Kapitulo Trese
‘Magdungan sa Paghugyaw sa Kalipay’!
1. Nganong ang matagnaong mga pulong sa Isaias kapitulo 52 usa ka tinubdan sa kalipay, ug unsang duha ka katumanan ang ilang nabatonan?
KAGAWASAN! Aduna bay labaw nga makalipayng palaaboton alang sa usa ka binihag nga katawhan? Sanglit ang kagawasan ug pagpasig-uli usa ka dakong tema sa basahon ni Isaias, dili katingad-an nga gawas lang sa Mga Salmo, kining basahona sa Bibliya adunay mas daghang pahayag sa kalipay kay sa ubang basahon. Ang Isaias kapitulo 52 mohatag ilabina sa katarongan aron maglipay ang katawhan sa Diyos. Ang matagnaong mga pulong niini natuman sa Jerusalem sa 537 W.K.P. Ug kini adunay dakong katumanan nga naglangkit sa “Jerusalem sa itaas,” ang langitnong organisasyon sa espiritung mga linalang ni Jehova, nga may panahong gibatbat nga usa ka inahan ug usa ka asawa.—Galacia 4:26; Pinadayag 12:1.
“Isul-ob ang Imong Kusog, Oh Zion!”
2. Kanus-a magmata ang Zion, ug sa unsang paagi mahitabo kini?
2 Si Jehova, pinaagi ni Isaias, nag-awhag sa Iyang minahal nga siyudad, ang Zion: “Pagmata, pagmata, isul-ob ang imong kusog, Oh Zion! Isul-ob ang imong matahom nga mga besti, Oh Jerusalem, ang balaang siyudad! Kay dili na moanha kanimo pag-usab ang usa nga dili-tinuli ug mahugaw. Taktaki ang imong kaugalingon sa abog, bangon, lingkod, Oh Jerusalem. Luagi alang kanimo ang mga higot diha sa imong liog, Oh binihag nga anak nga babaye sa Zion.” (Isaias 52:1, 2) Tungod kay ang iyang mga molupyo nakapukaw sa kasuko ni Jehova, ang Jerusalem nahimong biniyaan sulod sa 70 ka tuig. (2 Hari 24:4; 2 Cronicas 36:15-21; Jeremias 25:8-11; Daniel 9:2) Panahon na karon nga siya magmata gikan sa iyang hataas nga panahon sa pagkawalay-buhat ug isul-ob ang matahom nga mga besti sa kagawasan. Gipalihok ni Jehova ang kasingkasing ni Ciro sa pagpagawas sa “binihag nga anak nga babaye sa Zion” aron ang kanhing mga molupyo sa Jerusalem ug ilang mga anak makabiya sa Babilonya, makabalik sa Jerusalem, ug makapasig-uli sa matuod nga pagsimba. Walay mga dili-tinuli ug mahugaw ang angayng hikaplagan sa Jerusalem.—Esdras 1:1-4.
3. Nganong ang kongregasyon sa dinihogang mga Kristohanon matawag nga “anak nga babaye sa Zion,” ug sa unsang diwa nga sila napahigawas?
3 Kining mga pulonga ni Isaias may katumanan usab sa Kristohanong kongregasyon. Ang kongregasyon sa dinihogang mga Kristohanon ikabatbat ingong ang modernong-adlawng “anak nga babaye sa Zion,” sanglit ang “Jerusalem sa itaas” mao ang ilang inahan.a Kay napagawas na gikan sa paganong mga pagtulon-an ug apostatang mga doktrina, ang mga dinihogan kinahanglang maghupot ug mahinlong baroganan atubangan ni Jehova, dili, dili pinaagi sa pagkatinuli sa unod, kondili pinaagi sa pagkatinuli sa ilang mga kasingkasing. (Jeremias 31:33; Roma 2:25-29) Naglakip kini sa paghupot sa espirituwal, mental, ug moral nga kahinlo atubangan ni Jehova.—1 Corinto 7:19; Efeso 2:3.
