Magmauswagon

SA DIHANG imong unang nakat-onan ang pagpadapat sa mga prinsipyo sa Bibliya, ang nakagamot nga mga paagi sa panghunahuna, sinultihan, ug pamatasan anam-anam nga nausab. Ang kadaghanan niana nahitabo bisan sa wala ka pa magpalista sa Teokratikanhong Tunghaan sa Ministeryo. Karon tingali miuswag ka na sa punto nga imong gipahinungod ang imong kinabuhi kang Jehova. Nagpasabot ba kana nga mohunong ka na sa pag-uswag? Dili gayod. Ang imong bawtismo maoy sinugdanan lamang.

Ang tinun-ang si Timoteo nag-alagad na isip usa ka Kristohanong ansiyano sa dihang gisultihan siya ni Pablo nga ‘palandongon’ ang tambag nga gihatag kaniya ug ang mga pribilehiyo sa pag-alagad nga gisalig kaniya​—nga ‘hatagag bug-os nga pagtagad’ kining mga butanga​—aron ang iyang “pag-uswag madayag sa tanan nga mga tawo.” (1 Tim. 4:12-15) Bisan mao pay imong pagsugod sa pagsubay sa dalan sa kamatuoran o daghan ka nag kasinatian sa Kristohanong pagkinabuhi, ikaw kinahanglang magmaikagon sa pag-uswag.

Sa Efeso 3:14-19, atong mabasa nga si apostol Pablo nag-ampo nga ang iyang kaubang mga magtutuo ‘bug-os nga makasabot . . . sa gilapdon ug gitas-on ug gihabogon ug giladmon’ sa kamatuoran. Sa maong tumong, gihatag ni Jesus ang mga gasa nga mga lalaki aron sa pagtudlo, pagpasibo, ug pagpalig-on sa kongregasyon. Ang regular nga pagpamalandong sa dinasig nga Pulong sa Diyos, uban sa paggiya sa eksperyensiyadong mga magtutudlo, makatabang kanato nga ‘motubo’ sa espirituwal.​—Efe. 4:11-15.

Ang maong pagtubo naglakip sa ‘pagbag-o sa puwersa nga nagpalihok sa imong kaisipan.’ Naglakip kini sa pagtukod ug kusganong hilig sa hunahuna nga kaharmonya sa hunahuna sa Diyos ug ni Kristo. Nagkinahanglan kini nga kanunayng maladlad sa ilang panghunahuna, aron ‘makasul-ob sa bag-ong pagkatawo.’ (Efe. 4:23, 24) Sa dihang ikaw magtuon sa mga Ebanghelyo, giisip ba nimo kining mga asoy sa kinabuhi ni Kristo ingong sumbanan nga imong pagasundon? Gusto ba nimong maila ang tinong mga hiyas nga gipakita ni Jesus ug dayon maningkamot pag-ayo nga sundogon kini diha sa imong kinabuhi?​—1 Ped. 2:21.

Ang mga topiko nga isal-ot nimo sa pagpakigsulti mahimong ilhanan sa gilapdon nga imong nakab-ot ang maong pag-uswag. Silang nagsul-ob sa bag-ong pagkatawo dili mogamit ug malimbongon, mapasipalahon, malaw-ay o di-makapadasig nga sinultihan. Hinunoa, ang ilang sinultihan maoy “maayo nga makapalig-on . . . aron makahatag kinig kaayohan sa mga magapatalinghog.” (Efe. 4:25, 26, 29, 31; 5:3, 4; Jud. 16) Ang ilang mga komento ug mga tubag diha sa pribado ug sa mga tigom sa kongregasyon magbutyag nga ang kamatuoran nagausab sa ilang kinabuhi.

Kon ikaw wala na “gituyatuya sa mga balod ug gidala ngadto-nganhi sa matag hangin sa pagtulon-an,” kini usab maoy pamatuod sa pag-uswag. (Efe. 4:14) Sa unsang paagi ikaw mosanong, pananglitan, kon makmakan ka sa kalibotan ug daghang bag-ong mga ideya, mga kawsa, o mga paagi sa lulinghayaw? Matental ka ba nga gamiton ang panahon sa espirituwal nga mga obligasyon aron mangagpas sa maong mga butang? Ang pagbuhat sa ingon makababag sa espirituwal nga pag-uswag. Pagkamaalamon gayod ang pagpalit sa panahon alang sa espirituwal nga mga pangagpas!​—Efe. 5:15, 16.

