Jeremias

35 Si Jeremias nakadawat ug mensahe gikan kang Jehova sa mga adlaw ni Jehoiakim+ nga anak ni Josias, ang hari sa Juda, nga nag-ingon: 2 “Adto sa balay sa mga Rekabita+ ug pakigsulti kanila ug dad-a sila sa balay ni Jehova, ngadto sa usa sa mga lawak-kan-anan;* unya daliti silag bino.”

3 Busa akong giuban si Jaazanias nga anak ni Jeremias nga anak ni Habazinias, ang iyang mga igsoon, ang tanan niyang anak, ug ang tibuok panimalay sa mga Rekabita 4 ngadto sa balay ni Jehova. Gidala nako sila sa lawak-kan-anan sa mga anak ni Hanan nga anak ni Igdalias, nga tawo sa matuod nga Diyos, nga didto tapad sa lawak-kan-anan sa mga prinsipe sa ibabaw sa lawak-kan-anan ni Maaseias nga anak ni Salum nga magbalantay sa pultahan. 5 Unya nagbutang kog mga kopa ug mga tagayan nga punog bino diha sa atubangan sa mga lalaki sa panimalay sa mga Rekabita ug giingnan sila: “Inom mog bino.”

6 Apan sila miingon: “Dili mi moinom ug bino, kay si Jehonadab*+ nga anak ni Rekab, ang among katigulangan, nagsugo kanamo, ‘Dili mo angayng moinom ug bino, kamo ug ang inyong mga anak. 7 Ug dili mo angayng magtukod ug balay, magpugas ug binhi, o magtanom o manag-iya ug ubasan. Hinuon, angay mong magpuyo kanunay sa mga tolda, aron mabuhi mo sa taas nga panahon sa yuta diin mo nagpuyo ingong mga langyaw.’ 8 Busa padayon namong gituman ang tanang gisugo kanamo ni Jehonadab nga anak ni Rekab nga among katigulangan, pinaagi sa dili gayod pag-inom ug bisan unsang bino​—⁠kami, ang among mga asawa, ug ang among mga anak nga lalaki ug babaye. 9 Ug wala mi magtukod ug mga balay nga among kapuy-an, ug wala usab miy mga ubasan o kaumahan o binhi. 10 Padayon ming nagpuyo sa mga tolda ug nagtuman sa tanang gisugo kanamo ni Jehonadab* nga among katigulangan. 11 Apan dihang si Haring Nabucodonosor* sa Babilonya misulong sa yuta,+ kami miingon, ‘Dali, mangadto ta sa Jerusalem aron moikyas sa kasundalohan sa mga Caldeanhon ug sa mga Siryanhon,’ ug karon kami nagpuyo sa Jerusalem.”

12 Ug nadawat ni Jeremias ang mensahe gikan kang Jehova, nga nag-ingon: 13 “Kini ang giingon ni Jehova sa mga panon, ang Diyos sa Israel, ‘Lakaw ug ingna ang mga tawo sa Juda ug ang mga molupyo sa Jerusalem: “Dili ba kanunay man mong giawhag nga sundon ang akong mga pulong?”+ miingon si Jehova. 14 “Gisugo ni Jehonadab nga anak ni Rekab ang iyang mga kaliwat nga dili sila moinom ug bino, ug gituman nila ang iyang mga pulong pinaagi sa dili pag-inom niini hangtod niining adlawa. Busa ilang gisunod ang mando sa ilang katigulangan.+ Apan nakigsulti ko kaninyo nga balikbalik,* pero wala ko ninyo tumana.+ 15 Ug padayon nakong gipadala kaninyo ang tanan nakong alagad nga propeta, nga nagpadala kanila nga balikbalik,*+ nga nag-ingon, ‘Palihog, biyai ninyo ang inyong daotang mga dalan,+ ug himoa kon unsay husto! Ayawg sunda ug alagari ang ubang mga diyos. Unya kamo magpadayon sa pagpuyo sa yuta nga akong gihatag kaninyo ug sa inyong mga katigulangan.’+ Apan wala mo maghatag ug pagtagad* o mamati kanako. 16 Gituman sa mga kaliwat ni Jehonadab nga anak ni Rekab ang mando nga gihatag sa ilang katigulangan kanila,+ apan kini nga katawhan wala mamati kanako.”’”

17 “Busa kini ang giingon ni Jehova, ang Diyos sa mga panon, ang Diyos sa Israel: ‘Ania, ipahinabo nako sa Juda ug sa tanang molupyo sa Jerusalem ang tanang katalagman nga akong gipasidaan kanila,+ kay nakigsulti ko kanila, apan wala gayod sila mamati, ug padayon kong nagtawag kanila, apan wala gayod sila motubag.’”+

18 Ug si Jeremias miingon sa panimalay sa mga Rekabita: “Kini ang giingon ni Jehova sa mga panon, ang Diyos sa Israel, ‘Kay inyong gisunod ang mando sa inyong katigulangan nga si Jehonadab ug padayon ninyong gituman ang tanan niyang mando, nga nagbuhat kon unsa gyoy iyang gimando kaninyo, 19 kini ang giingon ni Jehova sa mga panon, ang Diyos sa Israel: “Kanunay nga dunay kaliwat si Jehonadab* nga anak ni Rekab nga mag-alagad sa akong atubangan.”’”