4. Bisan pag ang “Jerusalem sa itaas” wala gayod magmasupilon kang Jehova, unsang mga kasinatian sa iyang mga hawas sa yuta ang nagpabanaag niadtong iya sa karaang mga molupyo sa Jerusalem?
4 Tinuod, ang “Jerusalem sa itaas” wala gayod magmasupilon kang Jehova. Ugaling lang, panahon sa unang gubat sa kalibotan, ang iyang mga hawas sa yuta—ang dinihogang mga Kristohanon—di-tinuyong naglapas sa balaod ni Jehova tungod kay wala sila makasabot sa tukma sa neyutralidad sa matuod nga Kristohanon. Kay nawad-an sa pag-uyon sa Diyos, sila nahidangat sa espirituwal nga pagkabihag sa “Dakong Babilonya,” ang tibuok-kalibotang imperyo sa bakak nga relihiyon. (Pinadayag 17:5) Ang ilang kahimtang sa pagkaulipon miabot sa tayuktok niadtong Hunyo 1918 sa dihang ang walo ka opisyales sa Watch Tower Society gibilanggo pinasukad sa bakak nga mga sumbong, lakip ang daotang panagkunsabo. Niadtong tungora halos nahunong gayod ang organisadong pagwali sa maayong balita. Bisan pa niana, sa 1919 gipalanog ang usa ka dakong pag-awhag sa pagmata sa espirituwal. Ang dinihogang mga Kristohanon nagsugod sa pagbulag nga mas bug-os gikan sa moral ug espirituwal nga kahugawan sa Dakong Babilonya. Sila mibangon gikan sa abog sa pagkabinihag, ug ang “Jerusalem sa itaas” nakabaton sa katahom sa usa ka “balaang siyudad” diin wala itugot ang espirituwal nga kahugawan.
5. Nganong si Jehova adunay absolutong katungod sa paglukat sa iyang katawhan nga walay ibayad ngadto sa ilang mga magbibihag?
5 Sa 537 W.K.P. ug sa 1919 K.P., si Jehova may absolutong katungod sa pagpagawas sa iyang katawhan. Si Isaias nagpatin-aw: “Mao kini ang giingon ni Jehova: ‘Sa walay-bili nga kamo gibaligya, ug sa walay salapi unya nga kamo lukaton.’” (Isaias 52:3) Ang karaang Babilonya o ang Dakong Babilonya walay gibayad sa dihang giulipon nila ang katawhang may pakigsaad sa Diyos. Sanglit wala mahitabo ang transaksiyon nga nalangkit ang salapi, si Jehova gihapon maoy legal nga Tag-iya kaniadto sa iyang katawhan. Angay ba siyang mobati nga utangan kang bisan kinsa? Siyempre dili. Sa duha ka kahimtang, si Jehova makataronganong makalukat sa iyang mga magsisimba nga walay ibayad ngadto sa ilang mga magbibihag.—Isaias 45:13.
6. Unsang mga pagtulon-an gikan sa kasaysayan ang wala tagda sa mga kaaway ni Jehova?
6 Ang mga kaaway ni Jehova wala makakat-on sa mga pagtulon-an gikan sa kasaysayan. Atong mabasa: “Mao kini ang giingon sa Soberanong Ginoong Jehova: ‘Sa Ehipto nga ang akong katawhan miadto sa unang higayon aron sa pagpuyo didto ingong mga langyaw; ug sa walay hinungdan ang Asirya, sa iyang bahin, naglupig kanila.’” (Isaias 52:4) Si Paraon sa Ehipto nag-ulipon sa mga Israelinhon, kinsa gidapit ngadto sa iyang yuta aron mopuyo ingong mga bisita. Apan si Jehova naglumos kang Paraon ug sa iyang kasundalohan sa Pulang Dagat. (Exodo 1:11-14; 14:27, 28) Sa dihang si Haring Senakerib sa Asirya naghulga sa Jerusalem, ang manulonda ni Jehova mipatayg 185,000 sa mga sundalo sa hari. (Isaias 37:33-37) Sa susama, ang karaang Babilonya o ang Dakong Babilonya dili makaikyas sa mga sangpotanan sa pagdaogdaog sa katawhan sa Diyos.
