Jeremias
13 Kini ang giingon ni Jehova kanako: “Lakaw, pagpalit ug bakos nga panaptong lino ug ibakos kini sa imong hawak, apan ayaw kinig bas-a.” 2 Busa nagpalit kog bakos sumala sa giingon ni Jehova ug gibakos kini sa akong hawak. 3 Ug nakadawat kog mensahe gikan kang Jehova sa ikaduhang higayon, nga nag-ingon: 4 “Dad-a ang bakos nga imong gipalit ug gisul-ob, ug adto sa Euprates. Tagoi kini didto sa usa ka giwang sa dakong bato.” 5 Busa miadto ko ug gitagoan kini daplin sa Euprates, sumala sa gisugo ni Jehova kanako.
6 Apan paglabay sa daghang adlaw, si Jehova miingon kanako: “Adto sa Euprates, ug kuhaa ang bakos nga akong gipatagoan kanimo didto.” 7 Busa miadto ko sa Euprates ug gikalot nako ug gikuha ang bakos sa dapit diin nako kini gitagoan, apan ang bakos nadaot na ug dili na gyod mapuslan.
8 Unya nakadawat kog mensahe gikan kang Jehova, nga nag-ingon: 9 “Kini ang giingon ni Jehova, ‘Sa samang paagi akong gun-obon ang garbo sa Juda ug ang dakong garbo sa Jerusalem.+ 10 Kining daotang katawhan nga midumili sa pagtuman sa akong mga pulong,+ ug wala gyod mopatuo ug misunod hinuon sa ilang kasingkasing,+ ug misunod, mialagad, ug miyukbo sa ubang mga diyos, mahisama gayod niining bakos nga dili na gyod mapuslan.’ 11 ‘Kay sama nga ang bakos magpabilin sa hawak sa usa ka tawo, gipahinabo usab nako nga ang tibuok panimalay ni Israel ug ang tibuok panimalay ni Juda mounong kanako,’ miingon si Jehova, ‘aron sila mahimong akong katawhan,+ himaya,+ kadayeganan, ug dungog. Apan wala sila mosunod.’+
12 “Ug isulti usab kini nga mensahe kanila, ‘Kini ang giingon ni Jehova nga Diyos sa Israel: “Ang matag dakong banga angayng pun-on ug bino.”’ Ug sila motubag kanimo, ‘Dili ba nahibalo na man mi nga ang matag dakong banga angayng pun-on ug bino?’ 13 Ug ingna sila, ‘Kini ang giingon ni Jehova: “Sama sa dakong banga, pun-on nakog bino ang tanang molupyo niining yutaa,+ ang mga hari nga naglingkod sa trono ni David, ang mga saserdote ug ang mga propeta, ug ang tanang molupyo sa Jerusalem, hangtod nga sila mangahubog. 14 Ug ako silang ilambos sa usag usa, ang mga amahan ug ang mga anak,” miingon si Jehova.+ “Dili ko magpakitag simpatiya o maguol o maluoy kanila; walay makapugong kanako sa paglaglag kanila.”’+
15 Paminaw mo.
Ayaw mog panghambog, kay si Jehova nagsulti.
16 Himayaa si Jehova nga inyong Diyos
Sa dili pa siya magpahinabog kangitngit
Ug sa dili pa mapandol ang inyong mga tiil diha sa kabukiran inigkakilumkilom.
17 Ug kon dili mo mamati,
Mohilak ko sa tago tungod sa inyong garbo.
Magpaagay kog daghang luha, ug ang akong mata magpadaligdig ug mga luha,+
Kay ang panon ni Jehova+ gidalang binihag.
18 Ingna ang hari ug ang inahan sa hari,*+ ‘Lingkod mo sa mas ubos nga dapit,
Kay ang inyong matahom nga korona mahulog gikan sa inyong ulo.’
19 Ang mga siyudad sa habagatan gisirad-an* ug walay usa nga magbukas niini.
Ang tibuok Juda gidestiyero, bug-os nga gidestiyero.+
20 Iyahat ang imong mga mata ug tan-awa ang mga nagsingabot gikan sa amihanan.+
Hain na ang panon nga gihatag kanimo, ang imong matahom nga mga karnero?+
21 Unsay imong isulti kon ang imong silot
Maggikan niadtong imong gitratar nga suod nga mga higala sukad sa sinugdan?+
Dili ba nimo bation ang kasakit sa pagpanganak, sama nianang babayeng manganak?+
22 Ug dihang moingon ka sa imong kasingkasing, ‘Nganong nahitabo kanako kining mga butanga?’+
Tungod kana sa imong dakong kasaypanan nga ang imong sayal nahubo+
Ug ang imong mga tikod nasakitan pag-ayo.
23 Mausab ba sa usa ka Cusihanon* ang iyang panit, o sa leopardo ang mga kabang niini?+
Kon mao, makahimo mog maayo,
Kamong mga nabansay sa paghimog daotan.
24 Busa patibulaagon nako sila samag uhot* nga gipadpad sa hangin sa desyerto.+
25 Kini ang imong bahin, ang bahin nga akong gisukod alang kanimo,” miingon si Jehova,
26 Busa akong walison ang imong sayal paingon sa imong nawong,
Ug ang imong kaulawan makita,+
27 Ang imong mga pagpanapaw+ ug ang imong pagbahihi nga may kaulag,
Diha sa kabungtoran, sa kaumahan,
Nakita nako ang imong dulumtanang panggawi.+
Alaot ka, Oh Jerusalem!
Hangtod kanus-a ka magpabiling hugaw?”+