Kapitulo 15
Nganong Mabalaka Kon Unsa ang Mahitabo sa Ubang Katawhan?
1. (a) Unsa ang nakapahinabo sa daghang katawhan nga mabalaka alang sa kaugalingon ug dili na kaayo mabalaka mahitungod sa uban? (b) Unsa ang resulta?
ANG dili hakug nga kabalaka mahitungod sa kaayohan sa uban talagsaon karon. Bisan tuod ang tanan natawo uban sa kapasidad sa gugma, sa dihang ang uban sa dili husto mangagpas sa ilang kaugalingong bintaha o kon ang kaugalingong mga panlimbasug sa usa sa pagpakitag gugma sabton ug sayup, ang usa ka tawo mahimong mohukom nga mas maayo ang pag-atiman na lamang sa kaugalingon. Ang uban, sa pagtan-aw nga kadtong kinsa nagapamintaha sa ilang isigkatawo kalagmitan mao ang nagauswag sa materyal, mahimong maghunahuna nga mao kini ang dalan sa kalampusan. Ang resulta mao nga daghan sa katawhan dunay espiritu sa kawalay pagsalig ug adunay pipila lamang ka matuod nga higala, kon duna man. Unsa ang katarungan alang niining dili malipayong kahimtang sa mga butang?
2. (a) Sa unsang paagi ang Bibliya nagapaila sa gamut sa suliran? (b) Unsa ang buot ipasabut nga makaila sa Diyos?
2 Wala ing gugma, ang matang sa gugma nga nagapadayag ug sinserong kabalaka alang sa malungtarong kaayohan sa uban. Ug nganong nawala kini? Sa pag-adto sa mismong gamut sa suliran, ang Bibliya nagapahayag: “Siya nga wala mahigugma wala makaila sa Diyos, tungod kay ang Diyos gugma.” (1 Juan 4:8) Siyempre, daghang naninguha-kaugalingong mga indibiduwal nagaangkon nga nagatuo sa Diyos ug bisan ngani nagaadtoan sa simbahan. Apan ang kamatuoran mao nga sila sa pagkamatuod wala makaila sa Diyos. Ang pag-ila sa Diyos nagapasabut nga maayong nasinati sa iyang personalidad, sa pag-ila sa iyang awtoridad, ug unya sa paglihok uyon sa atong nahibaloan bahin kaniya. (Jeremias 22:16; Tito 1:16) Busa, aron makabaton sa matuod nga kasadya sa kinabuhi nga moabut lamang kon ang usa nagapahayag sa gugma ug nagadawat niini, kinahanglan kita makaila ug maayo sa Diyos ug magapadapat sa atong natun-an.
3. Sa unsang paagi ang Diyos nagpakita sa iyang dakung gugma alang sa katawhan?
3 “Pinaagi niini ang gugma sa Diyos gipadayag sa atong kaso, tungod kay ang Diyos nagpadala sa iyang bugtong nga Anak sa kalibutan aron nga kita makabaton sa kinabuhi pinaagi kaniya,” nagsulat ang apostol Juan. “Ang gugma maoy niining bahina, nga wala kita [unang] nahigugma sa Diyos, apan nga siya nahigugma kanato ug nagpadala sa iyang Anak ingon nga usa ka halad sa pagpasig-uli alang sa atong mga sala. Mga hinigugma, kon nahigugma ang Diyos kanato niining paagi, nan kita sa atong kaugalingon ubos sa obligasyon sa paghigugma sa usa ug usa.” (1 Juan 4:9-11) Ang Diyos wala magtugot sa dili mahigugmaong paggawi sa katawhan sa pagpalong sa iyang kaugalingong gugma. Sumala sa gipahayag sa Roma 5:8: “Ang Diyos nagarekumenda sa iyang kaugalingong gugma kanato nga, samtang kita mga makasasala pa, si Kristo namatay alang kanato.”
