Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 20
Usa ka Malipayon Tawhanong Panimalay Ilalom sa Bag-ong Pagkaamahan
HUMAN sa Armageddon, ang ikaduhang pagkaamahan ang naghulat sa tanang katawhan. Kana maoy tinuod gayod nga balita! Ang bag-ong pagkaamahan nagpaposible sa walay kataposang kinabuhi sa tawhanong kahingpitan diha sa tibuok-yutang paraiso, kay ang bag-ong Amahan sa tawhanong pamilya mismo dili-mamatay. Siya may gahom sa paghatag ug hingpit nga kinabuhi diha sa tanan nga iyang sagopon ingong iyang mga anak dinhi sa yuta.
2 Usa ka bag-ong pagkaamahan ang gikinahanglan tungod kay nawad-an ang katawhan sa iyang orihinal nga pagkaamahan, ang pagkaamahan sa Maglalalang sa tawo. Ang linya sa kaliwat gikan kang Jesus balik sa unang tawo, si Adan, natapos pinaagi sa paghatag kanato niining listahan: “Cainan, ang anak ni Enosh, nga anak ni Seth, nga anak ni Adan, nga anak sa Diyos.”—Lucas 3:37, 38.
3 Ang pagkawala sa pagkaamahan ni Jehova nga Diyos napamatud-ang makasubo alang sa tanang katawhan. Ang mga kaliwat ni Adan nakapanunod sa tunglo sa kamatayon. Kining butanga tin-awng gipahayag diha sa Roma 5:12: “Ang sala misulod sa kalibotan pinaagi sa usa ka tawo ug ang kamatayon misulod pinaagi sa sala, ug nga tungod niini ang kamatayon mikuyanap ngadto sa tanang mga tawo sanglit ang tanang mga tawo nakasala man.” Kanang “usa ka tawo” mao si Adan, ug tungod sa iyang tinuyo nga sala, nawala niya ang pagkaamahan sa iyang Maglalalang, si Jehova.
4 Kang kinsang pagkaamahan napailalom si Adan? Kang kinsang pagkaamahan nga iyang giagak ang kalibotan sa katawhan? Ang pagkaamahan sa usa nga midaog kaniya sa pagbiya sa pamilya sa tanang matinumanong mga anak sa Diyos sa langit ug sa yuta. Ang pagkaamahan sa usa nga misulti sa unang bakak, si Satanas nga Yawa. Sa unsang paagi gihimo kadto sa magsusupak ni Jehova?
5 Diha sa 2 Corinto 11:3 giladlad ni apostol Pablo ang maong butang, nga nagsulat: “Si Eva gilimbongan sa bitin pinaagi sa lipatlipat niini.” Sa malipatong paagi, migamit si Satanas ug usa ka bitin sa Eden aron ipahayag ang unang bakak ngadto sa wala magtahap nga Eva, nga bakak nga giakusar ang Diyos nga namakak. (Genesis 3:1-7; Juan 8:44) Wala badlonga ni Adan ang iyang asawa. Wala siya mobalibad sa pagkaon uban kaniya ug wala luwasa ang kahimtang. Ang iyang tinuyong buhat nga daotan nakahatag bentaha sa Bitin. Nagbutang sa iyang pasangil sa tukmang dapit, ang 1 Timoteo 2:14 nag-ingon: “Si Adan dili mao ang gilimbongan, kondili ang babaye mao ang gilimbongan ug nahimong malinapason.”
Ang Usa nga Takos nga Mahimong Amahan
6 Sa pagdumili sa pagsimba sa “diyos niining sistema sa mga butang,” gipamatud-an ni Jesus nga siya ang usa nga gipiyalan sa ikaduhang pagkaamahan sa tawhanong panimalay. (2 Corinto 4:4; Mateo 4:1-11; Lucas 4:1-13) Gikan sa iyang tawhanong pagkatawo sa 2 W.K.P., diha Kaniya naaplikar ang tagna sa Isaias 9:6:
7 “Kay alang kanato ang usa ka bata matawo, alang kanato ang usa ka anak nga lalaki gihatag; ug ang kagamhanan igatongtong sa iyang abaga. Ug ang iyang ngalan pagatawgon Kahibulongang Magtatambag, Diyos nga Makagagahom, Walay Kataposang Amahan, Prinsipe sa Pakigdait.” Busa ang “Prinsipe sa Pakigdait” adunay laing hinungdanong papel nga dulaon alang sa katawhan—kanang pagkahimong “Walay Kataposang Amahan.”
