Pinadayag Ngadto Kang Juan
9 Ang ikalimang anghel mihuyop sa iyang trompeta.+ Ug nakakita kog bituon nga nahulog sa yuta gikan sa langit, ug ang yawi sa gahong sa kahiladman+ gihatag kaniya. 2 Gibuksan niya ang gahong sa kahiladman, ug miutbo gikan sa gahong ang aso nga samag aso sa dakong hudno, ug ang adlaw mingitngit,+ maingon man ang hangin, tungod sa aso nga gikan sa gahong. 3 Ug gikan sa aso nanggula ang mga dulon ug mihugpa sa yuta,+ ug gihatagan silag awtoridad, sama sa awtoridad nga nabatonan sa mga tanga sa yuta. 4 Gidid-an sila sa pagdaot sa mga tanom sa yuta o sa bisan unsang lunhawng tanom o bisan unsang kahoy, kondili kadto lang mga tawo nga walay selyo sa Diyos diha sa ilang mga agtang.+
5 Ug ang mga dulon gitugotan, dili sa pagpatay kanila, kondili sa pagsakit kanila sulod sa lima ka bulan, ug ang pagsakit kanila maoy sama sa pagsakit sa tanga+ dihang mapaakan niini ang tawo. 6 Nianang panahona ang mga tawo mangita sa kamatayon apan dili gayod nila kini makaplagan, ug mangandoy sila nga mamatay, apan ang kamatayon mokalagiw gikan kanila.
7 Ug kon tan-awon, ang mga dulon samag mga kabayo nga andam na alang sa gubat;+ sa ilang mga ulo dihay morag korona nga bulawan, ug ang ilang mga nawong samag nawong sa tawo, 8 apan ang ilang buhok sama sa buhok sa mga babaye. Ug ang ilang mga ngipon sama nianang sa mga leyon,+ 9 ug sila may mga panagang sa dughan nga samag puthaw nga mga panagang sa dughan. Ug ang kinapakapa sa ilang mga pako sama sa dinahunog sa mga karong giguyod sa kabayo nga nagdali paingon sa gubat.+ 10 Dugang pa, duna silay mga ikog nga may ikot nga sama sa tanga, ug anaa sa ilang mga ikog ang ilang awtoridad sa pagsakit sa mga tawo sulod sa lima ka bulan.+ 11 Sila dunay hari, ang anghel sa kahiladman.+ Sa Hebreohanon ang iyang ngalan Abaddon,* apan sa Grego siya ginganlag Apollyon.*
12 Ang usa ka kaalaotan milabay na. Tan-awa! Duha pa ka kaalaotan+ ang moabot human niini.
13 Ang ikaunom nga anghel+ mihuyop sa iyang trompeta.+ Ug nadungog nako ang usa ka tingog gikan sa mga sungay sa halaran nga bulawan+ nga diha sa atubangan sa Diyos 14 nga nag-ingon ngadto sa ikaunom nga anghel nga may trompeta: “Buhii ang upat ka anghel nga gigapos sa dakong suba sa Euprates.”+ 15 Ug gibuhian ang upat ka anghel kinsa giandam na alang sa oras ug adlaw ug bulan ug tuig sa pagpamatay sa ikatulong bahin sa mga tawo.
16 Ang gidaghanon sa kasundalohang mga mangangabayo maoy duha ka mga panon sa mga panon;* nadungog nako ang ilang gidaghanon. 17 Ug ingon niini ang akong nakita sa mga kabayo diha sa panan-awon ug sa mga nagkabayo kanila: Sila may mga panagang sa dughan nga samag kalayo ang kapula ug samag hasinto ang kaasul ug samag asupre ang kadalag, ug ang ulo sa mga kabayo morag ulo sa leyon,+ ug sa ilang baba may nagagula nga kalayo ug aso ug asupre. 18 Ang ikatulong bahin sa mga tawo nangamatay pinaagi niining tulo ka hampak, nga mao ang kalayo, aso, ug asupre nga nagagula gikan sa ilang baba. 19 Kay ang awtoridad sa mga kabayo anaa sa ilang baba ug ikog, kay ang ilang ikog samag halas nga may ulo, ug pinaagi niini sila nagpahinabog kadaot sa katawhan.
20 Apan ang nahibilin sa mga tawo nga wala mangamatay pinaagi niining mga hampaka wala maghinulsol sa mga buhat sa ilang mga kamot; wala sila mohunong sa pagsimba sa mga demonyo ug sa mga idolo nga bulawan, plata,* tumbaga, bato, ug kahoy, nga dili makakita o makadungog o makalakaw.+ 21 Ug wala sila maghinulsol sa ilang mga pagpatay o sa ilang espiritistikanhong mga buhat o sa ilang pagbuhat ug seksuwal nga imoralidad* o sa ilang mga pagpangawat.