4. Sa unsang paagi kana nagapabati kanimo sa personal mahitungod sa Diyos?
4 Pila ka tawo ang imo gayong gihigugma nga ihatag mo ang imong kinabuhi alang kanila—mga tawo kinsa sukad wala maghimo ug bisan unsang butang alang kanimo? Kon ikaw usa ka ginikanan, kinsa ang anaa diha nga sugot ka nga ang imong anak mamatay alang kaniya? Kana ang matang sa gugma nga gipakita sa Diyos kanato. (Juan 3:16) Sa unsang paagi ang pagkahibalo niini nagapabati kanimo mahitungod sa Diyos? Kon kita sa pagkamatuod nagaila sa iyang nahimo, atong makaplagan nga dili mabug-at ang pagsugot sa iyang mga sugo.—1 Juan 5:3.
5. (a) Unsa ang “bag-ong sugo” nga gihatag ni Jesus sa iyang mga disipulo? (b) Sa unsang paagi ang atong debosyon sa Diyos ingon nga magmamando nalangkit niana? (c) Unsa, nan, ang gikinahanglan sa pagkamasinundanon ngadto niining “bag-ong sugo”?
5 Sa gabii una sa iyang kamatayon si Jesus naghatag sa iyang mga disipulo sa usa niadtong mga sugo. Kini magapaila kanila ingon nga lahi sa uban sa kalibutan. Siya nag-ingon: “Ako nagahatag kaninyo sa usa ka bag-ong sugo, nga kamo mahigugma sa usa ug usa.” Ang sugo ni Jesus maoy “bag-o” sa pagkaagi nga siya nag-ingon sa paghigugma sa uban, dili lamang sama sa paghigugma sa ilang kaugalingon, apan “sama sa akong paghigugma kaninyo”—nga mahinangop sa paghatag sa ilang mga kinabuhi alang sa usa ug usa. (Juan 13:34, 35; 1 Juan 3:16) Kining matanga sa gugma nagapakita sa atong debosyon sa Diyos pinaagig pagpamatuod nga ang Yawa usa ka bakakon sa pangangkon nga walay tawo nga magsugot sa Diyos sa kapeligrohan sa iyang kaugalingong kinabuhi. (Job 2:1-10) Dayag na lamang, ang pagsugot niining “bag-ong sugo” nagakinahanglan sa lalum nga kabalaka alang sa usa ug usa.—Santiago 1:27; 2:15, 16; 1 Tesalonica 2:8.
6. Kang kinsa pa ang gugma ipakita, ug ngano?
6 Si Kristo nagpakamatay alang sa kalibutan sa katawhan, dili lamang alang sa iyang mga disipulo. Busa ang mga Kasulatan nagaawhag: “Samtang kita dunay panahon nga paborable alang niini, magbuhat kita sa maayo ngadto sa tanan, apan labi na niadtong kauban nato sa pagtuo.” (Galacia 6:10) Ang mga oportunidad sa ‘pagbuhat ug maayo ngadto sa tanan’ motungha sa matag adlaw. Kon ang atong gugma dili hiktin, apan bukas sa kasingkasing ug dagaya, kita nagasundog sa Diyos, “tungod kay siya nagapasubang sa iyang adlaw sa dautang katawhan ug sa maayo ug nagapaulan sa matarung katawhan ug sa dili matarung.”—Mateo 5:43-48.
Pagtahud Alang sa Persona ug Kabtangan sa Uban
7. Unsa ang mag-inpluensiya sa paagi sa atong pagtratar sa tawo ug sa kabtangan sa uban?
7 Kita nagapuyo taliwala sa usa ka kalibutan nga dili mahigugmaon. Ikaw tingali nakaamgo nga ikaw wala kanunay nagapakitag konsiderasyon sa uban nga unta angay himuon nimo. Apan kon ang usa ka tawo magaalagad sa Diyos, dunay panginahanglan alang sa kinasingkasing nga pagpanlimbasug alang kaniya sa ‘pagbag-o sa iyang hunahuna.’ (Roma 12:1, 2) Nagakinahanglan siya sa pag-usab sa iyang pagpanglantaw sa persona ug kabtangan sa uban.
8. (a) Unsa ang nagapakita sa kanat nga walay pagtagad alang sa kabtangan sa uban? (b) Unsang tambag sa Bibliya, kon sundon, ang magapugong sa usa ka tawo sa pagbuhat sa maong mga butang?