8 Ang Anak sa Diyos mahimong “Walay Kataposang Amahan” niining tawhanong panimalay, nga alang niini iyang gihatag ang iyang hingpit tawhanong kinabuhi sa paghalad. Sama gayod kini sa gisulat ni apostol Pablo: “Tungod sa paglapas nga nahimo sa usa ka tawo daghan ang nangamatay, ang dili-takos nga kalulot sa Diyos ug ang iyang libreng gasa sa dili-takos nga kalulot pinaagi sa usa ka tawo nga si Jesus gipadagaya ngadto sa daghan. Busa, kon tungod sa usa ka paglapas nahimong tinunglo ang tanang matang sa tawo, sa ingon pinaagi sa usa ka buhat sa pagkamatarong ang tanang matang sa mga tawo gipahayag nga matarong alang sa kinabuhi.”—Roma 5:15, 18.
9 Busa, adunay hingpit nga pagkatimbang niining hinungdanong mga butang. Ang usa nga mihimo sa “usa ka paglapas” mao ang unang tawo sa yuta, si Adan. Ang “usa ka buhat sa pagkamatarong” gihimo sa lain pang usa ka hingpit nga tawo, si Jesus. Kini nakahimo kaniyang “Walay Kataposang Amahan” sa mga kaliwat sa nakasala nga Adan. Niining paagiha siya nahimong ikaduhang Adan sa tawhanong panimalay. Ang paghalad sa iyang hingpit tawhanong kinabuhi ug ang pagpresentar nianang tawhanong katungod-sa-kinabuhi ngadto sa Dakong Maghuhukom sa langit ang nagpaposible alang kaniya sa pag-alagad dinhi sa yuta ingong walay kataposang amahan sa katawhan. Sa dihang gibanhaw siya gikan sa patay, gibalik siya sa espirituhanong kalibotan ug gibayaw ngadto sa tuong kamot sa iyang Magbabanhaw. Busa kini ang gipahayag: “Sa ingon niini kini ang nasulat: ‘Ang unang tawo nga si Adan nahimong buhing kalag.’ Ang kataposang Adan nahimong espiritu nga maghahatag ug kinabuhi.” (1 Corinto 15:45) Ang bag-o, gisagop nga Amahan sa katawhan mohatag ug labing maayong pagsugod sa kinabuhi.
Ang Unang Tawhanong mga Linalang ang Hatagag Amahanong Pagtagad
10 Ipasundayag sa “Walay Kataposang Amahan,” si Jesu-Kristo nga Hari, kon kinsa ang una nga mahimo niyang mga anak. Sa unsang paagi? Pinaagi sa pagluwas sa dedikadong mga kinabuhi sa milyonmilyong buhi karon sa “dakong kasakitan.” Sila mao ang “dakong panon” sa “ubang mga karnero.”—Pinadayag 7:9, 14.
11 Dili-hitupngan mao ang yutan-ong higayon nga ibutang sa atubangan sa “dakong panon” tapos sa “dakong kasakitan.” Gibatbat ingong bahin sa “ilhanan” niining “konklusyon sa sistema sa mga butang,” ang mahulagwayong mga kanding sa sambingay ni Jesus laglagon gikan niining yutaa, nga nagkahulogan ug walay kataposang kalaglagan kanila. Apan dili kini mahitabo sa “dakong panon” sa mga karnerohon kinsa mahigugmaon ug maunongong nagabuhat ug maayo sa nanghibilin sa espirituwal nga “mga igsoon” ni Kristo dinhi sa yuta. (Mateo 25:31-46) Ang pagluwas niining “mga karnero” ngadto sa pikas bahin sa “dakong kasakitan” ug ngadto sa Milenyal nga Pagmando sa gitagnang “Prinsipe sa Pakigdait” maoy makapaposible niining mga makalabang-buhi sa pagsulod sa mga panalangin sa dapit sa Gingharian. Sila unya mao ang yutan-ong mga sakop sa “Prinsipe sa Pakigdait.”
12 Nianang panahona ang pulong nga gipahayag ni Jesus sa wala pa banhawa si Lazaro gikan sa mga patay matuman diha niadtong makasulod sa yutan-ong gingharian. Siya miingon: “Ako mao ang pagkabanhaw ug ang kinabuhi. Ang motuo kanako bisan siya mamatay, mabuhi; ug ang tanan nga buhi ug nagatuo kanako dili na gayod mamatay.” (Juan 11:25, 26) Tungod sa ilang pagsunod kaniya, ilang makab-ot ang hingpit tawhanong kinabuhi diha sa yutan-ong gingharian sa Hari. Bisan ang misimpatiyang daotang tawo nga namatay tapad kang Jesus diha sa Kalbaryo hatagag higayon sa pagsulod sa Paraiso. (Lucas 23:43) Tumanon ni Jesus ang tanang kahulogan sa iyang ngalang “Walay Kataposang Amahan.”