Kon sa unsang paagi ikaw makiglabot sa ubang mga tawo maoy ilhanan usab sa espirituwal nga pag-uswag. Nakakat-on ka na ba nga “magmalumo uban ang pagkamabination, kinabubut-on nga magpasaylo” sa imong mga igsoong lalaki ug babaye?​—Efe. 4:32.

Ang imong pag-uswag sa pagbuhat sa mga butang sa paagi ni Jehova kinahanglang madayag diha sa kongregasyon ug sa panimalay. Angay usab nga makita kini didto sa eskuylahan, sa publikong mga dapit, ug sa imong trabahoan. (Efe. 5:21–​6:9) Kon sa tanan nianang mga kahimtanga magpasundayag ka ug diyosnong mga hiyas sa mas bug-os nga sukod, nan ang imong pag-uswag makita.

Gisalig ni Jehova sa matag usa kanato ang mga katakos ug mga kahanas. Siya nagdahom nga gamiton nato kini alang sa uban aron nga pinaagi kanato, ikapahayag niya ang iyang dili-takos nga kalulot. Bahin niini si apostol Pedro misulat: “Sumala sa nadawat nga gasa sa matag usa, gamita kini sa pag-alagad sa usag usa ingon nga maayong mga piniyalan sa dili-takos nga kalulot sa Diyos.” (1 Ped. 4:10) Giunsa man nimo pagdumala ang imong pagkapiniyalan?

Si Pedro nagpadayon: “Kon ang usa mosulti, pasultiha siya ingon nga kini ang sagradong mga pahayag sa Diyos.” (1 Ped. 4:11) Kining bersikuloha nagpasiugda sa kaakohan nga mosulti nga bug-os nahiuyon sa Pulong sa Diyos, aron ang Diyos mahimaya. Ang paagi sa pagsulti angay usab nga maghimaya kang Jehova. Ang pagbansay nga gitagana pinaagi sa Teokratikanhong Tunghaan sa Ministeryo makatabang nimo sa paggamit sa imong gasa sa maong paagi​—magahimaya sa Diyos pinaagi sa imong pagtabang sa uban. Kay nakabaton niana ingon nga imong tumong, unsaon man nimo pagsukod ang imong pag-uswag diha sa tunghaan?

Imbes maghunahuna kon unsa na ka daghang punto ang imong nakobrehan diha sa imong porma sa talambagan o sa matang sa mga asaynment nga gihatag kanimo, palandonga hinuon ang gilapdon nga niana ang pagbansay nagpauswag sa kalidad sa imong halad sa pagdayeg. Ang tunghaan nag-andam kanato nga mahimong mas epektibo diha sa ministeryo sa kanataran. Busa suknaa ang kaugalingon: ‘Nangandam ba gayod ako kon unsay akong isulti diha sa pag-alagad sa kanataran? Nagpakita ba akog personal nga interes sa mga tawong akong gisangyawan? Ako bang giandam ang sukaranan alang sa mga balikduaw pinaagi sa pagbilin sa mga tawo ug usa ka pangutana aron hisgotan sa sunod panahon? Kon ako nagadumalag pagtuon sa Bibliya sa usa ka tawo, naningkamot ba ako nga mouswag ingong usa ka magtutudlo aron aboton ang kasingkasing?’

Ayaw isipa ang pag-uswag pinaagi lamang sa mga pribilehiyo sa pag-alagad nga gipiyal kanimo. Ang imong pag-uswag makita, dili diha sa asaynment, kondili sa kon unsay gibuhat nimo niana. Kon hatagag asaynment nga naglakip sa pagtudlo, suknaa ang kaugalingon: ‘Gigamit ba gayod nako ang arte sa pagpanudlo? Ako bang giandam ang materyal sa paagi nga kini may epekto sa mga kinabuhi niadtong makadungog niana?’

