Unsay Katuyoan sa Diyos?

DAGHANG tawo nga nagduhaduha sa paglungtad sa usa ka gamhanan-sa tanan, mahigugmaong Diyos nangutana: Kon naglungtad ang Diyos, nganong gitugotan niya ang hilabihang pag-antos ug pagkadaotan sa tibuok kasaysayan? Nganong gitugotan niya ang makaluluoyng kahimtang sa mga butang nga atong makita palibot nato karong adlawa? Nganong wala siyay gihimo aron taposon ang gubat, krimen, inhustisya, kakabos, ug ubang mga kagul-anan nga nag-uswag sa makahahadlok nga gikusgon diha sa daghan kaayong nasod sa yuta?

Gisugyot sa pipila nga ang Diyos naglalang sa uniberso, nagpahimutang sa mga tawo sa planetang Yuta, ug unya gipasagdan sila sa pagdumala sa ilang mga kalihokan. Sumala niini nga panglantaw, ang Diyos dili maoy basolon sa kasamok ug kagul-anan nga gipahinabo sa mga tawo sa ilang kaugalingon tungod sa ilang kadalo o sayop nga pagdumala.

Apan, ang uban nagsalikway niana nga teoriya. Pananglitan, ang propesor sa pisika nga si Conyers Herring, kinsa miangkon nga nagtuo sa Diyos, miingon: “Akong gisalikway ang ideya bahin sa usa ka Diyos nga dugay nang nagpaandar sa usa ka dakong makina sa relo ug sukad niadto naghinan-aw lamang samtang ang tawo nakigbisog sa suliran. Usa ka rason sa akong pagsalikway niini mao nga ang akong siyentipikanhong kasinatian wala maghatag kanako ug rason nga motuo nga dunay ‘makina sa relo’ nga modelo sa uniberso nga sa kataposan maoy tukma. Ang among siyentipikanhong mga teoriya . . . kanunayng angayan sa dugang ug dugang pang paghashas, apan segurado ako nga kanunay kining mapamatud-ang dili-hingpit. Sa akong hunahuna, mas maayong motuo sa buhing puwersa nga nagpaposible kanunay niining maong pag-uswag.”

Ang Diyos Duna Gayoy Katuyoan

Orihinal nga katuyoan sa Diyos nga puy-an ang planetang Yuta sa matarong, hingpit nga mga tawo. Si propetang Isaias misulat: “Mao kini ang giingon ni Jehova, ang Maglalalang sa mga langit, Siya ang matuod nga Diyos, ang Mag-uumol sa yuta ug ang Magbubuhat niini, Siya ang Usa nga lig-ong nagtukod niini, kinsa wala maglalang niini alang lamang sa walay kapuslanan, kinsa nag-umol niini aron pagapuy-an.”—Isaias 45:18.

Inay puy-an ang yuta pinaagi sa direktang paglalang sa tagsatagsa ka tawo, katuyoan sa Diyos nga pun-on ang yuta pinaagi sa pagsanay sa mga tawo. Sa dihang mirebelde si Adan ug Eva batok sa Diyos, wala kini magsanta sa iyang orihinal nga katuyoan, apan nagpahinabo kini ug kinahanglanong pagpasibo sa pipila ka detalye aron ang iyang katuyoan mahitungod sa mga tawo ug sa yuta matuman.

Sa mga unang 6,000 ka tuig niini nga yugto, gitugotan sa Diyos ang tawo sa paglihok nga independente sa iyang direktang paggiya. Mao kanay kinabubut-ong gipili sa atong orihinal nga mga ginikanan. (Genesis 3:17-19; Deuteronomio 32:4, 5) Kining pagtugot sa pagkaindependente gikan sa giya sa Diyos ug ang misunod nga pagmando sa mga tawo inay sa Diyos magpakita sa kawalay-katakos sa tawo sa pagtultol sa iyang mga lakang ug sa iyang kawalay-katakos sa pagmando sa iyang isigkatawo nga malamposon.

Siyempre, si Jehova nahibalo nang daan niini nga sangpotanan. Gidasig niya ang mga magsusulat sa Bibliya sa pagsulat niana. Pananglitan, si propetang Jeremias misulat: “Ako nasayod gayod, Oh Jehova, nga dili iya sa tawo ang iyang dalan. Dili iya sa tawo nga nagalakaw ang pagtultol sa iyang lakang.”—Jeremias 10:23.

Ang maalamong haring Solomon mikomento bahin sa malaglagong mga resulta nga mosunod sa dihang ang mga tawo mosulay sa pagdominar sa ilang isigkatawo, sama sa ilang gihimo latas sa kasiglohan. “Kining tanan nakita ko, ug gikugihan sa akong kasingkasing ang tanang buhat nga ginahimo ilalom sa adlaw, sa panahon nga ang tawo nagmando sa tawo sa iyang kadaotan.”—Ecclesiastes 8:9.

Apan, inay “naghinan-aw lamang samtang ang tawo nakigbisog sa suliran,” ang Labing Gamhanang Diyos dunay maayong rason sa pagtugot sa paglabay niining libolibong katuigan nga walay direktang pagbalda sa kinabuhi sa kadaghanan sa katawhan.

