Ezequiel

34 Nakadawat na usab kog mensahe gikan kang Jehova, nga nag-ingon: 2 “Anak sa tawo, panagna batok sa mga magbalantay sa Israel. Panagna, ug ingna ang mga magbalantay, ‘Kini ang giingon sa Soberanong Ginoong Jehova: “Alaot ang mga magbalantay sa Israel,+ nga nagapakaon sa ilang kaugalingon! Dili ba ang panon man ang angayng pakan-on sa mga magbalantay?+ 3 Ginakaon ninyo ang tambok, nagabesti mog delana,* ug ginaihaw ninyo ang kinatambokang hayop,+ apan wala ninyo pakan-a ang panon.+ 4 Wala ninyo palig-ona ang huyang o ayoha ang nasakit o bendahei ang naangol o dalhag balik ang nasaag o pangitaa ang nawala;+ hinuon, gimandoan ninyo sila sa mapig-oton ug pintas nga paagi.+ 5 Busa sila nagkatibulaag kay walay magbalantay;+ sila nagkatibulaag ug nahimong pagkaon sa tanang ihalas nga mananap sa kapatagan. 6 Ang akong mga karnero nangahisalaag diha sa tanang kabukiran ug sa matag habog nga bungtod; ang akong mga karnero nangatibulaag sa tibuok nawong sa yuta ug walay usa nga nangita kanila.

7 “‘“Busa, kamong mga magbalantay, patalinghogi ang pulong ni Jehova: 8 ‘“Ingon nga ako buhi,” miingon ang Soberanong Ginoong Jehova, “kay ang akong mga karnero nahimong tukbonon ug pagkaon sa tanang ihalas nga mananap sa kapatagan, kay ang akong mga karnero walay magbalantay ug wala sila pangitaa sa akong mga magbalantay; hinuon, padayon nilang gipakaon ang ilang kaugalingon ug wala nila pakan-a ang akong mga karnero,”’ 9 busa, kamong mga magbalantay, patalinghogi ang pulong ni Jehova. 10 Kini ang giingon sa Soberanong Ginoong Jehova: ‘Batok ko sa mga magbalantay, ug papanubagon nako sila tungod sa akong mga karnero,* ug dili na nako sila tugotang mopakaon* sa akong mga karnero,+ ug dili na pakaonon sa mga magbalantay ang ilang kaugalingon. Luwason nako ang akong mga karnero gikan sa ilang baba, ug dili na sila mahimong ilang pagkaon.’”

11 “‘Kay kini ang giingon sa Soberanong Ginoong Jehova: “Ania ako, ug ako mismo ang mangita sa akong mga karnero, ug atimanon nako sila.+ 12 Atimanon nako ang akong mga karnero samag magbalantay nga nakakaplag sa iyang nangatibulaag nga mga karnero ug nagpakaon kanila.+ Luwason nako sila gikan sa tanang dapit diin sila nangatibulaag sa adlaw sa mga panganod ug sa kangitngit.+ 13 Pagawason nako sila gikan sa mga katawhan ug tigomon sila gikan sa kayutaan ug dad-on sila ngadto sa ilang yuta ug pakan-on sila sa kabukiran sa Israel,+ sa daplin sa kasapaan ug sa tanang puloy-anang mga dapit sa yuta. 14 Pasibsibon nako sila sa usa ka maayong sibsibanan, ug sila manibsib sa habog nga kabukiran sa Israel.+ Didto manghigda sila sa maayong sibsibanan,+ ug manibsib sila sa maayo kaayong sibsibanan sa kabukiran sa Israel.”

15 “‘“Ako mismo ang magpakaon sa akong mga karnero,+ ug ako mismo ang magpahigda kanila,”+ miingon ang Soberanong Ginoong Jehova. 16 “Pangitaon nako ang nawala,+ dad-on nakog balik ang nahisalaag, bendahean nako ang naangol, ug palig-onon nako ang naluya; apan laglagon nako ang tambok ug ang kusgan. Hukman nako sila ug ihatag kanila ang nahiangayng silot.”

17 “‘Kon bahin kaninyo, akong mga karnero, kini ang giingon sa Soberanong Ginoong Jehova: “Hapit na kong maghukom taliwala sa mga karnero, taliwala sa mga laking karnero ug sa mga laking kanding.+ 18 Dili pa ba igo kaninyo nga mokaon sa kinamaayohang mga sibsibanan? Yatakan ba usab ninyo ang uban pa ninyong sibsibanan? Ug human makainom sa kinatin-awang tubig, hugawan ba ninyo ang tubig pinaagi sa pagtunobtunob niini? 19 Karon mokaon ba ang akong mga karnero sa sibsibanan nga inyong giyatakan ug moinom sa tubig nga nahugaw sa inyong pagtunobtunob?”

20 “‘Busa kini ang giingon sa Soberanong Ginoong Jehova kanila: “Ania ako, ug ako mismo ang maghukom tali sa tambok nga karnero ug sa niwang nga karnero, 21 kay pinaagi sa inyong kilid ug abaga padayon ninyong ginaduso ang tanang masakiton, ug pinaagi sa inyong mga sungay padayon ninyo silang ginasungag hangtod nga nangatibulaag sila sa layo. 22 Ug luwason nako ang akong mga karnero, ug dili na sila mahimong tukbonon;+ ug maghukom ko taliwala sa mga karnero. 23 Magpatungha kog usa ka magbalantay alang kanila,+ ang akong alagad nga si David,+ ug pakan-on niya sila. Siya mismo ang magpakaon kanila ug mahimong ilang magbalantay.+ 24 Ug ako, si Jehova, mahimong ilang Diyos,+ ug ang akong alagad nga si David mahimong ilang pangulo.+ Ako mismo, si Jehova, ang nagsulti.

25 “‘“Ug maghimo kog pakigsaad sa pakigdait uban kanila,+ ug wagtangon nako sa yuta ang bangis nga ihalas nga mga mananap,+ aron luwas silang magpuyo sa kamingawan ug mangatulog sa kalasangan.+ 26 Sila ug ang mga dapit palibot sa akong bungtod himoon nakong panalangin,+ ug magpaulan ko sa hustong panahon. Moulan ug mga panalangin.+ 27 Ang mga kahoy sa kapatagan mamunga, ug ang yuta maghatag sa abot niini,+ ug luwas silang magpuyo sa yuta. Ug sila makaila gayod nga ako si Jehova dihang balion nako ang ilang yugo+ ug dihang luwason nako sila gikan niadtong nag-ulipon kanila. 28 Dili na sila mahimong tukbonon sa mga nasod, ug dili na sila tukbon sa ihalas nga mga mananap sa yuta, ug magpuyo sila sa kasegurohan, nga walay usa nga makapahadlok kanila.+

29 “‘“Maghimo ko alang kanila ug uma sa kabantog,* ug dili na sila mamatay sa gutom diha sa yuta,+ ug dili na sila pakaulawan sa kanasoran.+ 30 ‘Unya sila mahibalo gayod nga ako, si Jehova nga ilang Diyos, nagauban kanila ug nga sila, ang panimalay sa Israel, mao ang akong katawhan,’+ miingon ang Soberanong Ginoong Jehova.”’

31 “‘Kon bahin kaninyo, akong mga karnero,+ ang mga karnero nga akong giatiman, kamo mga tawo lang, ug ako ang inyong Diyos,’ miingon ang Soberanong Ginoong Jehova.”