KORAL NGA TANOM, ALAD

Ang mga prutasan ug mga parasan sagad nga gilibotan sa mga koral nga tanom, bagang mga lumbay sa tunokong mga tanom, aron maprotektahan ang dapit gikan sa mga kawatan ug sa mga pagdaot sa mga hayop. (Isa 5:5) Ang Kasulatan migamit sa ekspresyong ‘pagbutang ug alad’ sa mahulagwayong diwa nga nagpasabot sa paghatag ug proteksiyon. (Job 1:10) Sa laing bahin, ang ‘pag-alad’ gigamit aron ilarawan ang paghimog mga babag, o mga ali, nga nagbutang sa usa ka tawo o bisan sa usa ka nasod diha sa makaluluoy ug sinalikway nga kahimtang nga walay kalutsan. (Job 3:23; Os 2:6; itandi ang Job 19:8; Lam 3:7-9.) Maylabot sa pagkadunot sa moral nga naglungtad taliwala sa mga Israelinhon sa iyang adlaw, si Miqueas misulat nga “ang labing matul-id kanila daotan pa kay sa koral nga sampinit,” sa ato pa, tunokon, makasakit, ug makadaot.​—Miq 7:4.