Kapitulo 17
Pagkaplag ug Seguridad Taliwala sa Katawhan sa Diyos
1, 2. Sa unsang paagi ang kahimtang sa katawhan nahisama sa kahimtang sa mga tawo diha sa dapit nga gilampornas sa bagyo?
HANDURAWA nga ang usa ka kusog nga bagyo milampornas sa dapit nga imong gipuy-an. Ang imong balay nagun-ob, ug ang tanan nimong mga kabtangan nawala. Ang pagkaon nihit. Daw mangiob ang kahimtang. Dayon, ang wala-damhang mga hinabang nangabot. Ang daghang pagkaon ug sapot gipanghatag. Usa ka bag-ong balay ang gitukod alang kanimo. Tino nga mapasalamaton ka sa tawo nga mihimo niining mga taganaha.
2 Ang susamang butang nagakahitabo karon. Sama nianang maong bagyo, ang pag-alsa ni Adan ug Eva nakapahinabog dakong kadaot sa tawhanong rasa. Ang Paraisong puloy-anan sa tawo nawala. Sukad niadto, ang tawhanong mga kagamhanan napakyas sa pagsalipod sa mga tawo gikan sa gubat, krimen, ug inhustisya. Tungod sa bakak nga relihiyon daghang tawo ang gigutom sa maayong espirituwal nga pagkaon. Hinuon, sa espirituwal nga pagkasulti, si Jehova nga Diyos nagatagana karon ug pagkaon, sapot, ug puloy-anan. Sa unsang paagi ginahimo niya kana?
“ANG KASALIGAN UG MABUOT NGA ULIPON”
3. Sa unsang paagi si Jehova nagtagana ug mga abiyo alang sa katawhan, ingon sa gipakita sa unsang mga pananglitan?
3 Ang mga hinabang kasagarang ipang-apod-apod pinaagi sa usa ka organisadong ahensiya, ug sa susamang paagi si Jehova naghatag ug espirituwal nga tagana alang sa iyang katawhan. Pananglitan, ang mga Israelinhon maoy “kongregasyon ni Jehova” sulod sa mga 1,500 ka tuig. Taliwala kanila mao kadtong mga nag-alagad ingong ahensiya sa Diyos sa pagtudlo sa iyang Balaod. (1 Cronicas 28:8; 2 Cronicas 17:7-9) Niadtong unang siglo K.P., nagpatungha si Jehova ug Kristohanong organisasyon. Nangaporma ang mga kongregasyon, ug kini milihok ubos sa pagtultol sa usa ka nagamandong lawas nga gilangkoban sa mga apostol ug mga ansiano. (Buhat 15:22-31) Sa susamang paagi karon, si Jehova nakiglabot sa iyang katawhan pinaagi sa usa ka organisadong lawas. Sa unsang paagi nasayod kita niini?
4. Kinsa ang napamatud-ang “kasaligan ug mabuot nga ulipon” sa modernong mga panahon, ug sa unsang paagi mahimong mabatonan ang espirituwal nga mga tagana sa Diyos?
4 Matud ni Jesus nga sa panahon sa iyang presensiya diha sa gahom sa Gingharian, “ang kasaligan ug mabuot nga ulipon” makaplagan nga nagtaganag “pagkaon sa hustong panahon” alang sa Iyang mga sumusunod. (Mateo 24:45-47) Sa dihang gientrono si Jesus ingong langitnong Hari niadtong 1914, kinsay napamatud-ang “ulipon”? Tino nga dili ang klero sa Kakristiyanohan. Sa dakong bahin, ilang gipakaon ang ilang mga panon ug propaganda nga nagpaluyo sa ilang kaugalingong nasodnong mga kagamhanan sa Gubat sa Kalibotan I. Apan ang husto ug nunot-sa-panahon nga espirituwal nga pagkaon giapod-apod sa grupo sa tinuod nga mga Kristohanon nga gidihogan sa balaang espiritu sa Diyos ug maoy bahin sa gitawag ni Jesus nga “gamayng panon.” (Lucas 12:32) Gisangyaw niining dinihogang mga Kristohanon ang Gingharian sa Diyos inay ang tawhanong mga kagamhanan. Ingong resulta, latas sa katuigan minilyon nga nakiling sa pagkamatarong nga “ubang mga karnero” ang mikuyog sa dinihogang “ulipon” sa pagtuman sa matuod nga relihiyon. (Juan 10:16) Nga migamit sa ‘kasaligang ulipon’ ug sa Nagamandong Lawas niini karon, gitultolan sa Diyos ang iyang organisadong katawhan aron ang espirituwal nga pagkaon, sapot, ug kapasilongan mabatonan sa tanan nga buot makabaton niining mga taganaha.
