Zacarias
5 Unya giyahat ko pag-usab ang akong mga mata ug nakita ko; ug, tan-awa! usa ka linukot nga basahon+ nga nagalupad. 2 Busa siya miingon kanako: “Unsay imong nakita?”+
Ug ako miingon: “Ako nakakitag usa ka linukot nga basahon nga nagalupad, nga ang gitas-on kawhaan ka maniko, ug ang gilapdon napulo ka maniko.”
3 Unya siya miingon kanako: “Mao kini ang tunglo nga nagapanaw sa ibabaw sa tibuok yuta,+ tungod kay ang tagsatagsa nga nagapangawat,+ sumala niini nga palid, nahigawas sa silot; ug ang tagsatagsa nga nagahimog panumpa,+ sumala sa pikas palid niini,+ nahigawas sa silot. 4 ‘Akong gipapanaw kini,’ mao ang giingon ni Jehova sa mga panon, ‘ug kini mosulod sa balay sa kawatan ug sa balay sa usa nga nagapanumpa ug bakak sa akong ngalan;+ ug kini mopuyo taliwala sa iyang balay ug maglaglag niini ug sa mga kahoy niini ug sa mga bato niini.’”+
5 Unya ang manulonda nga nakigsulti kanako milakaw ug miingon kanako: “Iyahat ang imong mga mata, palihog, ug tan-awa kon unsa kining nagapanaw.”
6 Busa ako miingon: “Unsa ba kini?”
Ug siya miingon: “Mao kini ang ephah nga nagapanaw.” Ug siya miingon: “Mao kini ang ilang dagway sa tibuok yuta.” 7 Ug, tan-awa! ang lingin nga taklob nga tingga giisa; ug kini maoy usa ka babaye nga nagalingkod taliwala sa ephah. 8 Busa siya miingon: “Mao kini ang Pagkadaotan.” Ug iyang gisulod siyag balik ngadto sa taliwala sa ephah,+ nga human niana iyang gitaklob ang mabug-at nga tingga diha sa baba niini.
9 Unya giyahat ko ang akong mga mata ug nakita ko, ug ania, may duha ka babaye nga migula, ug ang hangin diha sa ilang mga pako. Ug sila may mga pako nga sama sa mga pako sa cigueña. Ug inanay nilang giisa ang ephah sa kinatung-an sa yuta ug sa kalangitan. 10 Busa ako miingon sa manulonda nga nakigsulti kanako: “Asa nila dad-a ang ephah?”
11 Ug siya miingon kanako: “Aron sa pagtukod+ alang kaniya ug balay didto sa yuta sa Sinar;+ ug kini lig-ong pagatukoron, ug siya igabutang didto sa iyang hustong dapit.”