Job
3 Human niini si Job misulti ug gitunglo ang adlaw nga natawo siya.*+ 2 Si Job miingon:
3 “Maayo pag wala na lang moabot ang adlaw nga gipakatawo ko,+
Ug ang gabii nga may miingon: ‘Gipanamkon ang usa ka bata!’
4 Mingitngit unta kadtong adlawa.
Wad-on unta sa Diyos kadtong adlawa sa iyang panumdoman;
Wala untay kahayag nga misidlak niana.
5 Gilamoy unta kadto sa hilabihang kangitngit.*
Gitabonan unta kadto sa baga nga dag-om.
Gidaog unta sa makahahadlok nga kangitngit ang kahayag niadtong adlawa.
6 Kadtong gabhiona nalukop unta ug hilabihang kangitngit;+
Wala unta kadto magsadya duyog sa mga adlaw sa tuig,
Wala unta kadto mahilakip sa bisan unsang bulan.
7 Nagmamingawon unta kadtong gabhiona;
Wala untay nadunggang hugyaw sa kalipay.
9 Mingitngit unta ang mga bituon sa banagbanag niini;
Gipahulat unta kadto sa kahayag ug walay mitunghang kahayag,
Ug wala unta kadto pakit-a sa mga dan-ag sa banagbanag.
11 Nganong wala man ko mamatay sa tagoangkan?
Nganong wala ko mamatay sa akong pagkahimugso?+
12 Nganong diha pa may mga tuhod nga nagsabak kanako
Ug mga dughan nga nagpasuso kanako?
13 Kay naghigda na unta ko karon nga malinawon;+
Natulog na unta ko ug nagpahulay+
14 Uban sa mga hari sa yuta ug sa ilang mga magtatambag,
Kinsa nagtukod alang sa ilang kaugalingon ug mga dapit nga gun-ob na karon,*
15 O uban sa mga prinsipe nga dunay bulawan,
Kansang mga balay napunog plata.*
16 O nganong wala ko mahisama sa bata nga nakuha,
Sama sa mga bata nga wala gayod makakita sa kahayag?
17 Sa kamatayon bisan ang mga daotan wala na ginasamok;
Didto ang mga gikapoy pag-ayo nakapahulay na.+
18 Didto ang mga binilanggo nagmalinawon;
Dili na nila madunggan ang tingog sa usa nga nagpugos kanila sa pagtrabaho.
20 Nganong naghatag siyag kahayag sa usa nga nag-antos
Ug kinabuhi niadtong anaa sa grabeng kalisdanan?+
21 Nganong kadtong nangandoy ug kamatayon wala mamatay?+
Sila nagapangita niini labaw pa kay sa natagong mga bahandi,
22 Sila nagsadya pag-ayo,
Sila nalipay dihang ilang nakaplagan ang lubnganan.
24 Kay ang akong pagkaon napulihag pagpanghupaw,+
Ug ang akong pag-agulo+ samag dinaguok sa tubig nga nag-agos.
25 Kay ang akong gikalisangan midangat kanako,
Ug ang akong gikahadlokan nahitabo kanako.
26 Ako walay kalinaw, walay kahilom, walay pahulay,
Bisan pa niana wala gihapon ko lung-i ug kalisdanan.”