“Mahimong Akong Sumusunod”—Unsay Gipasabot ni Jesus?

1, 2. Unsa ang labing maayong imbitasyon nga madawat sa usa ka tawo, ug unsay ikapangutana nato sa atong kaugalingon?

UNSAY labing maayong imbitasyon nga imong nadawat sukad? Ikaw makahunahuna tingali sa dihang gidapit ka sa usa ka espesyal nga okasyon, tingali sa kasal sa duha ka tawo nga mahal kaayo nimo. O ikaw makahinumdom tingali sa adlaw nga ikaw gitanyagan ug usa ka hinungdanong trabaho. Kon ikaw nakadawat nianang mga imbitasyona, walay duhaduhang nalipay ka ug mibati nga gipabilhan. Apan, ang tinuod mao nga ikaw nakadawat ug mas maayong imbitasyon. Nakadawat niana ang matag usa kanato. Ug ang atong pagsanong sa maong imbitasyon dakog epekto kanato. Kini ang labing hinungdanong desisyon nga atong himoon sa kinabuhi.

² Unsa ba ang maong imbitasyon? Kini naggikan kang Jesu-Kristo, ang bugtong Anak sa Labing Gamhanang Diyos, si Jehova, ug kini nahisulat sa Bibliya. Sa Marcos 10:21, atong mabasa ang mga pulong ni Jesus: “Umari ka, mahimong akong sumusunod.” Sa pagkamatuod kana maoy pagdapit ni Jesus sa matag usa kanato. Makapangutana kita sa atong kaugalingon, ‘Unsay akong sanong?’ Daw dayag ang tubag. Kinsay mobalibad nianang maayo kaayong imbitasyon? Katingad-anan nga ang kadaghanang tawo mibalibad. Ngano?

3, 4. (a) Unsay mahimong isipon nga tilinguhaon kaayo bahin sa lalaki nga miduol kang Jesus nga nangutana bahin sa kinabuhing walay kataposan? (b) Unsay maayong mga hiyas nga mahimong nakita ni Jesus sa dato nga batan-ong magmamando?

³ Ingong pananglitan, palandonga ang usa ka tawo nga personal nga nakadawat sa maong imbitasyon mga 2,000 ka tuig kanhi. Siya maoy tinahod kaayong tawo. Nakabaton siyag labing menos tulo ka butang nga lagmit isipong tilinguhaon sa mga tawo, nga kasinahan pa gani​—pagkabatan-on, bahandi, ug gahom. Ang talaan sa Bibliya nagbatbat nga siya maoy “batan-ong lalaki,” ‘dato kaayo,’ ug “magmamando.” (Mateo 19:20; Lucas 18:18, 23) Hinuon, ang maong batan-on may mas hinungdanong hiyas. Siya nakadungog bahin sa Dakong Magtutudlo, si Jesus, ug iyang naangayan ang iyang nadungog.

⁴ Ang kadaghanang magmamando niadtong mga adlawa napakyas sa paghatag kang Jesus ug pasidungog nga takos kaniya. (Juan 7:48; 12:42) Apan lahi ang gibuhat sa maong magmamando. Ang Bibliya nagtug-an kanato: “Sa paghigula [ni Jesus] diha sa dalan, ang usa ka tawo midagan ug miluhod sa iyang atubangan ug nangutana kaniya: ‘Maayong Magtutudlo, unsay kinahanglan ko nga buhaton aron makapanunod sa kinabuhing walay kataposan?’” (Marcos 10:17) Matikding maikagon kaayo ang maong tawo nga makigsulti kang Jesus, nga midagan pa sa pagsugat kaniya nga nakita sa kadaghanan, sama gayod sa mahimong buhaton sa mga tawong kabos ug timawa. Dugang pa, siya matinahorong miluhod sa atubangan ni Kristo. Busa siya may pagkamapainubsanon ug kaamgohan sa iyang espirituwal nga panginahanglan. Gipabilhan ni Jesus ang maong maayong mga hiyas. (Mateo 5:3; 18:4) Nan, dili katingad-ang “si Jesus mitan-aw kaniya ug mibatig gugma alang kaniya.” (Marcos 10:21) Giunsa pagtubag ni Jesus ang pangutana sa batan-ong lalaki?

 5. Giunsa pagtubag ni Jesus ang dato nga batan-ong lalaki, ug nganong nahibalo kita nga ang pagkinabuhing kabos dili mao ang “usa ka butang” nga kulang kaniya? (Tan-awa usab ang potnot.)