8 Sa ubang mga dapit anaa ang makapakurat nga walay pagtagad sa kabtangan sa uban. Alang lamang sa kahinam, ang mga batan-on magalaglag sa kabtangang pribado ug publiko. O sila tuyo nga nagadaut sa mga butang nga gikugihan paghago sa uban aron mabatonan. Ang uban mahimong magpahayag sa kalisang sa maong tuyong pagpangdaut, apan nagaamot niini pinaagi sa pagkatag ug hugaw sa mga parke, mga kalye, o sa mga tinukod publiko. Kini ba nga mga buhat uyon sa tambag ni Jesus: “Busa, ang tanang mga butang nga buot nimo nga buhaton sa mga tawo kanimo, buhata usab kanila”? (Mateo 7:12) Ang maong dili mahigugmaong paggawi nagapasundayag nga ang usa dili bug-os nga uyon sa katuyoan sa Diyos alang niining yuta nga mahimong usa ka paraiso.
9. (a) Sa unsang paagi ang pagpangawat nagaapektar sa mga kinabuhi sa tanan? (b) Ngano ang pagpangawat sayup sa mga mata sa Diyos?
9 Sa daghang mga dapit, ang kabalaka alang sa kinabuhi ug kabtangan sa usa nagahimo sa pagkandado sa mga ganghaan, sa pagbabag sa mga bintana, ug kumon ang bantay nga mga iro. Ang mga tindahan nagapataas sa ilang mga prisyo aron matapalan ang gipangawat. Apan ang pagpangawat walay luna didto sa Bag-ong Kahikayan sa Diyos. Busa, bisan kinsa nga nagalaom nga makapuyo didto kinahanglan makakat-on sa paglihok karon sa paagi nga nagaamot sa kasegurohan sa ilang isigkatawo. Ang Bibliya nagapakita nga ang “gasa sa Diyos” mao nga ang usa ka tawo “makatan-aw ug maayo sa tanan niyang kugihang pagbuhat.” Busa sayup ang pagsulay sa pagkuha kaniya sa mga resulta sa iyang buhat. (Ecclesiastes 3:13; 5:18) Daghang katawhan kinsa sa nangagi limbongan nag-usab. Dili lamang sila nagadumili sa pagpangawat kondili sila usab nakakat-on sa kasadya sa paghatag sa uban. (Buhat 20:35) Uban sa tinguha sa pagpahimuot sa Diyos, sila nagbutang sa kasingkasing sa gisulat sa Efeso 4:28: “Pasagdi ang kawatan nga dili na mangawat, apan hinuon pasagdi siya nga kugihang magabuhat, uban sa iyang mga kamot sa maayong buhat, aron nga siya dunay butang nga ikatagtag sa bisan kinsa nga nanginahanglan.”
10. (a) Sa unsang paagi, pinaagi sa atong pagsulti sa uban, makapakita kita sa konsiderasyon alang kanila? (b) Unsa ang makatabang sa usa ka tawo sa pagtuon sa pagpakitag gugma niining paagi?
10 Kalagmitan, labi na kon dili maayo ang lakaw sa mga butang, ang panginahanglan sa uban dili butang materyal, kondili ang kalolot. Apan, unsa ang mahitabo kon ang kapakyasan sa usa mahaanha sa kahayag? Mahimong adunay masuk-anong mga pagbuto, abusado nga panultihon, o masakit nga mga pulong. Bisan ang pipila nga admitido nga kini sayup mapakyas sa pagpugong sa ilang dila. Unsaon sa usa ka tawo sa pagbuntog sa maong batasan? Sa sukaranan, ang kulang mao ang gugma, ug kana nagapasabut nga anaa ang panginahanglan nga makaila sa Diyos. Kon ang usa ka tawo makaila sa gilapdon diin ang Diyos nagmaluluy-on kaniya, makaplagan niya nga dili malisud kaayo ang pagpasaylo sa uban. Siya ngani mosugod nga mangitag mga paagi sa pagtabang sa nakasala, sa pagtanyag sa malolotong tabang uban sa katuyoan sa pagpauswag.—Mateo 18:21-35; Efeso 4:31–5:2.
