LEKSIYON 45
Kon Unsay Gipasabot sa Pagkahimong Neyutral
Si Jesus nagtudlo nga ang iyang mga sumusunod angayng ‘dili bahin sa kalibotan.’ (Juan 15:19) Apil ani ang pagkahimong neyutral—buot ipasabot, wala silay dapigan sa politika ug sa mga giyera sa kalibotan. Ang tinuod, dili kanunayng sayon nga mahimong neyutral. Tingali yagayagaan ta tungod ani. Unsay atong himoon aron makapabilin tang neyutral ug padayon tang magmaunongon kang Jehova nga Diyos?
1. Unsay panghunahuna sa tinuod nga mga Kristohanon bahin sa mga gobyerno sa tawo?
Gitahod sa mga Kristohanon ang gobyerno. Sundon nato ang giingon ni Jesus nga ‘ibayad sa Cesar ang iya sa Cesar’—sa ato pa, sundon nato ang mga balaod sa nasod, sama sa pagbayad ug buhis. (Marcos 12:17) Ang Bibliya nagtudlo nga ang mga gobyerno sa tawo nagmando tungod lang kay gitugotan sila ni Jehova sa pagmando. (Roma 13:1) Busa atong ilhon nga ang mga gobyerno sa tawo dunay limitadong awtoridad. May pagsalig ta sa atong Diyos ug sa iyang langitnong Gingharian sa pagsulbad sa mga problema sa tawo.
2. Unsaon nato pagpakita nga neyutral ta?
Sama kang Jesus, dili ta mag-apil-apil sa politika. Dihang nakita sa mga tawo ang usa sa mga milagro ni Jesus, gisulayan nila nga himoon siyang ilang hari sa yuta. Pero wala siya mosugot. (Juan 6:15) Ngano? Kay, sumala sa iyang giingon sa ulahi, “ang akong Gingharian dili bahin niining kalibotana.” (Juan 18:36) Ingong mga tinun-an ni Jesus, ikapakita nato sa daghang paagi nga neyutral ta. Pananglitan, dili ta mag-apil-apil sa giyera. (Basaha ang Miqueas 4:3.) Atong gitahod ang mga simbolo sa nasod—sama sa bandera—pero dili nato ni simbahon. (1 Juan 5:21) Ug dili ta modapig o mokontra sa bisan unsang partido sa politika o kandidato. Niini nga mga paagi ug sa uban pa, ikapakita nato nga maunongon gyod ta sa gobyerno sa Diyos—ang iyang Gingharian.
TUN-IG DUGANG
Sayra ang mga situwasyon diin lisod tingali nga mahimong neyutral, ug tan-awa kon unsaon nimo paghimog mga desisyon nga makapalipay kang Jehova.
3. Ang tinuod nga mga Kristohanon neyutral
Si Jesus ug ang iyang mga sumusunod naghatag natog ehemplo. Basaha ang Roma 13:1, 5-7 ug 1 Pedro 2:13, 14. Dayon i-play ang VIDEO, ug hisgoti ang mosunod nga mga pangutana:
Nganong angay natong tahoron ang mga gobyerno sa tawo?
Sa unsang mga paagi nga ikapakita nato nga nagpasakop ta nila?
Panahon sa giyera, ang ubang nasod moingon nga neyutral sila, pero ilang gisuportahan ang mga grupo nga naggiyera. Unsa man gyoy gipasabot sa pagkahimong neyutral? Basaha ang Juan 17:16. Dayon i-play ang VIDEO ug hisgoti ang mosunod nga pangutana:
Unsay gipasabot sa pagkahimong neyutral?
Komosta kon ang gobyerno magsugo nimo ug usa ka butang nga supak sa balaod sa Diyos? Basaha ang Buhat 5:28, 29. Dayon i-play ang VIDEO ug hisgoti ang mosunod nga mga pangutana:
Kon naay balaod ang tawo nga supak sa balaod sa Diyos, kang kinsang balaod ang angay natong sundon?
Makahunahuna ba kag mga kahimtang diin ang mga Kristohanon dili mosunod sa gobyerno sa tawo?
4. Kinahanglang neyutral ta sa hunahuna ug binuhatan
Basaha ang 1 Juan 5:21. Dayon i-play ang VIDEO ug hisgoti ang mosunod nga mga pangutana:
Sa video, nganong midesisyon si Ayenge nga dili moapil sa partido sa politika o sa nasyonalistikong mga seremonya, sama sa pagsaludar sa bandera?
Sa imong hunahuna, maalamon ba ang iyang desisyon?
Unsa pa nga mga kahimtang nga lisod tingaling mahimong neyutral? I-play ang VIDEO, ug dayon hisgoti ang mosunod nga mga pangutana:
Unsaon nato pagpabiling neyutral dihang motan-aw tag internasyonal nga kompetisyon sa sports?
Unsaon nato pagpabiling neyutral bisan dihang maapektohan ta sa mga desisyon sa mga politiko?
Sa unsang paagi ang mga balita o ang atong mga kauban makaapektar sa atong neyutralidad?
Unsang mga situwasyon nga ang usa ka Kristohanon angayng magpabiling neyutral sa hunahuna ug binuhatan?
KON NAAY MANGUTANA: “Nganong dili man mo mosaludar sa bandera o mokantag national anthem?”
Unsay imong itubag?
SUMARYO
Ang mga Kristohanon maningkamot gyod nga mahimong neyutral sa politika diha sa ilang hunahuna, sinultihan, ug binuhatan.
Review
Unsay atong obligasyon sa mga gobyerno sa tawo?
Nganong neyutral ta sa politika?
Unsa nga mga situwasyon nga lisod tingaling magpabiling neyutral?
SUSIHA
Unsa nga mga sakripisyo ang kinahanglan natong himoon aron makapabiling neyutral?
Unsay puwedeng himoon sa mga pamilya aron makapangandam sila sa mga pagsulay sa ilang neyutralidad?
Nganong ang pagdepensa sa nasod dili mao ang makahatag ug kinalabwang kadungganan sa usa ka tawo?
Sayra kon unsaon nga magpabilin kang dili bahin sa kalibotan dihang maghimog mga desisyon bahin sa imong pagpanarbaho.
“Ang Matag Usa Magpas-an sa Iyang Kaugalingong Luwan” (Ang Bantayanang Torre, Marso 15, 2006)