“Ang Akong Katawhan Makaila sa Akong Ngalan”
7. Unsay epekto sa pagkabihag sa katawhan ni Jehova diha sa iyang ngalan?
7 Ang kahimtang sa pagkabinihag sa katawhan ni Jehova may epekto diha sa iyang ngalan, sumala sa gipakita sa tagna: “‘Karon, sa unsa ako interesado dinhi?’ mao ang giingon ni Jehova. ‘Kay sa walay-bili nga ang akong katawhan gikuha. Ang mismong mga nagamando kanila nagpadayon sa pag-uwang,’ mao ang giingon ni Jehova, ‘ug kanunay, sa tibuok adlaw, ang akong ngalan gipasipalahan. Sa maong katarongan ang akong katawhan makaila sa akong ngalan, sa maong katarongan gayod nianang adlawa, tungod kay ako mao ang Usa nga nagasulti. Tan-awa! Ako kini.’” (Isaias 52:5, 6) Unsay interes ni Jehova sa kahimtang? Unsay labot niya nga ang Israel naulipon sa Babilonya? Si Jehova kinahanglang molihok tungod kay ang Babilonya nagbihag sa iyang katawhan ug nagsinggit sa kadaogan batok kanila. Ang maong pagpanghambog misangpot nga ang Babilonya nagpasipala sa ngalan ni Jehova. (Ezequiel 36:20, 21) Napakyas siya sa pagkaamgo nga ang biniyaang kahimtang sa Jerusalem maoy tungod sa pagkasuko ni Jehova sa iyang katawhan. Sa kapulihay, ang Babilonya nag-isip sa pagkaulipon sa mga Hudiyo ingon nga ebidensiya sa kahuyang sa ilang Diyos. Ang kaubang-hari nga si Belsazar nagtamay pa kang Jehova pinaagi sa paggamit sa mga galamiton gikan sa Iyang templo panahon sa usa ka kombira nga nagpasidungog sa mga diyos sa Babilonya.—Daniel 5:1-4.
8. Sa unsang paagi gitratar ang ngalan ni Jehova sukad sa pagkamatay sa mga apostoles?
8 Sa unsang paagi mapadapat kining tanan sa “Jerusalem sa itaas”? Sukad gayod sa pagkatukod sa apostasya taliwala sa nag-angkong mga Kristohanon, ikaingon nga “ang ngalan sa Diyos gipasipalahan tungod kaninyo taliwala sa kanasoran.” (Roma 2:24; Buhat 20:29, 30) Bahin niana, tungod sa patuotuo ang mga Hudiyo ngadtongadto misugod sa paglikay sa paggamit sa balaang ngalan. Wala madugay sa pagkamatay sa mga apostoles, ang apostatang mga Kristohanon misunod kanila ug mihunong sa paggamit sa personal nga ngalan sa Diyos. Ang apostasya misangpot sa pagkaugmad sa Kakristiyanohan, usa ka dakong bahin sa Dakong Babilonya. (2 Tesalonica 2:3, 7; Pinadayag 17:5) Ang mapatuyangong imoralidad ug way-ulaw nga pagkasad-an sa dugo sa Kakristiyanohan nakapadaot sa dungog sa ngalan ni Jehova.—2 Pedro 2:1, 2.
9, 10. Unsang mas halalom nga pagsabot sa mga sukdanan ni Jehova ug sa iyang ngalan ang nabatonan sa katawhang may pakigsaad sa Diyos sa modernong mga panahon?
9 Sa dihang ang Dakong Ciro, si Jesu-Kristo, nagpagawas sa katawhang may pakigsaad sa Diyos gikan sa pagkaulipon sa Dakong Babilonya sa 1919, sila nakabaton na ug mas maayong pagsabot sa mga kinahanglanon ni Jehova. Sila nakahinlo na sa ilang kaugalingon gikan sa daghang pagtulon-an sa Kakristiyanohan nga naggikan sa una-Kristohanong paganismo, sama sa Trinidad, imortalidad sa kalag, ug walay-kataposang pagsakit diha sa kalayonhong-impiyerno. Niadtong panahona gipapas nila ang tanang timaan sa Babilonyanhong impluwensiya gikan sa ilang kaugalingon. Nasabtan na usab nila ang kahinungdanon nga mahuptan ang estriktong neyutralidad bahin sa may-gidapigan nga mga kahikayan niining kalibotana. Gitinguha pa nila ang pagputli sa ilang kaugalingon sa pagkasad-an sa dugo nga basin nahimo sa pipila ka Saksi.
