Mga Batan-on Nangutana . . .

Unsay Akong Mahimo Mahitungod sa Daghan Kaayong Homwork?

“Ang “daghan kaayong buluhaton sa eskuylahan” nahisgotan na ingong usa sa labing kasagarang mga hinungdan sa kabug-at taliwala sa mga batan-on

“Kon dili ka organisado kaayo, mawad-an kag daghang panahon sa paghunahuna kon unsay imong sunod buhaton”

‘WALA kitay igong panahon!’ Maoy reklamo sa usa ka grupo sa hayskul nga mga estudyante. Ang hinungdan niining sulirana? Ang mga buluhaton sa eskuylahan ug ang homwork. “Ako motungha sa 8:00 s.b. ug matapos sa 5:30,” matud sa batan-ong si Véronique. “Ako makapauli sa balay, sa 6:30 na. Lisod kaayo. Ang mga ginikanan naghunahuna nga ang pagtungha usa ka maayong kinabuhi. Wala sila makasabot nga ang eskuylahan makakapoy ug makapabug-at, ug unya sa dihang kami mopauli, may homwork pa.” Ang 17-anyos nga si Sandrine midugang: “Ako mogugol ug gikan sa duha ngadto sa tulo ka oras sa usa ka gabii sa akong homwork, dugang pa sa mga hinapos sa semana.”

Si Véronique ug si Sandrine nagpuyo sa Pransiya, diin ang mga estudyante may usa sa kinatas-ang mga adlaw sa eskuylahan sa Uropa. Ang mga estudyante sa daghang ubang kayutaan sa susama mibating gibug-atan, pakyas, ug nalumsan sa tanang panginahanglan sa ilang panahon. Ang “daghan kaayong buluhaton sa eskuylahan” nahisgotan na ingong usa sa labing kasagarang mga hinungdan sa kabug-at taliwala sa mga batan-on.

Sanglit mas lisod kay kaniadto ang pagpangitag trabaho sa kadaghanang bahin sa kalibotan, daghang mga batan-on ang nakakita nga hinungdanon ang maayong edukasyon alang sa ilang kaugmaon diha sa kalibotan sa panarbaho. Sumala sa giingon sa usa ka estudyante sa hayskul nga si Violaine: “Ang kahigayonan sa pagbaton ug desenteng trabaho nagkalisod na nga ang mga bata karong adlawa nakaila nga usa lamang ka butang ang himoon​—MAGTUON!”

Dili Igo ang Panahon?

Bisan pa niana, kadtong maayog kahimoan sa tunghaan nahibalo nga nagkinahanglan kinig dakong panahon ug kusog. Ug kon ikaw usa ka Kristohanong batan-on, may dugang kang panginahanglan sa imong panahon: ang pagtambong sa Kristohanong mga tigom, pagtuon sa Bibliya, ug pagpaambit sa imong pagtuo sa uban. (Juan 17:3; Roma 10:10; Hebreohanon 10:24, 25) Ang Bibliya nagdugang sa pag-ingon nga may “panahon sa pagkatawa” ug paglingawlingaw. (Ecclesiastes 3:1, 4; 11:9) Sama sa kadaghanang batan-on, ikaw tingali gustong makabaton ug labing menos pila ka panahon alang sa lulinghayaw ug lingawlingaw. Apan ang buluhaton sa eskuylahan morag dili mohatag kanimo ug panahon sa paghimo sa mga butang nga kinahanglan nimong himoon​—ngani mas menos nga panahon sa paghimo sa mga butang nga gusto nimong himoon.

Hinuon, sa subsob ang suliran dili lang kay kakulang sa panahon. Usa ka pagtuon ning bag-o pa nagpakita nga ang duha sa pangunang mga rason kon nganong ang hayskul nga mga estudyante may mga suliran sa akademiko mao ang ilang “dili-maayong paggamit sa panahon” ug “kakulang sa organisasyon.” Sama sa nadiskobrehan sa usa ka batan-ong ginganlag Olivier, ang dili-maayong personal nga organisasyon makaapektar ug dako kay sa imong mga grado. Siya miingon: “Kon dili ka organisado kaayo, mawad-an kag daghang panahon sa paghunahuna kon unsay imong sunod buhaton.” Nan, sa unsang paagi makaorganisar ka sa imong kaugalingon?

