Gusto ni Jehova nga Makabaton ug Kinabuhi ang mga Tawo—Gusto Mo Ba?

1, 2. (a) Unsay atong makat-onan gikan sa reaksiyon ni Jonas sa desisyon ni Jehova bahin sa Nineve? (b) Nganong angay natong susihon ang kaluoy sa Diyos ug ang iyang hunahuna bahin sa kinabuhi?

SI Jehova nalipay. Ang manalagna nagsubo. Tungod sa kaluoy wala idayon sa Diyos ang paglaglag sa libolibong tawo. Gusto ni Jonas nga sila laglagon! Gipalabi ni Jehova nga pasayloon ug magpadayong buhi ang mga tawo nga mga kaaway kanhi sa iyang katawhan.

² Sumala sa atong masabtan sa kahimtang ni Jonas, lisod usahay masabtan sa mga tawo ang gidak-on sa pagkamainantoson sa Diyos ug ang pagpadayag sa Iyang tinguha nga makabaton ug kinabuhi ang mga tawo. Giisip ni Jonas ang desisyon ni Jehova sa dili paglaglag sa mga taga-Nineve ingong “dili gayod makapahimuot, ug siya nanginit sa kasuko.” Posible bang si Jonas mas naghunahuna sa iyang kaugalingong mga pagbati kay sa kaluoy ug pagluwas ug mga kinabuhi? Mahimong naghunahuna siya nga kon dili laglagon ang mga taga-Nineve, mapakaulawan siya. (Jonas 4:1, 10, 11) Komosta sa atong panahon, samtang tuling nagsingabot ang adlaw ni Jehova? Ikaw mangutana tingali: ‘Sa unsang paagi mapalalom ko ang akong pagpabili sa kapasayloan sa Diyos, ug sa unsang paagi makatabang ako sa naghinulsol nga mga mamumuhat ug daotan aron makapahimulos silang mas bug-os pa sa iyang pagkamabination? Oo, sa unsang paagi makasundog ako sa tinguha sa Diyos nga makabaton ug kinabuhi ang mga tawo?’

 3. Aduna bay panagsumpaki tali sa hustisya sa Diyos ug sa iyang kaluoy? Ipatin-aw.

³ Maghunahuna ang pipila ka tawo nga ang sunodsunod nga panid niining 12 ka matagnaong mga basahon naghisgot bahin sa kapungot sa Diyos ug sa iyang pagsilot sa mga tawo, sa iyang pagpatuman sa hustisya. Sila mangutana tingali: ‘Hain man ang kaluoy ni Jehova? Naghunahuna ba siya bahin sa pagluwas ug mga kinabuhi?’ Sa pagkamatuod, imbes magkasumpaki, gipadayag ang hustisya ug kaluoy sa Diyos aron makatabang sa pagluwas ug mga kinabuhi. Ang hustisya ug kaluoy maoy duha ka hiyas sa iyang personalidad nga hingpit nga pagkatimbang. (Salmo 103:6; 112:4; 116:5) Pinaagi sa pagwagtang sa mga kadaot nga nabuhat sa mga daotan, ang Diyos nagapadayag ug kaluoy alang sa mga tawo nga mahiligon sa pagkamatarong. Ebidensiya kana sa iyang hingpit nga hustisya. Sa laing bahin, tungod kay bug-os nga matarong, sa iyang kaluoy si Jehova nagkonsiderar sa mga kahuyangan sa dili-hingpit nga mga tawo. Ikapahayag nimo kini niining paagiha: pagsilot kon gikinahanglan, kaluoy kon posible. Sa mga mensahe sa mga manalagna, imong makaplagan ang daghang pagpahayag nga nagpamatuod sa maong hingpit nga pagkatimbang, nga nagpakita nga gitinguha sa Diyos nga makabaton ug kinabuhi ang mga tawo. Ato kining susihon ug sa paghimo niana kita makakaplag ug mga pagtulon-an nga atong ikapadapat karon sa praktikal nga mga paagi.

