Ezequiel
30 Ug nakadawat na usab kog mensahe gikan kang Jehova, nga nag-ingon: 2 “Anak sa tawo, panagna ug sulti, ‘Kini ang giingon sa Soberanong Ginoong Jehova:
“Pagminatay mo, ‘Pagkaalaot, ang adlaw nagsingabot na!’
3 Kay ang adlaw duol na, oo, ang adlaw ni Jehova duol na.+
Kini mahimong adlaw sa mga panganod,+ ang gitakdang panahon sa kanasoran.+
4 Usa ka espada ang moabot batok sa Ehipto, ug magkaguliyang pag-ayo ang Etiopia dihang ang pinatay mapukan sa Ehipto;
Panguhaon ang bahandi niini ug lumpagon ang mga pundasyon niini.+
5 Ang Etiopia,+ Put,+ Lud, ug ang tanang gikan sa ubang kanasoran,
Ug ang Kub, uban ang mga anak sa yuta sa pakigsaad,*
Silang tanan mangapukan pinaagi sa espada.”’
6 Kini ang giingon ni Jehova:
‘Ang mga tigpaluyo sa Ehipto mangapukan usab,
Ug ang garbosong gahom niini ipaubos.’+
“‘Gikan sa Migdol+ hangtod sa Syene+ sila mangapukan sa yuta pinaagi sa espada,’ miingon ang Soberanong Ginoong Jehova. 7 ‘Sila mahimong labing awaaw sa mga yuta, ug ang mga siyudad niini mahimong labing awaaw sa mga siyudad.+ 8 Ug sila makaila gayod nga ako si Jehova dihang sugniban nakog kalayo ang Ehipto ug ang tanang kaalyado niini mangalaglag. 9 Nianang adlawa magpadala kog mga mensahero nga magsakayg mga barko aron pakurogon ang masaligon sa kaugalingon nga Etiopia; magkaguliyang sila pag-ayo sa adlaw sa kalaglagan sa Ehipto, kay kini moabot gayod.’
10 “Kini ang giingon sa Soberanong Ginoong Jehova: ‘Laglagon nako ang mga panon sa katawhan sa Ehipto pinaagi sa kamot ni Haring Nabucodonosor* sa Babilonya.+ 11 Siya ug ang iyang kasundalohan, ang labing pintas sa kanasoran,+ pasudlon aron laglagon ang yuta. Bakyawon nila ang ilang espada batok sa Ehipto ug pun-on ang yuta ug mga pinatay.+ 12 Pamalahon nako ang mga kanal sa Nilo+ ug ibaligya nako ang yuta ngadto sa kamot sa daotang mga tawo. Himoon nakong biniyaan ang yuta ug ang tanang anaa niini pinaagi sa kamot sa mga langyaw.+ Ako, si Jehova, ang nagsulti niini.’
13 “Kini ang giingon sa Soberanong Ginoong Jehova: ‘Laglagon usab nako ang makaluod nga mga idolo* ug hanawon ang walay pulos nga mga diyos sa Nop.*+ Wala na unyay prinsipe* gikan sa yuta sa Ehipto, ug ipahinabo nako nga dunay kahadlok sa yuta sa Ehipto.+ 14 Himoon nakong biniyaan ang Patros+ ug sugniban ug kalayo ang Zoan ug hukman ang No.*+ 15 Ibubo nako ang akong kasuko sa Sin, ang kuta sa Ehipto, ug laglagon nako ang katawhan sa No. 16 Sugniban nakog kalayo ang Ehipto; ug ang Sin malisang pag-ayo ug ang paril sa No bangagan ug ang Nop* atakehon sa adlawng dako! 17 Ang mga batan-ong lalaki sa On* ug Pibeset mangapukan sa espada, ug ang mga siyudad mangabihag. 18 Sa Tehapnes ang adlaw mongitngit dihang balion nako didto ang mga yugo sa Ehipto.+ Ang iyang garbosong gahom matapos,+ tabonan siya sa kapanganoran, ug ang iyang mga lungsod mangabihag.+ 19 Hukman nako ang Ehipto, ug sila makaila gayod nga ako si Jehova.’”
20 Ug sa ikapitong adlaw sa unang bulan sa ika-11 nga tuig, nakadawat kog mensahe gikan kang Jehova, nga nag-ingon: 21 “Anak sa tawo, gibali nako ang bukton sa Paraon nga hari sa Ehipto; dili kini bugkosan aron dili kini maayo o dili kini bendahean aron dili kini makabatog kusog sa pagbakyaw sa espada.”
22 “Busa kini ang giingon sa Soberanong Ginoong Jehova: ‘Ania, ako batok sa Paraon nga hari sa Ehipto,+ ug balion nako ang iyang mga bukton, ang lig-on ug ang bali,+ ug ipahinabo nako nga mahulog gikan sa iyang kamot ang espada.+ 23 Unya patibulaagon nako ang mga Ehiptohanon taliwala sa kanasoran ug patibuagsahon nako sila taliwala sa kayutaan.+ 24 Palig-onon nako ang mga bukton* sa hari sa Babilonya+ ug ibutang nako ang akong espada sa iyang kamot,+ ug balion nako ang mga bukton sa Paraon, ug siya moagulog kusog samag himalatyong tawo sa iyang atubangan.* 25 Palig-onon nako ang mga bukton sa hari sa Babilonya, apan ang mga bukton sa Paraon manghuyhoy; ug sila makaila gayod nga ako si Jehova dihang ibutang nako ang akong espada sa kamot sa hari sa Babilonya ug gamiton niya kini batok sa yuta sa Ehipto.+ 26 Ug patibulaagon nako ang mga Ehiptohanon taliwala sa kanasoran ug patibuagsahon nako sila taliwala sa kayutaan,+ ug sila makaila gayod nga ako si Jehova.’”