ò nö kē-ěvkūö tö në chööngö nö ṙòkhöre nö ‘el halīöngö, ing panam inrē örheūheu inrē anga-aṅ nö holtörah hī söl im manā-angkūö ngih panam.’ (Mët. 28:18-20) Hōtu in tö Pītör öi ‘örheūheu hööngöre’ öi vënyö ngam ṙinatö-ellōnre. Hòṅ vënyö ngam tölöök inhānga hòng më-eṅ ichūökre la-evṙen, iskul hēk tahëng inrē kamngö meh? Hòṅ urěhngöre pöri më-eṅ öm fēkö öp inlahen ṙô re öm vënyö ngam tölöök inhānga. Vë-ekūötēv man öm havëkö ngam nganöötöre ngaich ṙatö-ellōnre tö Yāvē nö öthō nö öt hayööken meh ṙap ngam pinhë-ekūöre.—Inl. 4:29.

 9. Asūp töhěng lāinyngen Pītör nö öt teungten nö hameuktö hanangenlōn nö in yik holmaneukre? (Ngëichkö ngam nyat.)

⁹ Haköplu ök Pītör tö inlahenre nö hòṅ hangenlōn tö yip prötör sistör. Hěngheuh ang Yēsū nö ngö ṙô nö in yik haköptöre: “Hĕng ön ngih tufömngöre chöngö, kahëtö Chu in yīö, Hāngenlōn yin tö höö; sā hanāngenlōn Chu tö yīö, ngatī yī-ö kö hāngenlōn tö höö.” (Yôh. 13:34) Ōt inrē ang Pītör hē e. Sön pöri anga-aṅ nö pa-ekūö tö yik Kristīön aṅ Yahūti, ngaich ṙāngenre nö hanôl yik tahëng mihërö Kristīön nö holkūö cha nö nyā. Lökten ngam inlahen ò nö vënyu tö Pôl “nöng mahanyatkö elmat. (Kal. 2:11-14) Ik hē Pôl nö halēnö ò ngaich hō-en e anga-aṅ hēk halööktitre inrē. Unôichngöre ngaich ang Pītör nö kumlēḵlö alaha yik hol maneukre nö in në tö nët chitri tö cha nö ötkô nöng holtö ellōnre nö hangenlōn tö höö, pön hòṅ in nup la-enre inrē nö hameuktöre.

10. Ihē öi min ‘ahetlö ngam ellōnre im öt inhôngen ngam kanô-en öi hangenlōn tö yip holre’? Mikahtö elnang hī. (1 Pītör 1:22)

¹⁰ Ngö ṙô ök Pītör, ‘ahetlö ngam ellōnre im öt inhôngen ngam kanô-en i töt höng tötöl hanangen yīö tö holre.’ (Vë-evkūö 1 Pītör 1:22.) Yěi hòṅ īnu töm tö ngatī hanangenlōn ngaich hòṅ ‘hang ṙô ngam kanô-en’ ayī-ö. Hěng ön ngih inköphöti i alaha ngam kanô-en “tö ngam Tēv nö töt atöltuṙen tö tarik.” (Inl. 10:34, 35) Yē hī min atöltuṙen tö hanangenlōn öi in më prötör sistör el ngam māṅ ngaich sā töt hamang ngih chööngö min ayī-ö ṙô Yēsū. Kô-en min nö harōh tumtak yip hanangenlōn hī, sā inlahen Yēsū misī. (Yôh. 13:23; 20:2) Fēlen hī pöri ang Pītör öi hangenlōn tö höö öi “sā hanangenlōn yip aṅ patīre” töre.—1 Pīt. 2:17.

11. Asūp manah ngam inlahen hī “holtö ellōnre hangenlōn tö yip holre”?

¹¹ Lōnu ang Pītör tö hī öi ‘holtö ellōnre hangenlōn tö höö.’ Ik hē Pītör nö ngö ṙô ‘holtö ellōnre’ yin hangenlōn, tö ngö manah tö hī yěi pòrô öt hangenlōn tö öp holre ngaich hòṅ hangenlōn ayī-ö tö ò. Tö sā ngih inchōḵ elmat, lohten nö ōt öp prötör töhaṙivlōn tī tö hī. Lohten min öi ngölōn töre öi hòṅ ngatī inlahen in ò. Haköplu pöri ang Pītör nö in Yēsū, tö hī yěi havalvahre ngaich haṙivlōn min ang Yāvē tö tī hī. (Yôh. 18:10, 11) Ngö ṙô anga-aṅ: “Un havahlöng töchōich tö töchōich, hēk ötlinëkô tö ötlinëkô; asaha pöri tö tölöök ṙô.” (1 Pīt. 3:9) Yēḵ meh min holtö ellōnre hangenlōn tö yip tahëng, ngaich vāyö tinrīken min më-eṅ in cha, yip mumṙivngölōn meh.