 4. Unsay ebidensiya nga gusto sa Diyos nga makabaton ug kinabuhi ang mga tawo?

⁴ Ang manalagnang si Joel nagpahayag ug mensahe sa paghukom, apan siya nagpamatuod usab nga ang Diyos maoy “mapuangoron ug maluluy-on, mahinay sa kasuko ug dagaya sa mahigugmaong-kalulot.” (Joel 2:13) Mga usa ka gatos ka tuig sa ulahi, sa ikawalong siglo W.K.P., si Miqueas nagpasiugda nga kita nagkinahanglan gayod sa kapasayloan ni Jehova. Human sa pagsukna “Kinsa ang usa ka Diyos nga sama kanimo?” si Miqueas nagbatbat kang Jehova niining paagiha: “Siya dili magapabilin sa iyang kasuko hangtod sa kahangtoran, kay siya nahimuot sa mahigugmaong-kalulot. Siya magpakita ug kaluoy kanato pag-usab.” (Miqueas 7:18, 19) Sumala sa atong masabtan gikan sa asoy ni Jonas bahin sa mga taga-Nineve, andam ang Diyos nga dili idayon ang pagsilot sa mga tawong tumong sa iyang kapungot kon paluyohan nila ang ilang paghinulsol ug mga buhat nga nahiangay sa paghinulsol.

 5. Unsang mga bahin sa kaluoy sa Diyos ug sa iyang interes sa pagluwas ug mga kinabuhi ang giisip nimong labing makalilipay? (Tan-awa usab ang “Sila Andam Moalagad.”)

⁵ Wala kita magkinabuhi sa panahon sa 12 ka manalagna. Apan dili ba magmapasalamaton kita tungod sa mga pagpadayag sa kaluoy ni Jehova ug sa iyang interes sa pagluwas ug mga kinabuhi? Ang pagbati nimo niana makapalalom sa imong pagmahal sa Diyos ug makapausbaw sa imong interes nga motabang sa uban aron sila makabaton ug kinabuhi. Bisan pag nagsubay ug daotang dalan ang kadaghanang tawo karon, kita gipasaligan nga ang Diyos “wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Ang maong tinguha ni Jehova giilustrar diha sa mahinangpong mga pahayag ni Oseas sa iyang pagdawat pag-usab sa iyang mananapawong asawa. Si Jehova ‘nakigsulti sa kasingkasing’ sa iyang katawhan. Ang Diyos dili obligado sa pagpasaylo, apan siya andam mohimo niana “sa kinabubut-on.” (Oseas 1:2; 2:13, 14; 3:1-5; 14:4) Nahibalo ka ba kon nganong hinungdanon kaayo ang tinamdan ug mga lihok sa Diyos bahin sa pagpasaylo? Tungod kay ang mga kinabuhi nalangkit. Makakita kag dugang ebidensiya sa kaluoy sa Diyos ug sa iyang tinguha nga makabaton ug kinabuhi ang mga tawo sa dihang motan-aw ka sa Kristohanong kongregasyon, nga adunay ginahimo nga naglangkit kanimo.

 6. Unsay pangunang paagi nga gipadayag sa Diyos nga iyang gitinguha nga makabaton ug kinabuhi ang mga tawo?

⁶ Nganong nagpakigbahin ka man sa publikong ministeryo? Ang usa ka dakong katarongan maoy sa pagtabang sa uban aron sila makaila sa matuod nga Diyos. Aniay usa ka hinungdanong butang aron makaila kang Jehova: Siya mohatag ug tin-aw nga mga pasidaan sa dili pa magpahamtang ug silot. Nagpadayag kini nga siya mahunahunaon sa mga tawo, nga siya interesado nga sila dili mamatay apan makabaton hinuon ug kinabuhi. Ang 12 ka manalagna nagpahibalo sa mga tawong nagbuhat ug daotan nga gihatagan sila sa Diyos ug higayon aron tul-iron ang ilang mga panggawi ug unya makalikay sa iyang matarong nga kasuko. Kita nalangkit sa susamang buluhaton karon. Ingong Kristohanon, aduna kay pribilehiyo sa pagmantala sa pasidaan bahin sa umaabot nga adlaw sa panimalos sa Diyos. Samtang ikaw nagamantala, likayi ang mga pagbati sa panimalos, nga gustong makakita nga ang dili-motuo nga mga tawo “silotan sumala sa nahiangay kanila.” Pahinumdomi ang imong kaugalingon nga ikaw nagasangyaw ilabina aron makasubay unta ang pipila sa dalan paingon sa kinabuhi.—Joel 3:9-12; Sofonias 2:3; Mateo 7:13, 14.

 7. (a) Nganong hinungdanon ang pagpakigbahin sa buluhatong pagsangyaw? (b) Kon makahibalag kitag mga tawong dili matinagdanon, sa unsang paagi makatabang kanato ang paghunahuna bahin sa tinamdan ni Jehova?

