Sulat ni Santiago
4 Unsay hinungdan sa mga gubat ug panag-away taliwala kaninyo? Dili ba gumikan kini sa inyong unodnong mga tinguha nga nagpahinabog panag-away sa sulod ninyo?*+ 2 Nagtinguha mo, apan wala mo makabaton. Nagpadayon mo sa pagpatay ug sa pagbaton ug hakog nga pangibog, apan wala mo makaangkon. Nagpadayon mo sa pagpakig-away ug pagpakiggubat.+ Wala mo makabaton kay wala mo mangayo. 3 Dihang nangayo mo, wala mo makadawat kay nangayo mo alang sa sayop nga katuyoan, aron magamit ninyo kini sa inyong unodnong mga tinguha.
4 Mga mananapaw,* wala ba mo mahibalo nga ang pagpakighigala sa kalibotan maoy pagpakig-away sa Diyos? Busa bisan kinsa nga buot makighigala sa kalibotan maghimo sa iyang kaugalingon nga kaaway sa Diyos.+ 5 O naghunahuna ba mo nga wala ray katuyoan ang pag-ingon sa kasulatan: “Ang espiritu nga nagpuyo sulod kanato padayong nangandoy uban ang kasina”?+ 6 Apan ang dili hitupngang pagkamaayo* nga Iyang gihatag mas labaw kay sa maong espiritu. Busa ang kasulatan nag-ingon: “Ang Diyos mobatok sa mga mapahitas-on,+ apan siya mohatag ug dili hitupngang pagkamaayo sa mga mapainubsanon.”+
7 Busa pagpasakop mo sa Diyos;+ apan sukli ang Yawa,+ ug siya mokalagiw gikan kaninyo.+ 8 Duol sa Diyos, ug siya moduol kaninyo.+ Hinloi ang inyong mga kamot, kamong makasasala,+ ug lunsaya ang inyong kasingkasing,+ kamong maduhaduhaon. 9 Pagsubo ug pagbangotan ug panghilak mo.+ Himoang pagbangotan ang inyong katawa, ug kasubo ang inyong kalipay. 10 Ipaubos ang inyong kaugalingon sa mga mata ni Jehova,*+ ug siya magbayaw kaninyo.+
11 Mga igsoon, hunong na sa pagsulti batok sa usag usa.+ Bisan kinsa nga mosulti batok sa usa ka igsoon o maghukom sa iyang igsoon nagsulti batok sa balaod ug naghukom sa balaod. Karon kon hukman nimo ang balaod, dili ka magtutuman sa balaod kondili maghuhukom. 12 Usa lang ang Tighatag ug Balaod ug Maghuhukom,+ ang usa nga makaluwas ug makalaglag.+ Apan ikaw, kinsa ba ka nga maghukom sa imong isigkatawo?+
13 Karon, pamati mo, kamong nag-ingon: “Karong adlawa o ugma mangadto mi niining siyudara ug magpabilin didto ug usa ka tuig, ug magnegosyo mi didto ug manguwarta,”+ 14 samtang wala mo masayod kon unsay mahitabo sa inyong kinabuhi ugma.+ Kay sama mog gabon nga motungha kadiyot ug dayon mahanaw.+ 15 Hinuon, angay mong moingon: “Kon kabubut-on ni Jehova,*+ padayon ming mabuhi ug himoon namo kini o kana.” 16 Apan karon nanghambog mo pag-ayo ug gipasigarbo ninyo kana. Ang tanang pagpanghambog nga ingon niana daotan. 17 Busa kon ang usa nasayod sa kon unsay husto apan wala mobuhat niana, siya nakasala.+