10 Nabatonan na usab sa modernong-adlawng mga alagad sa Diyos ang mas halalom nga pagsabot sa kahinungdanon sa ngalan ni Jehova. Niadtong 1931 gisagop nila ang ngalang mga Saksi ni Jehova, sa ingon nagpahayag sa publiko nga sila nagpaluyo kang Jehova ug sa iyang ngalan. Dugang pa, pinaagi sa pagpatik sa Bag-ong Kalibotang Hubad sukad sa 1950, gipasig-uli sa mga Saksi ni Jehova ang balaang ngalan sa angayng dapit niini diha sa Bibliya. Oo, sila nakapabili sa ngalan ni Jehova ug nagapaila niana hangtod sa kinatumyan sa yuta.
“Ang Usa nga Nagdalag Maayong Balita”
11. Nganong ang pagpatugbaw nga “Ang imong Diyos nahimong hari!” nahiangay kon bahin sa mga panghitabo sa 537 W.K.P.?
11 Karon ang atong pagtagad giliso ngadto sa Zion sa dihang siya anaa pa sa iyang biniyaang kahimtang. Usa ka mensahero miduol nga nagdalag maayong balita: “Pagkatahom ibabaw sa kabukiran sa mga tiil sa usa nga nagdalag maayong balita, ang usa nga nagmantalag pakigdait, ang usa nga nagdalag maayong balita sa butang nga mas maayo, ang usa nga nagmantalag kaluwasan, ang usa nga nag-ingon ngadto sa Zion: ‘Ang imong Diyos nahimong hari!’” (Isaias 52:7) Sa 537 W.K.P., nganong ikaingon nga ang Diyos sa Zion nahimong Hari? Dili ba si Jehova kanunay man nga Hari? Sa pagkatinuod, siya mao ang “Hari nga Walay Kataposan”! (Pinadayag 15:3) Apan ang pagpatugbaw nga “Ang imong Diyos nahimong hari!” nahiangay tungod kay ang pagkapukan sa Babilonya ug ang harianong pagmantala nga ang templo sa Jerusalem tukoron pag-usab ug ipasig-uli ang maputling pagsimba didto maoy usa ka bag-ong pagpahayag sa pagkahari ni Jehova.—Salmo 97:1.
12. Kinsay nanguna sa ‘pagdalag maayong balita,’ ug sa unsang paagi?
12 Sa adlaw ni Isaias, walay usa ka tawo o grupo sa mga tawo ang gipaila ingong “ang usa nga nagdalag maayong balita.” Karong adlawa, hinuon, ang ilhanan sa tigdalag maayong balita nasayran na. Si Jesu-Kristo maoy kinalabwang mensahero ni Jehova sa pakigdait. Samtang dinhi sa yuta, siya nagwali sa maayong balita nga adunay usa ka pagpagawas gikan sa tanang epekto sa sala nga napanunod gikan ni Adan, lakip ang sakit ug kamatayon. (Mateo 9:35) Si Jesus naghatag ug madasigong panig-ingnan sa pagmantala niining maayong balita bahin sa butang nga mas maayo, nga nagpahimulos sa tanang higayon aron tudloan ang katawhan mahitungod sa Gingharian sa Diyos. (Mateo 5:1, 2; Marcos 6:34; Lucas 19:1-10; Juan 4:5-26) Ug ang iyang mga tinun-an nagsunod sa iyang panig-ingnan.
13. (a) Sa unsang paagi gilugwayan ni apostol Pablo ang kahulogan sa pamulong nga “Pagkatahom ibabaw sa kabukiran sa mga tiil sa usa nga nagdalag maayong balita”? (b) Nganong ikaingon nga ang mga tiil sa mga mensahero ‘matahom’?