⁷ Sa matag higayon nga ikaw nagpakig-ambit sa mga kamatuoran sa Bibliya diha sa pagbalaybalay, diha sa eskuylahan, sa imong trabahoan, o sa laing dapit, ikaw nagtanyag nga motabang sa usa ka tawo nga nagkinahanglan gayod sa kaluoy ug kapasayloan sa Diyos. (Oseas 11:3, 4) Itugot nato, ikaw makahibalag tingali ug mga tawong dili matinagdanon. Bisan pa niana, pinaagi sa paglahutay, imong ginasundog ang atong maluluy-ong Diyos, kinsa pinaagi ni Zacarias miingon ngadto sa Iyang masukihong katawhan: “Biyai ninyo, palihog, ang inyong daotang mga dalan ug ang inyong daotang mga pagpakiglabot.” (Zacarias 1:4) Kinsay nasayod kon pila ka tawo ang mosanong samtang isulti mo kanila ang bahin sa kaluoy sa Diyos ug ipunting ang dalan paingon sa kinabuhi? Sa makausa pa, sulayi ang paghinumdom nga ikaw nagsangyaw tungod kay gusto ni Jehova nga makabaton ug kinabuhi ang mga tawo, ug gusto usab nimo.

 8. Nganong makapadasig ang paghinumdom nga ang pipila misanong sa kaluoy sa Diyos?

⁸ Basin makapadasig kanimo ang paghinumdom niini: Halos kanunay nga may mga tawong modawat sa mga mensahe sa Diyos. Busa, si Oseas naghisgot niadtong nakaamgo nga “ang mga dalan ni Jehova matul-id.” Ang manalagna midugang: “Ang mga matarong mao ang magalakaw diha niana.” (Oseas 14:9) Latas sa kasiglohan, daghan ang natandog sa pagdapit sa Diyos: “Balik kanako uban sa bug-os ninyong kasingkasing.” (Joel 2:12) Kana gisulti ngadto sa katawhan nga nakaila kang Jehova, apan kini nagpadayag usab nga ang Diyos interesado sa mga tawong bag-o pang nagtuon bahin kaniya. Oo, ang Diyos wala kawad-ig pagsalig sa katakos sa mga tawo sa pagbasol tungod sa ilang nangaging daotang binuhatan, sa paghinulsol, ug pagliso sa pagbuhat kon unsay matarong. Tungod niana sila makalaom sa kaluwasan.—1 Timoteo 4:16.

 9. Unsa ang gikinahanglan sumala sa reaksiyon sa mga taga-Nineve?

⁹ Adunay laing hinungdan nga si Jehova nagpasaylo sa mga taga-Nineve. Atong mabasa nga ang katawhan seryosong naghunahuna bahin sa umaabot nga paghukom sa Diyos, ug sila “nagbutang ug pagtuo sa Diyos.” (Jonas 3:5) Ang pagtuo, dili lamang ang kahadlok sa paghukom, maoy gikinahanglan aron magpadayong buhi. Tungod sa dakong tinguha ni Jehova nga makitang maghinulsol ang mga tawo ug molihok pinasukad sa pagtuo, siya nagtugot kanato nga mahimong mga magwawali, aron tabangan ang mga tawo sa pagpili. Unsay resulta? Atong mabasa ang bahin sa mga taga-Nineve: “Nakita sa matuod nga Diyos ang ilang mga buhat, nga sila mitalikod sa ilang daotang dalan; ug mao nga ang matuod nga Diyos nagbasol sa katalagman nga iyang giingon nga ipahinabo kanila; ug kini wala niya ipahinabo.” (Jonas 3:10) Si Jehova dili malimbongan pinaagi lamang sa mga pulong o sa walay-kahulogan nga mga buhat. Tim-os gayod ang gipahayag nga paghinulsol sa mga taga-Nineve nga gipadayag sa ilang mga buhat. Nakita sa Diyos nga nagbag-o gayod sila; nagpakita silag tinuod nga paghinulsol nga inubanan sa pagtuo.