⁵ Gipakita ni Jesus nga ang iyang Amahan nakahatag nag impormasyon bahin sa hinungdanong pangutana mahitungod sa pagbaton ug kinabuhing walay kataposan. Iyang gipunting ang Kasulatan, ug ang batan-ong lalaki nagpamatuod nga siya matinumanong nagsunod sa Moisesnong Balaod. Ugaling lang, tungod sa talagsaong pagsabot ni Jesus, iyang nasabtan ang mas lalom pang butang. (Juan 2:25) Iyang nasabtan ang espirituwal nga suliran sa maong magmamando​—nga usa ka seryosong suliran. Busa, si Jesus miingon: “Usa ka butang ang kulang kanimo.” Unsa ba kanang “usa ka butang”? Si Jesus miingon: “Lakaw, ibaligya ang unsa mang mga butang nga imong nabatonan ug ipanghatag sa mga kabos.” (Marcos 10:21) Gipasabot ba ni Jesus nga kinahanglan ang usa ka tawo maoy kabos aron mag-alagad sa Diyos? Dili.a Gibutyag ni Kristo ang butang nga hinungdanon kaayo.

 6. Unsang pagdapit ang gitanyag ni Jesus, ug unsay gibutyag sa sanong sa dato nga batan-ong magmamando kon bahin sa iyang kasingkasing?

⁶ Aron ibutyag kaniya kon unsay kulang, gitanyagan ni Jesus ug talagsaong kahigayonan ang maong batan-on: “Umari ka, mahimong akong sumusunod.” Tiaw mo na​—ang Anak sa Labing Hataas nga Diyos personal nga nagdapit sa maong batan-on sa pagsunod kaniya! Gisaaran usab siya ni Jesus ug usa ka ganti nga dili mahanduraw. Siya miingon: “Makabaton ka ug bahandi sa langit.” Gidawat ba dayon sa dato nga batan-ong magmamando ang maong kahigayonan, ang maong talagsaong pagdapit? Ang asoy mabasa: “Nasubo siya sa gisulti ug milakaw nga naguol, kay siya naghupot man ug daghang kabtangan.” (Marcos 10:21, 22) Busa ang wala-damhang mga pulong ni Jesus nagbutyag sa usa ka suliran diha sa kasingkasing sa maong batan-on. Dako kaayo ang iyang pagmahal sa iyang mga kabtangan ug, walay duhaduha, sa gahom ug kadungganan nga duyog niana. Ikasubo, ang iyang gugma sa maong mga butang labaw kaayo kay sa iyang gugma alang kang Kristo. Nan, ang “usa ka butang” nga kulang mao ang tibuok-kasingkasing, nagsakripisyo-sa-kaugalingong gugma alang kang Jesus ug kang Jehova. Tungod kay nakulangan ang batan-ong lalaki sa maong gugma, iyang gibalibaran ang talagsaon kaayong pagdapit! Apan, sa unsang paagi ang maong pagdapit sa batan-ong lalaki mapadapat kanimo?

 7. Nganong makapaneguro kita nga ang pagdapit ni Jesus naglakip kanato karong adlawa?

⁷ Ang pagdapit ni Jesus dili lamang alang niadtong lalakiha; ni alang lamang sa pipila ka tawo. Si Jesus miingon: “Kon si bisan kinsa buot mosunod kanako, . . . magpadayon sa pagsunod kanako.” (Lucas 9:23) Matikding “si bisan kinsa” mahimong sumusunod ni Kristo kon “buot” gayod niya. Kabigon sa Diyos ang mga tawo nga matinud-anon ug kasingkasing ngadto sa iyang Anak. (Juan 6:44) Dili lamang ang mga dato, dili lamang ang mga kabos, dili lamang ang mga sakop sa usa ka rasa o nasod, ug dili lamang ang mga nabuhi niadtong panahona kondili ang tanan gihatagag kahigayonan sa pagdawat sa pagdapit ni Jesus. Busa ang mga pulong ni Jesus nga “Umari ka, mahimong akong sumusunod” mapadapat gayod kanimo. Nganong angay nimong sundon si Kristo? Ug unsa may nalangkit niana?

