Ezequiel
9 Unya nadungog nako nga siya misinggit, nga nag-ingon: “Ipatawag kadtong mga magsilot sa siyudad, ang matag usa magbitbit sa iyang hinagiban sa paglaglag!”
2 Nakakita kog unom ka lalaki nga naggikan sa ibabaw nga ganghaan+ nga nag-atubang sa amihanan, ang matag usa nagbitbit sa iyang hinagiban nga pangdugmok; ug uban kanila dihay usa ka lalaki nga nagbestig lino, nga may tintiro sa sekretaryo* sa iyang hawak, ug sila misulod ug mibarog tapad sa halaran nga tumbaga.+
3 Unya ang himaya sa Diyos sa Israel+ mikayab gikan sa nahimutangan niini ibabaw sa mga kerubin ug mibalhin ngadto sa bakanan sa entrada sa balay,+ ug iyang gitawag ang lalaki nga nagbestig lino, nga may tintiro sa sekretaryo sa iyang hawak. 4 Si Jehova miingon kaniya: “Libota ang tibuok siyudad sa Jerusalem, ug markahi ang agtang sa mga tawo nga nanghupaw ug nag-agulo+ tungod sa tanang dulumtanang butang nga ginahimo diha sa siyudad.”+
5 Ug nadunggan nako nga giingnan niya ang uban: “Sunod mo kaniya ug libota ninyo ang siyudad ug panglaglag. Ayawg tugoting masubo ang inyong mata, ug ayaw mog kaluoy.+ 6 Pamatya ninyo ang tanang tigulang nga lalaki, batan-ong lalaki, ulay,* gagmayng bata, ug babaye.+ Apan ayawg duol kang bisan kinsa nga dunay marka.+ Pagsugod mo sa akong sangtuwaryo.”+ Busa gisugdan nilag pamatay ang tigulang nga mga lalaki nga diha sa atubangan sa balay.+ 7 Unya siya miingon kanila: “Hugawi ang balay ug pun-ag mga pinatay ang hawanan.+ Lakaw!” Busa sila milakaw ug gipamatay ang mga tawo sa siyudad.
8 Samtang gipamatay nila ang mga tawo, ako lang ang nahibilin, ug mihapa ko ug misinggit: “Intawon, Oh Soberanong Ginoong Jehova! Laglagon ba nimo ang tanang nahibilin sa Israel samtang gibubo nimo ang imong kasuko sa Jerusalem?”+
9 Busa siya miingon kanako: “Ang kasaypanan sa panimalay ni Israel ug Juda dako gayod kaayo.+ Ang yuta napuno sa pag-ula ug dugo,+ ug ang siyudad napuno sa pagkadaotan.+ Kay sila miingon, ‘Si Jehova mibiya sa yuta, ug si Jehova wala makakita.’+ 10 Apan bahin kanako, ang akong mata dili masubo; dili usab ko magpakitag kaluoy.+ Panimaslan nako sila sumala sa ilang mga dalan.”
11 Unya nakita nako ang tawo nga nagbestig lino, nga may tintiro sa iyang hawak. Siya mitaho: “Nabuhat na nako ang sumala gayod sa imong gisugo kanako.”