Nagsilbi ug Usa ka Maayong Katuyoan

Ang milabay nga 6,000 ka tuig sa tawhanong kasaysayan morag dugay kaayo kon itandi sa atong aberids nga gitas-on sa kinabuhi nga menos sa 100 ka tuig. Apan sumala sa orasan sa Diyos ug sa iyang panglantaw sa paglabay sa panahon, kining libolibo ka katuigan sama ra sa unom ka adlaw—wala makaabot ug usa ka semana! Misaysay si apostol Pedro: “Ayaw sayloi sa pagmatikod kining butanga, mga hinigugma, nga ang usa ka adlaw kang Jehova maoy ingon sa usa ka libo ka tuig ug ang usa ka libo ka tuig ingon sa usa ka adlaw.”—2 Pedro 3:8.

Dayon si Pedro mipadayon sa pagtubag sa bisan unsang sumbong sa pagpasagad o pag-unya-unya sa bahin sa Diyos, pinaagi sa pagdugang: “Si Jehova dili hinayan labot sa iyang saad, ingon sa pagkahinayan nga giisip sa pipila ka tawo, kundili mapailobon siya kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.”—2 Pedro 3:9.

Busa, sa dihang ang gitagal nga mga tuig matapos na, ang Maglalalang magtapos sa sayop nga pagdumala sa atong maanindot nga planeta. Nagtugot na siya ug igoigong panahon nga ikapasundayag sa tawo ang iyang kawalay-katakos sa pagmando o pagtapos sa gubat, kapintasan, kakabos, sakit, ug ubang mga hinungdan sa pag-antos. Magpamatuod kini pinaagi sa aktuwal nga kasinatian kon unsay gipakita sa Diyos sa katawhan sa sinugdanan—nga kinahanglang mosunod sila sa paggiya sa Diyos aron magmalamposon.—Genesis 2:15-17.

Sumala sa katumanan sa tagna sa Bibliya, nagkinabuhi na kita karon sa kataposang bahin sa “kataposang mga adlaw” niining dili-diyosnong sistema sa mga butang. (2 Timoteo 3:1-5, 13; Mateo 24:3-14) Ang pagtugot sa Diyos sa pagmando sa tawo nga independente kaniya maingon man sa pagkadaotan ug pag-antos hapit nang matapos. (Daniel 2:44) Sa dili madugay ang kinadak-ang kasakitan nga masaksihan niining kalibotana modangat kanato, nga matapos sa “gubat sa dakong adlaw sa Diyos nga Labing Gamhanan,” sa Armagedon. (Pinadayag 16:14, 16) Kining gidumala-sa-Diyos nga gubat dili maglaglag sa binuhat sa Diyos nga yuta, apan kini ‘magalaglag niadtong nagalaglag sa yuta.’—Pinadayag 11:18.

Gingharian sa Diyos sa Usa ka Libo ka Tuig

Duna unyay milyonmilyong makalabang-buhi sa yuta sa dihang ang Armagedon matapos na. (Pinadayag 7:9-14) Ang tagna sa Proverbio 2:21, 22 matuman na: “Ang mga matul-id maoy magpuyo sa yuta, ug ang mga hingpit maoy magpabilin diha niana. Mahitungod sa mga daotan, sila pagaputlon gikan sa yuta; ug mahitungod sa mga mabudhion, sila pagalukahon gikan niini.”

Katuyoan sa Diyos nga ang usa ka linaing yugto sa usa ka libo ka tuig mosunod sa matarong nga gubat sa Armagedon. (Pinadayag 20:1-3) Maglangkob kini sa Milenyal nga Pagmando sa Anak sa Diyos, si Kristo Jesus, ingong Hari sa langitnong Gingharian sa Diyos. (Mateo 6:10) Sulod niining makalipay nga pagmando sa Gingharian ibabaw sa yuta, milyonmilyon ang pagabanhawon gikan sa ilang pagkatulog sa kamatayon aron moduyog sa milyonmilyong nakalabang-buhi sa Armagedon. (Buhat 24:15) Duyog silang ipasig-uli sa kahingpitan, ug unya—sa pagkatapos sa Usa ka Libo ka Tuig nga Pagmando ni Kristo—ang yuta sa kataposan mapuno na sa hingpit nga mga lalaki ug babaye, tanan mga kaliwat ni Adan ug Eva. Ang katuyoan sa Diyos mahimayaon ug malamposong matuman.

Oo, katuyoan sa Diyos nga “‘pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.’ Ug ang Usa nga naglingkod sa trono miingon: ‘Tan-wa! Ginabag-o ko ang tanang butang.’” (Pinadayag 21:4, 5) Segurado, kanang maong katuyoan matuman sa haduol na kaayong umaabot.—Isaias 14:24, 27.

[Hulagway sa panid 5]

Sa bag-ong kalibotan sa Diyos, ang mga tawo mabuhi sa walay kataposan sa kalipay