Unang Cronicas

29 Si Haring David karon miingon sa tibuok kongregasyon: “Si Solomon nga akong anak, ang usa nga gipili sa Diyos,+ batan-on pa ug kulag eksperyensiya,*+ ug dako ang buluhaton, kay kini dili templo* alang sa tawo kondili alang kang Jehova nga Diyos.+ 2 Gihimo nako ang tanan nakong maarangan sa pagpangandam alang sa balay sa akong Diyos, nga nagtagana sa bulawan alang sa mga butang nga gam-on sa bulawan, sa plata alang sa mga butang nga gam-on sa plata, sa tumbaga alang sa mga butang nga gam-on sa tumbaga, sa puthaw alang sa mga butang nga gam-on sa puthaw,+ sa mga kahoy+ alang sa mga butang nga gam-on sa kahoy, sa mga batong onyx, ug sa mga bato nga ibutang uban sa minasa, sa gagmayng mga bato nga lainlaig kolor nga pangdekorasyon, sa tanang matang sa bililhong mga bato, ug sa daghan kaayong mga bato nga alabastro. 3 Dugang pa, tungod sa akong kalipay sa balay sa akong Diyos,+ ako naghatag ug bulawan ug plata gikan sa akong katigayonan+ alang sa balay sa akong Diyos gawas pa sa tanan nga akong giandam alang sa balaang balay, 4 lakip ang 3,000 ka talantong* bulawan gikan sa Opir+ ug 7,000 ka talantong dalisay nga plata, aron ihaklap sa mga bungbong sa mga balay, 5 ang bulawan alang sa mga butang nga gam-on sa bulawan ug ang plata alang sa mga butang nga gam-on sa plata, ug alang sa tanang buluhaton nga himoon sa mga artesano.* Busa kinsay moboluntaryo karon sa pagdalag gasa alang kang Jehova?”+

6 Busa ang mga prinsipe sa mga banay,* ang mga prinsipe sa mga tribo sa Israel, ang mga pangulo sa kada 1,000 ug sa kada 100,+ ug ang mga pangulo sa buluhaton sa hari+ miboluntaryo. 7 Ug sila mihatag alang sa pag-alagad sa balay sa matuod nga Diyos ug 5,000 ka talantong bulawan, 10,000 ka darik,* 10,000 ka talantong plata, 18,000 ka talantong tumbaga, ug 100,000 ka talantong puthaw. 8 Si bisan kinsa nga may bililhong mga bato naghatag niini ngadto sa tipiganag bahandi sa balay ni Jehova, ubos sa pagdumala ni Jehiel+ nga Gersonhon.+ 9 Ang katawhan nagsadya sa paghatag niining kinabubut-ong mga halad, kay sila nagtanyag sa kinabubut-ong mga halad kang Jehova nga bug-os kasingkasing,+ ug si David nga hari nagsadya usab pag-ayo.

10 Unya si David nagdayeg kang Jehova atubangan sa tibuok kongregasyon. Si David miingon: “Madayeg unta ka, Oh Jehova nga Diyos sa Israel nga among amahan, hangtod sa hangtod. 11 Imo, Oh Jehova, ang kabantog+ ug ang gahom+ ug ang katahom ug ang himaya ug ang kahalangdon,*+ kay imo ang tanang butang sa langit ug sa yuta.+ Imo ang gingharian, Oh Jehova.+ Ikaw ang Usa nga nagbayaw sa imong kaugalingon ingong pangulo ibabaw sa tanan. 12 Gikan kanimo ang mga bahandi ug ang himaya,+ ug ikaw ang nagmando sa tanan,+ ug anaa sa imong kamot ang gahom+ ug ang pagkagamhanan,+ ug ang imong kamot makahimo sa pagtuboy+ ug sa paghatag ug kusog sa tanan.+ 13 Ug karon, Oh among Diyos, kami nagpasalamat kanimo ug nagdayeg sa imong maanindot nga ngalan.

