Ezequiel
21 Nakadawat na usab kog mensahe gikan kang Jehova, nga nag-ingon: 2 “Anak sa tawo, ipatumong ang imong nawong sa Jerusalem, ug pagmantala batok sa balaang mga dapit, ug panagna batok sa yuta sa Israel. 3 Sultihi ang yuta sa Israel, ‘Kini ang giingon ni Jehova: “Ania, ako batok kanimo, ug hulboton nako ang akong espada sa sakoban+ niini ug laglagon nako gikan kanimo ang matarong ug ang daotan. 4 Kay laglagon nako gikan kanimo ang matarong ug ang daotan, ang akong espada hulboton sa sakoban niini batok sa tanang tawo,* gikan sa habagatan hangtod sa amihanan. 5 Ang tanang tawo makaila gayod nga ako mismo, si Jehova, ang naghulbot sa akong espada sa sakoban niini. Dili na kini isakob pag-usab.”’+
6 “Ug ikaw, anak sa tawo, panghupaw samtang nagkurog ka,* oo, panghupaw pag-ayo sa ilang atubangan.+ 7 Ug kon ingnon ka nila, ‘Nganong nanghupaw man ka?’ ingna sila, ‘Tungod sa usa ka taho.’ Kay kini moabot gayod, ug ang tanang kasingkasing matunaw sa kahadlok ug ang tanang kamot manghuyhoy ug ang tanang espiritu magmasulub-on ug sa tanang tuhod motulo ang tubig.*+ ‘Tan-awa! Kini moabot gayod—kini mahitabo,’ miingon ang Soberanong Ginoong Jehova.”
8 Nakadawat na usab kog mensahe gikan kang Jehova, nga nag-ingon: 9 “Anak sa tawo, panagna ug isulti kini, ‘Kini ang giingon ni Jehova: “Usa ka espada! Usa ka espada+ ang gibaid, ug kini gipasinaw. 10 Kini gibaid aron makapatayg daghan; kini gipasinaw aron mokidlap samag kilat.”’”
“Dili ba kita magsadya?”
“‘Isalikway ba niini* ang setro sa akong anak,+ sama sa gihimo niini sa tanang kahoy?
11 “‘Gihatag kini aron pasinawon ug gamiton. Kini nga espada gibaid ug gipasinaw, aron ihatag ngadto sa kamot sa tiglaglag.+
12 “‘Singgit ug pagminatay,+ anak sa tawo, kay kini miabot batok sa akong katawhan; batok kini sa tanang pangulo sa Israel.+ Sila ug ang akong katawhan patyon sa espada. Busa hapaka ang imong paa sa kasubo. 13 Kay gihimo na ang usa ka pagsulay,+ ug unsay mahitabo kon isalikway sa espada ang setro? Kini* dili na maglungtad,’+ miingon ang Soberanong Ginoong Jehova.
14 “Ug ikaw, anak sa tawo, panagna ug ipakpak ang imong mga kamot ug sulti sa tulo ka higayon, ‘Usa ka espada!’ Kini ang espada nga mopatay, ang espada nga mopatayg daghan, nga maglibot kanila.+ 15 Ang ilang kasingkasing matunaw sa kahadlok+ ug daghan ang mapukan sa tanan nilang ganghaan sa siyudad; mopatay ko pinaagi sa espada. Oo, kini mokidlap samag kilat ug gipasinaw aron mopatay! 16 Panigbas sa tuo! Panigbas sa wala! Adto bisan asa ipatumong ang imong hait nga sulab! 17 Mopakpak usab ko ug tagbawon nako ang akong dakong kasuko.+ Ako mismo, si Jehova, ang nagsulti.”
18 Ug nakadawat na usab kog mensahe gikan kang Jehova, nga nag-ingon: 19 “Kon bahin kanimo, anak sa tawo, paghimog duha ka dalan alang sa espada sa hari sa Babilonya nga moabot. Kining duha ka dalan maggikan sa sama ra nga yuta, ug pagbutang ug ilhanan* sa dapit diin nagsanga ang dalan paingon sa duha ka siyudad. 20 Markahi ang usa ka dalan alang sa espada nga moabot batok sa Raba+ sa mga Ammonhanon, ug ang laing dalan batok sa pinarilan nga Jerusalem+ sa Juda. 21 Kay ang hari sa Babilonya mohunong aron mogamit ug pagpanag-an diha sa dapit diin nagsanga ang dalan. Uyogon niya ang mga udyong. Magpakisayod siya sa iyang mga idolo;* susihon niya ang atay. 22 Ang tubag sa pagpanag-an sa iyang tuong kamot nagpakita nga sa Jerusalem sila angayng moadto, aron magpahimutang ug bug-at nga mga troso nga panglumpag, aron moawhag sa pagpatay, aron ipatugbaw ang singgit sa pagpakiggubat, aron magpahimutang ug bug-at nga mga troso nga panglumpag sa mga ganghaan, aron maghimog bungdo, aron magtukod ug paril.+ 23 Apan alang niadtong mga* nanumpa kanila, kini nga pagpanag-an daw dili tinuod.+ Apan hinumdoman niya ang ilang pagkasad-an ug bihagon sila.+
24 “Busa kini ang giingon sa Soberanong Ginoong Jehova: ‘Gipahinabo ninyo nga ang inyong pagkasad-an mahinumdoman pinaagi sa pagyagyag sa inyong mga kalapasan ug sa pagpahinabo nga makita ang inyong mga sala diha sa inyong binuhatan. Karon nga gihinumdoman mo, kuhaon mo nga pinugos.’*
25 “Apan miabot na ang imong adlaw, Oh daotang pangulo sa Israel nga grabeng nasamdan,+ ang panahon sa imong kataposang silot. 26 Kini ang giingon sa Soberanong Ginoong Jehova: ‘Kuhaa ang turban, ug huboa ang korona.+ Dili kini magpabiling sama sa una.+ Ituboy ang usa nga ubos,+ ug ipaubos ang usa nga taas.+ 27 Kagun-oban, kagun-oban, himoon nakong kagun-oban ang pagkahari. Ug dili kini mapanag-iya ni bisan kinsa hangtod moabot ang usa nga may legal nga katungod,+ ug ihatag nako kini kaniya.’+
28 “Ug ikaw, anak sa tawo, panagna ug isulti kini, ‘Kini ang giingon sa Soberanong Ginoong Jehova bahin sa mga Ammonhanon ug sa ilang pagpanginsulto.’ Isulti kini, ‘Usa ka espada! Usa ka espada ang gihulbot sa pagpamatay; gipasinaw kini aron mopatay ug mokidlap samag kilat. 29 Bisan pa sa dili tinuod nga mga panan-awon ug sa bakak nga pagpanag-an bahin kanimo, itapok ka uban sa mga pinatay,* sa mga daotang tawo kansang adlaw miabot na, ang panahon sa ilang kataposang silot. 30 Ibalik kini sa sakoban. Hukman ka nako sa dapit diin ka gilalang, sa yuta nga imong gigikanan. 31 Ibubo nako ang akong kasuko kanimo. Bugahan ka nako sa akong nagdilaab nga kasuko, ug itugyan ka nako sa bangis nga mga tawo, sa mga tawong hanas sa pagpanglaglag.+ 32 Mahimo kang sugnod sa kalayo;+ ang imong dugo mobanaw sa yuta, ug dili na ka hinumdoman, kay ako mismo, si Jehova, ang nagsulti niini.’”