Kabos Apan Dato-Sa unsang paagi posible kana?

Kasiglohan kanhi usa ka maalamong tawo ang nag-ampo nga dili unta siya mahimong kabos. Nganong siya nag-ampo niana? Tungod kay nahadlok siya nga ang kakabos tingalig magpukaw sa mga tinamdan ug mga buhat nga magpameligro sa iyang relasyon sa Diyos. Kini dayag gikan sa iyang mga pulong: “Pakan-a ako sa pagkaon nga maoy gikinahanglan alang kanako . . . nga ako dili unta mahimong kabos ug mangawat ug magapasipala sa ngalan sa akong Diyos.”—PROVERBIO 30:​8, 9.

NAGPASABOT ba kini nga imposible sa kabos nga tawo ang pag-alagad nga matinumanon sa Diyos? Dili gayod! Sa tibuok kasaysayan daghan sa mga alagad ni Jehova nga Diyos ang nagpabiling maunongon ngadto kaniya bisan pa sa mga kalisod nga dala sa kakabos. Sa baylo, si Jehova nahigugma niadtong kinsa misalig kaniya ug nagtagana kanila.

Mga Matinumanon sa Karaang Panahon

Si apostol Pablo mismo nakasinatig mga panahon sa panginahanglan. (2 Corinto 6:​3, 4) Gihubit usab niya ang ‘dakong panganod’ sa matinumanong una-Kristohanong mga saksi, nga ang pipila kanila “nagsul-ob sa mga panit sa karnero, sa mga panit sa kanding, samtang nga sila anaa sa kawalad-on . . . Sila naglatagaw sa mga awaawng kamad-an ug kabukiran ug mga langob ug mga lungib sa yuta.”​—Hebreohanon 11:​37, 38; 12:1.

Usa niining maong mga matinumanon mao si manalagnang Elias. Sulod sa tulo ka tuig ug tunga nga hulaw, si Jehova regular nga nagtagana kaniya ug pagkaon. Una, gisugo sa Diyos ang mga uwak nga dalhan ug tinapay ug karne ang manalagna. (1 Hari 17:​2-6) Sa ulahi, milagrosong gipadaghan ni Jehova ang suplay sa harina ug lana nga gikan niana ang babayeng balo nagtagana kang Elias. (1 Hari 17:​8-​16) Ang maong pagkaon maoy paninugdan kaayong pagkaon, apan kini maoy nagpabuhi sa manalagna, sa babaye, ug sa iyang anak nga lalaki.

Sa ingon usab niana gipaluyohan ni Jehova ang matinumanong manalagna nga si Jeremias sa panahong malisod ang ekonomiya. Naluwas si Jeremias sa Babilonyanhong paglikos sa Jerusalem, sa dihang ang mga tawo napugos “sa pagkaon sa tinapay nga tinimbang ug diha sa dakong kabalaka.” (Ezequiel 4:16) Sa kadugayan, ang kagutom sa siyudad hilabihan kaayo nga ang pipila ka mga babaye mikaon sa unod sa ilang kaugalingong mga anak. (Lamentaciones 2:20) Bisag si Jeremias binantayan tungod sa iyang walay kokahadlok nga pagsangyaw, gitino ni Jehova nga siya kahatagan ug “usa ka lingin nga tipak sa tinapay” adlaw-adlaw “hangtod nahurot ang tanang tinapay sa siyudad.”​—Jeremias 37:21.

Busa si Jeremias, sama kang Elias, diyutay rag makaon. Ang Kasulatan wala magsulti kanato kon unsay gikaon o unsa ka subsob mikaon si Jeremias human mahurot ang tinapay sa Jerusalem. Apan, nasayod kita nga si Jehova nagpaluyo kaniya ug siya naluwas nianang makalilisang nga panahon sa kagutom.

