Jeremias
18 Kini ang mensahe nga nadawat ni Jeremias gikan kang Jehova: 2 “Lakaw ug lugsong ngadto sa balay sa magkukulon,+ ug duna koy isulti nimo didto.”
3 Busa milugsong ko ngadto sa balay sa magkukulon, ug duna siyay gihimong sudlanan diha sa mga ligid sa magkukulon. 4 Apan ang sudlanan nga gihimo sa magkukulon nadaot diha sa iyang kamot. Busa gihimo na lang niya kinig laing sudlanan, sumala sa kon unsay iyang nakitang mohaom niini.*
5 Unya nadawat nako ang mensahe ni Jehova, nga nag-ingon: 6 “‘Dili ba nako mahimo kaninyo ang sama sa gihimo niini nga magkukulon, Oh panimalay ni Israel?’ miingon si Jehova. ‘Tan-awa! Sama nga ang yutang kulonon anaa sa kamot sa magkukulon, kamo usab anaa sa akong kamot, Oh panimalay ni Israel.+ 7 Matag higayon nga maghisgot ko bahin sa pagluka ug sa paglumpag ug sa paglaglag sa usa ka nasod o gingharian,+ 8 unya kanang nasora mobiya sa pagkadaotan niini nga akong gihukman, bag-ohon usab nako ang akong hunahuna* bahin sa katalagman nga ipahamtang unta nako niini.+ 9 Apan matag higayon nga maghisgot ko bahin sa pagtukod ug pagpatindog* ug usa ka nasod o gingharian, 10 unya buhaton niini kon unsay daotan sa akong mga mata ug dili mosunod sa akong tingog, bag-ohon nako ang akong hunahuna* bahin sa maayo nga himoon unta nako niini.’
11 “Karon sultihi, palihog, ang mga tawo sa Juda ug ang mga molupyo sa Jerusalem, ‘Kini ang giingon ni Jehova: “Ania, nag-andam* kog katalagman ug naghunahunag butang nga ikadaot ninyo. Palihog, biya sa inyong daotang mga dalan, ug bag-oha ang inyong mga dalan ug binuhatan.”’”+
12 Apan sila miingon: “Wala nay paglaom!+ Kay mosubay mi sa among kaugalingong panghunahuna, ug buhaton gyod sa matag usa kanamo ang sumala sa iyang daotang kasingkasing.”+
13 Busa kini ang giingon ni Jehova:
“Palihog, pangutana mo sa mga nasod.
Kinsay nakadungog ug sama niini?
Ang ulay* sa Israel naghimog kinangil-arang butang.+
14 Mahanaw ba ang mga niyebe diha sa mga bato sa mga bakilid sa Lebanon?
O mauga ba ang bugnawng tubig nga nagaagos gikan sa layong dapit?
15 Apan ang akong katawhan nakalimot kanako.+
Kay sila nagahalad* ngadto sa mga butang nga walay pulos,+
Ug gipandol nila ang mga tawo sa ilang mga dalan, ang karaang mga agianan,+
Aron didto na mosubay sa mga dalan nga libaongon ug dili patag,
Ang matag usa nga moagi niini motutok sa kahadlok ug maglingolingo.+
17 Sama sa hanging sidlakan, patibulaagon nako sila sa atubangan sa kaaway.
Ipakita nako kanila ang akong likod, dili ang akong nawong, sa adlaw sa ilang katalagman.”+
18 Ug sila miingon: “Dali, magplano ta batok kang Jeremias,+ kay ang atong mga saserdote padayong magtudlo kanato sa balaod,* ang maalamong mga tawo padayong maghatag kanatog tambag, ug ang mga propeta padayong magpahayag kanato sa pulong. Dali ug mosulti kita batok kaniya,* ug dili nato pamation ang iyang isulti.”
19 Pamatia ko, Oh Jehova,
Ug patalinghogi ang ginasulti sa akong mga kaaway.
20 Angay bang balosan ug daotan ang maayo?
Kay nagkalot silag gahong alang sa akong kinabuhi.+
Hinumdomi nga mibarog ko sa imong atubangan aron mosultig maayong mga butang bahin kanila,
Aron mawala ang imong kasuko kanila.
Ang ilang mga asawa mamatyan untag mga anak ug mabalo.+
Ang ilang mga lalaki mangamatay unta sa makamatayng hampak,
Ang ilang batan-ong mga lalaki mangamatay unta pinaagi sa espada sa panggubatan.+
22 Ipadungog ang usa ka singgit gikan sa ilang mga balay
Dihang kalit kang magpadala kanilag mga bandido.
Kay nagkalot silag gahong sa pagdakop kanako
Ug nagbutang ug mga bitik alang sa akong mga tiil.+
Ayawg taboni ang ilang kasaypanan,
Ug ayawg papasa ang ilang sala sa imong atubangan.