 8. Unsay gikinahanglan gayod sa tanang tawo, ug ngano?

⁸ Adunay usa ka kamatuoran nga angay natong ilhon: Ang mga tawo nagkinahanglan gayod ug maayong pagpangulo. Dili tanang tawo modawat nga sila nagkinahanglan niana, apan kita nagkinahanglan gayod niana. Ang manalagna ni Jehova nga si Jeremias gidasig sa pagsulat niining dumalayong kamatuoran: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang mga tawo walay katakos o katungod sa pagmando sa ilang kaugalingon. Sa pagkatinuod, ang kasaysayan sa tawo sa pagpangulo kasagarang dili gayod malamposon. (Ecclesiastes 8:9) Sa panahon ni Jesus, ang mga pangulo nagdaogdaog, nag-abuso, ug nagpahisalaag sa katawhan. Tukmang gibatbat ni Jesus nga ang katawhan kaniadto “nahisama sa mga karnero nga walay magbalantay.” (Marcos 6:34) Susama niana ang kahimtang sa katawhan karong adlawa. Ingon nga pundok ug sa tagsatagsa, kita nagkinahanglan sa pagpangulo nga atong kasaligan ug matahod. Nakab-ot ba ni Jesus ang maong panginahanglan? Tagda ang ubay-ubayng katarongan kon nganong oo ang tubag.

 9. Nganong si Jesus lahi kay sa tanang ubang mga pangulo?

⁹ Una, si Jesus gipili ni Jehova nga Diyos. Ang kadaghanang tawhanong mga pangulo gipili sa ilang dili-hingpit nga mga isigkatawo, kinsa kasagarang malimbongan ug lagmit masayop sa paghukom. Si Jesus lahi nga matang sa pangulo. Ang iyang titulo mismo nagtug-an kanato niana. Ang pulong “Kristo,” sama sa pulong “Mesiyas,” nagkahulogang “Usa nga Dinihogan.” Oo, si Jesus gidihogan, o linaing gitudlo sa Soberanong Ginoo mismo sa uniberso diha sa iyang sagradong katungdanan. Si Jehova nga Diyos miingon bahin sa iyang Anak: “Tan-awa! Ang akong alagad nga akong gipili, akong gihigugma, nga giuyonan sa akong kalag! Ibutang ko ang akong espiritu diha kaniya.” (Mateo 12:18) Ang atong Maglalalang ang labaw nga nahibalo kon unsang matanga sa pangulo ang atong gikinahanglan. Ang kaalam ni Jehova way-kinutoban, busa kita adunay dakong katarongan sa pagsalig sa iyang pinili.​—Proverbio 3:5, 6.

10. Nganong ang panig-ingnan ni Jesus maoy labing maayong sulondan nga sundogon sa mga tawo?

¹⁰ Ikaduha, si Jesus nagbilin ug usa ka hingpit ug makapadasig nga panig-ingnan alang kanato. Ang labing maayong matang sa pangulo may mga hiyas nga madayeg ug masundog sa iyang mga sakop. Siya nanguna pinaagig panig-ingnan, nga nagdasig sa uban nga mahimong mas maayong mga tawo. Unsang mga hiyas ang mas gusto nimo sa usa ka pangulo? Kaisog? Kaalam? Kahangawa? Komosta ang pagkamalahutayon atubangan sa kalisdanan? Samtang imong tun-an ang talaan sa pagkinabuhi ni Jesus sa yuta, imong mahibaloan nga iyang nabatonan kanang mga hiyasa​—ug daghan pa. Kay hingpit nga banaag sa iyang langitnong Amahan, nabatonan ni Jesus sa hingpit nga paagi ang tanang hiyas sa Diyos. Sa tanang bahin siya hingpit nga tawo. Busa sa tanan niyang gibuhat, sa tanang pulong nga iyang gilitok, sa tanang pagbati sa kahiladman nga iyang gipadayag, kita may makaplagan nga takos sundogon. Ang Bibliya nag-ingon nga siya naghatag ug “sulondan aron kamo managsunod pag-ayo sa iyang mga tunob.”​—1 Pedro 2:21.

11. Sa unsang paagi gipamatud-an ni Jesus nga siya mao “ang maayong magbalantay”?

¹¹ Ikatulo, si Kristo bug-os nagtuman sa iyang gipangangkon: “Ako ang maayong magbalantay.” (Juan 10:14) Ang katawhan sa kapanahonan sa Bibliya sinati sa maong sambingay. Ang mga magbalantay naghago pag-ayo sa pag-atiman sa mga karnero nga gipiyal kanila. Unahon sa “maayong magbalantay” ang kaluwasan ug kaayohan sa panon kay sa iyang kaugalingon. Pananglitan, ang katigulangan ni Jesus nga si David maoy magbalantay sa iyang pagkabatan-on, ug dili lang usa ka higayon nga iyang gipameligro ang iyang kinabuhi aron suklan ang pag-atake sa usa ka mabangis nga hayop sa iyang mga karnero. (1 Samuel 17:34-36) Labaw pa niana ang gibuhat ni Jesus alang sa iyang tawhanong mga sumusunod. Siya namatay alang kanila. (Juan 10:15) Pipila ba ka mga pangulo ang adunay samang nagasakripisyo-sa-kaugalingong espiritu?

