LEKSIYON 39
Ang Panghunahuna sa Diyos Bahin sa Dugo
Ang dugo importante kaayo. Kon wala ni, dili ta mabuhi. Ingong Maglalalang, ang Diyos naay katungod sa pagsulti kon unsaon paggamit ang dugo. Unsay iyang giingon bahin sa dugo? Puwede ba ning kaonon? Puwede ba tang magpaabonog dugo? Ug unsay imong buhaton aron makahimo kag maayong mga desisyon bahin niini?
1. Unsay panghunahuna ni Jehova bahin sa dugo?
Giingnan ni Jehova ang iyang mga magsisimba sa panahon sa Bibliya: “Ang kinabuhi sa matag buhing linalang mao ang dugo niini.” (Levitico 17:14) Para kang Jehova, ang dugo nagrepresentar sa kinabuhi. Kay ang kinabuhi sagrado, o balaan, nga regalo gikan sa Diyos, ang dugo sagrado pod.
2. Unsa nga paggamit sa dugo ang gidili sa Diyos?
Sa wala pa ang Kristo, gisugo ni Jehova ang iyang mga magsisimba nga dili kaonon ang dugo. (Basaha ang Genesis 9:4 ug Levitico 17:10.) Iyang gipakita nga balido gihapon ni nga sugo dihang gihatagag instruksiyon sa nagamandong lawas ang mga Kristohanon nga “padayong likayan . . . ang dugo.”—Basaha ang Buhat 15:28, 29.
Unsay gipasabot sa sugo nga likayan ang dugo? Kon ingnon ka sa doktor nga likayan ang alkoholikong ilimnon, dili ka moinom niini. Pero mokaon ba kag mga pagkaon nga naay sagol nga alkoholikong ilimnon o magpa-injection ba ka ani? Siyempre dili. Sa susama, ang sugo sa Diyos nga likayan ang dugo nagpasabot nga dili ta angayng moinom ug dugo o mokaon ug karne sa hayop nga wala mapaagasig dugo. Ug dili pod ta angayng mokaon ug bisan unsa nga naay sagol nga dugo.
Komosta ang bahin sa medikal nga paggamit sa dugo? Ang ubang medical procedure klarong naglapas sa balaod sa Diyos. Apil ani ang pag-abono ug dugo o sa bisan hain sa pangunang mga bahin sa dugo—ang red cells, white cells, platelets, ug plasma. Kon bahin sa ubang medical procedure, wala tingali klarong giingon ang balaod sa Diyos. Pananglitan, ang ubang procedure mogamit ug mga fraction sa usa sa pangunang mga bahin sa dugo. Ang uban pong procedure mogamit sa mismong dugo sa pasyente. Dihang timbangtimbangon ni nga mga kapilian, ang matag usa nato kinahanglang mohimog desisyon.a—Galacia 6:5.
TUN-IG DUGANG
Sayra kon unsaon paghimog desisyon bahin sa paagi sa pagtambal nga mogamit ug dugo.
3. Pagpilig paagi sa pagtambal nga makapalipay kang Jehova
Unsay imong himoon aron makapili kag paagi sa pagtambal nga uyon sa panglantaw sa Diyos? I-play ang VIDEO, ug dayon hisgoti kon nganong importante nga himoon ang mosunod:
Pag-ampo para sa kaalam.—Santiago 1:5.
Pag-research ug mga prinsipyo sa Bibliya ug kon unsaon na pagpadapat.—Proverbio 13:16.
Sayra ang mga kapilian nga naa sa inyong lugar.
Sayra kon unsa nga mga paagi sa pagtambal ang dili nimo dawaton.
Seguroa nga ang imong desisyon dili makahasol sa imong konsensiya.—Buhat 24:16.b
Ilha nga walay laing tawo—bisan ang imong kapikas, usa ka ansiyano, o ang nag-Bible study nimo—ang angayng modesisyon para nimo bahin sa mga butang nga nagdepende sa konsensiya.—Roma 14:12.
Isulat ang imong desisyon.
