Jeremias
47 Kini ang mensahe ni Jehova kang propetang Jeremias bahin sa mga Filistehanon,+ sa wala pa laglaga sa Paraon ang Gaza. 2 Kini ang giingon ni Jehova:
“Tan-awa! Ang katubigan naggikan sa amihanan.
Mahimo kining nagbul-og nga katubigan.
Ug lunopan niini ang yuta ug ang tanang anaa niini,
Ang siyudad ug ang mga nagpuyo niini.
Ang mga tawo maninggit,
Ug ang tanang nagpuyo sa yuta motiyabaw.
3 Sa tinagaktak sa mga tiil sa iyang mga laking kabayo,
Sa kabanha sa iyang mga karong panggubat
Ug sa dinahunog sa iyang mga ligid,
Ang mga amahan dili na gani molingi sa ilang mga anak,
Kay ang ilang mga kamot manghuyhoy,
4 Kay ang nagsingabot nga adlaw molaglag sa tanang Filistehanon;+
Wad-on niini ang matag nahibiling kaalyado sa Tiro+ ug Sidon.+
Ang Askelon gipahilom.+
Hangtod kanus-a ka nga dili mopahulay?
Balik sa imong sakoban.
Pahulay ug paghilom.
7 Unsaon man pagpahulay niini
Nga gisugo man kini ni Jehova?
Batok sa Askelon ug sa baybayon,+
Didto niya kini gitudlo.”