Ezequiel
39 “Ug kon bahin kanimo, anak sa tawo, panagna batok kang Gog,+ ug ingna siya, ‘Kini ang giingon sa Soberanong Ginoong Jehova: “Ako batok kanimo, Gog, ang kinalabwang pangulo* sa Mesek ug Tubal.+ 2 Palisoon ka nako ug tultolan ug ipahinabo nako nga motungha ka gikan sa kinalay-ang mga bahin sa amihanan+ ug dad-on ka nako sa kabukiran sa Israel. 3 Hapakon nako ang busogan sa imong walang kamot ug ang mga udyong sa imong tuong kamot aron mangahulog kini. 4 Mapukan ka sa kabukiran sa Israel,+ ikaw ug ang tibuok nimong kasundalohan ug ang mga katawhan nga uban unya kanimo. Ipakaon ka nako sa tanang matang sa langgam nga mandadagit ug sa ihalas nga mga mananap sa kapatagan.”’+
5 “‘Mapukan ka sa kapatagan,+ kay ako mismo ang nagsulti,’ miingon ang Soberanong Ginoong Jehova.
6 “‘Ug magpadala kog kalayo batok sa Magog ug niadtong mga nagpuyo sa kaislahan nga may kasegurohan,+ ug sila makaila gayod nga ako si Jehova. 7 Ipaila nako ang akong balaang ngalan taliwala sa akong katawhang Israel, ug dili na nako tugotang mapasipalahan pa ang akong balaang ngalan; ug ang kanasoran makaila gayod nga ako si Jehova,+ ang Balaang Usa sa Israel.’+
8 “‘Oo, kini nagsingabot, ug kini mahitabo gayod,’ miingon ang Soberanong Ginoong Jehova. ‘Kini ang adlaw nga akong giingon. 9 Ang mga molupyo sa mga siyudad sa Israel manggula ug magdaob. Isugnod nila ang mga hinagiban—gagmayng taming* ug dagkong taming, mga busogan ug udyong, mga puspos nga panggubat* ug bangkaw. Ug gamiton nila kini ingong sugnod+ sulod sa pito ka tuig. 10 Dili na sila kinahanglang mangahoy sa kapatagan o sa kalasangan kay ang mga hinagiban ang ilang isugnod.’
“‘Ug ilang sakmitan kadtong mga nanakmit kanila ug agawan kadtong mga nangagaw kanila,’ miingon ang Soberanong Ginoong Jehova.
11 “‘Nianang adlawa hatagan nakog lubnganan si Gog+ didto sa Israel, sa walog nga agianan niadtong mga mopanaw sa sidlakan sa dagat, ug alihan niini ang dalan sa mga mangagi. Didto nila ilubong si Gog ug ang tibuok niyang panon, ug tawgon nila kining Walog sa Hamon-Gog.*+ 12 Ang panimalay ni Israel maggugol ug pito ka bulan sa paglubong kanila aron mahinloan ang yuta.+ 13 Ang tanang katawhan sa yuta maglubong kanila, ug tungod niini sila mabantog sa adlaw nga himayaon nako ang akong kaugalingon,’+ miingon ang Soberanong Ginoong Jehova.
14 “‘Duna unyay mga tawo nga itudlo nga maoy moagi kanunay sa yuta ug maglubong sa mga patayng lawas nga nahibilin sa yuta, aron hinloan kini. Magpadayon sila sa pagpangita sulod sa pito ka bulan. 15 Dihang ang mga moagi sa yuta makakitag bukog sa tawo, magbutang silag ilhanan sa tapad niini. Unya kadtong mga tiglubong maglubong niini sa Walog sa Hamon-Gog.+ 16 Ug duna usab unyay siyudad didto nga ginganlag Hamona.* Ug ilang hinloan ang yuta.’+
17 “Kon bahin kanimo, anak sa tawo, kini ang giingon sa Soberanong Ginoong Jehova: ‘Ingna ang tanang matang sa langgam ug ang tanang ihalas nga mananap sa kapatagan, “Pagtapok mo ug ari diri. Pagtigom mo libot sa akong halad nga akong giandam alang kaninyo, usa ka dakong halad sa kabukiran sa Israel.+ Mokaon mog unod ug moinom ug dugo.+ 18 Kaonon ninyo ang unod sa mga gamhanan ug imnon ang dugo sa mga pangulo sa yuta—mga laking karnero, nating karnero, kanding, ug torong baka—ang tanang pinatambok nga hayop sa Basan. 19 Matagbaw mog kinaon sa tambok ug mahubog mog ininom sa dugo gikan sa halad nga akong giandam alang kaninyo.”’
20 “‘Sa akong lamesa mabusog mo sa mga kabayo ug magkakaro, sa mga gamhanan ug sa tanang matang sa manggugubat,’+ miingon ang Soberanong Ginoong Jehova.
21 “‘Ipakita nako ang akong himaya taliwala sa kanasoran, ug ang tanang kanasoran makakita sa paghukom nga akong gipahamtang ug sa gahom* nga akong gipakita kanila.+ 22 Sukad nianang adlawa ang panimalay ni Israel makaila gayod nga ako si Jehova nga ilang Diyos. 23 Ug ang kanasoran mahibalo gayod nga ang panimalay ni Israel nadestiyero tungod sa ilang kasaypanan, kay wala sila magmatinumanon kanako.+ Busa gitago nako ang akong nawong gikan kanila+ ug gitugyan nako sila sa ilang mga kaaway,+ ug silang tanan napukan sa espada. 24 Gibuhat nako kanila ang sumala sa ilang kahugawan ug kalapasan, ug gitago nako ang akong nawong gikan kanila.’
25 “Busa kini ang giingon sa Soberanong Ginoong Jehova: ‘Ipasig-uli nako ang mga nabihag nga iya ni Jacob+ ug kaluy-an nako ang tibuok panimalay ni Israel;+ ug masiboton nakong depensahan ang* akong balaang ngalan.+ 26 Human nga sila gipakaulawan tungod sa tanan nilang pagkadili-matinumanon kanako,+ sila luwas nga magpuyo sa ilang yuta, nga walay usa nga makapahadlok kanila.+ 27 Dihang dad-on nako silag balik gikan sa mga katawhan ug tigomon nako sila gikan sa kayutaan sa ilang mga kaaway,+ balaanon usab nako ang akong kaugalingon taliwala kanila atubangan sa daghang kanasoran.’+
28 “‘Sila makaila gayod nga ako si Jehova nga ilang Diyos dihang idestiyero nako sila taliwala sa kanasoran ug unya tigomon nako sila ug dad-og balik sa ilang yuta, nga walay bisan kinsa kanila ang mabilin.+ 29 Dili na nako tagoan ang akong nawong gikan kanila,+ kay ibubo nako ang akong espiritu sa panimalay ni Israel,’+ miingon ang Soberanong Ginoong Jehova.”