13 Sa iyang sulat ngadto sa mga taga-Roma, gikutlo ni apostol Pablo ang Isaias 52:7 aron ipasiugda ang kahinungdanon sa buluhatong pagwali sa maayong balita. Gisukna niya ang sunodsunod nga nagapukaw-sa-hunahunang mga pangutana, lakip ang ‘Unsaon sa mga tawo pagkadungog kon walay magwali?’ Unya siya nag-ingon: “Ingon sa nahisulat: ‘Pagkatahom sa mga tiil niadtong nagapahayag sa maayong balita sa maayong mga butang!’” (Roma 10:14, 15) Sa ingon gilugwayan ni Pablo ang kapadapatan sa Isaias 52:7, nga migamit sa plural nga pormang “niadtong” inay sa singular nga “usa,” nga makita diha sa orihinal nga teksto sa Isaias. Kay nagasundog kang Jesu-Kristo, ang tanang Kristohanon maoy mga mensahero sa maayong balita sa pakigdait. Sa unsang paagi ang ilang mga tiil ‘matahom’? Si Isaias naghisgot nga samag ang mensahero nagsingabot sa Jerusalem gikan sa haduol nga kabukiran sa Juda. Gikan sa halayo, imposible nga makita ang mga tiil sa mensahero. Hinunoa, ang gipunting dinhi mao ang mensahero, kay ang mga tiil naghawas sa mensahero mismo. Maingon nga si Jesus ug ang iyang mga tinun-an maoy matahom nga talan-awon alang sa mga maaghop sa unang siglo, ang mga Saksi karong adlawa makapahimuot nga tan-awon sa mga mapaubsanon nga nagpatalinghog sa nagaluwas-sa-kinabuhing mensahe sa maayong balita.
14. Sa unsang paagi si Jehova nahimong Hari sa modernong mga panahon, ug sukad kanus-a gipahibalo kini ngadto sa katawhan?
14 Sa modernong mga panahon sukad kanus-a ang singgit nga “Ang imong Diyos nahimong hari!” nadungog? Sukad sa 1919. Nianang tuiga sa usa ka kombensiyon sa Cedar Point, Ohio, si J. F. Rutherford, nga niadto presidente sa Watch Tower Society, nagdasig sa iyang mga mamiminaw pinaagi sa usa ka pakigpulong nga nag-ulohang “Pahibalo Alang sa Isigka-mamumuo.” Ang pakigpulong, nga gipasukad sa Isaias 52:7 ug Pinadayag 15:2, nagdasig sa tanang tumatambong nga himoon ang buluhatong pagwali. Sa ingon, ang ‘matahom nga mga tiil’ nasugdan pagkakita diha sa “kabukiran.” Sa una ang dinihogang mga Kristohanon ug sa ulahi ang ilang mga kauban nga sakop sa “ubang mga karnero” madasigong nanglakaw aron iwali ang maayong balita nga si Jehova nahimong Hari. (Juan 10:16) Sa unsang paagi si Jehova nahimong Hari? Iyang gipahayag na usab ang iyang pagkahari sa 1914 sa dihang iyang gipalingkod ang iyang Anak, si Jesu-Kristo, ingong Hari diha sa bag-ong natukod nga langitnong Gingharian. Ug si Jehova mihimog lain pang pagpahayag sa iyang pagkahari sa 1919 sa dihang iyang gipagawas ang “Israel sa Diyos” gikan sa Dakong Babilonya.—Galacia 6:16; Salmo 47:8; Pinadayag 11:15, 17; 19:6.