11. Nganong dili kita mahimong abusado sa atong pagsulti bisan kon ang uban dili maloloton kanato?
11 Matuod nga ang ubang katawhan mahimong dili magapadapat niining maayong tambag gikan sa Pulong sa Diyos sa ilang pagtratar kanato. Bisan pa sa atong sinserong mga motibo, usahay atong makaplagan nga kita mao ang tumong sa ilang pag-abuso. Unsa nan ang atong buhaton? Ang Bibliya nagatambag: “Ayaw tugoti ang imong kaugalingon nga madaug sa dautan, apan magpadayon sa pagdaug sa dautan uban sa maayo.” (Roma 12:17-21; 1 Pedro 2:21-23) Ang padayong kalolot sa atong bahin mahimong ngadtongadto magpahumok sa ilang pagpanglantaw ug magpagula sa ilang mas maayong mga hiyas. Bisan kon unsa man ang ilang reaksiyon, sa dihang magpadayon kita sa pagpakitag kalolot, atong ginapadayag nga kita nagabayaw sa paagi sa Diyos sa pagmando, nga gipasukad sa gugma.
Pagbuntog sa Rasanhon, Nasudnon, Sosyal nga Pagdapigdapig
12, 13. Sa unsang paagi ang Bibliya nagatabang sa usa ka tawo sa pagwagtang sa bisan unsang pagbati sa rasanhon, nasudnon, o sosyal nga pagdapigdapig?
12 Ang indibiduwal kinsa dunay matuod nga gugma dili mainpluensiyahan sa rasa, kolor sa panit, nasyonalidad, o sosyal nga estado. Nganong dili? Tungod kay siya nagaila sa kamatuoran sa Bibliya nga ang “[Diyos] naghimo gikan sa usa ka tawo sa tagsa ka nasud sa mga tawo.” (Buhat 17:26) Busa ang tanang mga tawo usa lamang ka banay. Walay rasa ang kinaiyang labaw sa usa.
13 Walay usa ang dunay bisan unsang katarungan sa pagpasigarbo tungod sa iyang kagikanan, rasa, kolor, nasyonalidad, o kahimtang sa kinabuhi. “Ang tanan nakasala ug nakabsan sa himaya sa Diyos.” (Roma 3:23) Busa ang tanan magasalig sa halad lukat ni Kristo. Ug ang Bibliya nagapakita nga kadtong pagaluwason latas sa nagasingabut nga “dakung kasakitan” magagikan sa “tanang mga nasud ug mga tribo ug mga katawhan ug mga sinultihan.”—Pinadayag 7:9, 14-17.
14. Ngano ang usa ka dili maayo personal nga kasinatian dili balido nga sukaranan sa pagdapigdapig batuk sa katawhan sa usa ka rasa o nasyonalidad?
14 Sa pagsulay sa pagpakamatarung sa iyang pagdapigdapig, ang usa ka tawo mahimong maghinumdom sa usa ka dili maayong kasinatian nga iyang nabatonan uban sa usa ka tawo sa usa ka rasa o nasyonalidad. Apan tanan ba nianang rasaha o nasyonalidad nalangkit sa sayup nga buhat? Ug dili ba ang katawhan sa mismong rasa o nasyonalidad sa usa sad-an usab sa maong butang? Kon kita nagalaum nga mabuhi sa malinawon Bag-ong Kahikayan, kinahanglan hinloan nato ang atong mga kasingkasing sa bisan unsang garbo nga dunay hilig sa pagpahilayo kanato sa ubang katawhan.
15. Kon ang mga komento sa usa ka tawo mahitungod sa rasa o nasyonalidad magapangdol sa usa ka kaubanang magtutuo, sa unsang paagi kini magaapektar sa iyang kaugalingong baruganan atubangan sa Diyos ug kang Kristo?
15 Kon unsa ang anaa sa atong mga kasingkasing sa madali o madugay mogula sa atong baba. Sama sa gisulti ni Kristo Jesus: “Gikan sa kadagaya sa kasingkasing [ang] baba nagasulti.” (Lucas 6:45) Unsa na man kon ang pagsulti nga nagabanaag sa pagdapigdapig magapangdol sa usa kinsa nagapakitag interes sa organisasyon ni Jehova? Ang maong butang seryoso kaayo nga si Jesus nagpasidaan: “Ang bisan kinsa nga nagapangdol sa usa niining mga gamay nga nagatuo, mas maayo pa alang kaniya kon ang usa ka galingan nga bato sama nianang ginapatuyok sa usa ka asno ihikut sa iyang liog ug siya aktuwal nga itambug ngadto sa dagat.”—Marcos 9:42.
