Nanguna sa Pag-opera nga Walay Paggamit ug Dugo Diha sa mga Saksi ni Jehova

ANG mga Saksi ni Jehova kanunay nga nahimong ulohan sa mga balita sa mga katuigang dili pa dugay tungod kay dili sila magpadugang ug dugo. Bisan tuod ang katarongan sa ilang pagdumili Kasulatanhon, dunay naila usab nga mga kapeligrohan. (Genesis 9:3, 4; Levitico 17:10-12; Buhat 15:28, 29) Ang ilang baroganan misangpot ug mga komprontasyon sa mga doktor, mga ospital, ug mga korte. Ang edarang mga Saksi ni Jehova gihikawan sa operasyon tungod kay sila dili magpadugang ug dugo; ang ilang mga anak pinugos nga gidugangan ug dugo pinaagi sa sugo sa hukmanan.

Karong adlawa may kausaban na sa mga baroganan bahin sa mga pagdugang ug dugo. Ang mga suplay sa dugo sagad hugaw. Ang mga sakit, nga ang pipila makamatay, napasa tungod sa mga pagdugang ug dugo. Ang kadalo nahimong usa ka hinungdan dihang ang dugo nahimong dakong negosyo ug ang naandang paggamit niini ginaawhag​—nga nakadugang ug wala kinahanglanang risgo sa operasyon.a Alang niini ug sa ubang mga rason, daghan gawas sa mga Saksi ni Jehova ang nagpalandong pag-usab sa pagdawat sa naandang mga pagdugang ug dugo.

Ang mga Saksi ni Jehova nakabahin niining tanan. Libolibo kanila ang naoperahan ug sa kadaghanang mga kaso mas dali nga naulian kay sa mga tawong nakadawat ug dugo. Ang eksperyensiya sa mga Saksi ni Jehova nagpakita nga ang mga siruhano makaopera nga diyutayng dugo lang ang mawala ug nga diha sa pila ka kaso ang luwas nga gidaghanon sa dugo makaabot pa ug ubos pa kaayo sa gituohan niadto. Lain pa, ang ilang mga kaso nagapasundayag nga adunay daghang kapiliang mga paagi karon ang mabatonan, busa makamenos sa gasto ug makawala pa sa risgo sa mga pagdugang ug dugo. Ang ilang mga kadaogan diha sa korte nagauli sa mga pasyente sa ilang katungod sa pagdawat o sa pagdumili sa pila ka mga paagi sa pagpanambal.

Ang mga Saksi ni Jehova daghag nahimo niining bahina pinaagi sa pakigkooperar sa mga doktor ug sa mga ospital. Sa mga katuigang dili pa dugay sila nakatukod diha sa ilang hedkuwarter sa kalibotan ug usa ka departamento nga gitawag Hospital Information Services (HIS). Ang mga hawas niining departamentoha nakalibot sa mga nasod diha sa daghang bahin sa kalibotan, nagadumalag mga seminar sa pipila ka sangang buhatan sa Watch Tower Society ug nagpormag mga Hospital Liaison Committee nga maoy mokontak sa mga ospital ug mga doktor kon may panginahanglan. Samtang nagduaw sa dagkong mga sangang buhatan, ang mga hawas sa HIS nagtukod usab ug Hospital Information Service desk aron maoy moatiman sa buluhaton human sa ilang paggikan.

Gibansay niini nga mga seminar ang mga komite sa pagpakigsulti sa mga doktor ug sa mga empliyado sa ospital, aron hisgotan ang angay nga mga kapiliang pagdugang ug dugo ug sa pagpatin-aw nga ang maampingong mga katakos sa pag-opera makakunhod ug dako nga mahutdan ug dugo. Sa kataposan, ang nagaduaw nga mga membro sa HIS naghatag ug diha mismo sa ospital nga pagbansay ngadto sa bag-ong liaison nga mga komite pinaagi sa pagdala kanila aron makigkita sa mga doktor ug sa mga magdudumala sa ospital.

Sa pagsugod, 18 ka seminar ang gidumala sa Tinipong Bansa. Human niadto, upat ang gidumala sa dapit sa Pasipiko, usa diha sa Australia, Japan, Pilipinas, ug Hawaii, nagaalagad ug walo ka sangang buhatan sa Watch Tower Society diha sa maong lugar.b Sa Nobyembre ug Disyembre 1990, ang tulo ka membro sa HIS nagdumalag dugang napulo ka seminar sa Uropa, sa Latin Amerika, ug sa Caribeano. Ang mosunod mao ang taho sa mga resulta sa maong mga seminar.

