Ang Hunahuna sa Bibliya

Sa Unsang Paagi Ikaw Mahadlok sa Usa ka Diyos sa Gugma?

“MALIPAYON ANG TAWO NGA NAHADLOK KANG JEHOVA.”—Salmo 112:1.

KON ang “Diyos gugma,” sumala sa paghubit kaniya sa Bibliya, nganong kinahanglang mahadlok kaniya? (1 Juan 4:16) Ang gugma ug kahadlok kasagarang giisip nga dili-magkatukma. Busa, unsay angay nga bahin sa kahadlok diha sa atong relasyon sa Diyos? Nganong mahadlok sa usa ka Diyos sa gugma? Ang dulot nga pagsusi kon sa unsang paagi ang pulong “kahadlok” gigamit diha sa Bibliya magtagana kanato ug mas maayong pagsabot niining butanga.

Sa kadaghanang pinulongan ang usa ka pulong mahimong adunay lainlaing matang sa kahulogan, depende sa konteksto. Pananglitan, sa pipila ka pinulongan ang usa tingali moingon: “I love ice cream” (“Ganahan ko ug sorbetes”) ug usab, “I love my children.” (“Gimahal ko ang akong mga anak.”) Adunay dakong kalainan sa kainiton ug sa mga matang sa gugma nga gipahayag. Sa susama, ang Bibliya naghisgot ug lainlaing matang sa kahadlok. Sa dihang mogamit kini sa pulong maylabot sa pagsimba sa Diyos, wala kini magtumong sa kalisang, kakuyaw, o pagbati sa nagsingabot nga silot. Hinunoa, ang kahadlok sa Diyos nagpasabot ug maayong mga pagbati​—kahingangha, kataha, ug halalom nga pagtahod. Kining hamiling mga pagbati inubanan sa gugma ug pagkadani ngadto sa Diyos, dili kinaiyanhong awhag nga mokalagiw o motago gikan kaniya.

Ang kahadlok sa Diyos mopuli sa dili-maayo, makapakurog nga kahadlok. Mahitungod sa tawo nga nahadlok sa Diyos, ang salmista misulat: “Dili siya mahadlok bisan sa daotang balita. Ang iyang kasingkasing malig-on, nga nagasalig kang Jehova.” (Salmo 112:7) Walay hulga gikan sa daotang mga tawo o gikan kang Satanas mismo ang makabuntog sa atong halalom nga pagtahod ug kataha kang Jehova. (Lucas 12:​4, 5) Ni kinahanglang mahadlok kitang moduol sa Diyos diha sa pag-ampo. Hinunoa, niining maong konteksto, ‘ginasalibay sa gugma ang kahadlok ngadto sa gawas.’​—1 Juan 4:18.

Ang Kalangitan ug ang Kahalangdon sa Diyos

Si Haring David sa kakaraanan maoy mahinadlokon sa Diyos nga tawo. Siya nahingangha sa dihang nagpalandong sa katahom ug kakuti sa kalalangan. Siya mipatugbaw: “Dayegon ko ikaw tungod kay sa makalilisang nga paagi ako kahibulongang gihimo. Kahibulongan ang imong mga buhat, ingon sa nahibaloan kaayo sa akong kalag.” (Salmo 139:14) Misud-ong sa langit panahon sa kagabhion, siya mipatugbaw: “Ang kalangitan nagapahayag sa himaya sa Diyos.” (Salmo 19:1) Nahanduraw ba nimo nga si David gikuyawan niining maong kasinatian? Sa kasukwahi, kini nagpalihok kaniya sa pag-awit ug mga pagdayeg ngadto kang Jehova.

Ang miuswag nga kahibalo karon bahin sa kalangitan maghatag kanato ug mas lig-ong katarongan nga mobatig kahingangha. Di pa dugay, ang mga astronomo nga naggamit sa Hubble Space Telescope misusi pa pag-ayo sa kalangitan kay ni bisan kinsang tawo una kanila. Gipili nila ang bahin sa langit nga morag walay sulod kon tan-awon sa gibase sa yuta nga mga teleskopyo ug nagpunting sa Hubble sa usa ka dapit nga sama lamang ka dako sa usa ka lugas nga balas nga gikuptan sa nagtuyhad nga bukton. Ang miresultang hulagway nagpunsisok, dili sa tinagsatagsang mga bituon, kondili sa mga galaksiya​—dagkong mga pundok nga nalangkoban sa binilyong bituon​—nga wala pa gayod makita sa tawo sukad!

Ang gidak-on, misteryo, ug pagkakahibulongan sa uniberso nagpatisok ug kahingangha sa usa ka idlot nga tigpaniid. Apan, ang maong mga kahibulongan maoy banaag lamang sa himaya ug gahom sa Maglalalang. Ang Bibliya nagtawag kang Jehova nga Diyos ang “Amahan sa langitnong mga kahayag” ug nagtug-an kanato nga siya “nagaihap sa mga bituon; silang tanan gitawag niya sa ilang mga ngalan.”​—Santiago 1:17; Salmo 147:4.