“Ang Imong mga Tigbantay Nagpatugbaw sa Ilang Tingog”
15. Kinsa ang “mga tigbantay” nga nagpatugbaw sa ilang tingog sa 537 W.K.P.?
15 Ang singgit nga “Ang imong Diyos nahimong hari!” gitubag ba? Oo. Si Isaias nagtala: “Pamati! Ang imong mga tigbantay nagpatugbaw sa ilang tingog. Sila dungan nga naghugyaw sa kalipay; kay mata ngadto sa mata unya nga sila makakita sa dihang tigomon pag-usab ni Jehova ang Zion.” (Isaias 52:8) Walay literal nga mga tigbantay ang nagpahimutang sa Jerusalem niadtong 537 W.K.P. aron sugaton ang unang namauling mga nadestiyero. Ang siyudad nahimong biniyaan sulod sa 70 ka tuig. (Jeremias 25:11, 12) Busa ang “mga tigbantay” nga nagpatugbaw sa ilang tingog mao gayod kadtong mga Israelinhon nga abanteng nakadungog sa balita mahitungod sa pagpasig-uli sa Zion ug maoy responsable sa pagpasa sa balita ngadto sa uban pang mga anak sa Zion. Sa pagkakita nga gihatag ni Jehova ang Babilonya ngadto sa mga kamot ni Ciro niadtong 539 W.K.P., ang mga tigbantay wala magduhaduha diha sa ilang mga hunahuna nga si Jehova maoy nagpagawas sa iyang katawhan. Uban niadtong misanong sa ilang pag-awhag, ang mga tigbantay nagpadayon sa paghugyaw sa kalipay, nga nagdungan, nga nagtugot nga ang uban makadungog sa maayong balita.
16. Kinsa ang nakita sa mga tigbantay “mata ngadto sa mata,” ug sa unsang diwa?
16 Ang igmat nga mga tigbantay nag-ugmad ug suod, personal nga relasyon uban kang Jehova, nga samag nakakita kaniya “mata ngadto sa mata,” o nawong-sa-nawong. (Numeros 14:14) Ang suod nilang pakig-uban kang Jehova ug sa usag usa nagpasiugda sa ilang panaghiusa ug sa makapalipay nga matang sa ilang mensahe.—1 Corinto 1:10.
17, 18. (a) Sa unsang paagi ang matang nga tigbantay sa modernong-adlaw nagpatugbaw sa tingog niini? (b) Sa unsang diwa ang matang nga tigbantay nagdungan sa pag-awhag?
17 Sa modernong-adlawng katumanan, ang matang nga tigbantay, “ang matinumanon ug maalamong ulipon,” nagpatugbaw sa tingog niini dili lamang alang sa mga anaa na sa makitang organisasyon sa Diyos kondili alang usab sa mga tagagawas. (Mateo 24:45-47) Ang usa ka pag-awhag migula aron tigomon ang mga nahibilin sa mga dinihogan sa 1919, ug sa 1922 ang pag-awhag gipakusgan panahon sa kombensiyon sa Cedar Point, Ohio, pinaagi sa awhag nga “imantala, imantala, imantala, ang Hari ug ang iyang gingharian.” Sukad sa 1935, ang pagtagad gipunting ngadto sa pagtigom sa usa ka dakong panon sa mga samag-karnero. (Pinadayag 7:9, 10) Sa dili pa dugayng katuigan gipakusgan ang pagpahibalo bahin sa pagkahari ni Jehova. Sa unsang paagi? Sa tuig 2000, mga unom ka milyon ang nagpakig-ambit sa pagsulti bahin sa pagkahari ni Jehova diha sa kapig 230 ka nasod ug mga teritoryo. Dugang pa, Ang Bantayanang Torre, ang pangunang galamiton sa matang nga tigbantay, nagpalanog sa makapalipayng mensahe diha sa kapig 130 ka pinulongan.
18 Gikinahanglan ang pagpaubos ug inigsoong gugma aron makaambit sa maong makapahiusang buluhaton. Aron mahimong epektibo ang pag-awhag, ang tanang nalangkit kinahanglang magwali sa samang mensahe, nga magalakip sa ngalan ni Jehova, iyang taganang lukat, iyang kaalam, iyang gugma, ug sa iyang Gingharian. Samtang ang mga Kristohanon sa tibuok kalibotan magbuhat nga abaga sa abaga, ang ilang personal nga bugkos uban kang Jehova mapalig-on aron ipahayag ang makalipayng balita nga nagdungan.
19. (a) Sa unsang paagi ang “nagun-ob nga mga dapit sa Jerusalem” nagmaya? (b) Sa unsang diwa nga si Jehova ‘naghukas sa iyang bukton’?
