Salapi—Ang Imong Buotang Ulipon

NIADTONG mga tuig 1968 ug 1986 ang gidaghanon sa mga tawo nga nagdeposito sa building society sa Gran Britanya midaghan gikan sa 15% ngadto sa 64%,” mitaho ang Glasgow Herald. Sa kasukwahi, ang mantalaan miingon: “Ang gidaghanon sa mga tawo nga sakop sa Kristohanong Iglesya mius-os.”

Ang salapi, kon Mammon, dugay nang giisip nga kaatbang sa Diyos, sa walay duhaduha tungod sa mga pulong ni Jesus: “Walay tawo ang makaalagad sa duha ka agalon: kay mahitabo man nga dumtan niya ang usa, ug higugmaon niya ang ikaduha . . . Dili kamo makaalagad sa Diyos ug sa mammon.”—Mateo 6:24, King James Version.

Apan, sa samang panahon, ang Bibliya nag-ingon usab, “Ang salapi usa ka panalipod.” (Ecclesiastes 7:12) O sumala sa pagkasulti niana sa usa ka tawo sa modernong panahon, “Ang salapi nagasulti sa pinulongan nga masabtan sa tanang mga nasod.”

Apan sa unsang paagi atong mapiho nga makahatag kaayohan ang salapi inay mokontrolar kanato?

Ang itaas gikinahanglan. Ikaw nagkinahanglan niini aron magmalipayon. Sumala sa gisulti sa Bibliya: “Busa, kon kita dunay makaon ug ikabesti, kini igo na nga makatagbaw kanato.” Ikaw wala na magkinahanglan ug dugang pa. “Kay wala kitay bisan unsa nga gidala nganhi sa kalibotan, ug dili usab kita makadalag bisag unsa ngadto sa gawas.”—1 Timoteo 6:7, 8.

Apan, komosta kon ang imong kuwartang makita kulang pa sa pagtagana kanimo nianang imong giisip nga mga kinahanglanon? Nan tingali magpalandong ka sa pagbalhin sa usa ka lugar diin ang imong suweldo makatapal sa imong mga panginahanglan. Apan dinhi angay nimong timbagtimbangon sa matinud-anon ug sa mainampingon ang situwasyon, kay ang pulong sa Diyos mipadayon sa pagpasidaan: “Apan sila nga maikagon gayod nga mahimong dato mangahulog sa panulay ug ngadto sa bitik ug ngadto sa daghang binuang ug makadaot nga pagpangibog, nga nagaunlod sa mga tawo ngadto sa kamatayon ug sa pagkalaglag.”—1 Timoteo 6:9.

Sa maalamon pamatia kining pasidaana! Pamatia ang Kristohanong apostol Pablo kinsa miawhag, “Bantayi ang inyong pagkinabuhi nga mahigawas kini gikan sa pagkahigugmaon ug salapi.” (Hebreohanon 13:5) Susiha ang imong kaugalingon, pangutana: ‘Tagbaw ba ako sa mga kinahanglanon lamang? O nagapangandoy ba akog mga kaluho?”

Tinuod, ang salapi makahatag ug makalipayng kaluho. “Ang tinapay maoy alang sa kalipay sa mga mamumuo, ug ang bino makahatag kalipay sa kinabuhi,” nagaingon ang Bibliya, “apan ang salapi magatubag sa tanang mga butang.” Bisan pa, ang mga kaluho nga mapalit sa salapi dili hinungdanon sa tinuod nga kalipay.—Ecclesiastes 10:19.

Pagpalakaw sa Salapi

Nan, unsa, ang imong mahimo aron sa pagbutang sa salapi sa hustong dapit niini, ingong ulipon? Importanteng magkinabuhi sibo sa kinitaan. Pananglitan, si Liz nga gihisgotan sa sinugdan, miingon: “Naamgohan ko karon nga ang tuboran sa mga problema sa akong pamilya sa bata pa ako mao ang dili maayong pagpalakaw sa salapi. Namalit kami pinaagi sa utang, ug busa ang utang mao ang anaa sa among hunahuna kanunay. Kini ang nakahatag kaguol.”

