Unang Cronicas

20 Pagsugod sa tuig,* sa panahon nga ang mga hari mosulong sa pagpakiggubat, gipangulohan ni Joab+ ang kasundalohan sa pagsulong ug paggun-ob sa yuta sa mga Ammonhanon; iyang giadto ug gilikosan ang Raba,+ samtang si David nagpabilin sa Jerusalem.+ Giatake ni Joab ang Raba ug gilumpag kini.+ 2 Unya gikuha ni David ang korona sa ulo ni Malcam, ug iyang nasayran nga kini motimbang ug usa ka talanton* nga bulawan, ug kini may bililhong mga bato; ug gibutang kini sa ulo ni David. Gidala usab niya ang daghang inilog gikan sa siyudad.+ 3 Ug iyang gibihag ang katawhan sa siyudad ug gipatrabaho sila+ gamit ang gabas alang sa bato, hait nga mga himan nga puthaw, ug mga atsa. Mao kanay gihimo ni David sa tanang siyudad sa mga Ammonhanon. Sa kataposan si David ug ang tibuok kasundalohan namauli sa Jerusalem.

4 Human niini, nahitabo ang gubat sa Gezer batok sa mga Filistehanon. Niadtong panahona gipatay ni Sibecai+ nga Husahanon si Sipai, nga usa sa mga kaliwat sa mga Repaim,+ ug sila napildi.

5 Ug diha na poy nahitabo nga gubat batok sa mga Filistehanon, ug gipatay ni Elhanan nga anak ni Jair si Lami nga igsoon ni Goliat+ nga Gitihanon, kansang bangkaw dunay kuptanan nga sama ka dako sa likisan sa mga tighablon.+

6 May gubat na usab sa Gat,+ diin didto may usa ka tawo nga talagsaon ang kadako,+ ug ang iyang mga kamot ug tiil tag-6 ug tudlo, 24 tanan; ug siya kaliwat usab sa mga Repaim.+ 7 Siya kanunayng nagbiaybiay+ sa Israel. Busa gipatay siya ni Jonatan nga anak ni Simea,+ nga igsoon ni David.

8 Kini sila maoy mga kaliwat sa mga Repaim+ sa Gat,+ ug sila gipamatay ni David ug sa iyang mga tawo.