Nehemias
2 Sa bulan sa Nisan,* sa ika-20 nga tuig sa pagmando+ ni Haring Artajerjes,+ may bino nga giandam sa iyang atubangan, ug sama sa naandan gihatagan nakog bino ang hari.+ Apan karon lang ko niya nakita nga masulub-on. 2 Busa ang hari miingon kanako: “Nganong masulub-on ka nga wala man unta kay sakit? Seguradong naay nakapaguol nimo.” Busa gikulbaan ko pag-ayo.
3 Unya ako miingon sa hari: “Hatagan untag taas nga kinabuhi ang hari! Naguol ko kay guba pa gihapon ang siyudad nga gilubngan sa akong mga katigulangan, ug naugdaw ang mga ganghaan niini.”+ 4 Dayon ang hari miingon kanako: “Unsay gusto nimong buhaton?” Dihadiha miampo ko sa Diyos sa kalangitan.+ 5 Unya miingon ko sa hari: “Kon mosugot ang hari ug kon giuyonan nimo ang imong alagad, paadtoa ko sa Juda, sa siyudad diin gilubong ang akong mga katigulangan aron matukod nako kini pag-usab.”+ 6 Ang hari nangutana nako samtang ang rayna naglingkod tapad niya: “Unsa ka kadugay didto ug kanus-a ka mobalik?” Gisulti nako kon kanus-a ko mobalik,+ ug misugot ang hari nga molakaw ko.+
7 Ug miingon ko sa hari: “Kon maayo alang sa hari, hatagan unta kog sulat para sa mga gobernador sa kayutaan Tabok sa Suba*+ aron paagion ko nila paingon sa Juda, 8 ug sulat sab para kang Asap nga magbalantay sa Parke sa Hari* aron hatagan ko niyag kahoy para sa paghimo sa mga ganghaan sa Kuta+ sa Templo, sa paril sa siyudad,+ ug sa balay nga akong puy-an.” Busa gihatag kini sa hari+ kay ang akong Diyos nagtabang kanako.+
9 Pag-abot nako sa kayutaan Tabok sa Suba, gihatag nako sa mga gobernador ang mga sulat sa hari. Gipaubanan sab ko sa hari ug mga pangulo sa kasundalohan ug mga mangangabayo. 10 Dihang nahibaloan kini ni Sanbalat+ nga Horonhon ug ni Tobias+ nga Ammonhanon+ nga opisyal,* nasuko sila pag-ayo kay dunay miabot aron motabang sa katawhan sa Israel.
11 Sa ulahi nakaabot ko sa Jerusalem, ug nagpabilin didtog tulo ka adlaw. 12 Pagkagabii, ako ug ang pipila ka lalaki nga akong kauban mibangon. Wala koy gisultihan kon unsay gibutang sa Diyos sa akong kasingkasing nga buhaton alang sa Jerusalem, ug walay laing hayop nga among gidala gawas sa hayop nga akong gisakyan. 13 Nianang gabhiona, migawas ko sa Ganghaan sa Walog+ ug miagi atubangan sa Tuboran sa Dakong Bitin ngadto sa Ganghaan sa mga Tapok sa Abo.*+ Gisusi nako ang mga paril sa Jerusalem nga nalumpag ug ang mga ganghaan niini nga naugdaw.+ 14 Miadto sab ko sa Ganghaan sa Tuboran+ ug sa Linaw sa Hari, apan dili makaagi ang hayop nga akong gisakyan. 15 Pero mitungas gihapon ko sa walog*+ samtang gabii pa ug padayong gisusi ang paril. Human niana mibalik ko ug misulod agi sa Ganghaan sa Walog.
16 Ang mga opisyal+ wala mahibalo kon asa ko miadto ug kon unsay akong gibuhat kay wala pa koy gisultihan sa mga Hudiyo, mga saserdote, mga halangdon, mga opisyal, ug sa uban pa nga apil sa pagtukod. 17 Sa kataposan giingnan nako sila: “Nakita ninyo kon unsa ka makaluluoy ang atong kahimtang, guba kaayo ang Jerusalem ug nasunog ang mga ganghaan niini. Atong tukoron pag-usab ang paril sa Jerusalem aron dili na ta maulawan.” 18 Dayon gisultihan nako sila kon giunsa ko pagtabang sa akong Diyos+ ug kon unsay giingon kanako sa hari.+ Busa sila miingon: “Sige, ato nang sugdan ang pagtukod.” Ug gipalig-on nila ang matag usa* alang sa buluhaton.+
19 Pagkahibalo niini ni Sanbalat nga Horonhon, ni Tobias+ nga Ammonhanon+ nga opisyal,* ug ni Gesem nga Arabiano,+ sila nagbugalbugal+ ug nagtamay kanamo: “Unsa kining inyong ginabuhat? Mirebelde ba mo sa hari?”+ 20 Ako mitubag: “Ang Diyos sa kalangitan mao ang magpalampos niini,+ ug kami nga iyang mga alagad maoy magtukod; pero kamo walay labot ug walay katungod sa Jerusalem ug walay bahin sa kasaysayan niini.”+