Siyempre, ikaw kinahanglan magbantay sa pagpalandong kon pilay imong kuwartang nabatonan. Inigdawat nimo sa imong suweldo, una paggahin ug kuwarta aron ikapalit sa pangunang mga kinahanglanon. Nining paagiha, ang imong salapi mahimong mapanalipdanong ulipon, sumala sa gipahayag sa Ecclesiastes 7:12 nga iyang mahimo.

Ang makataronganong pagpanglantaw sa unahan maoy hinungdanong bahin sa maayong pagpalakaw sa salapi. Paggahin ug kuwarta nga kinahanglan aron mabayran ang umaabot nga mga galastohan. Apan, hinumdomi, ang hingaping pagkabalaka sa pagtigom ug kuwarta alang sa umaabot sa pagkatinuod maoy makadaot nga porma sa materyalismo.

Hinumdomi, usab, nga ang ubang kuwarta nga imong nabatonan sa tinuod dili gayod imoha. Nakahinumdom ka ba sa dihang nangutana si Jesus bahin sa pagbayad sa mga buhis? Siya nangayog sensilyo ug nangutana, “Kang kinsa man kining dagway ug kining nahisulat?”

“Kang Cesar,” miingon sila.

“Bayri ninyo si Cesar sa mga butang nga iya ni Cesar,” mitubag si Jesus.

Busa, ang mga kagamhanan tukmang mangayog buhis ingong bayad alang sa mga serbisyo sa pag-atiman sa panglawas, sa edukasyon, ug sa mga pasilidad sa transportasyon. Kon ginatinguha nimo ang pag-uyon sa Diyos, nan obligado ka sa pagbayad sa gipangayog kantidad alang sa mga buhis.—Marcos 12:13-17.

Laing Kinahanglanon

Gawas sa pagkaon, sapot, ug puy-anan, dunay laing kinahanglanon nga kon atong pasagdan mohatag kanatog seryosong mga problema. Nahibalo ka ba kon unsa kining kinahanglanona gikan niining mga pulong ni Jesus: “Pangita kamog higala alang sa inyong kaugalingon pinaagi sa malimbongon nga bahandi, aron nga inigkahurot na niini kamo ilang pagadawaton ngadto sa dayong mga puloy-anan”?—Lucas 16:9.

Ang mga bahandi mapakyas. Bahin niana daghan kanato ang nahibalo sa dihang atong makita nga ang gahom sa pagpalit sa atong salapi ginakaon sa implasyon. Busa, samtang buhi pa kita, atong gamiton ang atong salapi sa paagi nga makahimog mga higala alang niadtong modawat kanato ngadto sa “dayong mga puloy-anan.” Kinsa kining mga dumadawat?

Si Jesu-Kristo mismo mihatag ug tubag sa dihang siya miingon diha sa iyang pag-ampo: “Kini nagkahulogang kinabuhing dayon, ang ilang pagkuhag kahibalo kanimo, nga mao ang bugtong tinuod nga Diyos, ug sa usa nga imong gipadala, si Jesu-Kristo.” (Juan 17:3) Oo, kon gusto kitag kinabuhi saylo sa ato karong mubo, puno sa kaguol nga kinabuhi, hinungdanon gayod nga kita mahimong mga higala sa atong Maglalalang, si Jehova nga Diyos, ug sa iyang Anak, si Jesus.

Apan, ikaw mangutana, sa unsang paagi akong mahimo kini? Unsay akong isakripisyo niini? Mohatag ba kini kanakog tinuod nga kalipay?

[Mga Letrato sa panid 7]

Magmatagbaw sa mga Kinahanglanon sa Kinabuhi

Pagkaon

Sapot

Puloy-anan

[Letrato sa panid 8]

Ang pagtulon-an ni Jesus sa ‘pagbayad sa mga butang nga iya ni Cesar’ nagahatag kanatog responsabilidad karong adlawa