Ang Malipayong Palaabuton sa mga Patay
13 Si Jesus, ang labing tagsaong kaliwat ni Abraham, miingon nga ang kining maong kagikan, ang iyang anak si Isaac, ug ang iyang apo nga si Jacob makita diha sa bahin sa yuta sa Gingharian sa Diyos. (Mateo 22:31, 32) Mahimong posible kini pinaagi sa pagkabanhaw. Sumala sa gipamulong ni Jesus, ang tanang mga patay nga tawo nga anaa sa handumanang mga lubnganan makadungog sa tingog sa Anak sa Diyos ug manggula. Ang ilang umaabot tapos niini magadepende sa paagi sa paglihok nga ilang kuhaon.—Juan 5:28, 29; Pinadayag 20:12-15.
14 Dakong mga pagpangandam ang himoon alang sa katawhan nga pagabanhawon gikan sa lubnganan ngadto sa kinabuhi sa yuta ilalom sa Gingharian sa “Walay Kataposang Amahan.” Kining maong pagpangandam unang himoon sa mga makalabang-buhi sa “gubat sa dakong adlaw sa Diyos nga Makagagahom” sa Armageddon. (Pinadayag 16:14, 16) Kon pila unya ang gidaghanon sa “dakong panon” sa “ubang mga karnero” sa “Prinsipe sa Pakigdait” nianang panahona kita walay kasayoran, apan adunay igong gidaghanon alang sa buluhaton.
15 Ang Salmo 45 gipahayag ngadto niining “Prinsipe sa Pakigdait” ingong Hari, ug sanglit siya mahimong “Walay Kataposang Amahan” sa tanang katawhan, kining salmoha nag-ingon mahitungod kaniya: “Puli sa imong mga amahan mao ang imong mga anak, nga itudlo mong mga prinsipe sa tibuok yuta.” (Salmo 45:16) Apan bisan sa dili pa banhawon ang matinumanong “mga kagikan,” ang mga lalaking sakop sa “dakong panon” sa makalabang-uhi sa Armageddon itudlo sa katungdanan sa pagkaprinsipe. Libolibo niining umaabot nga mga makalabang-buhi sa Armageddon nag-alagad na ingong mga ansiano sa kapin sa 49,000 ka kongregasyon sa mga Saksi ni Jehova, nagadumala sa espirituwal nga mga intereses sa ilang tagsatagsang mga kongregasyon.
16 Ilalom sa pagdumala sa prinsipe, ang makalabang-buhi sa Armageddon moalagad nga may madasigong kooperasyon. Kon unsa may madawat nga mga instruksiyon sa “mga prinsipe sa yuta” gikan sa langitnong “Prinsipe sa Pakigdait” tan-awon pa, makahatag kulba-hinam nga kasinatian alang sa tanan nilang kaubang mga makalabang-buhi sa Armageddon. Palandonga lang ang tanang mga sapot nga andamon aron sa pagpabesti sa mga pagabanhawon diha sa nahiangay nga sapot! Palandonga ang tanang mga abiyo sa pagkaon nga itagana o tipigan! Kinahanglang andamon usab ang mga puloy-anan. Unsa ka makalilipayng panahona unya kana sa tanang makigbahin niining buluhaton sa pagpangandam! Kinsa ang unang banhawon? Una bang banhawon ang ulahing nangamatay ug sa paatras nga pagkasunodunsod sa ilang pag-adto sa handumanang mga lubnganan? Ang martir ba nga si Abel ug Enoch, nga gikuha sa Diyos, maingon man kang Noe, Abraham, Isaac, Jacob, ug ang tanang matinumanong mga propeta, linain nga gantihan pinaagi sa pagbanhaw kanila pag-una?
17 Nahibalo ug tinoon kini sa “Prinsipe sa Pakigdait.” Ug bug-os nga may katakos siya sa iyang mga responsibilidad ingong bag-ong Amahan sa gilukat nga katawhan. Ang uban pa niyang mga titulo nga gitagna mao ang “Makagagahom nga Diyos.” Kini nagkahulogan nga siya makagagahom, gamhanan nga Usa. Ang kapasundayagan sa iyang pagkadiyos makagagahom sa pagkaagi nga iyang banhawon ang tanang nalukat nga katawhan, ug makahinumdom sa ilang tagsatagsang mga ngalan ug sa ilang mga kinaiya. (Juan 5:28, 29; Buhat 10:42) Siya bug-os nga makawala sa kadaot nga nahimo ni Satanas nga Yawa sa milabayng 6,000 ka tuig sa tawhanong paglungtad.
