Ezequiel
1 Sa ika-30 nga tuig, sa ikalimang adlaw sa ikaupat nga bulan, samtang kauban ko sa mga nadestiyerong katawhan+ didto sa daplin sa suba sa Kebar,+ ang kalangitan nabuksan ug nakakita kog mga panan-awon sa Diyos. 2 Sa ikalimang adlaw sa bulan—nga mao, sa ikalimang tuig sa pagkadestiyero ni Haring Jehoiakin+— 3 si Ezequiel* nga anak ni Buzi nga saserdote nakadawat ug mensahe gikan kang Jehova sa daplin sa suba sa Kebar sa yuta sa mga Caldeanhon.+ Didto, ang kamot ni Jehova midangat kaniya.+
4 Samtang nagtan-aw ko, nakakita kog unos+ gikan sa amihanan, ug dihay dakong panganod ug nagkidlapkidlap nga kalayo*+ nga gilibotan ug sanag nga kahayag, ug sa tunga sa kalayo dihay butang nga samag sinubong.*+ 5 Ug sa taliwala niini dihay morag upat ka buhing linalang,+ ug ang hitsura sa matag usa may-ong sa tawo. 6 Ang matag usa may upat ka nawong ug upat ka pako.+ 7 Ang ilang mga tiil tul-id, ug ang ilang mga lapalapa sama nianang sa nating baka, ug kini naggilakgilak sama sa pinasinaw nga tumbaga.*+ 8 Duna silay mga kamot sa tawo ilalom sa ilang mga pako diha sa upat ka kiliran, ug silang upat may mga nawong ug mga pako. 9 Ang ilang mga pako nagdapatay. Dihang sila miabante, wala sila moliso; ang matag usa kanila paabante ang direksiyon.+
10 Kini ang hitsura sa ilang mga nawong: Ang matag usa sa upat may nawong sa tawo, sa tuo nawong sa leyon,+ sa wala nawong sa torong baka,+ ug ang matag usa sa upat may nawong+ sa agila.+ 11 Ingon niana ang ilang mga nawong. Ang ilang mga pako nagbukhad ibabaw nila. Ang matag usa may duha ka pako nga nagdapatay ug duha ka pako nga nagtabon sa ilang lawas.+
12 Ang matag usa kanila paabante ang direksiyon, nga nagpadulong sa direksiyon nga gipaadtoan kanila sa espiritu.+ Wala sila moliso samtang sila miabante. 13 Ug ang buhing mga linalang nahisamag nagsigang mga baga sa kalayo, ug dihay samag mga sulo nga nagngadto-nganhi taliwala sa buhing mga linalang, ug ang kilat mikidlap gikan sa kalayo.+ 14 Ug dihang ang buhing mga linalang nagngadto-nganhi, ang ilang paglihok nahisamag mga kidlap sa kilat.
15 Samtang nagtan-aw ko sa buhing mga linalang, nakakita kog usa ka ligid sa yuta tapad sa matag buhing linalang nga may upat ka nawong.+ 16 Ang mga ligid ug ang gambalay niini naggilakgilak samag batong krisolito, ug ang upat managsamag hitsura. Ug kon tan-awon ang hitsura ug gambalay niini daw ang usa ka ligid anaa sa sulod sa usa ka ligid.* 17 Dihang kini moabante, makaadto kini bisan asa sa upat ka direksiyon nga dili na kinahanglang moliso. 18 Ang mga yantas niini habog kaayo ug makapahingangha, ug ang yantas sa tanang upat punog mata sa palibot.+ 19 Dihang moabante ang buhing mga linalang, ang mga ligid moabante usab uban kanila, ug dihang ang buhing mga linalang mopataas gikan sa yuta, mopataas usab ang mga ligid.+ 20 Sila nagpadulong sa direksiyon nga gipaadtoan kanila sa espiritu, bisag asa moadto ang espiritu. Ang mga ligid mipataas uban kanila, kay ang espiritu nga naglihok sa buhing mga linalang* diha usab sa mga ligid. 21 Dihang sila miabante, kini miabante; ug dihang sila mihunong, kini usab mihunong; ug dihang sila mipataas gikan sa yuta, ang mga ligid mipataas uban kanila, kay ang espiritu nga naglihok sa buhing mga linalang diha usab sa mga ligid.
22 Ibabaw sa mga ulo sa buhing mga linalang dihay samag hawan nga mikidlap nga daw makapahinganghang yelo, nga binuklad sa ibabaw sa ilang mga ulo.+ 23 Ilalom sa hawan, ang ilang mga pako nagtul-id nga paingon sa usag usa. Ang matag usa dunay duha ka pako nga pangtabon sa usa ka bahin sa ilang mga lawas ug duha nga pangtabon sa pikas bahin. 24 Dihang nadungog nako ang kinapakapa sa ilang mga pako, sama kinig hinaganas sa nagbul-og nga katubigan, sama sa tingog sa Labing Gamhanan.+ Dihang sila miabante, sama kinig dahunog sa kasundalohan. Dihang sila mihunong, gipahuyhoy nila ang ilang mga pako.
25 Dihay tingog ibabaw sa hawan nga diha ibabaw sa ilang mga ulo. (Dihang sila mihunong, gipahuyhoy nila ang ilang mga pako.) 26 Ibabaw sa hawan nga diha ibabaw sa ilang mga ulo dihay samag batong sapiro,+ ug kini samag usa ka trono.+ Dihay naglingkod sa trono nga anaa sa ibabaw nga ang hitsura sama nianang sa tawo.+ 27 Nakakita kog butang nga naggilakgilak nga daw sinubong+ nga samag kalayo nga naggikan sa iyang hawak pataas; ug gikan sa iyang hawak paubos, nakakita kog butang nga samag kalayo.+ Siya gipalibotag kahayag 28 nga sama nianang sa balangaw+ diha sa panganod sa adlaw nga nag-ulan. Ingon niana ang sanag nga kahayag sa palibot. Nahisama kini sa himaya ni Jehova.+ Dihang nakita nako kini, ako mihapa ug nadungog nako ang tingog sa usa nga nagsulti.