10. Unsa ang pipila ka kahimtang nga niana si Jehova nagtanyag ug kaluwasan?

¹⁰ Dili gayod kita angayng moingon nga ang interes ni Jehova sa pagluwas ug mga kinabuhi nakabenepisyo lamang sa mga taga-Nineve. Sa pagkalaglag sa Jerusalem niadtong 607 W.K.P.—human sa pagpanagna ni Abdias, Nahum, ug Habacuc—si Jehova nagtaganag kaikyasan alang sa masinugtanong si Jeremias ug sa usa ka grupo sa matinumanon niyang mga kauban. (Jeremias 39:16-18) Ug gitagna sa mga manalagna sa Diyos nga ang mahinulsolong nahibilin mobalik gikan sa Babilonya ug magpasig-uli sa maputling pagsimba. (Miqueas 7:8-10; Sofonias 3:10-20) Ang maong mga tagna may dakong katumanan sa modernong panahon. Human sa Gubat sa Kalibotan I, ang dinihogang mga Kristohanon, nga daghan kanila nagpasagad sa matuod nga pagsimba, napasig-uli sa masibotong kalihokan ug sa pabor ni Jehova, nga naglaom sa umaabot nga kinabuhi. Karong adlawa usab, ang katawhan gikan sa ‘daghang kanasoran nagapakig-anib kang Jehova.’ (Zacarias 2:11) Kini sila naglaom nga makalabang-buhi sa nagsingabot nga kataposan niining sistema sa mga butang. Busa, ang imong publikong ministeryo maoy dili lamang masinugtanong buhat nga imong buhaton kay ang mga Kristohanon gisugo man sa pagbuhat niini. Ni gibuhat kini sa pagtuman lamang sa tagna. (Mateo 24:14; 28:19, 20) Ang katuyoan sa imong publikong ministeryo mao ang pagtabang sa mga tawo nga makakat-on bahin kang Jehova, magpasundayag ug pagtuo, ug makabaton ug kinabuhi.

11, 12. Sa unsang paagi ang kaluoy sa Diyos makabenepisyo niadtong iyang mga magsisimba kanhi?

¹¹ Si Jehova interesado sa mga bag-ohan ug gusto niyang makabaton silag kinabuhi, apan dili niya mahikalimtan kadtong nag-alagad na kaniya. Kita angayng mainteresado usab kanila ug buot natong magpadayon sila sa dalan sa kinabuhi. Sa unsang praktikal nga mga paagi ikapakita nato ang atong interes kanila?

¹² Basin may nailhan kang pipila ka tawo nga nakakat-on na bahin kang Jehova, nagpasundayag ug pagtuo kaniya, ug nahimong aktibo sa matuod nga pagsimba apan wala na mag-alagad kaniya karon. Ang mga mensahe nga gipadala ni Jehova pinaagi sa 12 ka manalagna nagpakita nga siya andam magpakitag kaluoy kang bisan kinsa nga kaniadto nahiapil sa iyang katawhan apan wala na magpadayon sa matuod nga pagsimba. Kini tinuod usab karon, bisan kon sila naanod, nahilayo, o nakasala ug kinahanglang maghinulsol. (Hebreohanon 2:1; 3:12) Bisag sila dili tingali malipayon samtang nahilayo kang Jehova, sila tingali malisdan sa pagbalik. Naghangyo ang Diyos kanila, sumala sa mga pulong sa iyang manalagna: “Mao kini ang giingon ni Jehova sa mga panon: ‘Balik kanako,’ mao ang giingon ni Jehova sa mga panon, ‘ug ako mobalik kaninyo.’” (Zacarias 1:3) Pagkamakapadasig ang mga pulong ni Oseas! Siya nag-ingon: “Balik, Oh Israel, kang Jehova nga imong Diyos, kay ikaw napandol sa imong kasaypanan. Pagdala kamog mga pulong ug pamalik kamo kang Jehova. Ingna siya, ninyong tanan, ‘Hinaot pasayloon mo ang kasaypanan; ug dawaton ang maayo.’” Oo, bisan kadtong nakahimog dagkong mga sala apan unya sila namalik sa Diyos nga may tim-os nga paghinulsol makasinati ug kapasayloan nga motultol sa bug-os nga pagkapasig-uli. (Oseas 6:1; 14:1, 2; Salmo 103:8-10) Kana nahitabo sa mga adlaw sa mga manalagna, ug kini nahitabo sa atong adlaw.