Karong adlawa, ang kakabos anaa sa tanang bahin sa kalibotan. Sumala sa Hiniusang Kanasoran, ang labing daghang kabos makaplagan sa Aprika. Nag-ingon ang taho sa prensa sa HK sa 1996: “Labing menos katunga sa tanang Aprikano maoy kabos.” Bisan pa sa nagkagrabeng mga kahimtang sa ekonomiya, ang nagdaghang Aprikano nagpadapat sa mga prinsipyo sa Bibliya diha sa kinabuhi ug matinumanong nagaalagad sa Diyos, masaligon nga siya motabang kanila. Palandonga ang pipila ka pananglitan gikan sa usa ka bahin sa atong gubot nga kalibotan.

Pagpabiling Matinud-anon

Si Michael,a nga nagpuyo sa Nigeria, maoy usa ka mag-uuma nga may unom ka anak nga suportahan. “Lisod nga magmatinud-anon kon wala kay kuwarta nga magamit sa pag-atiman sa imong pamilya,” matod niya. “Apan, sa dihang gitental ako nga dili magmatinud-anon, gipahinumdoman ko ang akong kaugalingon sa Efeso 4:​28, nga nag-ingon: ‘Ayaw na pagpangawata ang kawatan, apan hinuon pahagoa siya, nga magabuhat pinaagi sa iyang mga kamot kon unsay maayong buluhaton.’ Busa kon modangat kanako ang tentasyon, ako mangutana sa akong kaugalingon, ‘Gihagoan ko ba kining kuwartaha?’”

“Pananglitan,” midugang si Michael, “samtang ako nagbaktas usa ka adlaw niana, nakit-an ko ang usa ka bag nga nahulog sa likod sa usa ka motorsiklo. Wala nako mapahunong ang nagmotor, busa gipunit ko ang bag ug nakaplagang puno kini sa salapi! Gigamit ang identipikasyon diha sa bag, akong nakit-an ang tag-iya ug giuli ang bag ngadto kaniya.”

Pagpakigbisog sa Kaguol

Usa ka lalaki sa Amihanang Aprika miingon: “Ang kakabos maoy [sama] sa usa ka tawo nga nahulog sa lalom nga lungag, nga may makitang kahayag ug may mga tawong libreng naglakawlakaw, apan dili makasinggit sa pagpangayog tabang o sa pagpangayog hagdan nga katkatan aron makagawas.” Dili ikahibulong nga ang kakabos sagad mohatag ug mga pagbati sa kaguol ug kahigawad! Bisan ang mga alagad sa Diyos tingali makakita sa pagkabahandianon sa uban ug mosugod sa paghunahuna nga ang pagkamatinud-anon maoy kawang. (Itandi ang Salmo 73:​2-​13.) Sa unsang paagi masuklan ang maong mga pagbati?

Si Peter, nga taga-Kasadpang Aprika, miretiro human sa 19 ka tuig nga pag-alagad sa gobyerno. Karon gipaigo na lang gayod niya ang gamayng pensiyon. “Sa dihang ako may mga panahong mawad-ag kadasig,” matod ni Peter, “pahinumdoman ko ang akong kaugalingon sa akong nabasa sa Bibliya ug sa mga publikasyon sa Watch Tower Society. Kining karaang sistema hapit nang matapos, ug kita nagapaabot sa mas maayong sistema.

“Lain pa, gipalandong ko ang 1 Pedro 5:​9, nga nag-ingon: ‘Bumarog kamo batok [kang Satanas], nga lig-on diha sa pagtuo, kay nahibalo nga ang samang mga butang maylabot sa mga pag-antos ginapahinabo diha sa tibuok kapunongan sa inyong mga igsoon dinhi sa kalibotan.’ Busa dili ako lamang ang nag-antos sa mga kalisod. Kini nga mga pahinumdom nagtabang kanako nga isalikway ang mga hunahuna nga dili makapalig-on ug makapaguol.”

“Gawas pa,” si Peter midugang, “gibuhat ni Jesus ang daghang milagro sa dinhi pa sa yuta, apan wala siyay gipadato sa materyal nga paagi. Nganong magdahom ako nga himoon niya akong dato?”

