Kalipay—Garantisado!
“MALIPAYON kadtong mahunahunaon sa ilang espirituwal nga panginahanglan,” matud ni Jesu-Kristo. (Mateo 5:3) Kasukwahi sa naandang kaalam, si Jesus mipunting nga ang pagtagbaw sa espirituwal nga panginahanglan sa usa inay ang pagtagbaw sa materyal nga mga tinguha maoy usa ka kinahanglanong sangkap aron molampos sa pagpangagpas sa kalipay. Kanang mga pulonga ni Jesus, kon sundon, katumbas sa usa ka garantiya sa kalipay.
Hinuon, ang pagkamahunahunaon sa espirituwal nga panginahanglan sa usa wala lamang magkahulogan sa pagkaamgo nga naglungtad kana. Kasagaran kaayo, ang usa ka panginahanglan nga wala matagbaw maoy usa ka tinubdan sa kabalaka ug kayugot inay sa kalipay. Ang proverbio sa Bibliya nagpahayag niini niining paagiha: “Ang pagdahom nga nalangan nagasakit sa kasingkasing.” (Proverbio 13:12) Busa, ang kalipay mobuswak sa dihang ang usa mohimo sa mga tikang nga ilhon ug unya tagbawon ang espirituwal nga panginahanglan sa usa. Sa unsang paagi mahimo kini?
Niini ang Bibliya nagtagana kon unsay gikinahanglan. Ngano man? Kay kini lamang ang makahatag ug mga tubag sa mga pangutana nga dugay nang gipalandong sa daghan nga wala makakaplag sa makapatagbawng mga tubag. Pananglitan, ikaw ba nahibulong gayod, ‘Unsa ang katuyoan sa kinabuhi? Nganong ang tawo ania sa yuta? Unsay anaa sa umaabot?’ Gawas sa pagtagana sa makapatagbawng mga tubag niini ug sa daghan pang ubang mga pangutana, gitagana usab sa Bibliya ang giya alang sa pagkinabuhi nga nakatabang sa milyonmilyon aron atubangon ang komplikadong mga suliran nga giatubang natong tanan karong adlawa ug sagad mobabag sa pagpangita nato ug kalipay. “Ang pulong [sa Diyos] maoy usa ka lamparahan sa akong tiil, ug usa ka kahayag sa akong alagianan,” matud sa salmista. (Salmo 119:105) Oo, ang Bibliya maoy usa ka tinong giya nga makatabang kanimo nga molampos sa pagpangagpas sa kalipay. Tagda kining duha ka tinuod-kinabuhing panig-ingnan.
Gikan sa Kayugot Ngadto sa Kalipay sa Kaminyoon
Ang kaminyoon mamahimong tinubdan sa kalipay o sa kaguol. Ikasubo, alang sa daghan ang ulahi mao ang tinuod. Bisan pa niana, ang tambag sa Bibliya, sa dihang gipadapat, nakatabang sa daghan sa pagkaplag ug kalipay sa kanhing masulob-on nga kaminyoon.
Si Yungk’un ug Meihsiu adunay ingon nga kasinatian. “Dili malipayon ang unang pito ka tuig sa among kaminyoon,” mitug-an si Yungk’un. “Diyutay ra kaayong panahon ang akong gigugol uban sa akong asawa ug duha ka anak babaye. Ngani, kasagarang ako matulog sa akong dapit-trabahoan.” Bisan pag sila nakabaton sa tanan nga ilang gikinahanglan sa materyal nga paagi, dili sila malipayon. Ang iyang asawa midugang: “Gawas sa pagsuportar kanamo sa materyal nga paagi, gitugyan sa akong bana ang tanang kahikayan sa pamilya sa akong pagdumala. Ako nayugot kaayo niadto.” Sila nagplano gani nga magbulag.
Si Yungk’un may ubang pamilyahanong suliran usab. Tungod sa nangaging pamilyahanong mga kabingkilan, siya wala makigtingog sa magulang niyang babaye sulod sa pito ka tuig. Kadto nahitabo bisan pag sila nagpuyo nga walay usa ka gatos ka metros ang gilay-on gikan sa usag usa. Karon, hinunoa, gipahimuslan niya ang malipayong kaminyoon ug maayong relasyon uban sa iyang igsoong babaye. Nganong nahitabo ang maong dakong kausaban?
