1 Samuel
21 Sa ulahi si David nahiabot sa Nob+ ngadto kang Ahimelek nga saserdote; ug si Ahimelek+ nangurog sa pagkakita kang David ug dayon miingon kaniya: “Nganong nag-inusara ka, ug walay tawo nga uban kanimo?”+ 2 Niini si David miingon kang Ahimelek nga saserdote: “Ang hari nagsugo kanako labot sa usa ka butang,+ ug siya nagsulti kanako, ‘Ayaw gayod ipahibalo ni bisan kinsa ang butang nga labot niana ako nagpadala ug nagsugo kanimo.’ Ug nakigsabot ako sa batan-ong mga lalaki niini ug niadtong dapita. 3 Ug karon, kon adunay lima ka buok tinapay ilalom sa imong pagbuot, ihatag kini sa akong kamot, o bisan unsa nga anaa.”+ 4 Apan ang saserdote mitubag kang David ug miingon: “Walay ordinaryong tinapay nga ania sa akong kamot, apan adunay tinapay nga balaan;+ basta ang batan-ong mga lalaki nagpabilin lamang nga bulag sa kababayen-an.”+ 5 Busa si David mitubag sa saserdote ug miingon kaniya: “Apan ang mga babaye gipalayo kanamo sama kaniadto sa dihang ako migula,+ ug ang lawas sa batan-ong mga lalaki nagpabiling balaan, bisan kon ang tahas ordinaryo. Ug unsa pa kaha niining adlawa, nga ang usa mahimong balaan sa iyang lawas?” 6 Niana gihatag sa saserdote kaniya ang balaan,+ tungod kay walay tinapay didto gawas sa pasundayag nga tinapay nga gikuha gikan sa atubangan ni Jehova+ aron mabutangan ug bag-ong tinapay sa adlaw nga kuhaon kini.
7 Karon usa sa mga sulugoon ni Saul atua didto niadtong adlawa, nga gihawiran+ sa atubangan ni Jehova, ug ang iyang ngalan mao si Doeg+ nga Edomhanon,+ ang pangulo sa mga magbalantay sa kahayopan ni Saul.+
8 Ug si David miingon kang Ahimelek: “Ug wala bay bisan unsa dinhi nga ilalom sa imong pagbuot, bangkaw man o espada? Kay wala ko madala ang akong espada ni ang akong mga hinagiban, tungod sa pagkadinalian sa gipabuhat sa hari.” 9 Niini ang saserdote miingon: “Ang espada ni Goliat+ nga Filistehanon, nga imong gipatay sa ubos nga patag sa Elah+—ania dinhi, giputos sa kupo, luyo sa epod.+ Kon kini ang imong dad-on, dad-a kini, tungod kay walay lain dinhi gawas niini.” Ug si David miingon: “Walay sama niini. Ihatag kini kanako.”
10 Unya si David mitindog ug mipadayon sa pagkalagiw+ tungod kang Saul niadtong adlawa, ug sa ulahi nahiabot kang Akis nga hari sa Gat.+ 11 Ug ang mga sulugoon ni Akis miingon kaniya: “Dili ba kini mao si David nga hari+ sa yuta? Dili ba kaniya nga sila mitubag uban sa mga sayaw,+ nga nag-ingon,
‘Si Saul nakapatay sa iyang linibo,
Ug si David sa iyang tinagpulo ka libo’?”+
12 Ug si David nagbutang niining mga pulonga sa iyang kasingkasing, ug siya nahadlok+ pag-ayo tungod kang Akis nga hari sa Gat. 13 Busa siya nagtakoban+ sa iyang pagkahustog-pangisip atubangan sa ilang mga mata+ ug nagpabuangbuang diha sa mga kamot nila ug gikuroskurosan ang mga pultahan sa ganghaan ug gipatabisay ang iyang laway diha sa iyang bungot. 14 Sa kataposan si Akis miingon sa iyang mga sulugoon: “Ania, nakita ninyo nga ang tawo nabuang. Nganong dad-on man ninyo siya kanako? 15 Nagkinahanglan ba ako ug nabuang nga mga tawo, mao nga gidala ninyo siya aron sa pagbuhat ug binuang atubangan kanako? Angay ba siyang pasudlon sa akong panimalay?”