Pagpalampos sa Pagpatutoy sa Imong Anak!
BUG-OS nawad-ag kadasig—kana ang gibati sa pila ka inahan tapos mosulay sa pagpatutoy sa ilang mga anak sa unang pila ka adlaw ug semana human sa pagpanganak. Bisan pa niana, akong nasayran nga uban ang diyutayng kahanas ug lahutay, ang pagpatutoy mahimong molampos ug kahimut-anan. Busa, itugot nga akong ipakig-ambit ang akong nakat-onan gikan sa pagbasa, pagpakigsulti sa ubang inahan, ug personal nga kasinatian.
“Kanus-a nako pagasugdan ang pagpatutoy sa akong anak?”
Sa labing madali human manganak. Sa daghang kaso makasugod ka ibabaw mismo sa lamesang angkanan. Makahangyo ka sa imong doktor sa paghikay niini. Usa sa mga bentaha sa natural nga pag-anak, nga mao, pagpanganak nga walay mga tambal, mao nga ang bata matawong mas igmat ug busa mosugod dayon sa pagtutoy.
“Diyutay ang akong gatas!”
Kana ang giingon sa pila ka bag-ong inahan. Tinuod, may panahong ang usa ka bag-ong inahan mabalak-on kaayong mogawas ang gatas nga kini dili na hinuon mogawas. Kini mahitabo kay ang kaunorang nagagahom sa mga agianan sa gatas manghugot, nga mopugong sa libreng pag-agos sa gatas. Busa kinahanglang magrelaks ka. Hinumdomi, usab, nga ang imong produksiyon sa gatas mapalihok sa pagpatutoy mismo sa imong masuso. Sa dugang ikaw magpatutoy, mas daghang gatas ang magama. Busa hatagi ang imong masuso sa ubay-ubay tagidyot nga mga pagkaon inay sa usa o duha ka dagkong pagkaon. Sa tulo o upat ka adlaw, mokusog ang imong produksiyon sa gatas. Aw, ang mga lola nakapatutoy gani sa mga apo panahon sa emerhensiya! Ug bisan ang pila ka inahang nagsagop nakapatunghag gatas pinaagi sa pagpatutoy lamang sa ilang anak.
“Ang akong anak buot motutoy matag duha ka oras!”
Laing reklamo sa bag-ong mga inahan. Nahadlok silang ang ilang masuso dili mabusog sa ilang gatas. Apan hingpit normal nga ang bag-ong matawo motutoy matag duha ka oras. Ang pila ka masuso motutoy abot sa napulo ka beses sa 24 ka oras! Sa pag-edad sa bata ug duha o tulo ka bulan, lagmit kini nakaugmad na sa tulo o upat-oras nga eskedyul sa pagtutoy.
“Unsay akong buhaton kon may impeksiyon sa suso?”
Ayaw ihunong ang pagpatutoy sa bata. Hinunoa, dobleha ang pagpatutoy kay sa kasagaran sa naimpeksiyon nga suso aron kanunayng walay sulod ang suso. Ang impeksiyon, abi mo, lagmit anaa sa agianan sa gatas ug dili sa gatas mismo. Ang imong doktor tingali moresetag dili isog nga antibiotiko ug morekomendar sa hot compresses ug pahulay. Ako mismo mitomar ug 1,000 ka milligramong bitamina C matag duha o tulo ka oras sa una kong namatikdan ang impeksiyon, ug sa ikaduhang adlaw kadto nahanaw.
“Unsa man kon mawad-an akog gatas?”
Imposible. Ang suso maoy usa ka pabrika nga nagatrabaho 24 oras sa usa ka adlaw. Hinuon, ang produksiyon mahimong mohinay tungod sa suliran, hilanat, o mga emosyon. Ang remedyo mao ang pagrelaks, paghanaw sa mga suliran sa hunahuna, ug ibug-os ang hunahuna sa pag-alagad sa imong anak. Magpatutoy nga subsob pa hangtod ang imong suplay sa gatas modaghan na usab.
“May mahimo ba ang akong bana sa pagtabang?”
Ang labing dakong butang mahimo sa usa ka bana mao ang paghatag sa iyang gugma ug moral nga pagpaluyo. Angay niyang hinumdomang ang pagbatog anak maoy dakong shock sa lawas sa babaye. Madugaydugay una siya maulian. Busa angay pahinumdoman siya sa bana nga ang iyang pahulay ug ang kaayohan sa bata labi pang bililhon kay sa hingpit pagkaatiman nga balay. Lagmit ang bana makatabang sa pagpamalit ug pagpanghugas sa mga plato kasamtangan.
Hangtod kanus-a ako magpatutoy?
Kana depende kanimo ug sa imong anak. Ang gatas sa inahan maoy kompletong pagkaon, ug ang bata dili magkinahanglag laing pagkaon hangtod sa pagkatapos sa lima ka bulan. Ang personal kong tumong sa pagpatutoy sa akong mga anak maoy usa ka tuig. Si Sara, hinuon, nagpaabot hangtod si Isaas maoy lima ka tuig una siya lutasa!—Genesis 21:7, 8.
Ang pagpatutoy nagahatag sa kahibulongang higayon nga ang babaye masinati sa iyang anak ug magpahayag sa gugma alang niini. Hinumdomi, dili madugay nga kana dili na masuso. Busa pahimusli ang maong bililhong mga bulan samtang gamay pa ang bata.—Tinampo.