Jeremias
37 Ug si Haring Zedekias+ nga anak ni Josias nagsugod sa pagmando puli kang Conias*+ nga anak ni Jehoiakim, kay gihimo siyang hari sa yuta sa Juda ni Haring Nabucodonosor* sa Babilonya.+ 2 Apan siya ug ang iyang mga alagad ug ang katawhan sa yuta wala mamati sa mga pulong ni Jehova pinaagi kang propetang Jeremias.
3 Ug gipaadto ni Haring Zedekias si Jehucal+ nga anak ni Selemias ug si Sofonias+ nga anak ni Maaseias nga saserdote ngadto kang propetang Jeremias, nga nag-ingon: “Palihog pag-ampo kang Jehova nga atong Diyos alang kanamo.” 4 Si Jeremias nagkinabuhing gawasnon uban sa katawhan, kay wala pa man nila siya bilanggoa.+ 5 Niadtong panahona ang mga Caldeanhon naglikos sa Jerusalem, apan miatras sila sa pag-atake sa Jerusalem+ dihang nabalitaan nila nga ang kasundalohan sa Paraon nagpaingon kanila gikan sa Ehipto.+ 6 Unya si propetang Jeremias nakadawat ug mensahe gikan kang Jehova, nga nag-ingon: 7 “Kini ang giingon ni Jehova nga Diyos sa Israel, ‘Kini ang inyong isulti sa hari sa Juda, nga nagpaanhi kaninyo aron magpakisayod kanako: “Tan-awa! Ang kasundalohan sa Paraon nga nagpaingon sa pagtabang kaninyo mamalik sa yuta niini, ang Ehipto.+ 8 Ug ang mga Caldeanhon mamalik ug makig-away niining siyudara ug bihagon ug sunogon kini.”+ 9 Kini ang giingon ni Jehova, “Ayawg limbongi ang inyong kaugalingon pinaagi sa pag-ingon, ‘Ang mga Caldeanhon dili na gayod mamalik,’ kay sila mamalik gayod. 10 Bisan pag mapildi ninyo ang tibuok kasundalohan sa mga Caldeanhon nga miatake kaninyo ug mga samdan na lang ang mahibilin kanila, mobangon gihapon sila sa ilang mga tolda ug sunogon kining siyudara.”’”+
11 Dihang nakaatras na ang kasundalohan sa mga Caldeanhon sa pag-atake sa Jerusalem tungod sa kasundalohan sa Paraon,+ 12 si Jeremias migikan sa Jerusalem ug mipaingon sa yuta sa Benjamin+ aron dawaton ang iyang bahin didto, taliwala sa iyang katawhan. 13 Apan pag-abot ni propetang Jeremias sa Ganghaan ni Benjamin, gidakop siya sa opisyal nga nagdumala sa mga guwardiya, nga ginganlag Irias nga anak ni Selemias nga anak ni Hananias, ug giingnan siya: “Miikyas ka aron modapig sa mga Caldeanhon!” 14 Apan si Jeremias miingon: “Dili kana tinuod! Wala ko modapig sa mga Caldeanhon.” Apan wala siya mamati kaniya. Busa gidala ni Irias si Jeremias ngadto sa mga prinsipe. 15 Ang mga prinsipe nasuko pag-ayo kang Jeremias,+ ug ila siyang gibun-og ug gibilanggo*+ sa balay ni Jehonatan nga sekretaryo, nga gihimo nang bilanggoan. 16 Si Jeremias gibalhog sa bilanggoan sulod sa daghang adlaw, sa usa ka selda ilalom sa yuta.
17 Unya gipakuha siya ni Haring Zedekias, ug sekreto siyang gisukitsukit sa hari didto sa iyang balay.*+ Siya nangutana: “Duna bay mensahe gikan kang Jehova?” Si Jeremias mitubag, “Duna!” ug siya mipadayon, “Ikaw itugyan ngadto sa kamot sa hari sa Babilonya!”+
18 Si Jeremias miingon usab kang Haring Zedekias: “Unsay akong sala kanimo ug sa imong mga alagad ug sa imong katawhan, nga inyo man kong gibilanggo? 19 Hain na man karon ang inyong mga propeta nga nanagna kaninyo, ‘Ang hari sa Babilonya dili moanhi batok kaninyo ug batok niining yutaa’?+ 20 Karon pamati, palihog, Oh akong ginoo nga hari. Hinaot nga imong ihatag ang akong hangyo alang sa pabor. Ayaw ko ipadalag balik sa balay ni Jehonatan+ nga sekretaryo, kay mamatay ko didto.”+ 21 Busa si Haring Zedekias mimando nga si Jeremias ibutang sa Hawanan sa Guwardiya,+ ug ginahatagan siya adlaw-adlaw ug lingin nga tinapay gikan sa dalan sa mga panadero+ hangtod nga nahurot ang tanang tinapay sa siyudad.+ Ug si Jeremias nagpabilin sa Hawanan sa Guwardiya.