19 Mas maayo pa nga pobre ug naglakaw nga may integridad+
Kay sa buangbuang ug nagsultig bakak.+
2 Ang tawong walay kahibalo dili maayo,+
Ug ang madalidalion nagpakasala.
3 Ang mga kabuang sa usa ka tawo maoy makadaot sa iyang dalan,
Ug ang iyang kasingkasing masuko kang Jehova.
4 Ang bahandi makapadaghag higala,
Pero ang pobre biyaan bisan sa iyang higala.+
5 Ang bakakong saksi masilotan gyod,+
Ug ang magsigeg pamakak dili makaikyas.+
6 Daghan ang gustong mauyonan sa tawong halangdon,
Ug ang tanan higala sa tawong manghatag ug regalo.
7 Ang pobre dumtan sa tanan niyang igsoon;+
Labaw na gyong molikay niya ang iyang mga higala!+
Magsige siyag patabang nila, pero way maminaw.
8 Kadtong nakabaton ug maalamong kasingkasing nahigugma sa iyang kaugalingon.+
Kadtong nagpabili sa katakos sa pag-ila molampos.+
9 Ang bakakong saksi masilotan gyod,
Ug ang magsigeg pamakak malaglag.+
10 Dili angay sa buangbuang ang luho nga kinabuhi;
Samot na nga dili angay sa sulugoon nga magmando sa mga prinsipe!+
11 Ang lawom nga pagsabot sa usa ka tawo mopugong gayod sa iyang kasuko,+
Ug dalayegon siya kon palabyon niya ang sayop.+
12 Ang grabeng kasuko sa hari samag ngulob sa leyon,+
Apan ang iyang pag-uyon samag yamog diha sa mga tanom.
13 Ang anak nga buangbuang kagul-anan sa iyang amahan,+
Ug ang palaaway nga asawa samag atop nga dili mohunong ug tulo.+
14 Ang balay ug bahandi panulondon gikan sa mga amahan,
Apan ang maalamong asawa gikan kang Jehova.+
15 Ang pagkatapolan makapahinanok sa pagkatulog,
Ug ang tapolan magutman.+
16 Kadtong motuman sa sugo magluwas sa iyang kinabuhi;+
Kadtong way pagpakabana sa iyang mga dalan mamatay.+
17 Kadtong magpakitag kaluoy sa mga pobre nagpahulam kang Jehova,+
Ug bayran Niya siya sa iyang gibuhat.+
18 Disiplinaha ang imong anak samtang naa pay paglaom,+
Ug likayi nga ikaw ang hinungdan sa iyang kamatayon.+
19 Ang tawong init ug ulo magbayad sa multa;
Kon luwason nimo siya, balikbalikon nimo kanag buhat.+
20 Paminaw sa tambag ug dawata ang disiplina,+
Aron mahimo kang maalamon sa umaabot.+
21 Daghag plano ang kasingkasing sa tawo,
Apan ang tambag ni Jehova mao ang matuman.+
22 Ang tilinguhaong butang diha sa usa ka tawo mao ang iyang maunongong gugma;+
Ug mas maayo pang mapobre kay sa mahimong bakakon.
23 Ang pagkahadlok kang Jehova moresultag kinabuhi;+
Kadtong naa niini maayog pahulay, layo sa kapeligrohan.+
24 Gilubong sa tapolan ang iyang kamot sa panaksang pangkombira,
Apan kapoyan na siyang mohungit.+
25 Bunali ang mabiaybiayon,+ aron ang walay kasinatian mahimong maalamon,+
Ug badlonga ang tawong may pagsabot, aron madugangan ang iyang kahibalo.+
26 Kadtong nagmaltratar sa iyang amahan ug nag-abog sa iyang inahan
Maoy anak nga magpahinabog kaulawan ug pagtamay.+
27 Anak ko, kon dili na ka maminaw sa disiplina,
Matipas ka gikan sa mga pulong sa kahibalo.
28 Ang walay pulos nga saksi nagtamay sa hustisya,+
Ug lamyon sa baba sa daotan ang makadaot.+
29 Ang paghukom giandam para sa mga mabiaybiayon,+
Ug ang mga bunal para sa likod sa mga buangbuang.+