Jeremias

36 Karon sa ikaupat nga tuig sa pagmando ni Jehoiakim+ nga anak ni Josias, ang hari sa Juda, si Jeremias nakadawat ug mensahe gikan kang Jehova, nga nag-ingon: 2 “Pagkuhag linukot nga basahon* ug isulat niini ang tanang pulong nga akong gisulti kanimo batok sa Israel ug sa Juda+ ug sa tanang nasod,+ sukad sa unang adlaw nga nakigsulti ko nimo sa panahon ni Josias hangtod niining adlawa.+ 3 Basin pag kon madunggan sa panimalay ni Juda ang tanang katalagman nga akong gihunahuna nga ipahamtang kanila, sila mobiya sa ilang daotang mga dalan, aron pasayloon nako ang ilang kasaypanan ug ang ilang sala.”+

4 Unya gitawag ni Jeremias si Baruk+ nga anak ni Nerias, ug gidiktar ni Jeremias ang tanang pulong nga gisulti ni Jehova kaniya, ug gisulat kini ni Baruk diha sa linukot nga basahon.*+ 5 Dayon gisugo ni Jeremias si Baruk: “Gidid-an ko sa pagsulod sa balay ni Jehova. 6 Busa ikaw ang mosulod, ug basahag kusog ang mga pulong ni Jehova gikan sa linukot nga basahon nga akong gidiktar aron imong isulat. Basaha kini ngadto sa katawhan sa balay ni Jehova sa adlaw sa pagpuasa; busa basahon nimo kini sa tanang katawhan sa Juda nga manganhi gikan sa ilang mga siyudad. 7 Tingalig sila moampo kang Jehova alang sa pabor ug ang matag usa kanila mobiya sa iyang daotang mga dalan, kay si Jehova miingon nga dako ang iyang kasuko ug kapungot niini nga katawhan.”

8 Busa gibuhat ni Baruk nga anak ni Nerias ang tanang gisugo kaniya ni propetang Jeremias. Iyang gibasag kusog didto sa balay ni Jehova ang mga pulong ni Jehova gikan sa linukot nga basahon.+

9 Karon sa ikasiyam nga bulan sa ikalimang tuig sa pagmando ni Jehoiakim+ nga anak ni Josias, ang hari sa Juda, ang tanang katawhan sa Jerusalem ug ang tanang katawhan nga nangadto sa Jerusalem gikan sa mga siyudad sa Juda nagmantalag pagpuasa sa atubangan ni Jehova.+ 10 Unya gibasag kusog ni Baruk sa balay ni Jehova ang mga pulong ni Jeremias gikan sa linukot nga basahon. Gibasa niya kini ngadto sa tanang katawhan didto sa lawak* ni Gemarias+ nga anak ni Sapan+ nga magkokopya,* sa ibabaw nga hawanan, sa entrada sa bag-ong ganghaan sa balay ni Jehova.+

11 Dihang nadunggan ni Micaias nga anak ni Gemarias nga anak ni Sapan ang tanang pulong ni Jehova gikan sa linukot nga basahon, 12 siya miadto sa balay* sa hari, ngadto sa lawak sa sekretaryo. Ang tanang prinsipe* naglingkod didto: si Elisama+ nga sekretaryo, si Delaias nga anak ni Semaias, si Elnatan+ nga anak ni Akbor,+ si Gemarias nga anak ni Sapan, si Zedekias nga anak ni Hananias, ug ang tanang ubang prinsipe. 13 Gisulti ni Micaias kanila ang tanang pulong nga gikan sa linukot nga basahon nga iyang nadungog dihang gibasa kini ni Baruk sa katawhan.

14 Unya gisugo sa tanang prinsipe si Jehudi nga anak ni Netanias nga anak ni Selemias nga anak ni Cusi nga adtoon si Baruk ug sultihan: “Dali ug dad-a ang linukot nga basahon nga imong gibasa sa katawhan.” Busa gidala ni Baruk nga anak ni Nerias ang linukot nga basahon ug miadto siya kanila. 15 Sila miingon kaniya: “Lingkod, palihog, ug basaha kinig kusog kanamo.” Busa gibasa kini ni Baruk kanila.