Ang Gahom sa Pag-ampo

Ang pagduol kang Jehova nga Diyos diha sa pag-ampo maoy laing paagi nga masuklan ang negatibong panghunahuna. Sa dihang si Mary nahimong usa sa mga Saksi ni Jehova niadtong 1960, gisalikway siya sa iyang pamilya. Wala magminyo ug karon kapin nag 50 anyos, siya luya na ug wala kaayoy nabatonan sa materyal nga paagi. Bisan pa niana, siya masiboton sa Kristohanong ministeryo.

Si Mary nag-ingon: “Sa dihang ako mobatig kahigawad, moduol ako kang Jehova diha sa pag-ampo. Nahibalo ako nga walay usa nga makatabang kanako ug dako kay sa iyang mahimo. Akong nakat-onan nga sa dihang ikaw mosalig kang Jehova, siya motabang kanimo. Kanunay kong gibutang sa hunahuna kining maong mga pulong ni Haring David, nga makaplagan sa Salmo 37:​25: ‘Nabata ako kaniadto, karon ako tigulang na, ug bisan pa wala ako makakita sa matarong nga gibiyaan, ni magpakilimos sa tinapay ang iyang kaliwat.’

“Nagakuha usab akog pagdasig gikan sa mga kasinatian sa tigulang-sa-espirituwal nga mga igsoong lalaki ug babaye nga giasoy diha sa Ang Bantayanang Torre. Si Jehova nga Diyos nagtabang kanila, busa nasayod ako nga siya magpadayon usab sa pagtabang kanako. Iyang gipanalanginan ang akong gamayng trabaho sa pagbaligyag fufu [usa ka pagkaong gikan sa balanghoy], ug ako nakaarang sa pagtagana sa akong inadlaw nga mga panginahanglan. Usahay kon ako wala gayoy kuwarta ug maghunahuna ko kon unsay buhaton, si Jehova magpadalag tawo nga mohatag kanakog regalo ug moingon, ‘Sister, palihog dawata kini.’ Si Jehova wala gayod magpahigawad kanako.”

Ang Bili sa Pagtuon sa Bibliya

Ang mga Saksi ni Jehova nagpabili sa pagtuon sa Pulong sa Diyos, ang Bibliya, ug lakip niana ang kabos sa taliwala kanila. Ang 60-anyos nga si John nag-alagad ingong usa ka payunir (usa ka bug-os-panahong magsasangyaw sa Gingharian) ug usa ka ministeryal nga alagad sa kongregasyon. Siya nagpuyo sa usa ka gubaon duha-ka-andanang tinukod nga giambitan sa 13 ka pamilya. Ang iyang lawak maoy usa ka seksiyon sa pasilyo sa unang andana, nga gibulag pinaagig playwod. Sa sulod dunay duha ka daang lingkoranan ug usa ka lamesa nga puno sa mga tabang sa pagtuon sa Bibliya. Siya matulog diha sa banig nga gama sa uhot.

Si John makasapig usa ka dolyar sa usa ka adlaw sa pagbaligyag tinapay, apan sa dihang gidili ang pag-importar ug trigo, siya nawad-an niining maong paagi sa panginabuhi. Siya miingon: “Akong nakaplagan nga may panahong lisod kaayo ang kinabuhi, apan nagpadayon ako sa pagpayunir. Si Jehova ang nagpalig-on kanako. Gibuhat ko ang bisan unsang trabaho nga akong makaplagan ug wala magsalig kang bisan kinsang tawo nga magsuportar o magpakaon kanako, bisag ang mga igsoon sa kongregasyon matinabangon kaayo. Gitabangan nila ako sa pagpangitag trabaho ug usahay mohatag kanakog mga gasa nga kuwarta.

“Mogahin akog panahon sa pagbasa sa Bibliya ug sa mga publikasyon sa Watch Tower Society. Magtuon ako sa kadlawon sa dihang ang balay wala pay timik ug magbasa sa halawom nga gabii kon kami adunay koryente. Ako nahibalo nga kinahanglang masunod ko ang akong personal nga pagtuon.”