“PAGKAON SA HUSTONG PANAHON”
5. Unsang espirituwal nga kahimtang ang naglungtad sa kalibotan karon, apan unsay ginahimo ni Jehova mahitungod niini?
5 Si Jesus nag-ingon: “Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.” (Mateo 4:4) Hinunoa, ikasubo nga ang dakong kinabag-an sa katawhan wala magtagad sa mga pamulong sa Diyos. Ingon sa gitagna sa propeta ni Jehova nga si Amos, dunay “kagutmanan, dili alang sa tinapay, ug kauhaw, dili alang sa tubig, apan alang sa pagpatalinghog sa mga pulong ni Jehova.” (Amos 8:11) Bisan ang relihiyoso kaayong mga tawo gigutom sa espirituwal. Bisan pa, ang kabubut-on ni Jehova mao nga “ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:3, 4) Tungod niana, siya nagataganag dagayang espirituwal nga pagkaon. Apan asa kana mabatonan?
6. Giunsa pagpakaon ni Jehova ang iyang katawhan sa espirituwal nga paagi sa nangaging mga panahon?
6 Sa tibuok kasaysayan, si Jehova nag-apod-apod ug espirituwal nga pagkaon sa iyang katawhan ingong usa ka pundok. (Isaias 65:13) Pananglitan, gitigom sa Israelinhong mga saserdote ang mga lalaki, mga babaye, ug kabataan aron matudloan sa Balaod sa Diyos ingong usa ka pundok. (Deuteronomio 31:9, 12) Ubos sa direksiyon sa nagamandong lawas, ang mga Kristohanon niadtong unang siglo miorganisar ug mga kongregasyon ug mihikayg mga tigom alang sa instruksiyon ug pagdasig sa tanan. (Roma 16:5; Filemon 1, 2) Gisunod sa mga Saksi ni Jehova kining maong hularan. Mabination kang gidapit sa pagtambong sa tanan nilang mga tigom.
7. Sa unsang paagi ang regular nga pagtambong sa Kristohanong mga tigom nalangkit sa kahibalo ug pagtuo?
7 Tinuod, mahimong daghan na ang imong nakat-onan sa imong personal nga pagtuon sa Bibliya. Tingali dunay nakatabang kanimo. (Buhat 8:30-35) Apan ang imong pagtuo mahimong ikapanag-ing sa usa ka tanom nga malaya ug mamatay kon dili kini maatiman ug maayo. Busa, kinahanglang makadawat ka ug espirituwal nga sustansiya. (1 Timoteo 4:6) Ang Kristohanong mga tigom magtaganag mapinadayonong programa sa instruksiyon nga gidesinyo aron palamboon ka sa espirituwal ug tabangan ka nga magpadayon sa pagtubo sa pagtuo samtang nagauswag ang imong kahibalo sa Diyos.—Colosas 1:9, 10.
