Pagtuman sa Atong Panaad sa Matag Adlaw

¹ Ang salmistang si David nadasig sa pagpahayag ngadto kang Jehova: “Magaawit ako ug pagdayeg sa imong ngalan sa walay kataposan, aron makatuman ako sa matag adlaw sa akong mga panaad.” (Sal. 61:8) Nasayod si David nga ang paghimo ug panaad maoy usa ka bug-os boluntaryong butang. Bisan pa niana, giapresyar usab niya nga kon siya mihimog panaad, obligado siya sa pagtuman niana.

² Sa dihang gihimo nato ang atong pahinungod ngadto kang Jehova, andam kitang nanaad nga motuman sa iyang kabubut-on. Gidumilian nato ang atong kaugalingon ug gihimo ang pag-alagad kang Jehova ingon nga atong pangunang pangagpas sa kinabuhi. (Luc. 9:23) Busa, kita usab motuman sa atong panaad sa matag adlaw. (Eccl. 5:4-6) Ang atong publikong pagpahayag nga gihimo sa panahon sa bawtismo sa tubig angay nga mosumbaliksilaw sa atong bug-os nga sumbanan sa kinabuhi, sanglit nasayod kita nga “ang usa nagahimog pagpahayag diha sa dayag alang sa kaluwasan pinaagi sa baba.” (Roma 10:10) Nagalakip kini sa pagsangyaw sa maayong balita. (Heb. 13:15) Managkalahi ug dako ang personal nga mga kahimtang, apan sa matag adlaw ang tanan kanato makahimo nianang atong tumong ang pagpaambit sa maayong balita ngadto sa uban.

³ Paghimog mga Kahigayonan nga Makasangyaw sa Matag Adlaw: Aron makapaambit sa maayong balita sa matag adlaw angay natong himoon ang mga kahigayonan nga makasangyaw kon itugot sa atong mga kahimtang. Daghang malipayong kasinatian ang natagamtam niadtong kinsa naningkamot sa pagsangyaw sa di-pormal sa trabahoanan o sa eskuylahan ug sa mga silingan o sa uban pa nga ilang ikasugat matag adlaw. Bisan ang pagsulat o paggamit sa telepono mahimong magamit sa pagpanaksi ngadto sa uban. Kining tanang paagi maingon man ang paggahin ug panahon nga makanunayon sa pagpanaksi sa pamalaybalay ug ­paghimog mga balikduaw motultol ngadto sa kalipay nga nagasumikad sa pagdumalag usa ka pagtuon sa Bibliya. Oo, sa matag adlaw kita makalalang ug mga kahigayonan sa pagsangyaw.

⁴ Usa ka sister misugod sa pagbasa sa Pagsusi sa Kasulatan sa Adlaw-Adlaw sa tingpahulay niya sa trabaho. Gidapit niya ang iyang kauban sa trabaho aron basahon ang inadlaw nga teksto uban kaniya, ug sa wala madugay mitultol kadto sa pagtuon sa Bibliya uban sa maong babaye. Nagtuon silag tunga sa oras sa matag adlaw, lima ka adlaw sa usa ka semana. Lain pang kauban sa trabaho nakamatikod sa ilang matag adlaw nga pagtuon. Sa kapulihay gipaila niya ang iyang kaugalingon ingong di-aktibong igsoong lalaki. Nadasig sa kasibot sa sister, nakigkontak siya sa usa ka ansiyano aron maaktibo na usab. Kining maong sister positibong nakaimpluwensiya ug lain pang duha ka tawo gumikan sa pagpaningkamot sa pagtuman sa iyang panaad sa matag adlaw.

⁵ Sa dihang kita madasig pinaagig madayegong kasingkasing, ang pagtuman sa atong panaad sa matag adlaw magahatag kanatog kalipay ug katagbawan. Sama sa salmista, kita makapahayag: “Pagadayegon ko ikaw, Oh Jehova nga akong Diyos, uban sa bug-os ko nga kasingkasing, ug pagahimayaon ko ang imong ngalan sa walay kataposan.”​—Sal. 86:12.