Ang tambag nga gamiton mo ang imong gasa nagpasabot sa paggamit ug inisyatibo. Mopresentar ka ba nga mokuyog sa uban diha sa pag-alagad sa ministeryo? Mangita ka bag mga kahigayonan sa pagtabang sa mga membro sa imong kongregasyon nga mga bag-ohan, batan-on, o maluyahon? Moboluntaryo ka ba sa paghinlo sa Kingdom Hall o sa pagtabang diha sa nagkalainlaing mga paagi panahon sa mga kombensiyon ug mga asembliya? Makapalista ka ba ingong oksilyare payunir sa popanahon? Makaarang ka ba nga moalagad ingong regular payunir o motabang sa usa ka kongregasyon diin mas dako ang panginahanglan? Kon ikaw usa ka igsoong lalaki, naningkamot ka ba nga makab-ot ang Kasulatanhong mga kuwalipikasyon alang sa ministeryal nga mga alagad ug sa mga ansiyano? Ang imong kaandam nga motabang ug modawat ug responsabilidad maoy usa ka ilhanan sa pag-uswag.​—Sal. 110:3.

Kon mobati ka nga dili takos tungod sa kawalay-kasinatian sa Kristohanong pagkinabuhi, ayawg kaluya. Ang Pulong sa Diyos makahimo nga “maalamon sa walay kasinatian.” (Sal. 19:7; 119:130; Prov. 1:1-4) Ang pagpadapat sa tambag sa Bibliya motugot kanato nga makabatog kaayohan gikan sa hingpit nga kaalam ni Jehova, nga mas dakog bili kay sa bisan unsang kahibalo nga nabatonan gumikan sa kasinatian lamang. Apan, samtang mouswag kita sa atong pag-alagad kang Jehova, makabaton kitag hinungdanong kasinatian. Sa unsang paagi magamit nato kini aron makabaton kitag kaayohan?

Kay naladlad na sa nagkadaiyang mga kahimtang sa kinabuhi, ang usa ka tawo mahimong matental sa pagpangatarongan: ‘Nakasugat na ko niining kahimtanga kaniadto. Nahibalo na kog unsay buhaton.’ Ingon ba niini ang dalan sa kaalam? Ang Proverbio 3:7 nagpasidaan: “Ayaw pagpakamaalamon sa kaugalingon mong mga mata.” Ang kasinatian angayng magpalapad sa atong panghunahuna bahin sa mga prinsipyo nga tagdon sa dihang moatubang sa mga kahimtang sa kinabuhi. Apan kon kita nagauswag sa espirituwal, ang atong kasinatian kinahanglan usab nga makaapektar sa atong mga hunahuna ug kasingkasing nga nagkinahanglan kita sa panalangin ni Jehova aron molampos. Dayon, ang atong pag-uswag madayag, dili pinaagi sa atong pag-atubang sa mga kahimtang uban ang pagkamasaligon sa kaugalingon, kondili sa kinabubut-on natong pagliso kang Jehova sa paggiya sa atong kinabuhi. Makita kini pinaagi sa atong pagkamasaligon nga walay mahitabo kon dili niya tugotan ug sa atong paghupot ug masaligon ug mabinationg relasyon sa atong langitnong Amahan.

Si apostol Pablo, bisan tuod hamtong-sa-espirituwal, dinihogang Kristohanon, nakasabot nga kinahanglang mopadayon siya sa ‘pagpangab-ot’ aron maangkon ang tumong nga kinabuhi. (Filip. 3:13-16) Ikaw ba adunay samang panglantaw?

Ngadto sa unsang gilapdon nga ikaw miuswag? Sukda ang imong pag-uswag maylabot sa kon unsa ka bug-os ang imong pagsul-ob sa bag-ong pagkatawo, kon unsa ka bug-os ang pagpasakop nimo sa pagkasoberano ni Jehova, ug kon unsa ka makugihon nimong gigamit ang imong mga gasa sa pagpasidungog kang Jehova. Samtang makabaton kag kaayohan sa edukasyon sa Teokratikanhong Tunghaan sa Ministeryo, ang mga hiyas nga gipasiugda diha sa Pulong sa Diyos kinahanglang mauswagong madayag diha sa imong paagi sa pagpanulti ug pagpanudlo. Tagda kanunay kining mga puntoha sa imong pag-uswag. Oo, kalipayi kini, ug ang imong pag-uswag daling makita.