12, 13. (a) Sa unsang diwa ang usa ka magbalantay nakaila sa iyang mga karnero, ug sa unsang paagi nakaila sila kaniya? (b) Nganong buot nimong magpasakop sa pagpangulo sa Maayong Magbalantay?

¹² Si Jesus mao “ang maayong magbalantay” sa laing diwa. Siya miingon: “Ako nakaila sa akong mga karnero ug ang akong mga karnero nakaila kanako.” (Juan 10:14) Palandonga ang ilustrasyon ni Jesus. Alang sa way-tagad nga tumatan-aw, ang mga karnero daw sama lamag pundok sa balhiboong mga hayop. Apan ang magbalantay nakaila sa matag usa ka karnero. Siya nahibalo kon haing mga bayeng karnero ang hapit nang magkinahanglan sa iyang tabang sa dihang kini manganak, kon haing mga nating karnero ang kinahanglang kugoson kay dili makahimo sa paglakaw ug layo sa ilang kaugalingon sanglit kini gagmitoy ug luyahon pa, ug kon haing mga karneroha ang bag-o pang nasakit o napiang. Ang mga karnero makaila usab sa ilang magbalantay. Kini sila makaila sa iyang tingog, nga dili gayod masaypan nga iya sa laing magbalantay. Sa dihang ang iyang pagtawag adunay tono sa kahadlok o kaapurado, kini sila mosanong dayon. Sila mosunod kon asa niya dad-on sila. Ug ang magbalantay nahibalo kon asa niya dad-on sila. Siya nahibalo kon diin labong ug lunhaw ang kabalilihan, hinlo ug tin-aw ang mga sapa, dili peligroso ang sibsibanan. Samtang siya magbantay kanila, ang mga karnero mobati nga sila luwas sa kapeligrohan.​—Salmo 23.

¹³ Wala ba nimo pangandoya ang ingong matang sa pagpangulo? Ang Maayong Magbalantay adunay di-hitupngan nga rekord sa maong paagi sa pagtagad sa iyang mga sumusunod. Siya nagsaad nga ikaw giyahan ngadto sa malipayon ug matagbawong kinabuhi karon ug hangtod sa kahangtoran! (Juan 10:10, 11; Pinadayag 7:16, 17) Nan, kinahanglan natong masayran kon unsay nalangkit sa pagsunod kang Kristo.

14, 15. Aron mahimong sumusunod ni Kristo, nganong dili igo ang pag-angkon nga usa ka Kristohanon o ang emosyonal nga pagpakigsuod kang Jesus?

¹⁴ Ang ginatos ka milyong tawo karon lagmit mobati nga ilang gidawat ang pagdapit ni Kristo. Ngani, ilang gipili nga tawgon silang mga Kristohanon. Sila tingali mga sakop sa simbahan diin sila gipabunyagan sa ilang mga ginikanan. O mahimong sila nangangkon nga adunay emosyonal nga pagpakigsuod kang Jesus ug nagdawat kaniya ingong ilang personal nga Manluluwas. Apan kana ba naghimo kanila nga mga sumusunod ni Kristo? Kana ba ang gihunahuna ni Jesus sa dihang iya kitang gidapit nga mahimong iyang mga sumusunod? Labaw pa kaayo ang nalangkit.

¹⁵ Palandonga ang dominyo sa Kakristiyanohan​—ang kanasoran kansang mga lungsoranon kasagarang nag-angkon nga mga sumusunod ni Kristo. Gipasundayag ba sa Kakristiyanohan ang mga pagtulon-an ni Jesu-Kristo? O ato bang makita hinuon sa maong kanasoran ang pagdumtanay, pagpanglupig, krimen, ug inhustisya nga sama sa atong makita sa ubang bahin sa kalibotan? Ang tinahod nga pangulong Hindu nga si Mohandas Gandhi kas-a miingon: “Wala akoy nailhan nga laing tawo nga labaw ug nahimo alang sa katawhan kay kang Jesus. Sa pagkamatuod, ang problema wala diha sa Kristiyanidad.” Siya midugang: “Kamong mga Kristiyano ang problema. Wala gayod ninyo sunda ang inyong kaugalingong mga pagtulon-an.”

16, 17. Unsay kasagarang kulang sa nag-angkong mga Kristohanon, ug unsay nagpaila nga lahi ang matuod nga mga sumusunod ni Kristo?