12. (a) Yěi holtö ellōnre hangenlōn tö yip holmaneukre ngaich asuh min öp inlahen hī öi hööngöre? (b) Sā ngam vitiō tö hameuknyu Ekta Ka Pöntön Tutnē Na Tē asūp lōn meh inlahen meh?

¹² Sāḵta ön ngih ṙô Pītör nö im raneh chitri ò, ngam tö ngö ṙô, ‘kô-en hanāngenlōn yin tö höö.’ Hö-ö ön ngih hanangenlōn nö hayunngö nup töng rahëichyen tökööl, pön “hanyatngö nup töpōyen tökööl” inrē. (1 Pīt. 4:8) Lohten ang Pītör nö fēkö inlahen öp inṙēlö holre ök ṙô Yēsū nö haköphöti nö urěhngöre samyeūheu. Ngö ṙô ang Pītör hē e tö ò nö hòṅ “tölngö tö sat heuh van” nö aṙē-ěl öp holre. Ngölōn lohten anga-aṅ hē e töre nö tökirööngö ellōn, Ngö ṙô pöri ang Yēsū nö in ò hēk in hī inrē tö hī öi hòṅ “tölngö tö sat van sat anāi,” öi hööngöre aṙēlö yip holre. Tö ngö manah, nö öt tölngu ngam inlahen hī öi aṙēlö holre. (Mët. 18:21, 22) Yěm kihngen hang ngih inlēnö ngaich um haṙivlōn! Ṙòkhöre yip töthet tarik Yāvē nö hēṙu nö kihngen nö aṙēlö holre. Yěn ōt töhaṙivlōn tī tö meh, ngaich aṙēlen ò më-eṅ öp töng kanò-òṅ meh, urēhěre inrē öm vë-ekūö ò.c

13. Asūp kanihngen më minṙöinylen nö hayööken më prötör sistör?

¹³ Lohten ang Pītör nö öt vaichngö tö ök ṙô Yēsū urēhěkūö chanòhlö ò, nö ngö ṙô: ‘Meukṙen në sīṅp chu man.’ (Yôh. 21:16) Yěm tö hěngtak öm minṙöinylen ngaich akahakūö më-eṅ töre öm hòṅ hang ngih inlēnö. Lohten pöri ngòh minṙöinylen nö kihngen nö kē-ěny ṙētakre nö in ngih la-en. Tötṙanāngen ön nö inlahen ngòh minṙöinylen nö urěh nö meukṙen ngam mikūönöre, nö hateungngö nup kuilōn cha, kē-ěny ṙētakre nö in cha, hangenlōn tö cha hēk hayööken cha inrē nö hangön ngam innôlö cha nö in Yāvē. Hěnghöre hachō-okūö cha inrē nö im la-en inhāngö. Hēk Halēnlö nup la-en kinë-ekūöre inrē cha-a nö el mīting, esëmplī, könvensön inrē hòṅ cha nö kēten u. Ōt yip minṙöinylen alaha ngam tipātment HLC hēk vōlöntīör nö kētöre nö la-evṙen nö el ngam LDC. Kô-en nö pōyen minë la-en më minṙöinylen!

14. Asūp mahayööken ngòh minṙöinylen nö meukṙen ngam sīṅp ngam Tēv? (1 Pītör 5:1-4)

¹⁴ Minṙöinylen ök Pītör inrē ngaich lōnu anga-aṅ tö yip tahëng minṙöinylen nö ‘haṙūötken minë sīṅp ngam Tēv.’ (Vë-evkūö 1 Pītör 5:1-4.) Yěm töhěng tak më-eṅ öm minṙöinylen, akahalōn in tö meh öm hangenlōn tö meh prötör sistör hēk chumkūöken cha inrē öm sā inlahen öp yōm sīṅp. Hēṙu pöri lohten öm ngölōn töre öm pōyen la-en hēk laraḵ inrē töp lökten meh min öt teungten in ngih la-en. Asūp mihôiṅ inlahen meh? Keuheūtnyôre man vënyö nup kanihngenre in Yāvē. Ngö ṙô ang Pītör: “Yĕn tarīku mameukṙen, sā ap kanô-òṅ kahëtö ngam Tēv.” (1 Pīt. 4:11) Lohten yip holmaneuk meh nö la-al nup kanihngen töt kinheūtu nö ikūö ngih panam. Köplōn, öp töng kanò-òṅ yīö meukṙen më holmaneukre, mööḵngöre inlahen tī ngam yöngkūö më yōmsīṅp tö yīö. Pön mihôiṅ anga-aṅ nö töngamuh hēk ip tufömngöre panam min nö hayööken cha. Köplōn inrē tö Yāvē nö lōnu tö më minṙöinylen nö hangenlōn tö më prötör sistör, chumkūöken cha nö sā inlahen öp yōm sīṅp hēk ‘vītöre nö tövai nö inchōten më sīṅp.’