Ang kadako sa uniberso makita usab sa gidugayon sa panahon sa langitnong mga panghitabo. Ang kahayag gikan sa mga galaksiya nga giletratohan sa Hubble Space Telescope nagapanaw latas sa wanang sulod na sa binilyong katuigan! Dili ba ang atong bag-ohayng paglungtad ug kagamay kon itandi sa pagkapermanente sa kalangitan magpabati kanatog kahingangha ug halalom nga kataha alang sa Usa nga naghimo sa mga bituon? (Isaias 40:​22, 26) Ang pagkaamgo nga ang Diyos nga naglalang niining tanan usab ‘nahinumdom sa mortal nga tawo ug nag-atiman kaniya’ magpalalom sa atong pagtamod sa atong Maglalalang ug mag-aghat kanato nga buot makaila kaniya ug magpahimuot kaniya. (Salmo 8:​3, 4) Ang maong halalom nga pagtahod ug pagpabili maoy giingon sa Bibliya nga kahadlok sa Diyos.

Usa ka Mapinasayloong Diyos

Kitang tanan dili hingpit. Bisan pag naningkamot sa pagbuhat kon unsay matarong, sa wala tuyoa kita makasala. Sa dihang mahitabo kana, angay ba kitang mahadlok nga mawad-an sa pabor sa Diyos? Ang salmista misulat: “Kon ang mga kasaypanan maoy imong bantayan, Oh Jah, Oh Jehova, kinsay makabarog? Kay adunay tinuod nga kapasayloan diha kanimo, aron nga ikaw mahimong kahadlokan.” (Salmo 130:​3, 4) Nga ang “Dakong Magbubuhat” maluloton ug mapinasayloon kaayo magpukaw ug lalom nga pagpabili ug kataha diha sa iyang mga magsisimba.​—Isaias 54:​5-8.

Ang kahadlok sa Diyos magpalihok kanato sa pagbuhat kon unsay maayo ug usab sa paglikay sa pagbuhat kon unsay giingon sa Diyos nga daotan. Ang atong relasyon uban sa atong langitnong Amahan mahimong ikatandi nianang sa usa ka maayong tawhanong amahan uban sa iyang mga anak. Usahay, ang mga anak tingali makalimot kon nganong ang ilang amahan nagdili kanila sa pagdula diha sa karsada. Sa gihapon, sa dihang bation nila ang awhag nga gukoron ang bola ngadto sa agianan sa mga sakyanan, ang paghunahuna sa pagdili sa ilang amahan magpugong kanila​—nga lagmit magluwas kanila gikan sa kamatayon. Sa susama, ang kahadlok sa usa ka hamtong nga tawo kang Jehova mahimong magpugong kaniya sa pagbuhat sa usa ka binuhatan nga makadaot ug mga kinabuhi​—sa iyang kaugalingon ug nianang sa uban.​—Proverbio 14:27.

Pagkahadlok sa Paghukom sa Diyos

Sa kaatbang, ang usa ka tawo kansang tanlag dili mopugong kaniya sa dili-pagpahimuot sa Diyos adunay katarongan nga mahadlok sa lahi kaayo nga paagi. Maingon nga ang tawhanong mga gobyerno magasilot sa mga kriminal, ang Diyos adunay katungod sa paglihok batok sa tinuyo, dili-mahinulsolong mga mamumuhat ug daotan. Ang temporaryong pagtugot sa Diyos sa tumang-pagkadaotan nagtugot sa pipila nga mahimong dili na hasolon sa usa ka daotang dalan. Apan ang Bibliya tin-awng nagpakita nga usa ka adlaw niana sa umaabot wagtangon niya ang tanang daotang mga elemento gikan sa yuta. (Salmo 37:​9, 10; Ecclesiastes 8:​11; 1 Timoteo 5:24) Ang dili-mahinulsolong tuman-ka-daotan adunay katarongan nga mahadlok sa silot gikan sa Diyos. Bisan pa niana, kining matanga sa kahadlok dili mao ang matang sa kahadlok nga gisugyot sa Bibliya.

Hinunoa, ang Bibliya naglangkit sa kahadlok kang Jehova sa matahom nga mga butang sa kinabuhi​—pag-awit, kangaya, pagsalig, kaalam, pagkataas sa kinabuhi, pagsalig, kauswagan, paglaom, ug kalinaw, sa paghisgot lang ug pipila.a Kon kita mopadayon sa paglakaw sa kahadlok kang Jehova, mapahimuslan nato ang maong mga panalangin sa walay kataposan.​—Deuteronomio 10:​12-14.

[Mga footnote]

[Picture Credit Line sa panid 26]

Kortesiya sa Anglo-Australian Observatory, letrato ni David Malin