13. Unsay atong mga katarongan sa pagpakitag kaluoy niadtong gipasaylo na sa Diyos?

¹³ Apan unsay ipasabot niana alang sa mga Kristohanong nagpadayon pagsubay sa dalan sa kinabuhi? Sa unsang paagi ikapakita nato nga kita nakabaton sa panghunahuna ni Jehova bahin sa ubang mga tawo? Gidahom ni Jehova nga kita magpakitag kaluoy, ngadto sa mga bag-ohan ug ngadto niadtong mihunong sa ilang pag-alagad kaniya. Pinaagi ni Oseas gisulti sa Diyos kon unsay Iyang gitinguha gikan kanato: “Ako may kahimuot sa mahigugmaong-kalulot, ug dili sa halad; ug sa kahibalo sa Diyos inay kay sa tibuok halad-nga-sinunog.” Nahiuyon nianang mga pulonga gipahayag ni Jesu-Kristo ang ideya niining paagiha: “Nan, lakaw ug tun-i ninyo ang kahulogan niini, ‘Buot ko ug kaluoy, ug dili halad.’” (Oseas 6:6; Mateo 9:13) Ang atong pagpasundayag sa maong kaluoy hinungdanon gayod aron padayong mahuptan ang atong relasyon uban sa Diyos. Matikdi kon giunsa paglangkit ni apostol Pablo ang pagkamapasayloon uban sa pagsundog sa Diyos: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo. Busa, mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma.” (Efeso 4:32–5:2) Nagmalamposon ka ba sa pagsundog sa Diyos niining bahina?

14, 15. Ubos sa unsang matang sa mga kahimtang nga masulayan ang atong tinamdan bahin sa pagpasaylo ni Jehova?

¹⁴ Unsa na man kon ang usa ka igsoon nga nakahimog grabeng sala maoy dili mahinulsolon ug kinahanglang ipalagpot gikan sa kongregasyon? Ang maong kahimtang nahitabo sa unang siglo; ang mga Kristohanon nga nahimong dili-mahinulsolong mga makasasala kinahanglang ipalagpot. Kon kana nahitabo samtang buhi pa ang mga apostoles ni Jesus, dili katingad-ang kini mahitabo usahay karong adlawa. Sa maong mga kahimtang, ang mga maunongon sa kongregasyon modawat sa pahimangno sa Bibliya nga dili makig-uban sa usang gipalagpot. Ang ilang pagkamaunongon kang Jehova basin makatabang sa mamumuhat ug daotan sa pagkasabot sa kaseryoso sa iyang daotang panggawi, ug basin siya matukmod sa paghinulsol. Atong mabasa diha sa Bibliya nga ang usa ka tawo sa Corinto nga napalagpot sa ulahi naghinulsol gayod ug nagbag-o, ug siya napasig-uli sa kongregasyon. (1 Corinto 5:11-13; 2 Corinto 2:5-8) Kon kana mahitabo karong adlawa, unsay imong bation, ug sa unsang paagi ikapakita nimo ang imong interes nga makabaton ug kinabuhi ang uban?

¹⁵ Ang mahinulsolong mamumuhat ug daotan basin maulaw ug nawad-ag paglaom, nga nagkinahanglag pagpasalig gikan sa Diyos ug sa iyang espirituwal nga mga igsoon nga sila nahigugma kaniya ug nagtinguha nga makabaton siyag kinabuhi. Tan-awa kon unsa ka lumo ang pagpasalig sa Diyos sa iyang karaang katawhan nga andam maghinulsol: “Ako makigsaad kanimo sa kaminyoon diha sa pagkamatinumanon; ug ikaw makaila gayod kang Jehova.” (Oseas 2:20) Sanglit kana ang pagbati sa Diyos, angay natong ipasundayag nga kita nahiuyon sa usa nga sumala ni Zacarias maoy Diyos nga ‘nagpakitag kaluoy.’—Zacarias 10:6.

16. Unsay angay natong reaksiyon sa dihang adunay mapasig-uli sa kongregasyon?

¹⁶ Gusto sa Diyos nga ang mga tawo makabaton ug kinabuhi, busa siya malipay sa dihang ang makasasala maghinulsol o ang kanhi dili-aktibong alagad magmadasigon na usab.a (Lucas 5:32) Sa kahimtang sa napasig-uling taga-Corinto nga gihisgotan ganina, gitambagan ni Pablo ang kongregasyon sa pagpasaylo ug pagdasig kaniya, nga pahibaloon siya nga sila nahigugma gayod kaniya: “Kini nga pagbadlong nga gihatag sa kadaghanan igo na sa maong tawo, mao nga . . . angay kamong malulotong magpasaylo ug maghupay kaniya, aron ang maong tawo dili lamyon sa iyang tumang kasubo. Busa ako magaawhag kaninyo nga pamatud-an ang inyong gugma kaniya.” (2 Corinto 2:6-8) Hinumdomi nga si Oseas mikutlo kang Jehova nga nag-ingon bahin sa kanhing mga makasasala: “Ayohon ko ang ilang pagkadili-matinumanon. Higugmaon ko sila sa kinabubut-on.” (Oseas 14:4) Sundogon ba nato si Jehova, nga nalipay nga makatabang sa maong pagkaayo ug sa pagbaton niyag kinabuhing walay kataposan nga mahimong sangpotanan niana?