15. Sitih inlahen öng ngòh minṙöinylen nö meukṙen ngam sīṅp ngam Tēv? (Ngëichkö ngam nyat.)

¹⁵ Samyeūheuv ṙò-òten ök prötör Vilīöm nö la-evṙen tö la-en minṙöinylen. Akahakūö anga-aṅ tö ngam chinöhken më prötör sistör nö töt ṙanāngen angū-ö. Ik sā ngam tö lëlngökūö invah COVID-19 nö rultenre, ngaich chumkūöṙen anga-aṅ tö yik tahëng minṙöinylen nö hatön kö inlahen nup krup nö kaheuk afta. Vë-eny nang hī cha-a töre nö kūö yòh nö ngatī inlahen: “Pön pōyen yik prötör sistör tö hěng töṙah nö i patīre hēk veut miṙivlōn inrē cha-a.” Yěn ōt yip Kristīön tö kihngen, ngaich chumkūöṙen ang prötör Vilīöm nö hangihtö ṙô cha. Ngëichkö nup ātiköl hēk vitiō inrē anga-aṅ nö el vepsāit, pön hòṅ hareuskö alaha cha. Ngö ṙô anga-aṅ: “Tötṙanāngen ön töngamuh ngam chinöhkö më holmaneuk hī. Kalēḵ alaha ayī-ö hayööken yip tarik öi vë-eny nang cha tö inlahen Yāvē, ngatī kumlēḵ alaha inrē öi hòṅ meukṙen më sīṅp Yāvē hòṅ cha nöng örheūheu nö köp im kanô-en.”

16. Sitih inlahen öi mihôiṅ öi hang minë inlēnö tö kētu in minë chitri kahūich Pītör?

¹⁶ Pōyen nup haköp hī löktö in minë chitri Pītör öi in ngih ātiköl. Yē meh öm hakööpö e ngaich lohten öm meuk nup tö hòṅ halööktitvö töre. Tö sā ngih, fēkö inlahen ṙôken nup inkòlô re öm ṙung nup taneungen meh min ip tufömngöre tövai panam? Vī ngam chö-önyre hòng më-eṅ öm vënyö ngam tölöök inhānga ip chūökre kamān, iskul hēk tahëng inrē? Ōt hòng tahëng inlahen meh hēk hameuktö ngam hanangenlōnre tö yip prötör sistör? Yī-ö minṙöinylen, hō öi yī-ö holtö ṙanamlōnre hēk hööngöre inrē öi meukṙen më sīṅp Yāvē? Yěi ngatī inlahen öi ngëichköre ngaich lohten nö ōt nup tinrīken hī tö hòṅ halööktitvö tö hī. Um haṙivlōn pöri. ‘Tön tö aṙē-ělōn an ngam Mā,’ hayööken meh inrē min öm halööktitre. (1 Pīt. 2:3) Kētö ṙinatö-ellōn hī ang Pītör tö ngam “Tēv . . . nö Anga-aṅ min mahateungten yīö haköpö yīö, hangëken yīö inrē; unôichrit yīö rahëchtaṙen kihngen.”—1 Pīt. 5:10.

17. Asuh nup min inkòlô hī yěi haköpngöre i linökölōn Yāvē hēk hō inrē öi haköptu tö ò?

¹⁷ Ngölōn ang Pītör töre nö töng öt hō-ov nö ikūö ngam kūön ngam Tēv. (Lūk. 5:8) Öt ṙāngenre pöri anga-aṅ. Löktö i inyöökenre anga-aṅ tö Yāvē hēk Yēsū nö iṙūöhen nö haköpngöre nö löklōn cha. Lökten ang Yāvē nö hō-en Pītör nö el ngam “tö örheūheu pūlngö ngam Mā hī ane inrē mahayööken, Yēsū Kristu.” (2 Pīt. 1:11) Töt insā-av angū-ö nö inlōnti ò tö tī Yāvē! Yēḵ meh më-eṅ min öt heūlngöre, sā inlahen Pītör inrē öm iṙūöhen löklōn Yāvē hēk hō-en minë inköptöre tö ò, ngaich kē-ěvkūö min më-eṅ tö ngam nômö tö-örheūheu aṅ. ‘Kūö ngam ṙinatö-ellōnre inrē min öm teūngen tö ngam inyööken nômö.’—1 Pīt. 1:9.