16. Sa unsang paagi si Jesus nagapasabut sa dili pagpalabi nga kinahanglan atong ipakita sa ubang katawhan?
16 Ang mga Kristohanon ubos sa obligasyon sa pagpakitag mahigugmaong interes sa uban bisan kon unsang rasa, nasyonalidad, o kahimtang sa kinabuhi. (Santiago 2:1-9) Ingon sa giawhag ni Jesus: “Kon magahatag ka ug kumbira, dapita ang kabus nga katawhan, ang pungkol, ang piang, ang buta; ug magmalipayon ka, tungod kay sila walay bisan unsang butang ikabalus kanimo.” (Lucas 14:13, 14) Pinaagig pagpakita niining matanga sa matagdanong interes sa ubang katawhan, kita nagasumbaliksilaw sa mahigugmaong mga hiyas sa atong langitnong Amahan.
Mahigugmaong Kabalaka Alang sa Walay Katapusang Kaayohan sa Uban
17. (a) Unsa ang labing bililhong butang mahimong ikaambit nato sa uban? (b) Nganong magbati kita nga napalihok sa pagbuhat niana?
17 Ang atong kabalaka alang sa uban kinahanglan dili limitado sa ilang lawasnon nga kinahanglanon. Ni ang atong gugma mahimong kompleto tungod lamang kay kita maloloton ngadto sa tanang matang sa mga tawo. Alang sa kinabuhi nga makabaton sa matuod nga kahulogan, ang mga tawo kinahanglang makaila kang Jehova ug sa iyang mga katuyoan. Sa pag-ampo sa iyang Amahan, si Jesus nag-ingon: “Kini nagakahulogan sa walay katapusang kinabuhi, ang ilang pagbaton sa kahibalo mahitungod kanimo, ang bugtong matuod nga Diyos, ug sa usa kinsa imong gipadala, si Jesu-Kristo.” (Juan 17:3) Kon ikaw nakabasa niining basahon gikan sa sinugdanan, nahibalo ka kon unsaon sa pagbaton sa maong ganti. Nakita mo sa imong kaugalingon kon unsa ang gitagna sa mga Kasulatan mahitungod sa “dakung kasakitan,” ug sa pisikal nga ebidensiya nga nagalig-on sa pagkahaduol niini. Nahibalo ka nga ang Gingharian sa Diyos mao ang bugtong paglaum alang sa katawhan. Apan ang gugma ba alang kang Jehova ug alang sa imong isigkatawo nagapalihok kanimo nga ipaambit kining hinungdanong kahibalo sa uban?
18. (a) Sa Mateo 24:14, unsang bulohaton ang gitagna ni Jesus alang sa atong adlaw? (b) Sa unsang paagi atong lantawon ang pagpakig-ambit niini?
18 Sa nagahisgut mahitungod sa “konklusyon sa sistema sa mga butang,” si Jesus nagtagna: “Kining maayong balita sa gingharian igamantala sa tanang gipuy-ang yuta alang sa usa ka pagpamatuod sa tanang mga nasud; ug unya ang katapusan magaabut.” (Mateo 24:3, 14) Pagkadakung pribilihiyo nga magrepresentar sa Soberanong Magmamando sa uniberso, si Jehova mismo, samtang ang usa nagapakig-ambit niini nga “pagsaksi”! Ang oportunidad sa pagpakig-ambit niining espesyal nga bulohaton bukas pa gihapon, apan sa mubong panahon na lamang.
19. Nganong dili nato tugotan ang bisan unsang pagbati sa kakulang sa personal nga abilidad sa pagpugong kanato sa pagpakig-ambit niining bulohaton?
19 Sa pagtagad sa kalauman nga magpakig-ambit niining “pagpamatuod sa tanang mga nasud,” maayo nga amgohon nga maoy, dili ang personal nga abilidad sa usa, kondili ang Diyos ang nagapahinabo sa mensahe sa pagpatunghag mga resulta. (Buhat 16:14; 1 Corinto 3:6) Kon ikaw gipalihok sa mahinangpong kasingkasing, si Jehova makagamit kanimo sa pagpalampos sa iyang kabubut-on. Sama sa giingon ni apostol Pablo: “Karon pinaagi kang Kristo duna kita niining matang sa pagsalig sa Diyos. Dili nga kami sa among kaugalingon nahimong takus sa paghunahuna sa bisan unsang butang nga nagagikan sa among kaugalingon, apan ang among katakus nagagikan sa Diyos.”—2 Corinto 3:4-6.