18 Ang unang Adan nakahatag ug tunglo sa kamatayon sa tanan niyang mga anak. Si Adan ba nahimong kagikan sa tawong si Jesu-Kristo? Dili, si Jesus walay tawhanong amahan kondili natawo siya gikan sa ulay nga babaye nga gipasamkon pinaagi sa iyang gahom sa kinabuhi nga gibalhin sa Diyos gikan sa gingharian sa espiritu. Busa ang makasasalang si Adan dili kagikan sa yutan-ong Anak sa Diyos. Apan, ang ikaduhang Adan nahimong makahatag kinabuhi nga espiritu. Ning kapasidara natuman niya ang tagna sa Isaias ug nahimong “Walay Kataposang Amahan” sa unang kaliwat ni Adan, nga iyang gipalit ug balik ug gisagop alang sa katuyoan sa paghatag ug hingpit tawhanong kinabuhi sa paraiso sa yuta.
19 Sa ingon nga paagi ang langitnong Amahan ni Jesu-Kristo mahimong langitnong Apohan sa napasig-uling tawhanong panimalay. Tungod niini ang tawhanong panimalay may bag-ong relasyon sa Maglalalang sa langit ug sa yuta. Wala gayoy posibilidad nga mapakyas si Jehova sa iyang orihinal nga katuyoan. Busa masanta ni Jehova ang mapintas, dili-diyosnong plano ni Satanas nga Yawa. Ang tanang napalit ug balik nga tawhanong panimalay pahibaloon niining kamatuorana. Unsa ka katingalahang adlaw unya kini sa dihang mopuli na si Jesu-Kristo sa pagkahimong amahan sa tawhanong panimalay aron amumahon ang katawhan diha sa Paraiso sa napasig-uling yuta!
[Mga Pangutana nga Pagatun-an]
1. Nganong ang ulohan bahin sa bag-ong pagkaamahan maoy maayong balita sa tawhanong panimalay?
2. Nganong gikinahanglan ang bag-ong pagkaamahan?
3. Unsa ka makasubo ang pagkawala sa pagkaamahan ni Jehova nga Diyos sa tibuok tawhanong panimalay?
4. Kang kinsang pagkaamahan napailalom si Adan ug ang katawhan?
5. (a) Unsang ahensiya ang gigamit ni Satanas nga Yawa sa paglimbong sa asawa ni Adan sa pagsupak sa Diyos? (b) Sa unsang paagi ug nganong nailalom sa Adan sa bug-os nga responsabilidad sa iyang lihok?
6, 7. Sa unsang pagkaamahan gipakita ni Jesus nga siya kapiyalan, ug sa unsang paagi gihisgotan kini sa tagna sa Bibliya?
8. Nganong makalihok si Jesus aron mahimong ang “Walay Kataposang Amahan” sa katawhan, ug sa unsang paagi gipamatud-an kini si apostol Pablo?
9. Sa unsang paagi nahimong ikaduhang Adan si Jesus alang sa katawhan, apan gikan sa unsang gingharian nga siya milihok ingong Amahan sa katawhan?
10. Kinsa ang unang tawhanong mga linalang nga mahimong mga anak sa masinagopong Amahan?
11. Unsang yutan-ong higayon ang anaa sa atubangan sa samag karnero nga mga makalabang-buhi sa “dakong kasakitan”?
12. Unsang mga pulong ni Jesus mahitungod sa pagkabanhaw ang nagpakita nga gibutang sa atubangan ang walay kataposang kinabuhi alang niadtong makasulod sa yutan-ong Gingharian?
13. Ang pagkabanhaw sa mga tawong patay makapaposible alang sa kinsang iladong mga tawo sa karaang mga panahon ang makakita unya sa sakop sa Gingharian sa yuta?
14. Unsay buhaton ug una alang sa niadtong pagabanhawon sa yuta, ug kinsa ang unang makabahin niining mga pagpangandam?
15. Unsang linain nga kapasidad nga mag-alagad ang kadaghanan ilalom sa gisagop nga Amahan sa katawhan?
16. (a) Ilalom sa pagdumala sa prinsipe, unsang kalihokan nga mag-alagad ang mga makalabang buhi sa Armageddon? (b) Unsang mga pangutana ang mobangon mahitungod sa pagkasunodsunod sa pagbalik sa mga patay?
17. Kinsa ang motino sa paagi sa pagkasunodsunod sa pagbanhaw sa mga patay dinhi sa yuta, ug unsang gitagnang titulo mahitungod kaniya ang nagpakita sa iyang katakos sa pagtuman sa iyang mga kaakohan?
18. (a) Sa unsang paagi gikuha ang panginahanglan ni Adan nga mahimong kagikan ni Jesu-Kristo? (b) Sa unsang paagi nahimong ikaduhang amahan si Jesus sa mga anak ni Adan?
19. Unsa ang bag-ong relasyon ni Jehova diha sa tawhanong panimalay, ug busa unsang plano ni Satanas ang iyang masanta?