8. Nganong gidasig kita sa pagtambong sa mga tigom sa mga Saksi ni Jehova?
8 Ang mga tigom dunay laing hinungdanong katuyoan. Si Pablo nagsulat: “Tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom.” (Hebreohanon 10:24, 25) Ang Gregong pulong nga gihubad “pagpasibot” mahimong nagkahulogan usab ug “pagpahait.” Usa ka panultihon sa Bibliya nag-ingon: “Pinaagi sa puthaw, ang puthaw mismo mahait. Ingon man ang usa ka tawo magapahait sa panagway sa lain.” (Proverbio 27:17) Kitang tanan nagkinahanglan ug padayong ‘pagbaid.’ Ang adlaw-adlaw nga mga pagpit-os gikan sa kalibotan makapahabol sa atong pagtuo. Sa dihang motambong kita sa Kristohanong mga tigom, dunay pagdinasigay. (Roma 1:11, 12) Gisunod sa mga membro sa kongregasyon ang tambag ni apostol Pablo nga “padayon sa paghupayay sa usag usa ug paglinig-onay sa usag usa,” ug ang maong mga butang magpahait sa atong pagtuo. (1 Tesalonica 5:11) Ang regular nga pagtambong sa Kristohanong mga tigom nagpaila usab nga atong gihigugma ang Diyos ug maghatag kanato ug mga kahigayonan sa pagdayeg kaniya.—Salmo 35:18.
“ISUL-OB SA INYONG KAUGALINGON ANG GUGMA”
9. Sa unsang paagi si Jehova naghatag ug panig-ingnan sa pagpakitag gugma?
9 Si Pablo nagsulat: “Isul-ob sa inyong kaugalingon ang gugma, kay kini usa ka hingpit nga bugkos sa panaghiusa.” (Colosas 3:14) Si Jehova mapuangorong nagtagana niining maong sapot alang kanato. Sa unsang paagi? Ikapasundayag sa mga Kristohanon ang gugma tungod kay kini maoy usa sa hinatag-sa-Diyos nga mga bunga sa balaang espiritu ni Jehova. (Galacia 5:22, 23) Si Jehova mismo nakapasundayag sa kinadak-ang gugma pinaagi sa pagpadala sa iyang bugtong-gianak nga Anak aron nga makabaton kitag kinabuhing walay kataposan. (Juan 3:16) Kining kinalabwang kapahayagan sa gugma maoy atong sulundan sa pagpahayag niining maong hiyas. “Kon ang Diyos nahigugma kanato niining paagiha,” misulat si apostol Juan, “nan kita sa atong kaugalingon nahailalom sa obligasyon nga maghigugmaay sa usag usa.”—1 Juan 4:11.
10. Sa unsang paagi kita makabenepisyo gikan sa “tibuok kapunongan sa mga igsoon”?
10 Ang imong pagtambong sa mga tigom sa Kingdom Hall maghatag kanimo ug kinamaayohang kahigayonan sa pagpakitag gugma. Didto imong mahibalag ang lainlaing mga tawo. Walay duhaduha nga dihadiha mogaan dayon ang imong pagbati sa daghan kanila. Natural, ang mga personalidad lainlain bisan taliwala niadtong mga nagaalagad kang Jehova. Tingali sa miagi gilikayan lamang nimo ang mga tawo nga lahi ug mga interes o kinaiya kay sa imoha. Hinunoa, ang mga Kristohanon kinahanglang magbaton ug “gugma alang sa tibuok kapunongan sa mga igsoon.” (1 Pedro 2:17) Busa, himoang imong tumong nga mailaila nimo kadtong mga anaa sa Kingdom Hall—bisan ang mga indibiduwal kansang edad, personalidad, rasa, o edukasyon tingali lahi kay sa imoha. Malagmit hikaplagan nimo nga ang matag usa molabaw sa usa ka makapadaning hiyas.