17, 18. Sa unsang paagi kita mahigugmaong makatabang niadtong namalik kang Jehova o sa mga sakop sa pamilya sa usang gipalagpot?

¹⁷ Gihimong tin-aw ni Jehova nga iyang pagatagdon ang mga mobalik uban ang dignidad, nga sila dawaton pag-usab ug sila bug-os makadawat sa iyang gugma sama kang Oseas nga nagdawat dayon pag-usab sa iyang kanhi maluibong asawa. Si Jehova naghisgot sa paagi sa iyang pagtagad sa iyang mga alagad: “Ako nahisama niadtong nagtangtang ug yugo gikan sa ilang apapangig, ug sa kalumo ako nagdala ug pagkaon sa matag usa.” (Oseas 11:4) Pagkamakapadasig ang pagbati nga gipasundayag ni Jehova aron inanay nga madani ang mga gustong mobalik! Makasundog kita kaniya pinaagi sa pagkahimong dili mapig-oton o bugnaw ug tinagdan sa usang nagpakitag diyosnong kasubo ug tinuod nga paghinulsol. Sa dihang dawaton siya pag-usab sa kongregasyon, imbes magpakitag kayugot o magdumot kaniya tungod sa iyang nangaging kasaypanan, angay kitang mosulti nga mahupayon kaniya kon gikinahanglan.—1 Tesalonica 5:14.

¹⁸ May nahunahunaan ka bang laing mga paagi sa pagsundog kang Jehova may kalabotan sa usang gipalagpot gikan sa kongregasyon? Kon adunay kinahanglang ipalagpot, makatabang ba kita sa maunongong mga sakop sa iyang pamilya, tingali ang maunongong kapikas ug mga anak? Basin sila naglisod sa pagpadayon sa ilang pagtambong sa tigom ug sa ministeryo. Ihatag ba nato kanila ang espesyal nga pagpaluyo nga basin ilang gikinahanglan? Ang laing paagi sa pagpakitag malumong kaluoy mao ang paggamit ug “maayong mga pulong, makapahupay nga mga pulong,” nga maoy mouna sa pagpakigsulti sa maong mga maunongon. (Zacarias 1:13) Adunay daghang kahigayonan alang niana una pa ug human sa mga tigom, samtang magkauban sa ministeryo, o sa ubang mga higayon. Sila maoy mga isigkamagbubuhat, minahal nga mga membro sa atong kongregasyon nga angayng dili mobating gilikayan o gipalain. Sa pipila ka kahimtang, ang mga anak lamang sa napalagpot nga ginikanan ang naningkamot sa pag-alagad kang Jehova. Gusto gayod nato nga makabaton silag kinabuhi. Sa unsang paagi ikapakita nato kana?

19. Unsang espirituwal nga tabang ang gihatag ni Sofonias ngadto sa usa nga ikatandi sa “usa ka bata nga ilo-sa-amahan”?

¹⁹ Makakaplag ka ug mapuslanong sumbanan diha sa ministeryo ni Sofonias, kinsa nag-alagad sa tungatunga sa ikapitong siglo W.K.P. Siya sakop tingali sa harianong banay sa Juda, nga lagmit ig-agaw ni Haring Josias. Ang amahan sa hari gipatay sa malipotong paagi, mao nga ang otso-anyos nga si Josias napugos sa paglingkod sa trono. Siya nag-atubang ug lisod nga buluhaton: Ang idolatriya ug dulumtanang mga buhat kaylap sa nasod. (Sofonias 3:1-7) Ang bata, ilo-sa-amahan nga si Josias nagkinahanglan ug hanas nga paggiya ug maayong tambag aron sa pagmando sa maong masukihong nasod. Gitagana ni Jehova ang maalamong paggiya pinaagi ni Sofonias ug sa ubang mga propeta, sumala sa gihisgotan sa nag-unang mga kapitulo niining libroha. Mamatikdan nga bisan pag si Jehova pinaagi sa iyang manalagna misultig batok sa “mga prinsipe” sa Juda, Siya wala magsaway sa hari mismo. (Sofonias 1:8; 3:3) Kini mahimong nagpasabot nga ang batan-ong Haring Josias nagpakita na nga siya nakiling sa maputling pagsimba. Ang tambag sa manalagna sa walay duhaduha nakatabang kang Josias sa pagpalig-on sa iyang determinasyon sa pagwagtang sa mahugawng pagsimba gikan sa Juda.