Lima ang gihimo sa Uropa​—usa diha sa Inglaterra, Sweden, Pransiya, Alemanya, ug Espanya. Kining lima ka seminar nag-alagad ug 20 ka sangang buhatan sa Watch Tower Society ug nakabansay ug kapin sa 1,700 ka ansiano alang sa Hospital Liaison Committe nga buluhaton .

Ang usa ka Pranses nga siruhano miadmiter nga ang mga Saksi ni Jehova, pinaagi sa ilang malig-ong baroganan labot sa dugo, nakatabang sa medikal nga propesyon sa pag-uswag sa natad sa operasyon nga walay paggamit ug dugo. Siya miingon nga walay laing relihiyon ang hilabihang nakapaningkamot sa pagtabang sa katawhan niini aron masagubang ang malisod nga mga isyu.

Ang labing modernong ospital sa Madrid, Espanya, nasuko sa mga Saksi niining bahina. Ang usa ka Saksi nga kinahanglang operahan sa taludtod wala operahi tungod kay dili siya magpadugang ug dugo. Dihang dili siya mobiya sa ospital, ilang gipugos siya sa pagpagawas pinaagi sa dili paghatag kaniya ug pagkaon ug ilimnon. Apan, ang mga membro sa HIS, nakatigayon sa pagpakigsulti sulod sa duha ka oras sa medikal nga direktor ug hepe sa tig-opera. Ang resulta? Sila misugot sa paghimo sa operasyon ug giteleponohan ang gipagawas nga Saksi sa pagbalik alang sa operasyon.

Ang mga Saksi sa Italya nga namauli gikan sa seminar nakaengkuwentro dayon ug pagsulay sa pagpugos sa pagdugang ug dugo diha sa usa ka ahat nga natawong bata. Sila miingon: “Uban sa impormasyong among nakat-onan gikan sa seminar, among napakalma ang situwasyon, ug ang bata malamposong gitambalan nga walay dugo.”

Ngadto sa Latin Amerika ug sa Caribeano

Ang sunod nga lima ka seminar gihimo sa Mexico, Argentina, Brazil, Ecuador, ug Puerto Rico. Katloan-ug-duha ka sanga sa Watch Tower Society ang gialagaran niining lima ka seminar.

Ang direktor sa bangko sa dugo sa Mexico City miingon nga ang mga Saksi ni Jehova mao ang nanguna sa walay paggamit ug dugo nga pag-opera ug nga duna na karoy igong kahanas diha sa natad nga sa ingon ang uban makapahimulos gikan niadtong mga paningkamot sa pagpanguna. Iyang gitan-aw ang mga listahan sa HIS sa mga kapiliang paagi sa pagtambal sa mga kaso sa pagdugo.c Unya siya miingon: ‘Buot nakong kopyahan kini alang sa mga pisara sa tanang ospital sa Mexico City. Akong hangyoon ang mga doktor sa pagkopya niini alang sa ilang impormasyon. Unya, sa umaabot, kon motawag sila niining bangkoha sa dugo ug dugo, among hangyoon una sila sa pagkuha niining listahana, ug unya among pangutan-on sila, “Inyo na bang nasulayan kini nga kapilian? Inyo na ba kadtong nasulayan?” Kon wala pa nila masulayi kini nga mga kapilian, dili sila makakuhag dugo gikan namo gawas kon ilang gamiton una kini nga mga kapilian sa dugo!’

magasina.

Ang direktor sa bangko sa dugo sa amihanang Argentina matinabangon usab. Didto sa maong lugar, dunay polisa nga ang bisan kinsa nga modangop sa gidumala sa Estado nga ospital kinahanglang maghikay alang sa mga paryente ug mga higala sa pagdonar labing menos duha ka yunit sa dugo nga abante kay kon dili siya dili tambalan. Ang mga Saksi dili makasunod niini ug gihikawan sa operasyon. Human nga among gipatin-aw ang atong tim-os nga pagtuo mahitungod sa paggamit sa dugo, ang direktor mihikay sa pagbag-o niini nga polisa dihang sulaton kini pag-usab. Kasamtangan, ang mga Saksi nga nagpakita sa ilang tarheta nga Advance Medical Directive dihang ipasulod sa ospital libre gikan sa kinahanglanon sa pagdonar ug dugo.

Sa Ecuador adunay usa ka ilado ug impluwensiyal nga siruhano nga nakahimog kapin sa 2,500 ka operasyon diha sa mga Saksi ni Jehova ug sa dili mga Saksi nga walay paggamit ug dugo. Siya miingon nga siya nagplano sa pagsugod ug usa ka kampaniya nga iawhag ang walay paggamit ug dugo nga pag-opera sa maong nasod tungod sa daghang kapeligrohan ngadto sa pasyente gikan sa suplay sa dugo.