11. Nganong dili ka angay matugaw sa lainlaing mga personalidad taliwala sa katawhan ni Jehova?
11 Kinahanglang dili ka matugaw sa lainlaing mga personalidad diha sa kongregasyon. Sa pag-ilustrar, handurawa nga daghang sakyanan ang nagbiyahe ubay kanimo diha sa karsada. Ang katulinon sa dagan dili pareho, ni pareho ang kondisyon sa mga makina. Ang pipila nakadagan nag daghang kilometros, apan sama kanimo, ang uban bag-o pa lamang nagsugod. Hinunoa, bisan pa niining maong mga kalainan, ang tanan nagdagan sa karsada. Kini maoy susama sa mga indibiduwal nga naglangkob sa usa ka kongregasyon. Dili tanan ang nakaugmad ug Kristohanong mga hiyas sa samang katulinon. Dugang pa, dili tanan ang may samang pisikal o emosyonal nga kahimtang. Mahimong ang uban nagsimba kang Jehova sa daghang tuig; ang uban bag-o lang nagsugod. Apan, ang tanan nagasubay sa dalan sa kinabuhing walay kataposan, nga ‘sibong nagkahiusa diha sa samang kaisipan ug diha sa samang dalan sa panghunahuna.’ (1 Corinto 1:10) Busa, pangitaa ang labing maayong mga hiyas inay ang mga kahuyangan niadtong diha sa kongregasyon. Ang pagbuhat niana makapalipay sa imong kasingkasing, tungod kay nasabtan nimo nga ang Diyos tinuod nga kauban niining mga tawhana. Ug sa walay duhaduha mao kini ang dapit nga buot nimong maanaa.—1 Corinto 14:25.
12, 13. (a) Kon dunay makasilo kanimo sa kongregasyon, unsay mahimo nimong buhaton? (b) Nganong mahinungdanon nga dili maghambin ug kayugot?
12 Sanglit ang tanang tawo dili hingpit, usahay mahimong may mosulti o mohimog usa ka butang diha sa kongregasyon nga makapapikal kanimo. (Roma 3:23) Ang tinun-ang si Santiago realistikong nagsulat: “Kitang tanan mangapandol man sa makadaghan. Kon may dili mapandol diha sa pulong, kini siya usa ka tawong hingpit.” (Santiago 3:2) Unsay imong sanong kon dunay makapasilo kanimo? Matud sa usa ka panultihon sa Bibliya: “Ang salabotan sa usa ka tawo tinong maghupay sa iyang kasuko, ug maoy kaambong sa iyang bahin ang pagpasaylo sa kalapasan.” (Proverbio 19:11) Ang pagbaton ug salabotan nagkahulogan sa pagtugkad sa usa ka kahimtang, nga sabton ang sukaranong mga hinungdan nga nagpahinabo sa usa ka tawo sa pagsulti o paglihok sa usa ka paagi. Kadaghanan kanato mogamit ug dagkong pagsabot aron pakamatarongon ang atong kaugalingong mga sayop. Nganong dili usab kana gamiton sa pagsabot ug pagtabon sa mga dili-kahingpitan sa uban?—Mateo 7:1-5; Colosas 3:13.
13 Ayawg kalimti nga kinahanglang magpasaylo kita sa uban kon gusto natong makabaton sa kapasayloan ni Jehova. (Mateo 6:9, 12, 14, 15) Kon kita nagapadapat sa kamatuoran, tagdon nato ang uban sa mahigugmaong paagi. (1 Juan 1:6, 7; 3:14-16; 4:20, 21) Busa, kon may suliran ka sa usa ka indibiduwal diha sa kongregasyon, sukli ang kiling nga maghambin ug kayugot. Kon nasul-oban ka sa gugma, maningkamot ka sa pagsulbad sa suliran, ug dili ka manuko sa pagpangayog pasaylo kon ikaw ang nakasala.—Mateo 5:23, 24; 18:15-17.
14. Uban sa unsang mga hiyas nga kita angayng masul-oban?
14 Ang atong espirituwal nga sapot angayng maglakip sa ubang mga hiyas nga nalanggikit sa gugma. Si Pablo nagsulat: “Isul-ob sa inyong kaugalingon ang malumong mga pagmahal sa pagkamabination, kalulot, pagkamapaubsanon sa hunahuna, kalumo, ug hataas-nga-pailob.” Kining mga tarasa, nga gilikosan sa gugma, maoy bahin sa diyosnong “bag-ong pagkatawo.” (Colosas 3:10, 12) Maningkamot ka ba sa pagsapot sa imong kaugalingon niining paagiha? Ilabina kon imong sul-oban ang imong kaugalingon sa inigsoong gugma nga mabatonan nimo ang timailhan sa mga tinun-an ni Jesus, tungod kay siya nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”—Juan 13:35.
