Zacarias
4 Ug ang manulonda nga nakigsulti kanako mibalik ug mipukaw kanako, ingon sa usa ka tawo nga gipukaw gikan sa iyang pagkatulog.+ 2 Unya siya miingon kanako: “Unsay imong nakita?”+
Busa ako miingon: “Akong nakita, ug, tan-awa! may usa ka tangkawan, kini lunlon bulawan,+ nga may panaksan sa ibabaw niini. Ug ang iyang pito ka lampara anaa sa ibabaw niini, ang pito gayod;+ ug ang mga lampara sa ibabaw niini may pito ka tubo. 3 Ug may duha ka kahoyng olibo tupad niini,+ usa sa tuo nga kiliran sa panaksan ug usa sa walang kiliran niini.”
4 Unya ako mitubag ug miingon sa manulonda nga nakigsulti kanako, nga nag-ingon: “Unsay kahulogan niining mga butanga, akong ginoo?”+ 5 Busa ang manulonda nga nakigsulti kanako mitubag ug miingon kanako: “Wala ka ba gayod mahibalo kon unsay kahulogan niining mga butanga?”
Ug ako miingon: “Wala, akong ginoo.”+
6 Busa siya mitubag ug miingon kanako: “Mao kini ang pulong ni Jehova kang Zorobabel, nga nag-ingon, ‘“Dili pinaagi sa kasundalohan,+ ni pinaagi sa gahom,+ kondili pinaagi sa akong espiritu,”+ miingon si Jehova sa mga panon. 7 Kinsa ka ba, Oh dakong bukid?+ Atubangan ni Zorobabel+ ikaw mahimong patag nga yuta. Ug iyang pagulaon gayod ang pangulong bato.+ Adunay mga pagsinggit+ nganha niini: “Pagkamakabibihag! Pagkamakabibihag!”’”+
8 Ug ang pulong ni Jehova nagpadayon sa pagdangat kanako, nga nag-ingon: 9 “Ang mga kamot mismo ni Zorobabel nagpahimutang sa patukoranan niining balaya,+ ug ang kaugalingon niyang mga kamot magahuman niini.+ Ug ikaw mahibalo gayod nga si Jehova sa mga panon nagpadala kanako nganha kaninyo.+ 10 Kay kinsa ang nagtamay sa adlaw sa gagmayng mga butang?+ Ug sila magmaya+ gayod ug makita ang tunton diha sa kamot ni Zorobabel. Kining pito mao ang mga mata ni Jehova.+ Kini nagalibotlibot sa tibuok yuta.”+
11 Ug ako mitubag ug miingon kaniya: “Unsay kahulogan niining duha ka kahoyng olibo sa tuong kiliran sa tangkawan ug sa walang kiliran niini?”+ 12 Unya ako mitubag sa ikaduhang higayon ug miingon kaniya: “Unsa ba kining duha ka hugpong sa gagmayng mga sanga sa kahoyng olibo nga, pinaagi sa duha ka bulawang tubo, nagapaagay gikan sa sulod nila sa bulawang likido?”
13 Busa siya miingon kanako: “Wala ka ba gayod mahibalo kon unsay kahulogan niining mga butanga?”
Ug ako miingon: “Wala, akong ginoo.”+
14 Busa siya miingon: “Mao kini ang duha ka dinihogan+ nga nagabarog tupad sa Ginoo sa tibuok yuta.”+