¹⁶ Si Jesus miingon nga ang iyang matuod nga mga sumusunod mailhan dili lamang tungod sa ilang mga gipangangkon o sa ngalan nga ilang gigamit sa ilang kaugalingon, kondili ilabina tungod sa ilang mga buhat. Pananglitan, siya miingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit.” (Mateo 7:21) Nganong ang kadaghanan nga nag-angkong si Jesus ang ilang Ginoo napakyas sa pagbuhat sa kabubut-on sa iyang Amahan? Hinumdomi ang dato nga batan-ong magmamando. Kasagaran gayod nga “usa ka butang ang kulang” sa nag-angkong mga Kristohanon​—ang tibuok-kalag nga gugma alang kang Jesus ug alang sa Usa nga nagpadala kaniya.

¹⁷ Sa unsang paagi nahitabo kana? Dili ba ang milyonmilyon nga nagtawag sa ilang kaugalingon nga mga Kristohanon nag-angkon usab nga nahigugma kang Kristo? Segurado gayod. Apan labaw pa sa mga pulong ang nalangkit sa paghigugma kang Jesus ug kang Jehova. Si Jesus miingon: “Kon ang usa nahigugma kanako, sundon niya ang akong pulong.” (Juan 14:23) Ug sa nagsulti pag-usab ingong magbalantay, siya miingon: “Ang akong mga karnero magapatalinghog sa akong tingog, ug ako nakaila kanila, ug sila magasunod kanako.” (Juan 10:27) Oo, ang tinuod nga pagsulay sa atong gugma kang Kristo maoy dili lamang pinaagi sa atong mga pulong o sa atong mga pagbati kondili ilabina sa atong mga buhat.

18, 19. (a) Sa unsang paagi angay kitang maapektohan sa atong nakat-onan bahin kang Jesus? (b) Unsay katuyoan niining basahona, ug sa unsang paagi makabenepisyo kini niadtong dugay nang naghunahuna nga sila mga sumusunod ni Kristo?

¹⁸ Ugaling lang, ang atong mga buhat magpasundayag sa atong sulod nga pagkatawo. Mao kana ang atong pauswagon. Si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Kon kita mokuha ug tukmang kahibalo bahin kang Jesus ug mamalandong niana, ang atong kasingkasing matandog. Mas modako ang atong paghigugma kaniya, maugmad sa atong kaugalingon ang nagdakong tinguha nga sundon siya sa adlaw-adlaw.

¹⁹ Ang pag-ugmad sa tinguha nga sundon si Jesus mao ang katuyoan niining basahona. Ang tumong niini maoy dili ang paghatag ug kompletong sumaryo sa kinabuhi ug ministeryo ni Jesus kondili ang pagtabang kanato nga mas tin-awng masabtan kon sa unsang paagi masunod siya.b Gidisenyo kini sa pagtabang kanato nga manalamin diha sa Kasulatan ug mangutana sa kaugalingon, ‘Tinuod ba akong nagsunod kang Jesus?’ (Santiago 1:23-25) Tingali dugay ka nang naghunahuna nga ikaw usa ka karnero nga gigiyahan sa Maayong Magbalantay. Apan, dili ka ba mouyon nga kita kanunayng makakitag mga paagi sa pag-uswag? Ang Bibliya nag-awhag kanato: “Padayong sulayi kon kamo anaa ba sa pagtuo, padayong pamatud-i kon unsa kamo sa inyong kaugalingon.” (2 Corinto 13:5) Mapuslanon gayod ang pagtino nga kita tinuod nga gigiyahan sa atong mahigugmaong Maayong Magbalantay, si Jesus, kinsa gitudlo ni Jehova mismo sa paggiya kanato.

20. Unsay atong hisgotan sa mosunod nga kapitulo?

²⁰ Hinaot ang imong pagtuon niining basahona makatabang kanimo sa paglig-on sa imong gugma kang Jesus ug kang Jehova. Samtang ang maong gugma magagiya kanimo sa kinabuhi, imong masinati ang labing dakong kalinaw ug katagbawan nga posible niining daang kalibotan, ug mabuhi ka sa pagdayeg kang Jehova hangtod sa kahangtoran tungod sa pagtagana kanato sa Maayong Magbalantay. Hinuon, kinahanglang ipasukad nato ang atong pagtuon bahin kang Kristo sa hustong patukoranan. Nan, haom nga tukion nato diha sa Kapitulo 2 ang papel ni Jesus sa katuyoan ni Jehova alang sa iyang mga linalang.