20. (a) Ang tanan ba magasanong nga paborable sa maayong balita? (b) Unsang maayo ang nahimo pinaagi sa pagsangyaw sa katawhan kinsa walay pagtagad o bisan nagasupak?
20 Dili, hinuon, kita magadahum nga ang tanan magasanong nga paborable. Daghan ang dili magatagad. Ang uban magasupak. Apan mahimong makausab sila. Si Saul sa Tarsus, kinsa kaniadto usa ka maglulutos sa mga Kristohanon, nahimong usa ka madasigong apostol ni Jesus. (1 Timoteo 1:12, 13) Bisan kon ang uban nahibalo niini o wala, kinahanglanon nila ang mensahe sa Gingharian. Busa kinahanglan kita mabalaka kanila nga mahinangop sa paghago sa atong kaugalingon sa pagpalambo sa ilang dayong kaayohan. (1 Tesalonica 2:7, 8) Bisan kon sila dili buot sa mensahe sa Gingharian, ang maayo nahimo gihapon. Ang pamatuod gihatag, ang ngalan ni Jehova napadaku, nahimo ang ‘paglain’ sa katawhan, ug atong napasundayag ang ato mismong pagkamaunongon ngadto kang Jehova.—Mateo 25:31-33.
Nagakabalaka kon Unsa ang Mahitabo sa Imong Kaugalingong Panimalay
21. Unsang responsabilidad ang anaa sa ulo sa panimalay mahitungod sa espirituhanong kaayohan sa iyang kaugalingong panimalay?
21 Ang imong panlimbasug sa pagtabang sa uban sa pagbaton sa kaayohan sa mahigugmaong mga tagana ni Jehova kinahanglan usab itumong ngadto sa imong kaugalingong panimalay. Ang usa ka ulo sa pamilya, pananglitan, maoy responsable sa espirituwal nga pag-uswag sa iyang banay. Kini laktud nga ginainpluensiyahan pinaagig pagkamakanunayon sa iyang kahikayan panimalaynong paghisgut sa Pulong sa Diyos. Ug kon ang mga pag-ampo sa usa ka amahan alang sa panimalay nagapakita sa lalum nga debosyon ug pagpasalamat, kini makahulma sa pagpanglantaw sa entirong panimalay.
22. Nganong importante alang sa usa ka amahan sa pagdisiplina sa iyang mga anak, ug unsa ang magapalihok kaniya?
22 Ang iyang responsabilidad usab nagaapil sa pagpadapat sa disiplina. Kon magabangon ang mga suliran, daw mas sayon ang dili pagtagad kanila. Apan kon ang disiplina ipadapat lamang kon ang amahan nasuko, o kon ang mga suliran dumalahon lamang kon sila grabe na kaayo, dunay butang kulang. Nagaingon ang Proverbio 13:24: ‘Ang amahan kinsa nagahigugma sa iyang anak mao siya nga nagadisiplina kaniya.’ Mao nga ang mahigugmaong amahan nagapadapat sa disiplina nga masubayon. Siya sa mapailubon nagasaysay sa mga butang sa iyang mga anak ug nagatagad sa hunahuna, pagbati, ug lawasnong limitasyon sa matag usa. (Efeso 6:4; Colosas 3:21) Kon ikaw usa ka amahan, duna ka ba nianang matang sa gugma alang sa imong mga anak? Ikaw ba masinugtanon sa pag-abaga niining responsabilidad, nga nagalantaw dili lamang sa presente apan usab sa umaabut nga kaayohan sa imong panimalay?—Proverbio 23:13, 14; 29:17.
23. Sa unsang paagi ang usa ka inahan makaamot ngadto sa espirituhanong kaayohan sa iyang panimalay?
23 Ang asawa, usab, makahimog dakung amot sa panimalay. Ang iyang kooperasyon sa iyang bana ug iyang maalamong paggamit sa panahon sa paghulma sa kinabuhi sa ilang mga anak sa usa ka diyosnong paagi kalagmitan makita sa paggawi ug pagpanglantaw sa mga anak. (Proverbio 29:15) Bisan niadtong walay amahan sa puloy-anan, ang maampingong pagtudlo sa Bibliya inubanan sa maayong panig-ingnan nagapatungha sa maayong mga resulta.
