Unsaon Nato Pag-ampo sa Diyos?

PRIBILEHIYO gayod ang pagpakigsulti sa Labing Gamhanan ug ang pagpadayag sa atong pagbati kaniya. Apan daghang tawo wala mahibalo kon unsaon pag-ampo, ug ang uban gustong magpauswag sa ilang pag-ampo. Ang ubang sumusunod ni Jesu-Kristo nabalaka sa kalidad sa ilang pag-ampo. Ang usa kanila miingon: “Ginoo, tudloi kami kon unsaon sa pag-ampo.” (Lucas 11:1) Mitubag si Jesus pinaagi sa paghatag ug sulondang pag-ampo nga gitawag ug Amahan Namo. Kanang nindot ug simpleng pag-ampo makatabang kon unsaon sa pagpakigsulti sa Diyos sa hustong paagi ug sa pagkasabot sa pangunang mensahe sa Bibliya.

Sulondang Pag-ampo ni Jesus

Si Jesus miingon: “Mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta. Ihatag kanamo karong adlawa ang among tinapay alang niining adlawa; ug pasayloa kami sa among mga utang, ingon nga kami nagapasaylo usab sa mga nakautang kanamo. Ug ayaw kami dad-a ngadto sa tentasyon, apan luwasa kami gikan sa usa nga daotan.’”—Mateo 6:9-13.

Matikdi si Jesus miingon: “Mag-ampo kamo sa ingon niini nga paagi.” Ang punto? Dili buot ni Jesus nga sumaysumayon sa iyang mga sumusunod ang iyang mga pulong. Wala niya idasig kining paagiha sa pag-ampo. (Mateo 6:7) Hinunoa, ang iyang pag-ampo nagpadayag kon unsay unahon—kon unsay importante sa Diyos, dili lang ang atoa. Aron mahibalo kon unsay unahon, kinahanglang atong masabtan ang kahulogan sa mga pulong ni Jesus. Atong hisgotan ang matag punto niini.

Sulondang Pag-ampo Gipatin-aw

“Amahan namo nga anaa sa mga langit, pagabalaanon unta ang imong ngalan.” Tukmang gitawag ni Jesus ang Diyos ingong “Amahan” kay Siya mahigugmaon ug mapanalipdanon, samag buotan nga tawhanong amahan. Duna siyay personal nga ngalan—Jehova—nga lahi sa daghang titulo, sama sa Labing Gamhanan, Diyos, ug Ginoo.a (Salmo 83:18) Apan nganong ang ngalan sa Diyos, diin nalangkit ang iyang dungog, kinahanglang balaanon? Kay kini gipasipalahan ug gibutangbutangan.

Gibasol sa ubang tawo ang Diyos nga maoy naghatag kanilag mga pagsulay, nga lagmit tawo ang nakaingon o naatol nga sila anaa sa sayop nga lugar ug sa sayop nga panahon. (Proverbio 19:3; Ecclesiastes 9:11) Ang Diyos giakusar sa uban nga maoy nagpahinabo sa mga kalamidad. Apan ang Bibliya nag-ingon nga “ang Diyos dili masulayan sa daotang mga butang ni siya mosulay kang bisan kinsa.” (Santiago 1:13) Ug daghang relihiyon nagtudlo nga silotan sa Diyos ang daotan pinaagi sa pagpaantos kanila sa walay kataposan diha sa nagkalayong impiyerno, usa ka doktrina nga makapasuko sa Diyos sa gugma. (Jeremias 19:5; 1 Juan 4:8) “Ang suhol nga ginabayad sa sala mao ang kamatayon,” matod pa sa Roma 6:23, dili ang walay kataposang pagpaantos!b

“Paanhia ang imong gingharian.” Ang Gingharian sa Diyos maoy usa ka kagamhanan diin si Jesu-Kristo ang Hari. Dili madugay, iyang mandoan ang tibuok yuta. “Kaniya dihay gihatag nga pagmando ug dignidad ug gingharian,” nag-ingon ang Daniel 7:14. Ang Gingharian sa Diyos ‘moanhi’ dihang mangilabot kini sa tawhanong kalihokan, nga magdugmok sa tanang pagmando ug maggahom sa tibuok yuta.—Daniel 2:44.

“Matuman unta ang imong kabubut-on, maingon sa langit, mao man usab sa yuta.” Sa pagmando sa Gingharian, ang katawhan magpasakop sa Diyos. Busa ang tanang mosimba sa Diyos sa kamatuoran magmalinawon. Ang makapabahinbahin nga politika ug ang bakak nga relihiyon mawala na. Sa mahulagwayon, sa umaabot ‘ang tolda sa Diyos mahiuban sa mga tawo,’ nag-ingon ang Pinadayag 21:3, 4, ‘ug iyang pahiran ang tanang luha sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’

“Ihatag kanamo karong adlawa ang among tinapay alang niining adlawa.” Human sa paghatag ug unang pagtagad sa ngalan sa Diyos ug sa iyang Gingharian, sunod gitagad ni Jesus ang atong mga panginahanglan. Ang iyang mga pulong nagpakita nga dili kita mangayog sobra sa atong gikinahanglan “alang niining adlawa.” Atong sundon ang tambag sa Proverbio 30:8: “Ayaw ako hatagi ug kakabos ni mga bahandi. Pakan-a ako sa pagkaon nga maoy gikinahanglan lamang alang kanako.”

“Pasayloa kami sa among mga utang, ingon nga kami nagapasaylo usab sa mga nakautang kanamo.” Dinhi, ang pulong nga “mga utang,” nagkahulogang “mga sala.”c Kitang tanan utangan sa Diyos ug pagkamasinugtanon. Busa kon kita mosupak o makasala kaniya, magkaanam ug kadako ang atong utang. Apan si Jehova andam mopapas sa atong utang kon kita andam mopasaylo.—Mateo 18:21-35.

“Ayaw kami dad-a ngadto sa tentasyon, apan luwasa kami gikan sa usa nga daotan.” Ang “usa nga daotan” mao si Satanas nga Yawa, nga gitawag usab ug “Maninental.” (Mateo 4:3) Kay dili hingpit, kita nagkinahanglag tabang sa Diyos sa pagsukol kang Satanas ug sa iyang tawhanong mga sumusunod.—Marcos 14:38.

Hinaot ang sulondang pag-ampo ni Jesus makatabang sa pagpauswag sa imong pag-ampo, tingali sa pag-usab sa kon unsay hatagan nimog unang pagtagad. Apan giunsa pagpatin-aw sa sulondang pag-ampo ni Jesus ang pangunang mensahe sa Bibliya? Matod pa ni Jesus, ang pangunang tema sa Bibliya mao ang pagbalaan sa ngalan sa Diyos, pagwagtang sa tanang pagkadaotan, ug ang malinawong pagmando sa yuta pinaagi sa Gingharian sa Diyos. Pagkatugob ug espirituwal nga mga bahandi ang sulondang pag-ampo ni Jesus!

[Mga footnote]

NAKAPAMALANDONG KA BA?

● Unsay gipasabot ni Jesus dihang siya miingon: “Mag-ampo kamo sa ingon niini nga paagi”?—Mateo 6:9.

● Unsay atong hatagag unang pagtagad diha sa atong mga pag-ampo?—Mateo 6:9, 10.

● Unsa ang ‘atong mga utang,’ ug nganong pasayloon nato kadtong nakasala kanato?—Mateo 6:12.

[Hulagway sa panid 13]

Ang sulondang pag-ampo ni Jesus makatabang kanimo sa pag-una kon unsay importante sa Diyos, dili lang ang imoha