Pagpaniid sa Kalibotan
PAGLUTOS NABUNTOG
Bisan pa nga sa Agosto 15, 1989, giyagyag sa Bantayanang Torre ang paglutos sa mga Saksi ni Jehova sa Burundi, ang mga pag-atake ug pagdaogdaog nagpadayon nga walay hunong. Hinunoa, ang labing ulahing mga taho gikan sa Burundi nagpakitag pag-uswag nga 8.9 porsiento sa gidaghanon sa aktibong mga Saksi diha sa usa ka sirkito sa mga kongregasyon. Sa laing sirkito, diin ang paglutos mao ang labing mabangis, didto adunay 4.2 porsiento nga pag-uswag. Kining maong mga Saksi nagagugol ug aberids nga 17 ngadto sa 18 ka oras kada bulan sa ilang buluhatong pagsangyaw sa publiko. Ang mga isigkamagtutuo sa tibuok kalibotan nagpadayon sa pagsulat sa gobyerno sa Burundi sa pagprotesta sa pagpangdagmal sa mga Saksi.
INTERNASYONAL NGA MGA MANGONGOOT
Sa dihang moabot na ang ting-init sa London, moabot usab sa mga mangongoot. Duolan sa upat ka dosena kanila, nailhan sa tibuok-kalibotan nga mao ang labing banggiitan sa kalibotan, molupad ngadto sa siyudad ug nagapangawat sa gibanabanang £10 milyones nga kuwarta ug kabtangan nga walay duha ka bulan, mitaho ang The Sunday Times. Gitawag nga Los Chileanos, gikan sa Chile, ang ilang gigikanang nasod, sila moadto una sa Madrid, Espanya, o sa Milan, Italya, diin mangawat silag mga pasaporte aron makasulod sa ilegal nga paagi sa Inglaterra. Ang mga dagkong tindahan sa Oxford Street, ang mga estasyon sa tren sa Ilalom sa yuta, ug ang mga lawak-hulatanan sa mga otel sa West End mao ang pangunang mga target. Moipon sila sa panon sa mga tawo diha sa sosyal nga mga okasyon ug diha sa mga turista sa iladong mga lugar sama sa Tower of London ug sa Wetsminster Abbey. Sanglit hanas kaayo sila ug abtik ug dali nga makalinga sa ilang biktima, ang kapolisan nagtambag sa dili pagdala ug daghang kuwarta diha sa mga lugar nga daghang tawo. “Ang yanong lagda mao kini,” miingon ang usa ka polis, “bantayi kanunay ang imong mahalon nga mga butang.”
MAY KATUNGOD NGA MASAYOD?
Ang imperador sa Japan namatay nga “wala mahibalo sa iyang sakit o wala gani mangutana bahin niana,” miingon ang The Daily Yomiuri. Siya namatay sa kanser, sama sa iyang manghod nga igsoong lalaki sa 11 ka bulan nga milabay, nga wala mahibalo. Bisan pa nga daghang Hapones miingon nga sila gustong masayod kon sila may kanser ba, dos-tersiya miingon nga dili nila sultihan ang paryente nga gitakboyan niini. Kini nga hunahuna gipabanaag sa palumagian sa balita sa Japan, diin, bisan pag nahibalo nga may kanser ang imperador nga dugay na sa wala pa siya mamatay, sa katibuk-an ang maong ulohan gilikayan. Ang labing dakong peryodiko nga naghisgot sa sakit sa imperador napugos tungod sa kusganong pagprotesta dihadiha sa publiko sa dili pagpahayag ug bisan unsang komento samtang buhi pa ang imperador.
PAGPAKALMA SA MGA PAGHAGUROS
Sa dihang mihasmag ang Bagyong Hugo sa kabaybayon sa Amihanang Amerika sa Septiyembre 21 ug 22 niining tuiga, ang 220 ka kilometro por ora nga hangin mitumba sa dagkong mga tinukod ug gilambalamba ang mga barko samag mga dulaan. Ang mga Saksi ni Jehova sa kasikbit milihok dayon sa pagtabang sa ilang mga igsoon sa Charleston, sa South Carolina, nga maoy grabeng naig-an sa bagyo. Sa pagkabuntag sa ika-23, 125 ka buluntaryo milihok dayon, nanghinlo sa mga kagun-oban ug sa mga kahoyng nangatumba gikan sa mga balay sa kaubang mga Saksi ug sa mga Kingdom Hall. Ang mga suplay sa tubig, mga generitor, ug gasolina gidala. Sa pagkasunod adlaw, 14 ka trak ang miabot sa Charleston ug gipundohan ang lima ka Kingdom Hall niini ug pagkaon, dry ice, tubig, ug ubang mga suplay alang sa lokal nga mga Saksi. Sa pipila lang ka adlaw, ang usa ka grupo sa mga Saksi nakaamot ug $10,000 aron sa pagtagana niining dinaliang mga panginahanglan.