Kabatan-onan Karong Adlawa—Pag-atubang sa mga Hagit sa Katuigang 1990

NOBYEMBRE 1985. Ang mga tawong dagkog ranggo gikan sa 103 ka nasod nagtigom sa hedkuwarter sa Hiniusang Kanasoran sa paglaraw sa “usa ka tibuok-yutang estratehiya nga magasulbad sa mga problema sa kabatan-onan sa kalibotan.”​—UN Chronicle.

Milabay na ang lima ka tuig, ug nagbuntaog gihapon ang mga problema sa kabatan-onan. Ang mga panagbangi sa politikanhong pilosopiya, ang kanihit sa pondo, ug sigeg-nagabalhing mga prioridad nagpakyas sa maayog-tuyong mga singkamot sa mga gobyerno sa pagbuhat nga nagkahiusa alang sa kabatan-onan.

Ang relihiyon napakyas usab nga mahimong epektibong puwersa sa kaayohan. Ang bag-ong mga surbing Gallup sa Tinipong Bansa nagpadayag nga bisan tuod ang kinabag-an sa kabatan-onan (mga 90 porsiento) nagtuo sa Diyos (o sa usa ka tibuok-kalibotang espiritu), minoriya lamang ang nagaisip sa relihiyon ingong hinungdanon kaayo sa ilang kinabuhi. Dugang pa, diyutay ra o walay ginahimo ang relihiyon sa pagpugong sa kamahilayon sa sekso.

Unya anaa ang mga eksperto kono​—mga sikologo, mga sosyologo, mga magtatambag, ug ang susama​—kinsa nagahatag ug tambag sa mga batan-on. Ang pipila niana maayo ug mapuslanon. Hinuon, ang ilang tambag lagmit nagatumong sa pisikal nga mga butang: ang kalisdanan sa pangabuhi sa pagmabdos samtang tin-edyer, paglikay sa AIDS, ang pisikal nga kapeligrohan sa pag-abusar sa droga. Talagsa ra, kon ugaling ginahimo man, nga atubangon nila ang labi pang hinungdanong moral nga mga isyung nalangkit. Ang “mga eksperto” sa malangkobon kontento sa pagsunod sa presenteng mga kiling sa popular nga mga pagbati o pagsumay sa malinglahong mga eslogan, sama sa “Luwas nga sekso” o “Ingna lang nga dili!”

Komosta ang mga ginikanan? Daghan kaayo ang nalinga sa pangabuhi. Kay wala makaseguro kon unsang giya ang igahatag o gil-asan nga makighisgot sa tandogong mga butang, daghang ginikanan ang lagmit magpugong sa dihang motungha ang tandogong mga isyu. Nan, dili katingad-ang daghang batan-on modangop sa waykasinatiang mga isigkaingon alang sa tabang.

Ang Labing Maayong Tinubdan sa Tabang Alang sa mga Batan-on

Nan, sa unsang paagi ang mga batan-on makabatog praktikal nga mga tubag sa mga pangutana nga nakapalibog kanila? Ang mga pangutana sama sa: ‘Angay ba nakong tilawan ang mga droga ug alkoholikong ilimnon?’ ‘Unsa na man ang sekso sa dili pa magminyo?’ ‘Unsaon nako pagkasayod kon kini tinuod nga gugma?’ ‘Unsay umaabot alang nako?’

Tingali matingala ang uban sa pagkabati nga ang labing maayong tinubdan sa tambag alang sa mga batan-on mao ang Pulong sa Diyos, ang Bibliya. Ang Bibliya? Oo, kini daghag ikasulti sa mga batan-on. (Tan-awa ang Proverbio, kapitulo 1-7; Efeso 6:1-3.) Dugang pa, kini dinasig sa atong Maglalalang, kinsa nasayod kaayo sa “makasamok nga mga pangibog sa batan-on.” (2 Timoteo 2:20-22, Phillips; 3:16) Sa dili pa nimo isalindot ang ideya nga kining karaang basahon mahimong angayan sa kinabuhi sa katuigang 1990, palandonga: Posible ba nga ang kadaghanan sa tambag nga ginatanyag sa “mga eksperto” karong adlawa pagabasahon ug pagatahoron sa 50 anyos lamang gikan karon? Bisan pa niana, ang Bibliya padayong giisip nga ugdang kaliboan ka katuigan tapos kini masulat!

