Salmo

Ngadto sa direktor; duyogan sa dekuwerdas nga mga instrumento. Salmo ni David.

61 Patalinghogi, Oh Diyos, ang akong pagtuaw alang sa tabang.

Hatagig pagtagad ang akong pag-ampo.+

2 Gikan sa mga kinatumyan sa yuta motuaw ko kanimo

Dihang maluya ang akong kasingkasing.+

Tultoli ko ngadto sa bato nga mas taas pa kay kanako.+

3 Kay ikaw ang akong dangpanan,

Usa ka lig-ong torre nga manalipod kanako batok sa kaaway.+

4 Mahimo kong dinapit sa imong tolda hangtod sa hangtod;+

Modangop ko sa ilalom sa imong mga pako.+ (Selah)

5 Kay nakadungog ka, Oh Diyos, sa akong mga panaad.

Gihatag nimo kanako ang panulondon nga alang niadtong mga nahadlok sa imong ngalan.+

6 Dugangan nimog mga adlaw ang kinabuhi* sa hari,+

Ug ang iyang mga tuig molungtad hangtod sa sunodsunod nga kaliwatan.

7 Siya molingkod sa iyang trono* hangtod sa hangtod atubangan sa Diyos;+

Hatagi siyag* maunongong gugma ug pagkamatinumanon, aron kini makapanalipod kaniya.+

8 Unya mag-awit kog mga pagdayeg* sa imong ngalan hangtod sa hangtod+

Samtang ginatuman nako adlaw-adlaw ang akong mga panaad.+