“Ang akong asawa ug ako nagsugod sa pagtuon sa Bibliya uban sa mga Saksi ni Jehova ug sa pagtambong sa ilang senemanang mga tigom sa Bibliya,” misaysay si Yungk’un. Ang iyang igsoong babaye naghimo usab niana. Sila misugod pagpadapat sa mga butang nga ilang nakat-onan ug natingala sa mga sangpotanan. Si Yungk’un nakabaton ug trabaho nga nagtugot kaniya sa pag-atiman dili lamang sa materyal nga mga panginahanglan sa iyang pamilya kondili sa ilang espirituwal ug emosyonal usab nga mga panginahanglan. Karon gipahimuslan nila ang malipayon, nahiusang pamilyahanong kinabuhi.
Siya Nakakaplag ug Katuyoan sa Kinabuhi
Kadtong nagtuon ug tawhanong kinaiya nag-ingon nga aron magmalipayon atong gikinahanglan ang usa ka katarongan sa pagkabuhi, usa ka katuyoan sa kinabuhi. Ang kinabuhi nga gitumong sa mahakogong pagpangagpas ug materyal nga mga butang dili magtagbaw sa maong panginahanglan. Nakaplagan sa 26-anyos nga si Lini nga matuod kini.
“Ako kaniadto motrabaho ug 12 ka oras sa usa ka adlaw, pito ka adlaw sa usa ka semana,” matud niya. “Ang akong tumong mao ang pag-abli ug usa ka dakong beauty salon.” Bisan pag hapit na niyang matuman ang iyang pangandoy, gibati niya nga may nakulang sa iyang kinabuhi. “Ako kaniadto mahibulong kon unsa ang katuyoan sa kinabuhi. Mao ba lamang ang pagtrabaho ug pagpanapi?”
Unya usa ka adlaw may mianha sa iyang buhatan ug nangutana kaniya sa mismong pangutana nga iyang gikahibulongan. Siya giingnan nga ang Bibliya makatubag sa maong pangutana. Bisag siya wala pa gayod makabasa ug Bibliya sa nangagi, siya misugot nga mogahin ug usa ka oras matag semana aron susihon kana.
Gikan sa iyang senemanang pagtuon, nasayran ni Lini nga gitagna sa Bibliya ang daghan sa mga butang nga iyang nasaksihan matag adlaw. Natingala siya nga tukma kaayong gihubit nga abante sa Bibliya ang mga tinamdan nga naglungtad sa iyang palibot, nga nagtagna nga ang mga tawo unya maoy “mga mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos.” Gitun-an niya ang ubang mga tagna nga nagpunting sa walay-ingon nga pag-antos nga gipahinabo sa mga gubat, mga kagutmanan, ug mga katalagman sa kinaiyahan nga makita sa tibuok kalibotan.—2 Timoteo 3:1-5; Mateo 24:7, 12.
Dayon nakat-onan ni Lini ang butang nga nakapalipay kaayo kaniya—kining mga kahimtanga sa kalibotan nga kasagarang maghikaw sa katawhan sa kalipay maoy usa ka timaan nga haduol na ang usa ka bag-ong panahon sa kasaysayan sa tawo. (Mateo 24:3-14) Siya nakabasa usab diha sa Bibliya nga ang Maglalalang sa katawhan may katuyoan nga tukoron ang usa ka bag-ong kalibotan dinhi sa yuta, diin ang materyal nga kadagaya sa sukod nga wala pa hisayri sa dili-hingpit nga tawo molungtad sa tibuok kalibotan. (Salmo 72:16; Isaias 65:17, 18, 21, 22) Kining umaabot mauswagong katilingban dili pagadaoton sa paglungtad sa kadalo, kahakog, ug materyalismo, uban sa tanan nilang daotang sangpotanan. (Salmo 37:9-11, 29; 1 Corinto 6:9, 10) Nahinam siya sa dihang iyang nabasa kining mga pulonga diha sa Bibliya: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.”—2 Pedro 3:13.
Kalipay Nagpaabot Kanimo
Inay gugolon ang tanan niyang panahon sa pagpangagpas sa materyal nga mga tumong, si Lini karon naggugol sa kadaghanan sa iyang panahon sa pagsulti sa uban mahitungod sa mga butang nga iyang nakat-onan. Buot ka bang masayod ug dugang mahitungod niining kahibulongang mga saad? Gusto ba nimong masusihan kon sa unsang paagi ang Bibliya makatabang kanimo sa pagkaplag sa kalipay nga nakaplagan ni Lini, Yungk’un, Meihsiu, ug sa minilyon pang uban? Ang mga Saksi ni Jehova labing andam nga motabang kanimo.
[Hulagway sa panid 8, 9]
Ang atong Maglalalang may katuyoan nga tukoron ang usa ka paraiso sa yuta