USA KA DAPIT SA SEGURIDAD
15. Sa unsang paagi ang kongregasyon nahisama sa usa ka kapasilongan?
15 Ang kongregasyon nagsilbi usab ingong usa ka silonganan, usa ka nagpanalipod nga dangpanan diin ikaw mahimong mobati ug seguridad. Niana makakaplag ka ug matinud-anon-ug-kasingkasing nga mga tawo nga nagapaningkamot sa pagbuhat kon unsay matarong sa mga mata sa Diyos. Daghan kanila nakabiya na sa daotang mga bisyo ug mga tinamdan nga hayan imong gipaningkamotan nga mabuntog. (Tito 3:3) Makatabang sila kanimo, tungod kay kita giingnan nga “padayong magpinas-anay sa mga kabug-at sa usag usa.” (Galacia 6:2) Natural, ang pagsubay sa dalan nga motultol sa kinabuhing walay kataposan sa kataposan maoy imong kaugalingong responsabilidad. (Galacia 6:5; Filipos 2:12) Apan, si Jehova nagtagana sa Kristohanong kongregasyon ingong kahibulongang paagi sa pagtabang ug pagpaluyo. Bisag unsa ka bug-at ang imong mga suliran, may nabatonan kang bililhong tinubdan sa tabang—ang mahigugmaong kongregasyon nga magpaluyo kanimo sa mga panahon sa kasakitan o kapildihan.—Itandi ang Lucas 10:29-37; Buhat 20:35.
16. Unsang tabang ang ginahatag sa mga ansiano sa kongregasyon?
16 Taliwala niadtong mga makatabang kanimo mao ang “mga gasang mga lalaki”—ang tinudlong mga ansiano, o mga magtatan-aw, sa kongregasyon nga sa kinabubut-on ug dakong kaikag nagbantay sa panon. (Efeso 4:8, 11, 12; Buhat 20:28; 1 Pedro 5:2, 3) Bahin kanila, si Isaias nagpropesiya: “Ang matag usa kinahanglang mahimong usa ka tagoanan gikan sa hangin ug usa ka salipod gikan sa bagyo, sama sa mga sapa sa tubig sa usa ka dapit nga mamala, ingon sa usa ka landong sa usa ka dakong bato sa disyerto.”—Isaias 32:2.
17. (a) Unsang matang sa tabang ang ilabinang gustong ihatag ni Jesus? (b) Unsang tagana ang gisaad sa Diyos nga himoon alang sa iyang katawhan?
17 Sa dinhi si Jesus sa yuta, ikasubo nga walay mahigugmaong pagdumala ang relihiyosong mga pangulo. Ang kahimtang sa mga tawo nakatandog gayod kaniya, ug buot gayod niyang makatabang kanila sa espirituwal nga paagi. Naluoy si Jesus kanila tungod kay ‘sila pinanitan ug natibulaag nga sama sa mga karnero nga walay magbalantay.’ (Mateo 9:36) Pagkahaom sa paghubit niini sa presenteng-adlaw nga kahimtang sa daghan nga nag-antos sa makadugmok-sa-kasingkasing nga mga suliran nga walay kadaganan alang sa espirituwal nga tabang ug kahupayan! Apan ang katawhan ni Jehova dunay espirituwal nga tabang, tungod kay siya nagsaad: “Ako magbutang ug mga magbalantay sa ibabaw nila nga sa pagkatinuod magabantay kanila; ug sila dili na mahadlok, ni malisang pa sila, ug walay makulang kanila.”—Jeremias 23:4.