24. (a) Kon atubangon sa pagsupak sa kapikas sa kaminyoon sa usa, unsang isyu ang kinahanglan ibutang sa nagatuo sa hunahuna? (b) Ubos sa maong mga sirkumstansiya, sa unsang paagi ang gugma ikapakita alang sa wala nagatuo nga kapikas?
24 Apan unsa na man kon ang usa ka amahan kinsa anaa sa puloy-anan wala nagadawat sa Pulong sa Diyos, o lutoson pa gani ang iyang asawa? Unsa ang buhaton sa asawa? Kon siya nahigugma kang Jehova, piho nga dili siya magatalikud Kaniya. Si Satanas mao ang nag-akusar nga ang mga tawo magatalikud sa Diyos kon magaantus sa kalisud. Siya dayag na lamang dili buot nga magabuhat sa gusto ni Satanas. (Job 2:1-5; Proverbio 27:11) Sa samang panahon, ang Bibliya nagaawhag kaniya nga pangitaon ang malungtarong kaayohan sa iyang bana. Ang pagbiya sa iyang nahibaloan nga mao ang kamatuoran magkahulogan sa pagkawala sa walay katapusang kinabuhi alang kanilang duha. Apan kon siya magpabilin nga malig-on sa iyang pagtuo, siya mahimong makatabang kaniya sa pagbaton sa kaluwasan. (1 Corinto 7:10-16; 1 Pedro 3:1, 2) Dugang pa, pinaagi sa pagpadayon sa pagpasidungog sa iyang mga panumpa sa kaminyoon, bisan ubos sa kalisdanan, siya nagapakita sa iyang lalum nga pagtahud alang sa Awtor sa kaminyoon, si Jehova nga Diyos.
25. Sa unsang paagi ang desisyon sa ginikanan nagaapektar sa paglaum sa kinabuhi sa mga anak?
25 Ang laing gamhanang katarungan alang sa usa ka nagatuong ginikanan nga magmatinumanon sa Diyos sa dihang nagaatubang sa paglutos mao ang mga anak. Ang Diyos nagahatag ug pasalig nga ang batan-ong mga anak sa iyang debotadong mga alagad pagaluwason latas sa nagasingabut nga “dakung kasakitan.” Bisan kon ang usa lamang ka ginikanan ang alagad ni Jehova, Siya nagaisip sa maong batan-ong mga anak nga “balaan.” (1 Corinto 7:14) Apan kon ang ginikanan “magasibug” sa pagbuhat sa kabubut-on sa Diyos, nan unsa? Ang maong ginikanan mawad-an sa aprobado nga baruganan atubangan sa Diyos dili lamang alang sa iyang kaugalingon kondili alang usab sa batan-ong mga anak. (Hebreohanon 12:25) Pagkasubong butang nga mawala kana!
26. Sa paglihok uban sa matuod nga kaayohan alang sa atong kaugalingon ug sa uban, unsa ang atong kinahanglang buhaton?
26 Walay sapayan kon unsang bahin sa kinabuhi ang atong lantawon, nan, dayag nga atong gikinahanglan ang pagpalandung dili lamang sa atong kaugalingon apan sa uban usab. Kita makadawat sa gugma kon kita nagabatasan sa pagpakitag gugma ngadto sa uban. (Lucas 6:38) Apan aron sa pagpasundayag sa matuod nga gugma ug dili mapasalaag sa mubog-panglantaw tawhanong pangatarungan, kinahanglan kita makaila kang Jehova ug sa pagbaton sa maayong relasyon uban kaniya. Ang atong pagbuhat niana, bisan pa, nagalangkit sa usa ka pagpili nga personal natong pagahimuon.
[Hulagway sa panid 171]
Ang matang sa gugma nga kinahanglang batonan sa mga alagad ni Jehova nagaobligar kanila sa pagpakitag dalisay nga pagtagad sa uban nga walay pag-isip sa rasa, nasyonalidad, o kahimtang