Deuteronomio

26 “Dihang makasulod na mo sa yuta nga ihatag kaninyo ni Jehova nga inyong Diyos ingong panulondon ug inyo na kining mapanag-iya ug magpuyo na mo didto, 2 pagkuha mog pipila sa mga unang bunga sa tanang abot sa yuta nga ihatag kaninyo ni Jehova nga inyong Diyos, ug ibutang kini sa bukag ug adto sa dapit nga pilion ni Jehova nga inyong Diyos nga butangan sa iyang ngalan.+ 3 Adtoa ang saserdote nga mag-alagad nianang panahona ug ingna siya, ‘Karon akong isulti kang Jehova nga imong Diyos nga miabot na ko sa yuta nga gipanumpa ni Jehova sa atong mga katigulangan nga ihatag kanato.’+

4 “Unya kuhaon sa saserdote ang dala ninyong bukag ug ibutang kini sa atubangan sa halaran ni Jehova nga inyong Diyos. 5 Dayon isulti ninyo kini sa atubangan ni Jehova nga inyong Diyos, ‘Latagaw* nga Arameanhon+ ang akong amahan. Miadto siya sa Ehipto+ ug mipuyo didto ingong langyaw, ug gamay ra ang iyang panimalay.+ Apan didto nahimo siyang dakong nasod, gamhanan ug daghan.+ 6 Gidaogdaog mi sa mga Ehiptohanon, gisakit, ug giulipon pag-ayo.+ 7 Busa nagpakitabang mi kang Jehova nga Diyos sa among mga katigulangan, ug gidungog mi ni Jehova. Nakita niya ang among pag-antos, ang among kalisdanan, ug ang pagdaogdaog kanamo.+ 8 Sa kataposan gipagawas mi ni Jehova sa Ehipto pinaagi sa iyang dako kaayong gahom,+ makahadlok nga mga buhat, mga ilhanan, ug mga milagro.+ 9 Unya gidala mi niya niining dapita ug gihatag kanamo kining yutaa, yuta nga abunda sa gatas ug dugos.+ 10 Karon gidala nako ang mga unang bunga sa abot sa yuta nga gihatag kanako ni Jehova.’+

“Ibutang ninyo kini sa atubangan ni Jehova nga inyong Diyos ug yukbo sa atubangan ni Jehova nga inyong Diyos. 11 Unya maglipay mo tungod sa tanang maayong butang nga gihatag ni Jehova nga inyong Diyos kaninyo ug sa inyong panimalay, kamo ug ang mga Levihanon ug ang mga langyaw nga nagpuyo uban ninyo.+

12 “Dihang matigom na ninyo ang tibuok ikapulo+ sa inyong abot sa ikatulong tuig, ang tuig sa ikapulo, ihatag ninyo kini sa Levihanon, sa langyaw nga residente, sa batang wala nay amahan,* ug sa biyuda, ug mokaon sila sa inyong mga siyudad* hangtod mabusog.+ 13 Unya isulti ninyo kini sa atubangan ni Jehova nga inyong Diyos, ‘Gikuha na nako ang balaang mga butang gikan sa akong balay ug gihatag nako kini sa Levihanon, langyaw nga residente, batang wala nay amahan, ug sa biyuda,+ sumala sa imong gisugo kanako. Wala nako lapasa o kalimti ang imong mga sugo. 14 Wala ko mokaon niini samtang nagbangotan ko o magtandog niini samtang hugaw ko o maghatag ug bisag unsa niini para sa patay. Gisunod nako ang giingon ni Jehova nga akong Diyos ug gibuhat ang tanan nimong gisugo kanako. 15 Dungaw gikan sa imong balaang puy-anan, ang kalangitan, ug panalangini ang imong katawhang Israel ug ang yuta nga imong gihatag kanamo,+ yuta nga abunda sa gatas ug dugos,+ sumala sa imong gisaad sa among mga katigulangan.’+

16 “Niining adlawa gisugo mo ni Jehova nga inyong Diyos sa pagtuman niini nga mga regulasyon ug hudisyal nga mga hukom. Kinahanglang tumanon ninyo kini sa bug-os ninyong kasingkasing+ ug sa bug-os ninyong kalag.* 17 Gipasaligan mo ni Jehova karon nga siya mahimong inyong Diyos basta mosubay mo sa iyang mga dalan, motuman sa iyang mga regulasyon,+ mga sugo,+ ug hudisyal nga mga hukom,+ ug mamati sa iyang tingog. 18 Ug gipasaligan sab ninyo si Jehova karon nga kamo mahimong iyang katawhan, iyang espesyal* nga katigayonan,+ sama sa iyang gisaad kaninyo, ug nga tumanon ninyo ang tanan niyang sugo. 19 Unya himoon mo niyang labaw kay sa tanang ubang nasod nga iyang gihimo,+ sumala sa iyang gisaad, nga moresulta sa inyong kadayeganan, kadungganan, ug himaya kon pamatud-an ninyo nga kamo balaang katawhan para kang Jehova nga inyong Diyos.”+