Human sa seminar sa Ecuador, usa ka siruhano nga mitambong sa presentasyon miingon: “Kon kining mga tawhana takos niining kalibreha sa pagpanukiduki sa medisina, may ikaingon kini mahitungod sa ilang pagtuon sa Bibliya ug nagpabati kanako nga ang ilang relihiyon takos nga susihon.”

Usa ka maayong kausaban sa tinamdan ang makaplagan sa Puerto Rico. Sa nanglabay, ang edarang mga Saksi usahay higtan diha sa katre ug ginapugos nga dugangan silag dugo; ang pipila kanila sa ulahi nangamatay. Ang mga hawas sa HIS nakigkita sa bise-presidente ug sa abogado sa Puerto Rico Hospital Association; ang ulahi mao usab ang tagdumala sa ospital. Dihadiha human sa pormal nga pagpailaila ug sa wala pa magsugod ang presentasyon sa HIS, ang abogado miingon nga siya may gustong isulti. Sa kahibulong sa mga Saksi, siya misugod sa pagpatin-aw sa plano sa pagpauswag sa mga katungod sa pasyente diha sa mga ospital sa isla, ug gikobre niini ang pangunang mga punto sa presentasyon! Siya nangayo usab ug permiso sa pagkopya sa pipila ka impormasyon nga gibilin kaniya; gusto niyang ilakip kini diha sa usa ka artikulo nga giandam pa alang sa magasin sa asosasyon sa ospital.

Mga Resultang Nabatonan Gikan sa Tinipong Bansa

Ang usa ka doktor​—si James J. Riley, tsirman sa departamento sa pag-opera diha sa iyang ospital​—miingon sa lokal nga liaison komite: “Kamo, sa akong pagsabot, nanguna sa medikal ug legal nga impormasyon bahin sa paggamit sa dugo.”

Diha sa usa ka dakong ospital sa Washington D.C., nakigkita ang Hospital Liaison Committee sa usa ka grupo sa administratibo ug medikal nga trabahante nga nanumpa sa ilang pagsuportar ug ilabina mipahayag sa ilang apresasyon alang “sa panaad sa Watchtower sa pagtabang sa kaugalingong katawhan niini sa panahon sa panginahanglan uban sa kahikayan sa pagtabang nga sama niini.”

Ang pangulo sa pag-atiman-pasyente nga departamento diha sa usa ka ospital sa Wisconsin miingon nga pagkasayop sa iyang kahibalo mahitungod sa mga Saksi ni Jehova. Iyang gidasig ang Hospital Liaison Committee sa “pagpadayon aron makaabot kini nga mensahe ngadto sa tanang mga tigtagana sa medisina.”

Ang usa ka bahin sa buluhaton sa HIS mao ang pagpadalag medikal ug legal nga mga butang ngadto sa natudlong mga doktor, mga ospital, ug medikal nga mga asosasyon. Usa ka tubag gikan sa administrador sa ospital sa Baltimore, Maryland, nga nagasusi sa kaugmaran sa mga pasyente aron ang ospital ug mga empliyado sa ospital dili makiha, miingon: “Salamat sa inyong matukiong materyal nga gipadala aron akong matagad ang bahin sa mga pagdugang ug dugo ug sa mga Saksi ni Jehova. Kining impormasyona makatabang kaayo sa pagtabang sa among ospital sa pagbag-o sa among mga polisa mahitungod sa pagtambal sa mga Saksi ni Jehova.”

Sa Tinipong Bansa lamang, mga 10,000 ka doktor ang anaa sa listahan niadtong andam mohimog walay-dugo nga pag-opera sa mga Saksi ni Jehova.

Sa pagkakaron, pinaagi sa 32 ka seminar nga nahimo, natukod ang liaison komite diha sa 62 ka sangang mga buhatan aron matagan-an ang mga panginahanglan sa mga Saksi ni Jehova sa nagkalainlaing bahin sa kalibotan. Sila andam na karon sa pag-atiman sa minilyong mga Saksi ni Jehova. Ang mga resulta nagpaila nga gipanalanginan ni Jehova sa pagkatinuod ang mga paningkamot sa HIS.