Pagbansay sa mga Anak Alang sa Kinabuhi

Si Daniel usa ka biyudo nga may unom ka anak. Sa 1985 nawad-an siya sa trabaho nga iyang gihuptan sulod sa 25 ka tuig, apan nakakita siyag trabaho ingong tindero. “Lisod ang panginabuhi sa pamilya,” matod niya. “Karon makakaon kami kas-a lang sa usa ka adlaw. Kas-a, kami walay kaon sulod sa tulo ka adlaw. Moinom lang kami ug tubig aron makalahutay.”

Si Daniel nag-alagad ingong ansiyano sa kongregasyon. “Wala gayod ako mosipyat sa Kristohanong mga tigom, ug ako puliki kanunay sa teokratikanhong mga asaynment,” matod niya. “Kon adunay bisan unsang buluhaton nga pagabuhaton sa Kingdom Hall, akong tinoon nga ako maanaa. Ug kon malisod ang situwasyon, akong pahinumdoman ang akong kaugalingon sa mga pulong ni Pedro ngadto kang Jesus, nga girekord sa Juan 6:​68: ‘Ginoo, kinsa man ang among adtoan?’ Kon ako mohunong sa pag-alagad kang Jehova, asa man ako moadto? Ang mga pulong ni Pablo nga atong makita sa Roma 8:​35-​39 nagpatugob usab kanako sa determinasyon tungod kay kini nagpakita nga walay bisan unsa nga makapahimulag kanato gikan sa gugma sa Diyos ug ni Kristo. Kini ang tinamdan nga akong gitisok sa akong mga anak. Kanunay ko silang gisultihan nga dili gayod namo biyaan si Jehova.” Ang kasibot ni Daniel, inubanan sa regular nga pagtuon sa Bibliya sa pamilya, may positibong impluwensiya diha sa iyang mga anak.

Usa ka Espiritu sa Paghatag

Ang usa tingali maghunahuna nga kadtong nagkinabuhi sa hilabihang kakabos dili makaamot sa pinansiyal nga paagi sa pagpalambo sa mga intereses sa Gingharian. Apan dili kana tinuod. (Itandi ang Lucas 21:​1-4.) Ang pipila ka mga Saksi sa Ghana kansang pangunang okupasyon mao ra ang pagpanguma naglain ug bahin sa ilang yuta nga magamit sa pagpalambo sa mga intereses sa Gingharian sa Diyos. Sa dihang gibaligya ang abot sa maong luna sa ilang uma, ang kuwarta gigamit alang ra gayod sa maong katuyoan, nga naglakip sa mga pag-amot sa lokal nga Kingdom Hall sa mga Saksi ni Jehova.

Si Joan, nga nagpuyo sa Sentral Aprika, maoy usa ka payunir. Aron maatiman ang paralisadong bana ug upat ka ubang sakop sa pamilya nga nagsalig kaniya, siya namaligyag tinapay. Sa dihang ang kongregasyon nga iyang gitambongan nagkinahanglan ug mga lingkoranan alang sa Kingdom Hall, ang pamilya ni Joan mihukom sa pagdonar sa tanan nilang salapi. Wala nay nabilin kanila. Apan, sa sunod nga adlaw dihay tawo nga wala damhang mibayad sa iyang dugay nang utang, nga naghatag kanilag kuwarta nga wala na gayod nila laomi nga madawat pa!

Si Joan malipayon ug wala maghinobra sa kabalaka bahin sa kuwarta. “Gipatin-aw ko ang akong kahimtang ngadto kang Jehova diha sa pag-ampo, ug dayon mogula ako sa ministeryo sa kanataran. Nasayod kami nga wala kaayoy paglaom alang sa mas maayong mga panahon niining sistema sa mga butang. Bisan pa niana, kami nahibalo nga si Jehova motagana sa among mga panginahanglan.”