19 Tungod sa katawhan sa Diyos nga naghugyaw sa kalipay, bisan ang dapit nga ilang gipuy-an daw masadyaong tan-awon. Ang tagna nagpadayon: “Magmaya kamo, pagdungan sa paghugyaw sa kalipay, kamong nagun-ob nga mga dapit sa Jerusalem, kay gihupay ni Jehova ang iyang katawhan; iyang gilukat ang Jerusalem. Gihukasan ni Jehova ang iyang balaang bukton atubangan sa mga mata sa tanang nasod; ug ang tanang tumoy sa yuta makakita gayod sa kaluwasan sa atong Diyos.” (Isaias 52:9, 10) Tungod sa pag-abot sa mga namalik gikan sa Babilonya, ang daw-nagbangotan nga mga dapit sa biniyaang Jerusalem adunay masadyaong dagway tungod kay ang maputling pagsimba ni Jehova sa maong panahon mapasig-uli na. (Isaias 35:1, 2) Tin-aw, si Jehova may kalabotan niini. Iyang ‘gihukasan ang iyang balaang bukton,’ nga samag naglulho sa iyang mga manggas aron atimanon niya ang tahas sa pagluwas sa iyang katawhan.—Esdras 1:2, 3.
20. Unsay misangpot ug mosangpot pa gikan sa paghukas ni Jehova sa iyang balaang bukton sa modernong mga panahon?
20 Niining “kataposang mga adlaw,” si Jehova naghukas sa iyang balaang bukton aron buhion pag-usab ang dinihogang nahibilin, ang “duha ka saksi” sa basahong Pinadayag. (2 Timoteo 3:1; Pinadayag 11:3, 7-13) Sukad sa 1919, kini sila gidala nganha sa usa ka espirituwal nga paraiso, ang espirituwal nga kahimtang nga karon gipakig-ambitan nila uban sa milyonmilyon nilang mga kauban, ang ubang mga karnero. Sa kataposan, hukasan ni Jehova ang iyang balaang bukton aron ipahinabo ang kaluwasan sa iyang katawhan panahon sa “Har–Magedon.” (Pinadayag 16:14, 16) Unya, “ang tanang tumoy sa yuta makakita gayod sa kaluwasan sa atong Diyos.”
Usa ka Dinaliang Kinahanglanon
21. (a) Unsay gikinahanglan niadtong “nagdala sa mga galamiton ni Jehova”? (b) Nganong walay katarongan nga malisang ang mga Hudiyo nga nanggula sa Babilonya?
21 Kadtong mogula sa Babilonya aron mobalik ngadto sa Jerusalem kinahanglang makakab-ot sa usa ka kinahanglanon. Si Isaias nagsulat: “Pahilayo, pahilayo, gula gikan dinha, ayaw paghikap ug mahugaw; gula gikan sa iyang taliwala, pagpabilin kamong hinlo, kamo nga nagdala sa mga galamiton ni Jehova. Kay kamo mogula nga dili malisang, ug kamo molakaw nga dili mangalagiw. Kay si Jehova magauna mismo kaninyo, ug ang Diyos sa Israel mao ang inyong magbalantay sa luyo.” (Isaias 52:11, 12) Kinahanglang ibilin sa nanggulang mga Israelinhon ang bisan unsang may lama sa bakak nga pagsimba sa Babilonya. Sanglit ilang dad-on ang mga galamiton ni Jehova nga naggikan sa templo sa Jerusalem, sila kinahanglang mahinlo, dili lamang sa panggawas, seremonyal nga paagi, kondili sa panguna sa ilang mga kasingkasing. (2 Hari 24:11-13; Esdras 1:7) Dugang pa, si Jehova magauna kanila, busa sila walay katarongan nga malisang, ni kinahanglang sila mokalagiw nga malisangon, nga samag anaa sa ilang luyo ang mga uhaw-sa-dugo nga mga tiggukod. Ang Diyos sa Israel mao ang ilang magbalantay sa luyo.—Esdras 8:21-23.
