“Ang Bantayanang Torre” ug “Pagmata!”—Agig Apresasyon

Usa ka kolumnista sa Olandes nga mantalaang NRC Handelsblad sa Hulyo 24, 1990, miingon mahitungod sa Pagmata! ug sa kaubang magasin, Ang Bantayanang Torre:

‘Kadtong kinsa, sama nako, sa duha na ka dekada nag-isip sa mga magasing Pagmata! ug Ang Bantayanang Torre [gipatik sa mga Saksi ni Jehova] nga dili takos lantawon apan sulagma nga nakabasa niini bag-o pa lang mahingangha. Tumang nausab kini, sa dagway sa basahon ug sa unod.

‘Kaniadto, sa maong duha ka magasin, ang labing makakurat mao ang mga dibuho: mga hulagway nga usag kolor ug sa newsprint nga papel. Ang mga estorya, kon husto ang akong nahinumdoman, samag Reader’s Digest sa maayong balita ug kini pahapyaw lang kon maghisgot mahitungod sa lisod nga mga problema sa kalibotan, sama sa gubat, droga, sekso ug politika.

‘Kana bug-os nausab na karon. Ang duha ka magasin maoy usa ka matang sa pinamubo nga mga komentaryo sa mga panghitabo karon. Abunda nga pagkailustrar kini uban sa de-kolor nga mga letrato . . . Matag karon ug unya ang usa makadayeg sa daw makapadasig nga obra maestra, sama sa dibuho sa mga apostoles sa Kataposang Panihapon (diha sa Ang Bantayanang Torre sa Hulyo 1, 1990), apan kon posible, letrato ang gamiton. Mamatikdan usab nga ang Pagmata! daghag artikulo labot sa siyensiya. Sa Hulyo 8 nga gula, dihay artikulo mahitungod sa eklipse sa bulan sa Agosto 16 sa miaging tuig, mugbong batbat labot sa pagpasuso ug sa kalangkitan sa osteoporosis ug sa gidaghanon sa manganese diha sa dugo, ug kataposan apan sama kahinungdanon, ang tulo-ka-bahin nga artikulo diin ang mga hunahuna nga dapig ug kontra bahin sa panukiduki ginamit ang mga mananap gihikyad.’

Ang magsusulat dugang miingon: ‘Uban sa sirkulasyong 11,930,000 ka kopya sa 61 ka pinulongan [karon 12,980,000 ka kopya sa 64 ka pinulongan], ang Pagmata! naglangkob sa dili mabanabana nga tinubdan sa siyentipikanhong balita alang sa daghang magbabasa nga publiko.’

Siyempre, ang Ang Bantayanang Torre ug Pagmata! ‘tumang nausab’ sa panagway lamang niini​—dili sa unod. Sa daghang dekada na karon, ang duha ka magasin padayong nagapresentar ug maayong-pagkatuking mga artikulo nga nagapunting sa Gingharian sa Diyos ingong bugtong paglaom sa katawhan. Apan gilaoman nga ang miuswag nga porma sa among mga magasin mosangpot ug dugang pang mga indibiduwal nga mobasa sa among mga basahon ug makabaton ug kaayohan gikan sa nagahatag-kinabuhi nga mensahe niini.

[Mga hulagway sa panid 9]

Mga Olandes nga edisyon sa Ang Bantayanang Torre ug Pagmata!