16 Karon pagkadungog gyod nila sa tanang pulong, nagtinan-away sila sa kalisang, ug sila miingon kang Baruk: “Kinahanglan gyod namong isulti kining tanan sa hari.” 17 Ug ilang gipangutana si Baruk: “Palihog, sultihi mi kon giunsa nimo pagsulat kining tanan? Gidiktar ba kini ni Jeremias kanimo?” 18 Si Baruk mitubag: “Gidiktar niya kining tanan kanako, ug gisulat nako kini niini nga linukot nga basahon pinaagig tinta.” 19 Ang mga prinsipe miingon kang Baruk: “Lakaw, panago mo ni Jeremias, ug ayawg ipahibalo kang bisan kinsa kon asa mo.”+

20 Unya gibutang nila ang linukot nga basahon didto sa lawak ni Elisama nga sekretaryo, ug sila miadto sa hari, ngadto sa hawanan, ug giingnan ang hari sa tanan nilang nadungog.

21 Busa gipakuha sa hari kang Jehudi+ ang linukot nga basahon, ug gikuha niya kini gikan sa lawak ni Elisama nga sekretaryo. Gibasa kini ni Jehudi ngadto sa hari ug sa tanang prinsipe nga nagtindog duol sa hari. 22 Ang hari naglingkod sa balay nga para sa tingtugnaw, sa ikasiyam nga bulan,* nga may nagdilaab nga bagahan sa iyang atubangan. 23 Human makabasa si Jehudi ug tulo o upat ka lindog,* ginaputol sa hari kanang bahina pinaagi sa kutsilyo sa sekretaryo ug ginaitsa kana sa nagdilaab nga kalayo sa bagahan, hangtod nga nahurot ug kasunog ang tibuok linukot nga basahon diha sa bagahan. 24 Ug wala sila mangalisang; wala usab gisia sa hari ug sa tanan niyang alagad nga nakadungog niining tanang pulong ang ilang mga besti. 25 Bisag nagpakiluoy sa hari si Elnatan,+ Delaias,+ ug Gemarias+ nga dili sunogon ang linukot nga basahon, wala siya mamati kanila. 26 Dugang pa, gisugo sa hari si Jerameel nga anak sa hari, si Seraias nga anak ni Azriel, ug si Selemias nga anak ni Abdeel nga dakpon si Baruk nga sekretaryo ug si Jeremias nga propeta, apan gitagoan sila ni Jehova.+

27 Ug nakadawat na usab si Jeremias ug mensahe gikan kang Jehova human sunoga sa hari ang linukot nga basahon nga naundan sa mga pulong nga gisulat ni Baruk sumala sa pagdiktar ni Jeremias,+ nga nag-ingon: 28 “Pagkuhag laing linukot nga basahon ug isulat niini ang tanang pulong nga nasulat sa unang linukot nga basahon, nga gisunog ni Jehoiakim nga hari sa Juda.+ 29 Ug isulti kini batok kang Haring Jehoiakim sa Juda, ‘Kini ang giingon ni Jehova: “Gisunog nimo kini nga linukot nga basahon ug miingon ka, ‘Nganong gisulat nimo kini dinhi: “Ang hari sa Babilonya moanhi gayod ug maglaglag niining yutaa ug hanawon niya ang mga tawo ug mananap nga anaa niini”?’+ 30 Busa kini ang giingon ni Jehova batok kang Haring Jehoiakim sa Juda, ‘Wala siyay kaliwat nga magpabiling maglingkod sa trono ni David,+ ug ang iyang patayng lawas pasagdang maladlad sa init sa adlaw ug sa tun-og sa gabii.+ 31 Siya ug ang iyang mga kaliwat* ug ang iyang mga alagad akong papanubagon sa ilang kasaypanan, ug ipahamtang nako kanila ug sa mga molupyo sa Jerusalem ug sa mga tawo sa Juda ang tanang katalagman nga akong gisulti batok kanila,+ apan wala sila mamati.’”’”+

32 Unya si Jeremias mikuhag laing linukot nga basahon ug gihatag kini kang Baruk nga anak ni Nerias, ang sekretaryo.+ Sumala sa pagdiktar ni Jeremias, gisulat niya ang tanang pulong sa linukot nga basahon nga gisunog ni Haring Jehoiakim sa Juda.+ Ug daghang pulong nga sama niadto ang gidugang.