22. Sa unsang paagi gipasiugda ni Pablo ang panginahanglan sa kahinlo taliwala sa dinihogang mga Kristohanon?
22 Ang mga pulong ni Isaias bahin sa paghupot sa kahinlo may dakong katumanan diha sa mga anak sa “Jerusalem sa itaas.” Sa gitambagan ni Pablo ang mga Kristohanon sa Corinto nga dili magpayugo nga dili timbang uban sa mga dili-magtutuo, iyang gikutlo ang mga pulong sa Isaias 52:11: “‘Busa gumula kamo gikan sa ilang taliwala, ug ilain ang inyong kaugalingon,’ nagaingon si Jehova, ‘ug hunong na sa paghikap sa mahugaw nga butang.’” (2 Corinto 6:14-17) Sama gayod sa mga Israelinhon nga namauli gikan sa Babilonya, ang mga Kristohanon kinahanglang bug-os magpalayo sa Babilonyanhong bakak nga pagsimba.
23. Sa unsang mga paagi ang mga alagad ni Jehova karong adlawa naningkamot nga magpabiling hinlo?
23 Matuod kini ilabina niadtong dinihogang mga sumusunod ni Jesu-Kristo nga mikalagiw gikan sa Dakong Babilonya sa 1919. Sila mauswagong naghinlo sa ilang kaugalingon gikan sa tanang timaan sa bakak nga pagsimba. (Isaias 8:19, 20; Roma 15:4) Sa mausbawon sila nakaamgo usab sa kahinungdanon sa moral nga pagkahinlo. Bisan pag ang mga Saksi ni Jehova kanunayng naglaban sa hataas nga moral nga mga sukdanan, Ang Bantayanang Torre may mga artikulo niadtong 1952 nga nagpasiugda sa panginahanglan nga disiplinahon ang mga tawong imoral aron ang kongregasyon magpabiling hinlo. Ang maong pagdisiplina motabang usab sa mamumuhat ug daotan sa pagkaamgo nga gikinahanglan ang sinserong paghinulsol.—1 Corinto 5:6, 7, 9-13; 2 Corinto 7:8-10; 2 Juan 10, 11.
24. (a) Sa modernong mga panahon, unsa ang “mga galamiton ni Jehova”? (b) Nganong ang mga Kristohanon karong adlawa masaligon nga si Jehova mopadayon sa pagpanguna kanila ingon man mahimong ilang magbalantay sa luyo?
24 Ang dinihogang mga Kristohanon kauban sa dakong panon sa ubang mga karnero determinado nga dili mohikap sa bisan unsa nga mahugaw sa espirituwal. Ang ilang naputli, nahinloang kahimtang magpatakos kanila nga mahimong mga tigdala sa “mga galamiton ni Jehova”—ang bililhong mga tagana sa Diyos alang sa sagradong pag-alagad diha sa balay-balay ug sa pagtuon sa Bibliya nga ministeryo ug sa ubang mga matang sa Kristohanong buluhaton. Pinaagi sa paghupot sa hinlong baroganan, ang katawhan sa Diyos karong adlawa mahimong masaligon nga si Jehova mopadayon sa pagpanguna kanila ingon man mahimong ilang magbalantay sa luyo. Ingong hinlong katawhan sa Diyos, sila adunay daghang katarongan nga ‘magdungan sa paghugyaw sa kalipay’!
[Footnote]
a Tan-awa ang Kapitulo 15 niining libroha alang sa mas bug-os nga paghisgot sa relasyon tali sa “Jerusalem sa itaas” ug sa iyang yutan-on, dinihogang mga anak.
[Hulagway sa panid 183]
Ang Zion ipagawas gikan sa pagkabihag
[Hulagway sa panid 186]
Sugod sa 1919, ang ‘matahom nga mga tiil’ nakita na usab ibabaw sa “kabukiran”
[Hulagway sa panid 189]
Ang mga Saksi ni Jehova nagdungan sa pagsulti
[Hulagway sa panid 192]
Kadtong “nagdala sa mga galamiton ni Jehova” kinahanglang mahinlo sa moral ug espirituwal