[Mga footnote]

[Kahon sa panid 10]

Pagsumpo ug Pagkontrolar sa Pagdugo nga Walay Pagdugang ug Dugo

1. Mga Gamit sa Operasyon:

a. Electrocautery

b. Pag-opera pinaagig laser

c. Argon beam coagulator

d. Gamma knife radiosurgery

2. Mga Paagi ug mga Gamit Aron Pangitaon ug Paundangon ang Pagdugo sa Sulod sa Lawas:

a. Endoscopy aron pangitaon ang dapit nga nagdugo sa sulod sa lawas

b. Flexible suction coagulator electrode (Papp, J. P., JAMA, Nobyembre 1, 1976, panid 2076-9)

c. Arterial embolization (JAMA, Nobyembre 18, 1974, panid 952-3)

d. Controlled hypotension (hangtod mapahunong ang pagdugo)

e. Tissue adhesives (Dr. S. E. Silvas, MWN, Septiyembre 5, 1977)

3. Mga Paagi sa Pag-opera ug Pag-anestisya:

a. Hypotensive anesthesia (pagpaus-os sa presyon sa dugo)

b. Hypothermia (pagpaus-os sa temperatura sa lawas)

c. Hemodilution sa panahon sa operasyon

d. Mga makina nga nagpaus-os sa pagdugo sa panahon sa operasyon, pananglitan, “cell-saver”

e. Makuting pagpatang-on sa pagdugo sa panahon sa operasyon ug paagi sa operasyon

f. Pagdugang ug mga membro sa grupo sa mga siruhano aron makunhoran ang panahon sa pag-opera

4. Mga Gamit sa Pagsubay:

a. Transcutaneous oxygen monitor

b. Oximeter

5. Volume Expanders:

a. Crystalloids

(1) Ringer’s lactate (Eichner, E. R., Surgery Annual, Enero 1982, panid 85-99)

(2) Normal saline

b. Colloids

(1) Dextran

(2) Gelatin (Howell, P. J., Anaesthesia, Enero 1987, panid 44-8)

(3) Hetastarch

6. Chemical Hemostats:

a. Avitene

b. Gelfoam

c. Oxycel

d. Surgicel

e. Daghan pang uban

7. Mga Tambal sa Diyutayg Hemoglobin:

a. Oksiheno

b. Hyperbaric oxygen chamber (Hart, G. B., JAMA, Mayo 20, 1974, panid 1028-9)

c. Iron dextran (Dudrick, S. J., Archives of Surgery, Hunyo 1985, panid 721-7)

d. Folic acid

e. Erythropoietin​—pagpadasig sa utok sa bukog sa paggamag dugo

f. Anabolic steroids, pananglitan, Decadurabolin o sintitikong hormone sa pagtubo

g. Bitamina B-12 iindiyeksiyon diha sa tisyu

h. Bitamina C

i. Bitamina E (ilabina diha sa bag-ong natawo)

8. Gawas sa Lawas nga mga Paagi:

a. Alang sa pagdugo:

(1) Bugkosag-hugot

(2) Mga paketeng yelo

(3) Pagpapuwesto sa lawas (pananglitan, ipataas ang nasamdang tiil aron mohinay ang pagdugo)

b. Alang sa nabungog:

(1) Butangag pressure cuff ang tiil

(2) Antishock nga mga karsones

(3) Ipaisa ang duha ka tiil aron maampingan ang presyon sa dugo

9. Mga Tambal Alang sa mga Pasyenteng May Problema sa Dugo:

a. DDAVP, desmopressin (Kobrinsky, N. L., Lancet, Mayo 26, 1984, panid 1145-8)

b. E-aminocaproic acid (Schwartz, S. I., Contemporary Surgery, Mayo 1977, panid 37-40)

c. Bitamina K

d. Bioflavonoids (Physician’s Desk Reference)

e. Carbazochrome salicylate

f. Tranexamic acid (Transfusion Medicine Topic Update, Mayo 1989)

g. Danazol

10. Uban Pang Punto:

a. Ang igo nga pag-us-os sa presyon sa dugo nga mga 90-100 mm nga Hg mahimong makatabang sa pagpatang-on sa pagdugo pinaagi sa kinaiyanhong pagtibugol sa dugo diha sa nasamad nga arteriya

b. Ang lagda nga labing ubos nga 10g hemoglobin alang sa operasyon walay lig-ong pagpaluyo sa siyensiya

c. Ang mga pasyente nga gioperahan nabuhi bisag 1.8 lang ang ilang hemoglobin (Anaesthesia, 1987, Tomo 42, panid 44-8)

d. Ang diyutay nga hemoglobin moresulta ug hinay nga paglapot sa dugo, busa makunhoran ang lulan sa kasingkasing ug daling moagos ang pluwido diha sa tisyu ug sa pagtaganag oksiheno sa dugo