Pagpakita ug Kakugi

Ang mga Saksi ni Jehova nailhan pinaagi sa ilang gugma sa usag usa. (Juan 13:35) Kadtong adunay kuwarta motabang sa ilang mga isigka-Kristohanon nga nanginahanglan. Sagad kini moabot ingong gasa ug usahay ingong tabang sa pagpanarbaho.

Si Mark, nga nagpuyo sa Congo, nag-antos gumikan sa sanla. Kini nakapahibat sa iyang mga tudlo sa tiil ug kamot. Busa siya nagdepende sa mga kratses aron makalakaw. Sa dihang gihukom ni Mark nga moalagad kang Jehova, siya misugod sa paghimog dagkong mga kausaban sa iyang kinabuhi. Imbes magpalimos aron adunay makaon sama sa iyang gihimo niadto, siya misugod sa pagpanapi aron adunay makaon. Naghimo usab siyag mga tisa nga adobe, nga iyang ginabaligya.

Bisan pa sa iyang kakulian sa pisikal, si Mark nagpadayon sa pagtrabaho nga makugihon. Sa kadugayan siya nakapalit ug lote ug nagtukod ug kasarangang balay diha niana. Karong adlawa, si Mark nag-alagad ingong usa ka ansiyano sa kongregasyon ug gitahod pag-ayo sa lungsod nga iyang gipuy-an. Karon siya nagatabang sa uban nga mga nanginahanglan.

Siyempre, sa daghang dapit ang trabaho halos dili makaplagan. Usa ka Kristohanong ansiyano nga nag-alagad sa usa sa mga sangang buhatan sa Watch Tower Society sa Sentral Aprika misulat: “Daghang igsoon dinhi walay trabaho. Ang uban misulay sa pagmugna sa ilang kaugalingong mga trabaho, apan kini malisod. Daghan ang nangatarongan nga sanglit sila mag-antos bisan pa kon unsay ilang buhaton, sila nagahimog mga pagsakripisyo sa materyal ingong payunir nga mga ministro. Sa pagbuhat niana, daghan ang nakakaplag nga sila gipanalanginan nga mas madagayaon kay sa kon sila adunay trabaho nga may diyutayng suweldo o wala.”

Si Jehova Nagpalig-on sa Iyang Katawhan

Si Jesu-Kristo nag-ingon bahin sa iyang kaugalingon: “Ang mga zora may mga lungib ug ang mga langgam sa langit may mga batoganan, apan ang Anak sa tawo walay bisan diin nga kapahilunaan sa iyang ulo.” (Lucas 9:58) Sa susama, si apostol Pablo misulat: “Hangtod niining taknaa mismo kami padayon nga gipanggutom ug usab gipang-uhaw ug nakulangan sa besti ug ginadagmalan ug walay-puloy-anan.”​—1 Corinto 4:11.

Si Jesus ug Pablo mipili sa pagkinabuhing limitado sa materyal nga paagi aron sila sa bug-os makapangagpas sa ilang ministeryo. Daghang presenteng-adlaw nga mga Kristohanon maoy kabos tungod kay sila walay laing kapilian. Bisan pa niana, gipadapat nila ang mga prinsipyo sa Bibliya diha sa kinabuhi ug masibotong nagtinguha sa pag-alagad sa Diyos. Sila nasayod nga sila gimahal pag-ayo ni Jehova samtang ilang nasinati ang kamatinud-anon sa pasalig ni Jesus: “Nan, padayong pangitaa nga una ang gingharian ug ang iyang pagkamatarong, ug kining tanang ubang [materyal nga mga butang] idugang kaninyo.” (Mateo 6:​25-​33) Dugang pa, kining kabos nga mga alagad sa Diyos adunay pamatuod nga “ang panalangin ni Jehova​—mao ang nagapadato.”​—Proverbio 10:22.

[Mga footnote]

[Hulagway sa panid 7]

Ang pagtuon sa Bibliya gipabilhan sa mga tawo sa tibuok kalibotan