4. Ang mga Saksi ni Jehova gustog pinakamaayong paagi sa pagtambal
Posible ang pagsunod sa balaod sa Diyos bahin sa dugo ug sa samang higayon modawat ug pinakamaayong paagi sa pagtambal. I-play ang VIDEO.
Basaha ang Tito 3:2, ug dayon hisgoti kini nga pangutana:
Nganong angay tang magpakitag pagtahod ug kalumo dihang makig-estorya sa mga doktor?
Dili dawaton sa Kristohanon |
Desisyonan sa Kristohanon |
|---|---|
A. Blood plasma |
Mga fraction sa plasma |
B. White cells |
Mga fraction sa white cells |
C. Platelets |
Mga fraction sa platelets |
D. Red cells |
Mga fraction sa red cells |
5. Dihang ang paagi sa pagtambal mogamit ug mga blood fraction
Ang dugo naay upat ka pangunang bahin—ang red cells, white cells, platelets, ug plasma. Kini nga pangunang mga bahin naa poy daghang mas gagmayng bahin nga gitawag ug mga blood fraction.c Ang ubang fraction gigamit diha sa mga tambal para sa mga sakit o sa pagpatang-on sa dugo.
Kon bahin sa mga blood fraction, ang matag Kristohanon kinahanglang mohimog desisyon base sa iyang konsensiya nga gibansay sa Bibliya. Ang uban modesisyon tingali nga dili modawat ug paagi sa pagtambal o procedure nga mogamit ug mga blood fraction. Pero ang konsensiya sa uban motugot ra tingali nga modawat ug mga fraction.
Dihang modesisyon ka bahin niini, konsideraha kini nga pangutana:
Unsaon nako paghatag ug eksplinasyon sa doktor kon nganong modawat ko o dili ko modawat sa paagi sa pagtambal nga mogamit ug espesipikong mga blood fraction?
KON NAAY MANGUTANA: “Unsa may sayop anang magpaabonog dugo?”
Unsay imong itubag?
SUMARYO
Gusto ni Jehova nga dili nato gamiton ang dugo sa sayop nga paagi.
Review
Nganong giisip ni Jehova nga sagrado ang dugo?
Giunsa nato pagkahibalo nga ang pag-abonog dugo apil sa sugo sa Diyos nga likayan ang dugo?
Unsay imong buhaton aron makahimo kag maayong mga desisyon bahin sa mga paagi sa pagtambal nga mogamit ug dugo?
SUSIHA
Unsay angay nimong hunahunaon sa dili pa ka modesisyon kon modawat ba kag medical procedure nga gamiton ang imo mismong dugo?
“Mga Pangutana Gikan sa mga Magbabasa” (Ang Bantayanang Torre, Oktubre 15, 2000)
Unsay angay nimong konsiderahon dihang magdesisyon ka kon modawat ba kag mga blood fraction?
“Mga Pangutana Gikan sa mga Magbabasa” (Ang Bantayanang Torre, Hunyo 15, 2004)
Nganong ang usa ka doktor mituo sa ulahi nga rasonable ang panghunahuna ni Jehova bahin sa dugo?
“Akong Gidawat ang Hunahuna sa Diyos Bahin sa Dugo” (Pagmata!, Disyembre 8, 2003)
Sayra kon sa unsang paagi ang mga ansiyano nga nag-alagad sa mga Hospital Liaison Committee nagtabang sa mga igsoon.
a Tan-awa ang Leksiyon 35, “Kon Unsaon Paghimog Maayong mga Desisyon.”
b Tan-awa ang punto 5, “Dihang ang Paagi sa Pagtambal Mogamit ug mga Blood Fraction,” ug ang Endnote 3, “Mga Medical Procedure nga Naggamit ug Dugo.”
c Para sa ubang doktor, ang upat ka pangunang bahin sa dugo maoy mga fraction. Busa kinahanglan nimong seguroon nga nasabtan sa imong doktor ang imong desisyon nga dili ka magpaabonog dugo o dili ka magpaabonog red cells, white cells, platelets, o plasma.