Pagpaniid sa Kalibotan
Mangil-ad nga mga Video
Ang operasyon sa kasingkasing sa nangamatayng mga pasyente sa atake sa kasingkasing, mga pagbitay sa mga rebolusyonaryo pinaagig mga firing squad, binilanggo nga gipatay sa silya elektrika, ug guwardiya sa parke nga gikaon sa buaya mao ang pipila ka aktuwal nga mga esena sa kamatayon nga karon matan-aw diha sa ginapaabangang mga teyp sa video. Ang tulo-ka-tomo nga seryal nga nag-ulohang Faces of Death mangilngig nga nagpakita sa mga tawong nagpinal diha sa mga pelikula. Unsay reaksiyon sa publiko niining seryal sa video? “Dili kini magdugay sa estante,” miingon ang usa ka tigbantay sa tindahan ug video sa Virginia Beach, Virginia, miingon ang The Virginian-Pilot and the Ledger-Star, usa ka pamantalaan sa Virginia. “Inig-uli sa naghulam niini, hulaman usab dayon kini sa uban.” Ang usa ka nasukong tumatan-aw nga supak sa unod sa pelikula mihimog kampaniya aron mawala kini diha sa lokal nga mga hulamanan ug video. Mikomento bahin sa pelikula, siya miingon: “Pornograpiko kaayo kini.”
Gastoso nga Panalipod
Tungod sa pagpangawat sa tindahan nga mikabat ug $30 ka bilyon sa usa ka tuig, dili ikatingala nga midako ang industriya sa paggamag mga aparato aron masumpo ang pagpangawat diha sa tindahan. Lakip niini mao ang EAS (Electronic Article Surveillance) nga mga produkto nga gitawag targets o mga puntariya. Kini maoy plastik nga mga plaka nga itaod diha sa mga butang sama sa sapot, kini maoy usa ka magnetikong hilo nga sama ka “pino sa buhok sa tawo,” o “sistema nga elektroniko nga itaod diha sa malabayng mga tag sa prisyo.” Ang “targets” matangtang o mapalong sa pagpaandar sa mga empliyado inigbayad na nimo sa imong pinalit. Ang mga kustomer sa mga tindahan nga migamit niining maong mga aparato kinahanglang moagi o molabay sa unit nga mohatag ug signal kon ang “target” wala palonga. Ang halin niining aparatoha miabot nag $150 ka milyon.
Bag-ong Tambal sa Sip-on?
Nganong ginaingon nga ang mga manunumbag kahoy nga taga Norwey panagsa rang takboyan ug sip-on? Sumala kang Dr. Olav Braenden, ang tubag makita sa aso sa kahoy nga ilang giginhawa, mitaho ang The Times sa London. Nagkinahanglag daghang oksihino ang virus sa sip-on aron mosanay. Apan, masanta ang ilang pagsanay pinaagi sa bitamina B ug C ug usab, kini gituohan, pinaagi sa polyphenols. Kining mga substansiyaha, nga anaa sa aso sa kahoy sa Norwey, makakuha sa suplay sa oksihino sa mucous membrane sa ilong. Gitaho nga kining tambala nga ipatulo sa ilong aduna niining tulo ka sambog nga nasulayan na diha sa 300 ka empliyado sa air force sa Norwey nga may 82 porsientong kalamposan sa pagtambal sa sip-on. “Ang importante mao ang pagtambal dayon niining igpatulo sa ilong sa unang timaan sa sip-on,” miingon ang direktor sa tigdukiduki si Dr. Anton Rodahl, “sa dili pa makahimog kadaot ang virus sa [hapin] sa mucous epithelium sa ilong.” Gibaligya kining tambala sa Norwey karon lang tuiga.
Hulad nga Pagsimba
Ang mga batang nagtungha sa Japan, nga nabalaka nga makasulod ug maayong mga tunghaan, migamit ug teknolohiya sa pagduol sa ilang mga diyos. Sa unsang paagi? Sumala sa Asahi Shimbun, usa ka mantalaan sa Tokyo, ipasulod sa estudyante ang iyang ngalan, direksiyon, tuig sa pagtungha, ug ngalan sa tunghaan nga gustong sudlan diha sa hulad nga unit nga gitaod sa telepono. Kining impormasyona ihatod dayon ngadto sa ampoanan sa Shinto diin basahon kini sa pari ug moampo sa kantidad nga 3,000 yen ($20, U.S.) Ang mga awtoridad sa ampoanan miingon, “Siyempre mas maayo nga mosimba atubangan sa altar sa imong kaugalingon.” Apan, usa ka pari sa Dazaifu Tenmangu sa Kyushu, ang labing popular nga ampoanan sa Japan nga gideboto alang sa edukasyon, mibatbat nga ang mga tawong abtik nga nagpuyo duol sa ampoanan nanukot hangtod 2,000 ka yen ($140, U.S.) aron sa paghawas sa mga magsisimba. Misupak ang mga pari nga gihimong negosyo ang pagsimba sa mga tawong dili-sakop sa ampoanan. Sila mihukom: “Gipadayag usab sa hulad ang mga pagbati sa kasingkasing. Managsama ra ang epekto,” ug nagtanyag sila ug serbisyong barato.
