“Mole People”

BUGNAW ang tingtugnaw. Ang 1,100 kilometros nga kutay sa mga tunel sa subwey sa labing menos mas init kay sa gawas sa siyudad. Ang nagtubong populasyon sa mga tawong walay balay​—75,000 sila, sumala pa sa usa ka pagbanabana. Diha sa New York City, U.S.A., kadtong tulo ka butang nakamugnag usa ka makatugaw nga katingad-anan sa siyudad: mga molupyo sa tunel o “mole people,” nga maoy pagtawag sa uban kanila. Diha sa gagmayng mga dalan ug mga hagdanan, sa gibiyaang mga bodega, mga tunel, ug ubang mga suok niining dako lisod-taakon nga mga dapit, sila nagtukod ug gagmayng mga pinuy-anan. Diha sa usa ka dugay nang wala gamitang tunel sa tren sa Manhattan, daghan kanila ang mibalhin ngadto sa gibiyaan sementong mga lungag sa ilalom sa yuta, mga alkoba, ug mga pasamano. Ang uban nagtukod ug gagmay nga mga balongbalong diha sa tunel.

Ang kinabuhi sa tunel malisod. Ang mga ilaga nga samag gidak-on sa iring magdagandagan diha sa kangitngit. Matag tuig dinosenang mga tawo ang nangamatay tungod sa mga tren nga nagadahunog nga nagaagi diha sa mga tunel ug sa may koryente ikatulong riles. Ang mga polis regular nga nagalibot sa maong mga lugar sa pagpukaw sa mga walay balay. Sundan kini sa mga trabahante sa tren, nagaguba sa tinukodtukod nga mga pinuy-anan. Ilang guroyon ang mga kama ug mga alpombra, mga radyo ug mga telebisyon, laksion pa gani ang mga wallpaper sa mga bungbong sa ubang tagoanan sa tunel.

Inigbiya sa polis, ang mga walay balay mobalik. Sama sa giingon sa usa ka opisyal sa polis sa The New York Times, ang ilang tanang mga paningkamot sa pagbugaw sa mga walay balay magpabalhin lamang kanila makadiyot diha sa sulod sa sistema sa tunel. “Kini maoy usa ka mubog-abot nga solusyon,” matud pa niya. Apan ang pagkawalay-balay dili kay usa ka mubog-abot nga problema lamang. Sumala sa usa ka pagbanabana, ingon ka daghan sa duha ka milyon ang mga walay balay diha sa Tinipong Bansa lamang. Sa usa ka tuig lamang, ang ilang gidaghanon misulbong sa makapakurat nga 18 porsiento. Sa matin-aw, ang usa ka taas-ug-abot nga solusyon ang atong gikinahanglan. Mao kanay gisaad sa Maglalalang sa katawhan diha sa Bibliya​—usa ka panahon dihang ang matag tawo sa yuta magatukod unya ug iyang kaugalingong balay ug magapuyo diha niana, magatagamtam ug usa ka kinabuhing libre gikan sa mangilngig nga talan-awon sa kakabos ug pagkawalay-pinuy-anan.​—Isaias 65:21-23.