20. Sa unsang paagi ang pagtambag bahin sa espirituwal nga mga butang makatabang sa mga batang “ilo-sa-amahan” sa kongregasyon?

²⁰ Ang interes ni Sofonias kang Josias naghulagway kanato sa interes ni Jehova sa nanginahanglan, mahuyang nga mga bata, sama sa mga bata kansang ginikanan tingali napalagpot. Si Oseas mipahayag: “Pinaagi [sa Diyos] ang usa ka bata nga ilo-sa-amahan gipakitaan ug kaluoy.” (Oseas 14:3) May nailhan ka bang ubang “ilo-sa-amahan” nga mga batang lalaki ug babaye nga kinahanglang tabangan bahin sa espirituwal nga mga butang ug bahin sa matag-adlawng pagkinabuhi? Sila tingali mga ilo sa espirituwal nga paagi, mga anak sa mga pamilya nga usa rag ginikanan, o mga bata nga nag-alagad kang Jehova nga walay pagpaluyo sa ilang pamilya. Kasagaran, ang pagpabiling suod sa kongregasyon ug pagkahamtong sa espirituwal sa maong mga batan-on apektado sa pagkaaduna o pagkawala nilay magtatambag bahin sa espirituwal nga mga butang. Daghang “bata nga ilo-sa-amahan” ang miuswag ug nahimong balanse ug hamtong sa espirituwal nga tawo human pakitaig mahigugmaong interes sa hamtong nga mga Kristohanon sa kongregasyon.—Salmo 82:3.

21. Unsang tabang ang ikahatag sa hamtong nga mga Kristohanon ngadto sa mga bata?

²¹ Pananglitan, ang usa ka tagsaanong inahan matabangan kon ang hamtong nga mga Kristohanon magpakitag interes sa iyang mga anak. (Santiago 1:27) Samtang magpakita ug angayng pagtahod sa pagkaulo sa inahan sa maong panimalay ug paghunahuna sa tukmang panggawi, ang mga magtatan-aw ug uban pa makahatag ug espirituwal nga pagpaluyo sa mga membro sa nanginahanglang mga pamilya. Basin ikaw ug ang imong kapikas o pamilya makagugol ug panahon kauban sa batang lalaki o babaye nga ilo-sa-amahan. Makapakita ka bag konsiderasyon sa mga bata nga tingali mamingawon? Mahimong nagkinahanglan silag empatiya ug kompidensiyal nga pakig-estorya, nga imong mapatalinghogan samtang nakig-uban kanila sa publikong ministeryo. Sa walay duhaduha ikaw puliki, busa ang imong paghatag nga regular sa maong tabang sa usa ka bata sulod sa usa ka yugto sa panahon mahimong ‘usa ka pagsulay sa pagkatiunay sa imong gugma.’ (2 Corinto 8:8) Ang imong mga paningkamot magpadayag sa imong interes nga ang uban makabaton ug kinabuhi.

22. Unsay imong pagbati bahin sa interes ni Jehova nga ang uban makabaton ug kinabuhi?

²² Pagkamakapalig-on ang pagpadayag sa Diyos ug interes sa mga tawo, sa iyang tinguha nga sila makabaton ug kinabuhing walay kataposan! Mopalabi siya sa pagpasundayag sa iyang pagmahal ngadto sa matarong nga mga tawo nga nahigugma kaniya ug mohatag kanila ug kinabuhi imbes magpahayag sa iyang kasuko ngadto sa mga tawong mopalabi nga dili mag-usab ug dili takos sa walay-kataposang kinabuhi. Samtang nagpaabot kitang maikagon sa adlaw ni Jehova, atong sundogon siya diha sa pagtabang sa uban nga makasubay sa dalan paingon sa kinabuhi.