Mga Tarheta Alang sa Kaluwasan
Ang pagpangitag mga biktima sa pagdahili dugay nang problema sa mga tig-ski ug mga tigkatkat ug bukid. Bisan pag adunay daghang matang sa transmitter-receiver, diyutay lamang ang migamit kanila tungod sa ilang bili ug sa kabug-at ug sa gidak-on sa de-bateriyang mga modelo. Apan, usa ka tem sa mga tigdukiduking Pranses naghimog bag-ong ideya—mga tarheta alang sa kaluwasan. Itaod sa dughan ug sa likod sa kada tig-ski o tigkatkat ug bukid, mobalor lamang kinig pipila ka dolyar, wala kini magkinahanglag mga bateriya, ug sama rag gidak-on sa credit card. Sa unsang paagi nagaobra sila? Ang Pranses nga mantalaang Le Figaro mitaho nga sama silag salamin, nga mopaaninag ug bahin sa signal sa radyo ngadto sa tem sa mangluluwas nga may puwersadong transmitter. Diha sa mga pagsulay nga hinimo sa phototypes, milampos ang mga tigdukiduki sa pagpangita sa mga tawo nga nalubong sa 30 ka piye (9 cm) sa niyebe.
Nagapangawat sa Gobyerno
Ang dili pa dugay nga pagpanuki sa kuwenta sa kabtangan sa gobyerno sa Canada nakitang alakansig $3 milyones ngadto sa $4 milyones sa kabtangan sa gobyerno tuig-tuig. Bisan pag gibatbat sa opisyal nga paagi nga nawala ang kabtangan, giadmiter nga “gikawat tingali” kadto. Mitaho ang The Toronto Star nga lakip sa mga butang nga nangawala mao ang mga ilimnon, TV nga de-kolor, mga makinelya, mga suga sa lamesang tun-anan, dictaphones, 35-mm cameras, overhead projectors, kalkiyolitor, outboard motor, ug presir. Laing porma sa pangawat gikan sa gobyerno nagpakita nga halos $60 milyones ang nakuha gikan sa seguro sa walay mga trabaho sa Canada sa mga tawong naningkamot sa pagdaog sa sistema. “Adunay 180,458 ka mga panikas,” matud pa sa mantalaang The Globe and Mail. Makalilipay, sa tanan nianang nangawala, “$32.3 milyones ang nabalik.”
Lahi nga mga Paghilak
Makaila ba ang inahan sa hilak sa iyang kaugalingong anak? Oo, mitaho ang The Sunday Times sa London. Apan labaw pa ang kinaiyanhong kahibalo sa inahan, sumala sa mga nakaplagan ni Dr. Alain Lazartigues, sikyatrista sa bata sa La Pitié Salpetriére Hospital sa Paris. Gikan sa tuno sa paghilak, makahibalo usab siya sa katarongan niana, kon gigutom ba ang bata, basa, nasuko, o may sakit. Ang kagutom, nga mao ang labing komun nga hinungdan sa paghilak sa bata, may taas ug tuno tali sa 270 ug 450 hertz ug moabot ug 80 ug 85 ka decibel. Ang paghilak tungod sa sakit, kasuko, kalagot, ug kalipay, nag-ingon ang doktor, adunay ilang tagsaon usab nga kinaiyahan sa kalanog. Siya nakamatikod nga sa pipila ka sakit, ang paghilak sa bata nakitang nakatabang sa pagsusi sa sakit.
Mga Beterano ug Gubat sa TV
Ang kabangisan ug gubat mao ang regular nga ginapasalida sa telebisyon ug sa mga programa sa balita. Ang mga pelikula, ilabina, hilig sa pagpakita sa gubat sa dungganong paagi. Apan, ang mga beterano sa gubat, kinsa nakaagi sa mapait nga kangilngig niini wala malingaw niining mga hitaboa nga gipasalida sa telebisyon. Si Stan Knorth, beterano sa Gubat sa Kalibotan I, nga karon 90 anyos na, miingon diha sa St. Louis Magazine: “Sa dihang makita nako kanang pinosilay diha sa TV, palongon nako kini.” Ang katarongan? “Dili ako makaagwanta niini. Dili ko gustong mahinumdoman kana,” miingon si Knorth.
Sugmat-sugmat nga Insomia
Usa ka tawo nga nag-antos sa sugmat-sugmat nga insomia o kakulang sa katulog miabot ug siyam ka bulan nga wala makatulog ug dayon namatay, mitaho ang Evening Press sa Dublin, Ireland. Gibatbat ang hinungdan sa kamatayon, si Propesor Elio Lugaresi, neurologo sa University of Bologna Medical School sa Italya, mibatbat nga ang tagsaong sakit nga nakaapekto sa thalamus, usa ka sistema sa nerbiyos sa utok nga mohatag ug mga mensahe sa tunga sa utok ug sa lawas. Kon madaot ang mga komunikasyon, “ang sentro sa utok nga nagaobra nga samag motor mapalong.” Bisan pag nanlimbasog ang biktima sa pagsanta sa sakit, siya nahimong ika-14ng membro sa iyang pamilya nga namatay, sukad sa 1822, tungod sa kakulang sa katulog. Ang taho ni Lugaresi mahitungod sa kahimtang nakapukaw sa ubang mga siyentista sa papel nga gidula sa genetiko ug sa thalamus sa kaso sa grabeng insomia: “Nahibalo kami sa sistema sa sakit, apan kami walay paagi sa pagsumpo niana.”