Usa ka Balanseng Panglantaw sa Buluhaton sa Tunghaan

Una sa tanan, imong ibutang sa hustong dapit ang imong buluhaton sa eskuylahan. Ang Bibliya nagasulti kanato nga “tinoon ang mas hinungdanong mga butang.” (Filipos 1:10) Ug sa dihang imo kanang hunahunaon, unsa ba gayod ang labing hinungdanong butang sa imong kinabuhi? Dili ba ang imong espirituwal nga mga obligasyon? Gani, si Jesus miingon sa iyang mga sumusunod: “Nan, padayon sa pagpangita pag-una sa gingharian ug sa iyang pagkamatarong.” (Mateo 6:33) Kana nagkahulogan nga unahon ang Kristohanong mga tigom, pag-ampo, pagtuon, ug ang buluhatong pagsangyaw sa uban.

Kini ba nagpasabot nga ang buluhaton sa eskuylahan dili hinungdanon? Wala gayod. Apan ingong usa ka Kristohanon, ang imong tumong sa pag-agpas ug edukasyon dili kay sa pagsangkap kanimo alang sa usa ka sekular nga karera. Inay, kana alang sa pagkat-on ug mga kahanas nga mapuslan nimo sa imong karera ingong ministro sa Diyos. Sa samang panahon, giandam nimo ang imong kaugalingon aron makakitag trabaho ug masuportahan ang imong kaugalingon, ug tingali ang usa ka pamilya sa pila ka adlaw. (1 Tesalonica 4:11, 12; 1 Timoteo 5:8) Ang pagkasayod niini kinahanglang motabang kanimong maningkamot sa paghimo sa imong maarangan sa eskuylahan. Sa samang panahon, kinahanglang ikaw maningkamot ug igo aron mahuptan ang imong kaugalingon nga lig-on sa espirituwal.

Ang “pagpalit ug angayng panahon” alang sa espirituwal nga mga obligasyon, buluhaton sa balay, lulinghayaw, ug buluhaton sa eskuylahan, mahimong usa ka tinuod nga hagit, apan kana malampos.​—Efeso 5:15, 16.

Ang Bili sa Paghimog Rutina

Ang usa ka paagi sa pagpalit ug panahon mao ang pagkahimong labaw nga epektibo sa paagi sa imong pagtuon. Ang kapitulo 18 sa librong Mga Pangutanang Gisukna sa mga Batan-on​—Mga Tubag nga Mosaler nagatanyag ug ubay-ubayng sugyot nga makatabang.a Pananglitan, nakahimo ka na bag eskedyul o nakahimog rutina sa imong mga buluhaton sa eskuylahan?—Itandi ang Filipos 3:16.

“Walay duhaduha ang labing sagad nga kakulian sa pagtuon,” si Harry Maddox misulat diha sa iyang librong How to Study, “mao lamang ang pagkapakyas sa pagsugod sa makanunayon gitagad sa bug-os nga buluhaton.” Komosta ka man? Langanlanganon ba nimo ang paghimo sa imong homwork hangtod nga mobati kang gusto na nimo kanang himoon​—o sa dihang morag kombenyente? Ang Ecclesiastes 11:4 nagpasidaan: “Siya nga nagabantay sa hangin dili makapugas ug binhi; ug siya nga nagalantaw sa mga panganod dili magaani.”

Si Harry Maddox dugang miingon: “Hilabihang sayona ang pag-usik ug panahon sa inanay. Kon dili nimo pugson ang imong kaugalingon nga magbatog eskedyul may dakong purohan nga mogugol ka sa panahon nga alang unta sa pagtuon ngadto sa pagtan-aw ug T.V., pagbasag magasin, . . . o sa pagbuhat sa bisan unsa sa daghang butang buot buhaton sa mga estudyante nga walay kahanas inay kay sa tinuod nga pagtrabaho. Kon ikaw may eskedyul ug nakahukom sa pagtapot niana, kana may bug-os nga kusog sa balaod nga kinahanglang dili lapason, ug sa pag-abot sa panahon ang pagtuman niana mahimo nang sayon, ug mosugod ka sa pag-isip niana ingong kinaiyanhong bahin sa imong kinabuhi.”

Kon imong himoon ang imong buluhaton sa eskuylahan sa paaging maayong pagkaorganisar ug disiplinado, lagmit makabaton kag dugang panahon. Ang maayo nimong pagplano makatabang usab nimo sa paglikay sa mga panagbangi tali sa pagkompleto sa imong mga asaynment sa eskuylahan ug sa pagtuman sa imong Kristohanong mga obligasyon, sama sa pagtambong sa mga tigom sa kongregasyon.