18. Nganong angay kitang moduol sa usa ka ansiano kon nanginahanglan kitag espirituwal nga tabang?
18 Himamata ang tinudlong mga ansiano sa kongregasyon. Daghan ang ilang kasinatian sa pagpadapat sa kahibalo sa Diyos, tungod kay nakab-ot nila ang kuwalipikasyon alang sa mga magtatan-aw nga mabasa diha sa Bibliya. (1 Timoteo 3:1-7; Tito 1:5-9) Ayaw pagpanuko sa pagduol sa usa kanila kon nanginahanglan ka ug espirituwal nga tabang aron buntogon ang usa ka bisyo o taras nga supak sa mga kinahanglanon sa Diyos. Makaplagan nimo nga gisunod sa mga ansiano ang tambag ni Pablo: “Pamulong nga mahupayon sa magul-anong mga kalag, buligi ang mga maluya, magmataas-ug-pailob sa tanan.”—1 Tesalonica 2:7, 8; 5:14.
TAGAMTAMA ANG SEGURIDAD UBAN SA KATAWHAN NI JEHOVA
19. Unsang mga panalangin ang gihatag ni Jehova niadtong nangitag kasegurohan sulod sa iyang organisasyon?
19 Bisan tuod nanagpuyo kita karon taliwala sa dili-hingpit nga mga kahimtang, gitagan-an kita ni Jehova ug espirituwal nga pagkaon, sapot, ug kapasilongan. Siyempre, kinahanglang maghulat kita sa gisaad sa Diyos nga bag-ong kalibotan aron maeksperyensiyahan ang mga benepisyo sa pisikal nga paraiso. Apan kadtong bahin na sa organisasyon ni Jehova sa pagkakaron nagatagamtam sa seguridad sa espirituwal nga paraiso. Bahin kanila, si Ezekiel nagpropesiya: “Sa pagkatinuod sila magapuyo nga may kasegurohan, nga walay mausa nga magahadlok kanila.”—Ezekiel 34:28; Salmo 4:8.
20. Sa unsang paagi gantihan ni Jehova ang bisan unsa nga mahimong isakripisyo nato tungod sa iyang pagsimba?
20 Pagkadako sa atong pasalamat nga si Jehova naghimo ug mahigugmaong espirituwal nga mga tagana pinaagi sa iyang Pulong ug organisasyon! Pagpakigsuod sa katawhan sa Diyos. Ayaw pagpanuko gumikan sa kahadlok sa mahimong hunahunaon sa mga higala o mga paryente bahin kanimo tungod sa pagkuhag kahibalo sa Diyos. Ang pipila mahimong dili mouyon tungod kay ikaw nagapakig-uban sa mga Saksi ni Jehova ug nagatambong sa mga tigom sa Kingdom Hall. Apan dagayang moganti ang Diyos sa bisan unsang pagsakripisyo nga imong gihimo tungod ug alang sa iyang pagsimba. (Malakias 3:10) Dugang pa, si Jesus nag-ingon: “Walay usa nga nagbiya ug balay o mga igsoong lalaki o mga igsoong babaye o inahan o amahan o mga anak o kaumahan tungod kanako ug tungod sa maayong balita nga dili makabaton ug usa ka gatos ka pilo karon niining yugtoa sa panahon, mga balay ug mga igsoong lalaki ug mga igsoong babaye ug mga inahan ug mga anak ug kaumahan, nga may mga paglutos, ug sa umaabot nga sistema sa mga butang kinabuhing walay-kataposan.” (Marcos 10:29, 30) Oo, bisan unsay imong gibiyaan o kinahanglang agwantahon, makakaplag ka ug makalilipayng panagkauban ug espirituwal nga seguridad taliwala sa katawhan sa Diyos.
TAKSA ANG IMONG KAHIBALO
Kinsa “ang matinumanon ug maalamong ulipon”?
Unsang tagana ang gihimo ni Jehova aron pakan-on kita sa espirituwal nga paagi?
Sa unsang paagi kadtong mga anaa sa Kristohanong kongregasyon makatabang kanato?
[Tibuok-panid nga hulagway sa panid 165]