14 “Ug bisan pa niana, kinsa ba ko ug kinsa ang akong katawhan nga kami makahatag ug kinabubut-ong mga halad sama niini? Kay ang tanang butang gikan kanimo, ug ang among gihatag gikan mismo sa imong kamot. 15 Kay kami langyawng mga residente sa imong atubangan ug mga lalin, sama sa tanan namong katigulangan.+ Kay ang among mga adlaw sa yuta samag anino+​—walay paglaom. 16 Oh Jehova nga among Diyos, kining dagayang mga butang nga among giandam sa pagtukod ug balay alang kanimo alang sa imong balaang ngalan naggikan sa imo mismong kamot, ug imoha kining tanan. 17 Ako nahibalo pag-ayo, Oh akong Diyos, nga ikaw nagasusi sa kasingkasing+ ug malipay ka sa integridad* sa usa.+ Sa pagkasinsero* sa akong kasingkasing, ako kinabubut-ong nagtanyag niining tanan, ug nalipay ko pag-ayo nga makita ang imong katawhan nga ania dinhi nga nagtanyag kanimog kinabubut-ong mga halad. 18 Oh Jehova nga Diyos ni Abraham, ni Isaac, ug ni Israel, nga among mga katigulangan, tabangi kini nga katawhan nga mahuptan sa ilang kasingkasing kini nga mga tinguha ug panghunahuna hangtod sa hangtod ug mag-alagad kanimo nga bug-os kasingkasing.+ 19 Ug hatagi si Solomon nga akong anak ug bug-os nga kasingkasing,*+ aron iyang matuman ang imong mga sugo,+ pahinumdom, ug regulasyon ug iyang mabuhat kining tanan ug matukod ang templo* nga akong gipangandaman.”+

20 Unya si David miingon sa tibuok kongregasyon: “Karon dayega ninyo si Jehova nga inyong Diyos.” Ug ang tibuok kongregasyon nagdayeg kang Jehova nga Diyos sa ilang mga katigulangan ug nangyukbo ug nanghapa kang Jehova ug sa hari. 21 Ug pagkaugma, sila nagpadayon sa pagtanyag ug mga halad+ kang Jehova ug sa pagtanyag ug mga halad nga sinunog kang Jehova, 1,000 ka toreyong baka, 1,000 ka laking karnero, 1,000 ka laki nga nating karnero, ug sa ilang mga halad nga ilimnon;+ daghan kaayo ang ilang gihalad alang sa tibuok Israel.+ 22 Sila nagpadayon sa pagpangaon ug sa pagpanginom atubangan ni Jehova nianang adlawa nga masadyaon kaayo,+ ug sa ikaduhang higayon ilang gihimong hari si Solomon nga anak ni David ug gidihogan siya ingong pangulo atubangan ni Jehova,+ ug si Zadok usab ingong saserdote.+ 23 Ug si Solomon milingkod sa trono ni Jehova+ ingong hari puli ni David nga iyang amahan, ug siya nagmalamposon, ug ang tanang Israelinhon nagmasinugtanon kaniya. 24 Ang tanang prinsipe,+ banggiitang manggugubat,+ ug ang tanang anak nga lalaki ni Haring David+ nagpasakop kang Solomon nga hari. 25 Ug gihimo ni Jehova si Solomon nga gamhanan kaayo atubangan sa tibuok Israel ug gihatagan siyag kahalangdon ingong hari nga labaw nianang sa mga hari sa Israel nga nag-una kaniya.+

26 Busa si David nga anak ni Jese nagmando sa tibuok Israel, 27 ug ang gitas-on* sa iyang pagmando sa Israel maoy 40 ka tuig. Sa Hebron siya nagmando sulod sa 7 ka tuig,+ ug sa Jerusalem siya nagmando sulod sa 33 ka tuig.+ 28 Ug siya namatay nga tigulang na,+ nga tagbaw sa taas nga kinabuhi,* bahandi, ug himaya; ug si Solomon nga iyang anak nahimong hari puli kaniya.+ 29 Ang kasaysayan ni Haring David, sukad sa sinugdan hangtod sa kataposan, nasulat lakip sa mga pulong ni Samuel nga tawo nga makakitag panan-awon, ni propetang Natan,+ ug ni Gad+ nga bisyonaryo,* 30 lakip ang tanang nahitabo sa iyang pagkahari, ang iyang pagkagamhanan, ug ang mga nahitabo kaniya ug sa Israel ug sa tanang gingharian sa palibot.