Organisaha ang Imong Panahon!

Unsa na man ang ubang mga butang nga imong gusto ug kinahanglang taposon, sama sa mga buluhaton sa balay? Dinhi usab, ang pagkaorganisado mao ang yawi. Sulayi pagpadapat ang mosunod nga mga sugyot:

Ilista ang mga butang nga himoon. Ang konsultant sa pagdumala sa panahon nga si Stephanie Winston misugyot nga modala kag de-bulsang notbok sa tanang panahon. Gamita kana sa pagtala sa “matag ideya, asaynment, tawag, proyekto, tahas, o buluhaton​—dako o gamay, pitsepitse o importante—​samtang kana motungha.” Sa unang pagtan-aw, ang imong lista morag daghan kaayo, apan ang paggamit sa mosunod nga mga sugyot, imo kanang mapakunhod ngadto sa mas madumalang gidaghanon.

Ihan-ay ang mga butang sumala sa importansiya. Kini makatabang kanimo sa pagtagad sa mga butang nga kinahanglan gayod nga himoon. Sa samang panahon, mapaiway nimo ang mga butang nga makahulat o sa yano wala kay panahon sa pagbuhat.

Pag-andam ug eskedyul. Oo, ibalhin ang imong lista ngadto sa usa ka plano nga buhaton​—usa ka nasulat nga eskedyul. Usa ka gamay nga de-bulsang kalendaryo, o talaadlawan, tingali makatabang nimog maayo niining bahina. Halayo gikan sa paglimite sa imong kagawasan, ang usa ka maayong-pagkabalanseng eskedyul makapaarang nimo sa pagbaton ug mas maayong pagkontrol sa imong panahon.

Magmareyalistiko. Pinaagi sa pagsulaysulay, buhata sa dihang kana kinamaayohang panahon sa pagbuhat sa usa ka butang. Lagmit imong makaplagan nga may bentaha, pananglitan, sa pag-eskedyul nga himoon ang imong homwork sa kinasayohang posible sa adlaw, sa dihang ikaw igmat pa sa pangisip.

Hinuon, ilha nga dili nimo kinahanglang planohon ang matag gutlo sa imong kinabuhi. Hupti nga mapailin-ilinon ang imong eskedyul, nga maghatag luna sa mga wala damha ug sa mga butang dihadiha. Paghimog mga pagpasibo kon kinahanglan, apan sunda ang imong eskedyul kutob sa mahimo. Timan-i: Sagad nga mas maayo nga pasobrahan ug kalkulo ang gidaghanon sa panahon nga kinahanglanon nimo sa pagbuhat sa usa ka butang. Kanunay kang makapasibo kon makatapos kag sayo.

Paghimog kaugalingon nimong mga tagal. Kini motabang kanimo nga malikayan ang kiling nga mohulat sa kataposang minutos una pa buhaton ang usa ka butang. Kon ikaw may usa ka proyekto sa eskuylahan, sulayig tagal nga kompletohon kana nga abante kaayo kay sa petsa sa pagsubmiter niana.

Disiplinaha ang imong kaugalingon sa pagsunod sa imong eskedyul. Mahimong makadani ang pag-adto sa balay sa higala sa dihang kinahanglan kang mopabilin sa balay aron motuon alang sa kataposang pasulit. Apan pagpugas ug gamay kon bahin sa imong mga pagtuon, ug lagmit kang magaani ug mugbong mga grado sa ulahi. (Itandi ang 2 Corinto 9:6.) Gawas pa, sagad nga makapahimulos kag dugang sa imong libreng panahon kon human ka na sa imong buluhaton. Usa ka makatabang nga prinsipyo mao, Mga importanteng butang una, ayha pa ang makalingawng mga butang.

Ang pag-eskedyul ug pag-organisar sa imong kaugalingon magkinahanglag panahon, pailob, ug dakodakong disiplina sa kaugalingon, apan ang mga Kristohanon giingnan sa pagkontrol sa kaugalingon sa tanang mga butang. (1 Corinto 9:25) Ang pagkat-on sa pagsunod sa usa ka eskedyul maoy maayong pagbansay sa pagpadapat niining prinsipyoha. Ang mga resulta tingali katagbawan sa kalamposan, dugang pagkontrolar sa imong kinabuhi, ug dugang panahon sa paghimog mga butang nga gusto nimo ug kinahanglang buhaton.

[Footnote]

[Hulagway sa panid 15]

Paghimog eskedyul sa pagtuon ug sunda kana