Tinuod, ang tawhanong katilingban nabalhin kaayo sukad sa panahon sa Bibliya, apan ang tawhanong kinaiya wala. Ang mga pangibog sa batan-on sa panguna sama gihapon. Busa ang Bibliya mapadapat gihapon karon. Ug kini makaabot sa hinungdan mismo sa daghan sa mga problema nga maylabot sa mga batan-on karong adlawa. Sa samang panahon, kini nagatanyag sa kabatan-onan ug paglaom sa umaabot.

Sanglit ang Bibliya nagagikan man sa atong Maglalalang, magdahom kita nga ang mga tambag niini moobra, praktikal. Ang tinuod-kinabuhing mga kasinatian sa linibong Kristohanong mga batan-on karong adlawa, nga nagasunod sa tambag sa Bibliya, nagapamatuod nga kini mao! Sa pagtabang sa kabatan-onan, ang Watch Tower Society mipatik sa usa ka librong gitawag Mga Pangutanang Gisukna sa mga Batan-on​—Mga Tubag nga Mosaler. Gihisgotan niini ang nagkadaiya kaayong mga butang gikabalak-an sa mga batan-on, ug ang tambag niini gipasukad kanunay sa Bibliya! Ang madasigong sanong sa batan-ong mga magbabasa sa maong basahon nagapamatuod dili lamang sa pagkaepektibo sa pahimangno sa Bibliya kondili sa kamatuoran nga ang kabatan-onan gusto ug nagalambo sa pagtultol sa Bibliya. Ang mosunod nga artikulo nagapahayag sa pipila sa kinasingkasing nga mga ekspresyon sa kabatan-onan gikan sa tibuok kalibotan.

Kon kaha ikaw batan-on o tigulang, angay nga ikaw masinati sa Bibliya. Ang mga Saksi ni Jehova nakatabang sa minilyon sa pagbuhat niana pinaagi sa kahikayan sa libreng pagtuon sa Bibliya sa balay, ug sila malipay gayod sa pagtabang kanimo. Pinaagi sa pagkasinati ug pagpadapat sa tambag sa Bibliya, ang mga batan-on mahibalo dili lamang sa praktikal nga mga solusyon sa mga problema karong adlawa apan sa paagi sa pagbaton sa pag-uyon sa Diyos, nga nagadapit sa mga batan-on sa pag-alagad kaniya.​—Ecclesiastes 12:1.

[Kahon sa panid 8]

Mga Pangutanang Gisukna sa mga Batan-on—Mga Tubag nga Mosaler

Aniay sampol sa tambag sa Bibliya nga gihatag niining basahona bahin sa pila ka isyu karon.

Ang Epidemya sa AIDS: “Likayi ang imoralidad. Ang ubang sala nga ginabuhat sa usa ka lalaki [o, babaye] dili magaapektar sa iyang lawas; apan ang lalaki nga sad-an sa kahilayan sa sekso nagapakasala batok sa iyang lawas mismo.”​—1 Corinto 6:18, “Today’s English Version”; itandi ang Proverbio 5:3-20.

Pag-abusar sa Alkohol: “Ayaw pagtipon taliwala sa mga kusog moinom ug bino, sa mga ulitan nga kumakaon ug unod. Kay ang palahubog ug ang ulitan modangat sa kakabos, ug ang pagkahingatulog magapasapot sa usa sa mga nuog lamang. Sa kataposan niana [ang bino] magapaak ingon sa bitin, ug kini magabuga ug hilo sama sa udto-udto.”​—Proverbio 23:20, 21, 32.

Panarbaho: “Nakita mo ba ang usa ka tawo nga mahanason sa iyang buhat? Siya magatindog sa atubangan sa mga hari; siya dili magatindog sa atubangan sa kasagarang mga tawo.”​—Proverbio 22:29.

“Bisan unsay inyong ginabuhat, buhata ninyo kana nga tibuok kalag ingon nga ngadto kang Jehova, ug dili ngadto sa mga tawo.”​—Colosas 3:23.

Kahadlok sa Nukleyar nga Kalaglagan: “Kini ang giingon ni Jehova, ang Maglalalang sa mga langit, Siya ang matuod nga Diyos, ang Mag-uumol sa yuta ug ang Magbubuhat niini, Siya ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an.”​—Isaias 45:18; 55:10, 11; Ecclesiastes 1:4.

Kadili-piho sa Pangabuhi: “Sila magatukod ug mga balay ug magapuyo niana; ug sila magatanom ug mga kaparrasan ug magakaon sa ilang bunga. Sila dili magatukod ug lain ang magapuyo; sila dili magatanom ug lain ang magakaon. . . . Sila dili magabuhat sa walay kapuslanan.”​—Isaias 65:21-23.